中文科課程分享

anna525

相信不少家長都會覺得現在中文科課程好奇怪，同自己讀書的時候唔同，例如考好多份卷，又聽又講，考試時又唔係出範文，仔女又可能同你講中文唔駛溫，或者溫書係無用。筆者為現任中學中文科老師，亦為學校的職業輔導老師，如果家長們對於升學或中文科有任何問題，都歡迎直接詢問或PM我。當然我會分幾日，將我所見到的同大家分享。

[ 本帖最後由 ZZdaphne 於 11-2-22 15:08 編輯 ]

anna525

現在的中國語文課程係為新高中文憑試舖路，所以考核模式會照新高中中文科的要求，包括考閱讀、寫作、聆聽、說話和綜合幾卷。
閱讀卷最難，因為考評局要考學生的思維、分析和轉化知識能力，所以無得背範文就咁考。試卷要求學生會經過平時上堂的學習，舉一反三咁運用在其他文章的分析裏。仔女可能話俾你聽，上堂學的東西考試唔會考，唔駛理唔駛記，其實如果學生上堂有用心思考，的確可以唔溫書，但有幾多學生能夠自律呀? 事實上，如果學生平時唔多思考，上堂只識抄同背，咁你會發覺仔女幾勤力都好，成績都會差。
父母點幫仔女呢? 下一節再講。

anna525

以前唔少父母都會迫子女背書，或做大量練習，希望子女中文成績好，但事實證明，這個方法是事倍功半。因為子女做好多練習，對埋答案，知道自己唔識同錯，但如何唔知點去改善，所以做幾多練習都係無用。

點先有用，第一﹕鼓勵子女閱讀報章，或聽評論節目，再跟子女討論內容，教孩子分析技巧，例如某句有否前後矛盾，為何不矛盾?跟子女分析是很重要，當然要對點地分析，習慣思考和分析的孩子，才能在各科考取好成績，在社會有立足之地。中文方面，這個方法可以幫助子女改善思考能力和說話能力。

第二﹕要考子女利用成語或修辭手法作文，改善子女的寫作能力，同時要明白子女的強弱項，例如有些人天生議論型，不懂抒情，那就要教子女避重就輕，揚長避短咁作文。

第三﹕了解考試要求，有時候很多學生中文能力佳，但因為未能了解考試技巧而失分，所以訓練子女的考試技巧是必須的。

讀中文有很多秘技，歡迎有興趣的家長就自己子女的情形，個別詢問或PM我。

Kitten006

老師：
您是有讀者的。我是來年中一生媽媽，都希望多些了解現在初中中文的教學及考試方向。
Thanks!

原帖由 anna525 於 09-4-3 23:54 發表
以前唔少父母都會迫子女背書，或做大量練習，希望子女中文成績好，但事實證明，這個方法是事倍功半。因為子女做好多練習，對埋答案，知道自己唔識同錯，但如何唔知點去改善，所以做幾多練習都係無用。

點先有用，第一﹕鼓勵子女閱讀報章 ...

anna525

現時大部份中學的初中中文教學，主要會迎合新高中的文憑試(即係考大學試)，除了聽說讀寫的訓練，由於新高中有不同的選修科，很多學校會在初中時已為學生做準備，高中熱門的選修科有新聞與報道、戲劇、小說與文化、改篇影視作品咁。
考試方面，有幾個重要層面。一係閱讀卷，有部份學校會出返平時教的篇章，但好多都為應付考試模式，上課教a篇章，考試出返b篇章，所以平時應該要小朋友多做點其他的閱讀理解，最好有個補習老師解返俾佢聽佢點錯，否則好難改善。還有文言文，我會另闢一章講。
作文方面，有一種新題型出現，坊間叫「自由題」，例如俾「電腦」兩個字學生，由佢自己發揮咁作，唔駛好似以前咁規定一種文體。當然，亦有一般的記敍、議論文咁教授，除此之外，亦有片段寫作，即係俾個場景個學生，叫個學生作短文，呢種作法幾難。
聆聽方面，一般學校都會俾帶學生聽，希望學生能夠聽到語氣、用字之間的分別，推斷說話者的潛台詞。一般聽到就抄的題目好少會在band one學校出了。
說話方面，最古怪了。因為要考粵語正音、小組討論，呢一部份好多用普教中的學校都會用返粵語教，因為大部份學校都會在新高中轉粵語教學，以保公開試成績。

