終於放棄O左，唉！！！

BBTWIN

星期六同孖b去協恩面試．比我之前講中o左，好快比老師叮走．

佢地去到細孖巳經想喊．大孖仲叫做okay，肯自己落地行. 時間未到我地，我諗住帶細孖四維睇環境，等佢冇o甘緊張．點知佢要拉我走．入到面試場地，課室外o既老師即刻同我地講下一個到我地，兩個女都未有得warm up就要入課室，於是兩個齊齊喊，負責面試o既老師都幾好肯幫手安撫，但佢地就喊得仲大聲．我諗唔夠一分鐘我地就抱返佢地出黎．門外o既老師叫我地嘗試穩定佢地o既情緒先再面試，於是我地比孖b玩滑梯．玩玩下老師又問我得未，於是我地又再抱佢地入去，點知今次未入課室巳經喊，我同老師講話未得．點知另外有個負責人木口木面走埋黎同我地講話如果仲未得，就要我地出返去等．１０點半再試過．佢態度真係好cool，絕對唔似幼稚園老師，如果係都會比佢嚇死果隻．於是我地四個人齊齊出返去．呢個時候我感覺有d"魚".　我地o係出面不停安撫佢地．細孖終於肯攞住張申請表落地行，我問佢要唔要入去，佢話要．於是我地又帶住佢兩個再嘗試過．點知入到去，大孖喊，細孖又跟住佢喊．好無奈地我同負責人講話要放棄．佢好cool同我講話要通知o係門口o既老師．於是我交低兩張申請表就離開．唉！我巳打定輸數協恩唔會收我兩個女，但我真係諗都冇諗過連面試機會都冇．

都唔知點解佢地好怕入陌生地方．我地星期六日巳經成日同佢地出街．佢地o係街見倒人唔會驚．　但係唔可以o係一間間房o既地方見陌生人o羅．唉，黎緊o既interview都唔知點算？？？？唔通冇書讀？？？

doryee

有冇返過playgroup呀?

BBTWIN

原文章由 doryee 於 07-12-3 12:19 發表
有冇返過playgroup呀?

佢地８個月時返過o羅．不過我諗係佢地以前比姑媽o係屋企湊時冇出街，所以形成好細胆．都唔知點算．冇學校肯收一開始就喊o既小朋友o架．

heidilam

不如你試吓搵多d其他收緊生嘅學校, 安排面試, 比佢地試多d Interview嘅感覺, 到正式見心儀的學校時, 希望佢地會無咁驚。

StrongCat

邊間收其實有d緣份. Don't worry.

Play group 對d 用工人揍嘅小朋友係有用, 但遠水不能救近火.

早D去學校, 同佢講一會老師同你玩. MaMa 都玩. 我個仔頭兩次in. 問嘜答嘜. 第三次, 問嘜都唔答. In 多幾間當Training la.

ysnmama

BBTWIN,

明白你的感受. 我同一個小朋友去面試都覺辛苦. 何況你同兩個. 有時就算有返開nursery或playgroup. 小朋友面試表現都唔一定好同唔喊. 好多時係"天時地利人和"去配合. 大家都控制唔到. 所以唔好太唔開心.

面試前盡量比佢地有多d心理準備. 氹氹佢地話同老師傾完計玩完就會帶佢地去佢地鐘意地方.

小朋友情緒唔易掌握. 只能盡力令佢地情緒穩定. 盡量放鬆自己. 如果唔係. 佢地都會感受到. 努力呀!

moonychan

本來我仔仔都好怕去有門既房, 佢一定要拉我開門走的, 自從佢返左 nursery, 好左好多. 又返下 playgroup, 慢慢來, 唔好特別擔心, 始終有kinder收的.

fanny豬豬

我個囡都是一樣, 見到陌生人佢就怕(只可以眼看手勿動), 一掂即哭,  但唔掂佢又無咩事喎, 只係唔係好彩人, 不過玩多兩玩又可以無野。 但係屋企同佢自己友就會不停講野/唱歌。我地星期六多數返婆婆屋企, 唔返婆婆度, 就會同囡囡去行街食飯, 星期日就老公d屋企人黎我地屋企(因為我同99住), 所以好少會自己去街。 我地一早知自己個囡係咁, 所以每日見到陌生人都盡量叫呀囡同d佢地 say hello, 每日同d 看更叔叔/姨姨講 bye bye / hello 等等, 而且我個囡有返playgroup架, 開頭家長可以同小朋友一齊上,  上都一段日子, 小朋友要自己上堂。 我地都覺得有d野要比人, 才會幫到自己。  我地係面試前都驚呀囡唔掂,  所以係上學校前兩個鐘, 同佢warm up, 點知去到學校......非常好。老師問佢D問題全部都肯答。 雖然都考唔到心儀學校(可能係細B), 但我覺得呀囡好叻。

**芳芳**

最緊要係唔好俾壓力自己同個女, 唔好話一定要入某一間學校, 平常心一d, 對自己同個女都會好好多, 表現都好dla!!!:idea: :idea: :idea:

熊媽媽

BBTWIN:

我前日都係有去INTERVIEW呀...我囡囡都係冇表現...但其實我會覺得學校呢種面試模式...對於2歲幾嘅小朋友嚟講實在係好難嘅事...又可能囡囡對當時環境個感覺唔係咁relax..maybe無緣囉~

Heyheyhaha

完全明白既幾情況，唔好氣餒呀。你個大細孖幾多歲呀以家？我都覺得返下兩歲班係有幫助既......

