馬頭涌官立小學家長請入來傾吓

Leolonglongma

ngyanting2000 寫道:
Leolonglongma,

好耐無見你啦, 你囝囝考完試未呀, 我哋聽日係去大埔海濱公園旅行，大約下午一時回校, 我囝囝幾年幼稚園都係去全日旅行，唔知係唔係大部份學校１－２年級學生都係去半日旅行呢？

ngyanting2000,

係呀, 好耐無網上見啦!  個囝考試連自己都要自閉, 佢今日要考埋最後一科常識呀, 整體溫咗3次, 已經溫到唔知仲可以點溫, 所以昨晚都係求其寫一D生字便算.  其他要靠佢自己啦!  佢考完試, 我覺得終於有幾晚可以有好覺瞓了.   其他默書, 下星期再諗! 見到你o地D小朋友測驗成績唔錯喎, 恭喜, 恭喜, 慶幸沒有白費大家的努力!  你地幾位住得近嗎?  我有時會發神經諗下, 如果小朋友好似大學生咁, 一齊小組溫習, 唔知會唔會有比較好o既效果呢?  家長又可以用自己o既擅長幫佢
o地溫唔同o既科目, 不過一定要大家有同一理念才可行. (如果家長傾得埋, 真係可以諗下)!

ngyanting2000

Leolonglongma,

你的提議真不錯,不過我只係認識其中一個家長，明日去旅行，有機會要和其餘的家長打個招呼！

[quote]
Leolonglongma 寫道:
ngyanting2000,

係呀, 好耐無網上見啦!  個囝考試連自己都要自閉, 佢今日要考埋最後一科常識呀, 整體溫咗3次, 已經溫到唔知仲可以點溫, 所以昨晚都係求其寫一D生字便算.  其他要靠佢自己啦!  佢考完試, 我覺得終於有幾晚可以有好覺瞓了.   其他默書, 下星期再諗! 見到你o地D小朋友測驗成績唔錯喎, 恭喜, 恭喜, 慶幸沒有白費大家的努力!  你地幾位住得近嗎?  我有時會發神經諗下, 如果小朋友好似大學生咁, 一齊小組溫習, 唔知會唔會有比較好o既效果呢?  家長又可以用自己o既擅長幫佢
o地溫唔同o既科目, 不過一定要大家有同一理念才可行. (如果家長傾得埋, 真係可以諗下)!

多利是

你地今日有無陪仔女去旅行呀?? 有無相認呀??    

ngyanting2000

多利是,

我琴日已同yung媽相認咗啦

ngyanting2000

Leolonglongma,

我看到你哋紅馬個BK, 我覺得你哋間學校,學生要得到獎勵貼紙好似好難咁,我哋學校係學期初個時, 已經派咗張紙講話點樣可以取得貼紙(有寫作、進步、學業、功課、清潔、服務等…..), 太多種類我都唔係好記得清楚, 我見囝囝好容易就可以得到貼紙, 一星期最少可以取得幾張貼紙, 由開學到E+都幾十張貼紙, 不過我哋學校派貼紙可能比較寬鬆, 所以小朋友好容易得到. 我覺得獎勵貼紙真係幾有用, 我囝囝比較以前積極進取好多. 你囝囝派咗中文考試卷未呀? 我想問吓深唔深? 希望大家可以交流吓.

Leolonglongma

ngyanting2000,

上星期公司忙, 囝囝考完試即刻要溫默書, 所以無乜時間上BK, 佢4份卷都已經派回, 最高分竟然係常識, 中英文都唔錯有9字頭, 佢最有信心o既數學反而只有89分(原來唔係太明文字題, 要再同佢練習下).  中文考試印象中係考擴張句子, 重組句子, 閱讀理解, 簡單標點符號..... 擴張重組囝囝都掌握得不錯, 閱讀理解就因為大意(可以抄, 都抄錯字)被扣分, 文章中用擬人法, 佢理解得不夠仔細而出錯, 詳細內容我回家再看一下; 然後才告訴你.  考完試後原本想俾佢輕鬆下, 抖了2天; 但一放鬆, 溫書就有點磨擦, 相信下次英默成績會不理想. 自己都好掙扎, 由佢自己承受後果還是趕緊替佢"補鑊", 但自己真的放不下!

