超差的眼科醫生

yesasiamama

今日同浩浩去嘉賓大廈度驗眼, 上到去, 有印象係幾年前黎過, 諗諗下, 應該係浩浩第一次驗眼時的地方, 嗰時浩浩都未夠一歲. 我都唔記得係咩原因令到我唔再黎呢度, 但今日睇完後, 我知道個原因是什麼了. 嗰度d醫生完全無耐性, 睇症時好求其, 又無醫德, 完全唔知係度做咩, 就收我$650, 簡直不知所謂, 垃圾過垃圾, 我以後都唔會再去嗰度睇.
今次約的眼科專科醫生係楊x燦, 我上網睇過佢既資料, 佢無疑係一個有經驗的醫生, 但估唔到係咁差. 上到去嗰間眼科中心, 登記完, 好普通咁驗一驗眼, 跟住等見醫生. 在醫生房門口, 見到佢d病人出出入入, 好快就睇完一個症, 都心知不妙. 輪到我地嗰時, 入到去, 講咗幾句無謂野之後, 睇一睇之前驗眼嗰張電腦紙, 話我個仔有少少近視, 跟住呢個楊xx就叫將我地呢個波踼咗俾視光師. 視光師驗完之後, 話浩浩有近視, 右眼50度, 左眼75度, 兩隻眼都有75度散光, 咁我問個視光師使唔使戴眼鏡, 視光師就話要看醫生既決定. 第二次入醫生房, 楊xx就話要戴眼鏡, 咁我話咁少度數, 係咪真係有需要戴, 可唔可以唔戴住, 因為我知道個仔平時睇野應該無問題. 點知呢個pk醫生就話: 你唔俾佢戴咪執輸囉, 人地睇到, 佢睇唔到之嘛, 人地睇到10行, 佢睇到3行. 我心諗: 有無咁誇呀. 跟住佢仲話: 佢今日唔戴, 聽日唔戴, 後日唔戴, 始終有一日都要戴, 你都係面對現實啦. 聽到佢咁講, 我已經好唔高興, 邊有醫生咁講野架, 咁無醫德既? 我最終無配眼鏡, 但出到黎已經一肚氣, 我發誓以後都唔會再睇呢個楊xx.

gardenwoods

可能有點誤會了....佢其實係一個好醫生黎架....我同老公兩個屋企所有人都係睇佢...我亦介紹過幾個朋友去睇佢，都無 bad comment.....佢為人係有點直話直說喇....但係事實既佢先講出口架....例如：我媽咪有白內障，佢話未熟，唔使做住......我婆婆舊年眼爆血管 (完全黑哂，睇唔到野)，威院眼科醫生一直叫我地等，話d血會自動被身體吸收，咁先可以睇得清楚眼內情況 (當時無法預計下一步既行動亦叫我地唔好出去睇私家)....2個星期後，我覺得唔對路，於是帶婆婆去睇楊醫生....佢一見我婆婆對眼，就話我地太遲喇...對眼救唔番喇 (原來 d 血已經將視網膜完全沖甩，仲摺埋左一舊)....如果可以抽走眼裡面既血既話，都可能會有機會睇到光既(好似舊式菲林相底片咁)，不過手術要4萬幾...佢唔建議我地做手術，因為效果同付出唔成正比....為買一個希望 (婆婆80幾歲先黎盲好慘)，最後我地都決定做手術....依家我婆婆只可以睇到光影，知道有人/物響佢面前，但睇唔到 detail.....想講係，當時手術係分2次進行，第一次做左一半咋，因為佢想幫我地慳d(只需俾2萬幾)，而且想睇婆婆進展如何....係響2個月後，覺得有價值喇，先完成埋另一半。
Btw, 我對近視眼都係佢幫我做激光咋....so far 7年喇，都仲係 0 度近視！

原帖由 yesasiamama 於 08-10-2 00:33 發表
今日同浩浩去嘉賓大廈度驗眼, 上到去, 有印象係幾年前黎過, 諗諗下, 應該係浩浩第一次驗眼時的地方, 嗰時浩浩都未夠一歲. 我都唔記得係咩原因令到我唔再黎呢度, 但今日睇完後, 我知道個原因是什麼了. 嗰度d醫生完全 ...

[ 本帖最後由 gardenwoods 於 08-10-15 17:27 編輯 ]

Namnam05

我都帶個個仔去楊医生處驗過眼,他好詳細好nice,我個仔都有散光但佢話其實個個小朋友都会有小小仲叫我唔駛太緊張,如果驚便1年返去check1次啦 !