我so far in左都有四五間，協恩俾我既印象都係唔係咁好.....可能佢真係一間傳統名校啦，但KV都算係名校，點解人地又唔似得佢呢

fannyyug

ＨＩ! 你好, 我都係星期六IN 協恩,不過我無去.
仲要係果日先決定. 我亞囡不嬲都有返NURSEY ,
又係見到陌生人,陌生環境都會喊. 又係陌生人 只可以
(只可以眼看手勿動), 星期六,日又出街,又係返教會.

唔去IN協恩,係對自己,對小朋友都無信心,
因為一定唔PASS , 好深.
唔想自己唔開心 , 唔想再煩.

熊媽媽

原文章由 fannyyug 於 07-12-3 14:44 發表
ＨＩ! 你好, 我都係星期六IN 協恩,不過我無去.
仲要係果日先決定. 我亞囡不嬲都有返NURSEY ,
又係見到陌生人,陌生環境都會喊. 又係陌生人 只可以
(只可以眼看手勿動), 星期六,日又出街,又係返教會.

唔去IN協恩,係對 ...

除咗協恩...重有冇報邊幾間呀咁?

Good_Daddy

原文章由 BBTWIN 於 07-12-3 12:16 發表
星期六同孖b去協恩面試．比我之前講中o左，好快比老師叮走．

佢地去到細孖巳經想喊．大孖仲叫做okay，肯自己落地行. 時間未到我地，我諗住帶細孖四維睇環境，等佢冇o甘緊張．點知佢要拉我走．入到面試場地，課室外o既老師即刻同我地講下 ...

唔使唔開心, BB interview  都好講彩數
放棄o左,  咪當同協恩 冇緣囉
仲有好多好學校等緊妳

BBTWIN

好多謝各位關心,其實我對女而家都返緊Nursery, 不過因為佢地９月底出世，所以都成１０月先返學．我諗佢地真係同協恩冇緣，因為之前返學先生都話佢地巳適應，返學都冇再喊．點知前星期病足一星期冇返學．好返之後返學又喊返．連校服都唔肯著．所以我都知今次面試死硬．我對女平時見管理員會揮哂手，出街都唔覺有問題，o係地鐵仲會聊人玩．係唔知點解佢地唔可以o係間房o既地方o羅．佢地入大型商店好似Marks & spencer, Toy's R us都唔會有問題，但係入小型boutique好似間房就唔得，喊得好緊要，我真係不明所以．

佢地出年仲有３次面試，琴日係St. Rose of Lima o既open day. 我都有帶佢地去參觀．細孖又係一入到去就想走．家姐就好好，warm up一陣間就自己四維攪．最攪笑就係細孖每入一間房都喊一次，warm up一陣見有野攪就okay. 我而家嘗試盡量帶佢地去多d小型商店，見多d人．等佢地喊多d, 喊哂就唔喊啦．

fannyyug

原文章由 熊媽媽 於 07-12-3 14:54 發表



除咗協恩...重有冇報邊幾間呀咁?

有報聖三一, 靈糧堂都係WAITINGＬＩＳＴ。
聖羅撒未ＩＮ。　

fannyyug

原文章由 BBTWIN 於 07-12-3 16:03 發表
好多謝各位關心,其實我對女而家都返緊Nursery, 不過因為佢地９月底出世，所以都成１０月先返學．我諗佢地真係同協恩冇緣，因為之前返學先生都話佢地巳適應，返學都冇再喊．點知前星期病足一星期冇返學．好返之後返學又喊返．連校服都唔肯 ...

我個囡都係９月，係２４日。　
不過佢入店舖又無野。　
係人問佢野，先十問九唔認。　
同Ｄ野一定唔可以太深，
因為我屋企問佢都唔識。　

BBTWIN

原文章由 fannyyug 於 07-12-3 16:35 發表


我個囡都係９月，係２４日。　
不過佢入店舖又無野。　
係人問佢野，先十問九唔認。　
同Ｄ野一定唔可以太深，
因為我屋企問佢都唔識。　

我對女就睇環境O羅，好似琴日o係St. Rose, 個義工家長同我大女玩，人地講什麼佢又做什麼喎．我叫佢同人講多謝，佢又肯講喎．細女情緒始終差d o羅．佢地d性格有時好難掌握，一時家姐好d, 一時妹妹好d.　我而家諗諗下真係唔應該比佢地一齊interview, 因為大家會互相影響．　本來妹妹唔喊，見家姐喊佢又喊，真係好難攪．我諗呢幾次interview我嘗試要求分開佢地．

BBTWIN

原文章由 fannyyug 於 07-12-3 16:35 發表


我個囡都係９月，係２４日。　
不過佢入店舖又無野。　
係人問佢野，先十問九唔認。　
同Ｄ野一定唔可以太深，
因為我屋企問佢都唔識。　

大家都係細女，係蝕底d.

熊媽媽

原文章由 fannyyug 於 07-12-3 16:32 發表


有報聖三一, 靈糧堂都係WAITINGＬＩＳＴ。
聖羅撒未ＩＮ。　

聖羅撒我地都有報 ^^ 大家加油!
其實小朋友INTERVIEW真係好睇佢情緒架