本帖最後由 一個閒人 於 16-9-29 10:32 編輯
自從2011年我小朋友出世後，我就係BK同EK既長期粉絲。
由「談幼稚園」，以至宜家既「小一選校」，我都會好努力不斷爬文，吸收資訊，作出分析從而得出一個合理性既資訊。
呢次係我第一次出post。因為我自己住34網，除咗幾間出名既小學之外，我對34網裡面其他小學既認識實在太少。因為呢個網，只係得一間協恩可以叫做神級學校外，其餘既一線學校都只屬於地區優秀學校，呢個網唔算太多人去討論。
睇咗咁多個posts同埋咁多位師姐師兄既意見，我歸納出以下既假設：
34網一線學校包括：協恩、聖羅撒、陳瑞棋及福馬；
而二線學校包括：合一堂、何壽南、基道、農官、聖十架、2間獻主會以及牧愛。
其餘五間就係眾多師姐師兄所叫既寶校。
由於我既小朋友將於17/18年度入讀小一，我同我太太，以及我阿哥、阿嫂四個人係暑假中已經不斷對上述既一、二線學校作出分析。包括17年初填大抽獎表格乙部時既志願次序安排（因為自分只有15分），務求可以增加入到心儀小學既機會。
當然，我都有兩手準備，報讀直私學校（當中已經有一間直資學校既offer，不過唔係自己最心儀果間）。
到今年九月初時，網內好多二線學校都舉辦左學校資訊日，提供資料畀來年升小一既家長。但係呢啲資訊日都會同其他學校撞晒時間，我哋四個人都要分開出席呢啲資訊日；返到屋企後要開家庭會議，討論每一間學校既教學方法、課外活動種類以及其學校文化，睇下邊一間學校會比較適合自己小朋友多少少。
我自己非常信奉升中派位嚟決定學校既好與壞。所以我係＂hkpapa852＂小六升中派位資料既支持者。但係34網之中，只係得一間陳瑞棋披露佢地畢業生升中既資料，其餘網內十六間小學都無透露相關資料；令到我幫小朋友揀學校時無所適從。
當我前個星期出席其中一間學校既資訊日時，果間學校既2016年升中派位數據真係令我難以置信。果間學校既powerpoint同老師講解中顯示當屆大約有85名畢業生，有56%既畢業生被派到英文中學，當中有8位居然可以派到MCS、5名LS、2名DGS、DBS及BPS各1位；其餘KL3網內既華英、旅港開平、丘佐榮以及迦密加埋大約有25位畢業生入到。如果計埋3名同學派到培正的話，呢間學校派B1-B2A中學既百分比有60%。假若呢間學校既升中派位資訊係事實的話，我覺得呢個百分比係34網裡面係非常難得。
再者，有9位畢業生可以派到MCS及BPS呢啲神級既官津女校（即係平均每5位女同學就有1位可以入到呢啲神級女校，我估佢地應該以自行派位入到），簡直合晒我既合尺（因為我小朋友係囡囡）。 不過係資訊會上，校長都講出事實，呢間學校係非常谷，要報讀果間學校既家長要有心理準備（no pain, no gain）。不過校長亦都提及到佢地唔會強逼學生去考TSA，係家長自由選擇。但係校長會催谷學生準備Pre-S1既考試，呢個我都明白，要「前人種樹，後人乘涼」既道理。
至於呢間學校2016年6月大抽獎小一派位中，我見到EK以及其他親子網站既師姐師兄提過佢小朋友係乙二及乙三抽中。我唔理係真係假，總之到咗2017年1月份要填大抽獎表格時，呢間學校會係我心儀對象之一；唔係放乙一，就係乙二（既然有人話乙三都抽到）。
我真係想知道其他師姐師兄聽完其他34網學校既資訊會後，有無任何既選擇或者意見呢。
| 
發表於 16-9-29 10:30