anna525

媽咪你好，如果私人補習補聆聽，唔係話個老師播完帶你個女聽，你個女會識。
我自己的做法係，我會望住個學生聽，留意佢聽到邊個字點答，再估個學生唔識o的咩，再教返佢。
要改善聆聽能力，必須要知學生的個別問題，再對症下藥，否則做一萬次練習都唔會有進步。
至於分數，好多學校中文科分數都會評得好緊，你有冇問下女女其他同學攞幾多分呀?
如果個個都係七十幾分(特別作文)又唔需要特別擔心，否則你可以請你補習老師望下你個女的試卷，話俾你聽你女點解成績唔好。一個有經驗的老師，望一望會知個學生有咩問題。我自己的做法係，補習前會望下小朋友試卷，將個學生問題話俾家長聽，再講我會點幫個小朋友。如果你補習老師無咁做，你可以要求佢分析返俾你聽。

anna525

大部份學校都會好注重中文科文言文操練，因為這是公開試必考的。但作為父母可以點幫子女改善文言文能力呢?
根據我的經驗，教學生文言文好難，一來學生無興趣，二來太難。以我自己為例，我常教學生解文言文，都會問佢個別字詞解釋，不過佢地多數唔會思考，直接看教科書的注解，結果佢地完全掌握唔到解文言文的方法，考試一樣差。
其實要令子女明白文言文，首先要教他們如何推敲文字，例如配詞呀、加減部件、同音字，學生慣左思考推敲，考試面對無注解的文言文先識解，否則學左等如無學。
當然，如果家長本身都唔太認識，就要找一個熟悉中文的補習老師幫你地子女啦。

anna525

我的學校每年都有大量學生申請入學，做中一面試都做到氣咳。我又是語文老師，常常要做兩三 round的面試，面試時見到的情況都幾有趣。
有些學生應該上過面試班，連對答都好像背出來的，太生硬，好假。又或者有些極度aggressive，不斷反駁其他同學，老師見到都驚。又有一些學生會攞住一大堆證書黎面試，又英文又普通話等，好似好叻，不過面試時又一句聲都唔出。不過最大量都係皇帝唔急太監急，父母超緊張，子女懶懶閒。各位媽媽，你又知否你孩子在面試時的真實表現呢?

anna525

真係替你擔心...
你女女已經係第二次呈分試，只餘下一次呈分試，但時間又咁緊迫，你女女好難追。至於解決方法，我個別pm你呀。

ALAL

老師:
我仔小四好中意看精探,三國,神鵰黑貓白貓但中文分不好.

他的標點每次無左5分,原來連標點擺邊個位都錯!成語識解不識用,作文除非是自由題作打仗,或我的偶像馬星原否則通常只有合格分.但學校很容易就是BAND3.

[ 本帖最後由 ALAL 於 09-4-4 11:52 編輯 ]

anna525

原帖由 ALAL 於 09-4-4 11:47 發表
老師:
我仔小四好中意看精探,三國,神鵰黑貓白貓但中文分不好.

他的標點每次無左5分,原來連標點擺邊個位都錯!成語識解不識用,作文除非是自由題作打仗,或我的偶像馬星原否則通常只有合格分.但學校很容易就是BAND3. ...

好明顯你仔仔係典型男仔性格，只求興趣，不肯向正規考試妥協，我相信你仔仔的中文水平一定不差，不過佢唔肯「從俗」，所以成績唔好。成語方面，你要訓練佢每篇文用幾個成語，或者專門用某些成語作句，作咩都得(佢有興趣的東西啦)，咁先會有進步。

其實所有題目都可以作到令你仔仔有興趣，聯想力係好重要，所以最好同佢一齊睇書，邊睇邊問佢﹕點解會咁，有冇矛盾呀，點解你咁憎個配角呢? 又可以叫佢代諸葛亮寫封信咁，慣左思考同聯想，咁咩題目都唔驚架啦。

之於標點，一般男仔都懶，亂咁標，你可以教佢每個標點對於表現佢喜歡人物或情節的用途，咁佢會易記好多架啦。

anna525

好多媽咪都問我關於作文的東西，大部份都話子女有睇書，不過作文無改善。坦白講，我自己看書都係看情節，如果你俾本超悶的作文書我我都唔會睇。

改善作文應由興趣入手，慢慢建立子女的能力。好似我有學生好鍾意寫搞笑野，我唔會阻止佢，反而叫佢在隨筆努力作，每次要求佢用一個成語或者修辭手法，又或者叫佢再描述下一個人物的形象，慢慢改善，會好好多。

又或者佢無心機作，我會俾個角色佢扮演，叫學生做訓導主任，寫一篇文責罵一個不守校規還諸多歪理的學生。嘩，結果學生真係超鍾意作個篇文，作到我叫佢攞返屋企作都唔肯，一定要留堂做好。

