《藍田循道衛理小學校際問答》鴕鳥政策=八萬五政策

macylovemama

【明報專訊】如果你係無「慣性收視」觀眾，應該錯過星期三晚亞視播出香港電台節目《小學校際通識大賽2008》精彩一幕，段片呢兩日網上熱爆，未睇快上YouTube網站，包笑爆嘴。
話說比賽入面，主持人麥潤壽問﹕「形容一個人有逃避問題性格，會用什麼政策呢？」正確答案係「鴕鳥政策」，但係藍田循道衛理小學三個參賽學生商量一陣，答個好「爆」答案﹕「八萬五！」現場觀眾笑到反肚，家庭觀眾笑到噴飯。雖然答錯，但麥潤壽話﹕「正確答案應該取消，你呢個答案有創意，下次比賽時，呢個係model answer(標準答案)。」
呢段片「形容人逃避現實，是什麼政策？」(http://hk.youtube.com/watch?v=jLWMIAFyRKg)噚晚點擊率已經有3.3萬，好多人留言亦相當頂癮，例如﹕「有這樣的年青人，香港有希望了！」、「有仔女都填循道衛理做第一志願 」，亦有人即刻認係藍田循道衛理小學舊生，與有榮焉咁話。