ngyanting2000

Leolonglongma,

恭喜你同囝囝, 兩個努力都無白費, 你囝囝都考得好好, 好叻仔     , 你應該要好好地獎勵吓囝囝, 你囝囝考試時, 老師有無讀卷俾小朋友聽, 我哋間學校老師係有讀卷, 所以理解就無問題, 你囝囝就好啦, 平均分都有九十幾分，我囝囝平均分得八十九分，差Ｄ先到九字頭，中文科做得唔係咁好拖低咗Ｄ分，無辦法，鬼叫囝囝粗心大意，唯有下次努力．

Leolonglongma

ngyanting2000,

我都有買咗份小禮物獎勵佢, 佢都有d意外, 因為佢覺得自己考得麻麻地!   佢每次派完試卷回來, 佢會同我講:"媽咪對唔住, 我無拿到100分", 其實我真係無要求100分, 只要佢有努力, 溫書態度正確便已經很好.  但唔知係唔係真係自己太緊張而令佢誤會每科都要有100分, 所以佢會主動同我講:"對唔住!"  我囝囝都係勁粗心大意, 要不斷提, 不斷操, 但不停的"不斷", 會令佢覺得無自由時間, 無得玩!  老公不時叫我放手, 但數學考試分數唔理想(就係因為我放手俾爸爸教/溫習, 我無特意出卷俾佢做, 跟貼佢, 所以攪成咁!), 爸爸自己都有唔開心, 因為佢覺得囝囝能力不止於此, 所以說易行難, 係父母過不了自己那一關!  一年級係有讀卷, 但囝囝都係話唔明, 所以唔識"列式"和解答, 3題文字題已不見了11分.

小朋友的分數差異真的很少, 特別係一二年級, 剛上小一, 各方面都要適應.   八十九分已經是很不錯的表現, 我地家長真係要不時互相提醒; 唔好太介意分數. 其實中英文都一樣, 要不斷睇書, 佢地才會進步得快, 但上了小一, 時間少了很多, 以前幼稚園階段的睡前故事時間真的係奢侈活動, 唉! 要再看一下如何調節自己, 多點時間陪他及鼓勵他看書, 大家努力啦!

YUNG媽

旅行見到班同學仔真開心,個個都很乖很可愛。我和先生都很放心。囝囝係細仔,有D同學高佢成個頭, 哈哈.

ngyanting2000

YUNG媽，

我都有同感，班同學仔個個都好叻同好乖，雖然大家只係認識短短兩個月，但感情好好，不論男或女都能一起玩，見到咁樣我都好放心和好開心。今日學校打針，全班同學仔都好叻，無人   　　  

helenting

ngyanting & YUNG媽~
係呀, 仔仔都話比我知無人喊呀, 真係估都估唔到佢地咁叻仔叻女喎~~
旅行嗰日都見到d同學仔個個都好乖, 我都係一樣好放心丫, 其實初初見到其他班d小一生好曳曳, 仲諗住仔仔d同學都係咁, 好采咋, 原來自己嗰班個個都好乖...

cslam

helentin, ngyanting & YUNG媽:

你地d仔仔女女都好叻喎，打針無喊。其實小朋友打針唔喊，係因為怕俾人笑o麻，全班都無人喊，如果你喊就好醜啦。仲有，事前老師都會話定俾佢地聽打針好似俾蚊針，無事o既。好多時老師一句話，好過我地講多多句呀。

YUNG媽

各位媽咪,
你地買什麼小食比小朋友帶返學校架?
我慣常買細包軟糖, 棉花糖, 欣欣杯, 小曲奇, 小蛋糕....

ngyanting2000

YUNG媽,

我通常都係買豆沙餅(細個),  蛋糕仔, 穀麥條, 糖果(一至二粒), 餅乾仔, 提子乾, 棉花糖, 紫菜.......(俾囝囝選擇二樣帶返學), 不過囝囝近來小息都無食嘢, 次次帶俾佢都帶返晒返屋企, 都唔知做咩, 佢同我講話唔餓同無時間食, 不過囝囝就同我講午飯食晒全個飯盒, 我都安心d.

