一個小學補習導師的自白

isolation2009

我知道好多家長都鐘意送自己既小朋友去補習社補習，但你地又有冇諗過，補習社入面又係點既呢？

大學畢業之後，因為要讀master，所以陸續係幾間補習社/教育中心工作過。因為我數學唔夠好，所以教唔到中學果個stream(中學要補全科)，所以只可以教小學stream。我曾經做過一間專做中產客既learning centre既學林數學/中文同英文加強班既導師。個course成幾百蚊4堂，個老細先pay 40一個鐘俾我地d導師！又要我地用額外時間去改習作，又唔pay返俾我地。所以d導師轉得好快。因為好多導師都係學生，根本冇時間特登返黎改習作。之前有d導師想趁上堂時間改習作，又俾個老細話。收工果陣已經八點，佢地九點就閂門。要人地用一個鐘改兩大箱習作？根本就冇可能。做到d導師勁灰心，有心教都變冇心教。

其實我自己係好enjoy教小學生，可惜個pay實在係太難接受。結果我無可奈何下要quit。我按照返合約，預先一個月通知個老細，點知臨走個老細cut晒我d堂，話唔想俾d家長覺得成日轉老師。其實自己暗底啞搵左個人頂左我個位。我本來個人工係按月薪計。結果我臨走果個月，俾個老細cut到得返400蚊人工。

碩士畢業之後，遇著金融海嘯。結果無奈之下，去左一間係貧民區既蚊型補習社做。因為學費平，所以人工更平。個老細d教育方法真係不敢恭維。喪鬧不特止，仲要用膠間尺打學生。我諗應該係d家長俾permission佢地咁做。d學生係喪鬧喪打之下，d默書成績都ok既。不過個個都苦口苦面咁樣。由於入面係intensive咁改功課(係2個鐘之內改約10份功課，4個鐘我有時要改20份)，有時見到個學生明明係唔識，都唔夠時間講，因為講得耐左，老細又會鬧話d學生懶，唔查字典。其實個老細都係狂俾supplemenary exercises俾學生做黎操佢地，本來都係一個好正常既做法，但最弊係教果個有問題。我聽住我老細將"beer"讀左"bear"。讀"nutrient"讀左"nitrogen"。佢俾六年級學生做d英文文法exercises，又解釋得唔清唔楚，結果要我執晒手尾。其實小六既英文都幾深，d學生就算用左字典機查左d字，佢地都唔知邊個解釋係岩，結果做到錯晒，又俾我老細喪鬧。好似"report card"，我有個學生以為係報告。其實應該係解成績表。我d學生堂堂都問我借字典機，因為一篇文章太多生字，佢地又覺得查字典辛苦。

我教左咁多年補習社，發覺唔少小學生既grammar都唔好。主要係佢地理解能力弱，字彙不足，結果睇一篇文章，竟然可以睇左一個鐘。有d仲呈現半放棄狀態。一般補習社(功輔班果d)，根本冇時間去矯正學生既問題。老實講，就算d功課答案岩晒又點？反正功課又唔計分，如果冇辦法係小學階段去搞踮d英文，d學生將來一定會學得更辛苦。我之前教過一個中四學生既英文，佢竟然連present tense幾時用都唔知。d作文既文法更錯漏百出。所以我一直都希望可以親住老細唔覺，去搞返正個學生既基礎。可惜事與願違。一講得耐又俾老細鬧。

其實我一直都覺得功輔班既師資好參差。有d求祈搵個中五畢業既都俾佢去教。好坦白講，小五六果d comprehension真係幾多生字，我諗如果冇返咁上下英文水平，都幾難教。有d生字連我都唔識。作為一個負責任既導師，你不但要明佢錯乜，仲要解返俾佢聽，話俾佢知佢錯乜，同答案點搵。有時都覺得幾高難度。好在讀書果陣寫得thesis多，同不嬲都有鑽研開grammar，唔係都唔知點解俾d學生知。

所以，如果我將來有仔女，我死都唔會俾佢地去功輔班，寧願自己教。

isolation2009

仲有，勸大家唔好晒錢去買系統式教材。因為我曾經係某系統式教材公司做過，知道晒佢地套concept，佢最值錢唔係套教材，係個concept。連我個舊同事都話個concept真係正！有興趣知多d就send e-mail俾我 [email protected]，千祈唔好留email係度，因為我係唔睇post既。