放棄以往沉悶的教法，用有趣的題目，重點式的片段作文提升子女對作文的興趣，成績先有改善架。

loyanmei

老師，

小女近這一兩年來忽然很熱愛看書，所以她的中文水平已有很明顯的進步。奈何她亦如ALAL媽咪的小朋友一樣，標點方面每每失去大部份的分數。不知老師有否更多的建議來令小女有更大的改進呢？煩請老師指導。謝謝！

原帖由 anna525 於 09-4-4 13:31 發表


好明顯你仔仔係典型男仔性格，只求興趣，不肯向正規考試妥協，我相信你仔仔的中文水平一定不差，不過佢唔肯「從俗」，所以成績唔好。成語方面，你要訓練佢每篇文用幾個成語，或者專門用某些成語作句，作咩都得(佢有興趣的東西啦)，咁 ...

hhma

老師
可以介紹什麼評論節目適合嗎?
我自己幾怕聽"評論節目", 因為好嘈

原帖由 anna525 於 09-4-3 23:54 發表
點先有用，第一﹕鼓勵子女閱讀報章，或聽評論節目

tvokok

我個仔一樣, 現讀小三, 跟大家說的情況很相似. 他很喜歡看書, 但他的中文讀本及中作, 真係一年比一年差. 特別是中作, 大話西遊, 簡直嚇死我. 我是上班一族, 工餘時間少, 所以現打算找一上門補習老師看他的中文科, 請給與意見吧 !
謝.

原帖由 anna525 於 09-4-4 13:37 發表
好多媽咪都問我關於作文的東西，大部份都話子女有睇書，不過作文無改善。坦白講，我自己看書都係看情節，如果你俾本超悶的作文書我我都唔會睇。

改善作文應由興趣入手，慢慢建立子女的能力。好似我有學生好鍾意寫搞笑野，我唔會 ...

anna525

愛看書而標點錯，只有一個原因，係學生根本未看透文章結構。一般學生都只會一逗到尾，他們唔明白幾時是問題句，幾時是感嘆句。
實際的方法，可以叫孩子有感情地讀篇文章出黎。如果佢識讀而唔識填標點，代表佢唔識個標點幾時用，但如果佢連讀都唔識讀，代表佢根本唔明篇文講咩。
兩個情況係唔同架，媽咪必須對症下藥，先找出病源。

anna525

原帖由 hhma 於 09-4-4 21:20 發表
老師
可以介紹什麼評論節目適合嗎?
我自己幾怕聽"評論節目", 因為好嘈

要看你孩子幾多歲，如果小朋友細，其實唔駛睇評論節目，叫小朋友講返學校發生的事，例如咩同學唔睬咩同學，咩同學俾老師罰，你再叫孩子評下理，分析下點解同學會嬲呢，點解老師會罰佢呢，呢種已經係評論，事件本身唔重要，最重要係小朋友會去思考。

如果小朋友大個，可以睇下星期日檔案、時事追擊，或者睇下報紙都可以，睇完再俾意見。例如近日有港男港女的節目，我班學生(中四以上)討論得好激烈，我又會響課堂同佢地分析下唔同人的心態，或者現行年青人的特點，事後更有好多學生以此作議論文俾我，反應好到你唔信。

anna525

原帖由 tvokok 於 09-4-4 23:02 發表
我個仔一樣, 現讀小三, 跟大家說的情況很相似. 他很喜歡看書, 但他的中文讀本及中作, 真係一年比一年差. 特別是中作, 大話西遊, 簡直嚇死我. 我是上班一族, 工餘時間少, 所以現打算找一上門補習老師看他的中文科, 請 ...

喜歡看書而作文唔好，可能因為佢唔鍾意作上堂的文。先唔好否定小朋友的作文能力，可能佢有太多野想寫，但無從落筆，所以先離哂題，我好多學生都係咁。我的做法係，先由基本做起，叫小朋友用最簡單的文字寫佢要寫的東西，再加修辭手法、成語、積極意義上去。日常作文教佢聯想法，將題目寫成自己喜歡的東西而唔離題，咁佢地先有興趣寫落去。

找中文補習老師方面，最好在請老師前，問一問老師會點幫你子女，或佢對訓練作文的看法，再分析佢幫唔幫到你子女，最好找一個老師明白小朋友的需要，知道學生常見錯誤的。因為坊間有好多大學生都係得過且過咁補，只幫小朋友做功課，無心教小朋友。有時，自己成績好唔代表教到小朋友架。