YUNG媽

ngyanting,
我個囝就次次午餐都食唔晒.  有時我用食物盒裝蛋糕/麵包仔比佢返學, 佢就裝番d午餐返黎比我試下喎. 唔怪得只係長計唔長肉.

今次買冬季校服, 校服公司樣樣都比大幾個碼d衫褲比佢, 重講話有人為小朋友度呎碼, 真係激死人, 要個小朋友攞來攞去.  我唔喜歡著大d呎碼, 因為好唔稱身, 著得個小朋友好論盡.  我情願著得靚靚, 出年唔啱咪再買過, 好正常啫.  校服隔日著, 抵過去街衫好多.

件校縷比32碼, 我想可以著到3/4年級. 件恤衫比12-15碼, 我打電話去校服公司問想要細一碼係什麼碼, 佢話應該係11-14, 但係佢地唔會做定咁細d碼 (連一兩件都無), 如果要堅持就要另外特登做, 要等兩三星期. 無辦法, 件恤衫大就大d啦.

ngyanting2000

YUNG媽,

我囝囝都有同我講，老師話如果食唔晒個飯盒，可以帶個盒裝返屋企俾家人試吓，我囝囝問我想唔想試，我同佢講如果可以食晒就唔好帶返屋企啦．

好在有你提提我，我都未同囝囝試過ｄ校服，我見到件校褸（３４碼），大得驚人，但係運動外套都係３４碼就差唔多，無理由件校褸大得咁誇張，我都係等聽日放學叫囝囝試晒ｄ校服好ｄ，諗住有專人度身，無理由差咁遠

helenting

YUNG媽 & ngyanting~~
你地仔仔d校服太大, 但我仔仔d校服我覺得細左d啦, 好似條校服褲咁, 依家著住都係剛剛好, 少少長都無丫, 萬一洗一洗縮左水咪吊腳囉, 件運動衫又係喎, 個衫就同隻手一樣長, 都唔知d人點攪~~
YUNG媽呀, 乜可以叫仔仔攞番去學校換嘅咩 我以為要自己攞去長沙灣換添...咁係唔係同老師講聲就得架啦
小食呀, 我通常都係帶餅乾或者旦糕仔比仔仔, 因為佢好簡飲擇食架, 佢只係鍾意食餅乾~~
仔仔初初開學時都成日攞番學校d野番黎, 佢話唔鍾意食喎, 真係比佢激死丫, 咪就係因為婆婆就慣左, 咩都唔鍾意食~~
不過後黎我同陳老師講左, 之後情況就有好轉, 依家都無再攞番黎啦~~

YUNG媽

ngyanting, helenting,
好似只係尋日可以拎返學校換咋, 過左既話就要去長沙灣換.  最好先打電話去華生問下好d.

cslam

亞女因為過肥，而家多數俾生果佢帶，有時係脫脂芝士三文治，盡量唔俾熱氣o野佢食，因為佢成日喉嚨痛。

YUNG媽 寫道:
各位媽咪,
你地買什麼小食比小朋友帶返學校架?
我慣常買細包軟糖, 棉花糖, 欣欣杯, 小曲奇, 小蛋糕....

多利是

係呀, 學校d人都5知點度校服既, 所以除左第一次係學校買校服之外, 次次都係自己帶阿女去長沙灣買架    

阿女又大得快, 套運動衫又縮水, 今年已5稱身啦      不過好彩我可以留返比細佬    

運動衫, 買大小小都5怕, 因為會縮水架