到底咩狀況才要讀特殊小學呢？

psv

如果智力正常，有咩因素仍需讀特殊小學？係咪多數因行為問題？如只有言語遲緩及坐唔定（經常出位無時停)，認知同齡，會唔會主要因為坐唔定而被迫要讀特殊呢？
另外，其實特殊小學裡面係咪好多都智力正常嘅呢？

annaanna

回復 ivybibi 的帖子

thanks~ 我有同學校講想請影子老師，但學校一直都唔比，但冇講原因囉﹗

我聽日都去睇精神科，睇下醫生O係藥果度可以點幫阿仔啦﹗

爸爸好好，每日都有打去學校問下阿仔情況，尋日就好左，佢放學番屋企做功課都好快手呀﹗

psv

安全帶呢樣嘢分別係主任同治療師親口同我講，絕對唔係因坐唔穩，而係俾坐唔定嘅用，仲話如果個仔係醒目識解安全帶，咁佢哋就將個扣收埋喺後面，務求個仔走唔到，我自己聽完後都唔敢相信! 其實我唔係怕特殊，只係怕呢d非常手法，仲要理直氣壯咁，好得人驚！問心講，如果你見到你小朋友返學被人綁上安全帶，你會點？

ivybibi

縛安全帶?其實有無了解個事情?會唔會係個小朋友唔識坐，容易跌，所以要有安全帶去作保護?嚴重智障學校可能會有最多呢D情況出現。我個小朋友小時S位，依家特殊學校小學，咁多年我未見過有小朋友要縛係張椅到上堂。呢D係真心話，有時唔好比特殊兩個字嚇怕，"特殊"學校不可怕，"特殊"的小朋友更加不可怕!

ivybibi

回復 annaanna 的帖子

明白你的憂慮，不過如果評估結果只係話佢智力正常(70以上)係唔會安排到入特殊學校的!如果食左藥都控制唔到，可能係藥物方面的問題，同你個精神科醫生傾下，睇下可唔可以轉藥。
另外，群育學校好似係比一D犯左嚴重過錯的小朋友讀的。如果你想試下特殊學校﹝短暫﹞你可以同學校的駐校心理學家傾下，叫佢Refer你去附近的特殊學校讀最多三個月，睇下有無辦法執到佢D行為問題!﹝因為有好多特殊學校都有幫主流學校做輔導工作的。﹞
你有諗過請影子老師跟下，如果有相熟的影子老師，而你小朋友同樣好似怕爸爸的，都可以一試，影子老師可以慢慢抽離可能會好一點!

annaanna

回復 pocoyo123 的帖子

其實開學頭一星期，爸爸去左陪佢，有爸爸在場一切正常，只係我地唔O係身邊時變成另一個人﹗

psv

回復 hktkomama 的帖子

改善行為當然重要，但係唔係你話想改就可以改到，如果咁易改到就唔駛要食藥同有特殊學校啦！改善行為係減少唔好嘅行為，但係好似過動嘅表現，小朋友自己都唔想亦未必控制得到，難道因為咁就變成會傷害到人而應份去接受如此對待？從學校或大人角度去做課室管理，為咗維持秩序，咁嘅做法當然覺得無問題，但係試下俾少少同理心去想象一下，如果你係個小朋友，當你返學時俾人用嘢綁住，不論繩、櫈或安全帶都好，你會有咩感覺？你仲會唔會鍾意返學？定係你仲會鍾意d老師？你嘅自尊心如何？對抗性會否更加激烈？小朋友行為控制唔到，但係佢哋都係人，佢哋都有感覺，都有自尊心，唔識正確表達，難道就抵罰到要被人綁住？咁其他會咬人嘅小朋友，唔通我哋又應該搵嘢塞住佢個口？喺父母角度，我想象唔到會有咩人係接受到人哋喺學校入面搵嘢綁住自己嘅仔女囉！總之，針唔拮到肉唔知痛，家長盡努力去改善，但學校唔配合反而要用以暴逆暴嘅手法？個人感覺係，綁住等同虐待，亦只令行為惡化！

hktkomama

我不是想幫特殊學校說什麼，但你自己想想，如果以特殊學校的師生比例，佢哋都要用安全帶來處理小朋友，小朋友的行為是否已對自己或他人做成危險。那麼個小朋友在主流小學，一個老師睇廿幾個，點可能睇到?老師只會打俾家長接小朋友回家。我之前聽過有我們的小朋友在主流學校常打人，最後，老師用很多椅子圍著佢，唔俾佢離開自己的座位。如果你小朋友不斷比人投訴或俾人isolate,你是否接受到？
我不是說你小朋友要讀什麼位，只是想你想深一些。現在你應該盡量幫小朋友改善行為問題(不過我知好難)。

psv

Capricorn2521,
該機構就係人人都讚嘅協xx！估唔到會遭到如此對待囉！

annaanna,
你講得好啱！呢個世界絕對係有綁住呢樣嘢，我亦同你一樣最擔心阿仔會遭受如此對待！事實上，某人親口話浄係S位都已經存在類似嘅嘢，不過佢哋將"綁住"呢兩個字美化為"攬安全帶"，仲要話到你接放學時要預咗會見到佢有傷痕，因為"攬住安全帶"佢會爭扎，實會有損傷！你接唔接受到？聽完已經想喊，佢哋有時可能自己都控制唔到，唔係痴線，點解要好似喺青山咁被人綁住？諗起真係好心痛，又想喊....

pocoyo123

不如媽媽試下做影子老師, 跟佢一兩個星期, 可能情況會改善

hktkomama

會唔會剛剛放完假，心情未平復？希望佢過多一兩個星期，習慣返，可能會好些。加油！

annaanna

回復 ivybibi 的帖子

THANKS~ 唔會因為坐唔定而安排入特殊學校，但如果學校真係容納唔到呢？我明白學校有愛心好重要，但學校話放完暑假番去變左好多，叫唔聽，話唔停，咁再包容O既小學都好難接受到佢囉....

ivybibi

需要入讀特殊學校的首要條件係評估出黎佢的智商為70以下，唔會因為佢坐唔得，四圍行而要求你入讀的。另評估結果亦都唔會堅持要你的小朋友入讀特殊學校，最終選擇權係父母身上。
入讀特殊學校唔會比人縛住係張椅度的，就算發脾氣到有攻擊性行為，大多數老師都會想辦法令佢情緒回復平靜，真的無效就唯有報警轉送精神科；但呢D係萬中無一的事例。
小朋友有ADHD的問題，等大個一點，可以靠藥物去控制，只有搵到一間有愛心的小學，同樣可以係主流有所成就!

annaanna

回復 psv 的帖子

其實我唔介意轉特殊，只係怕連特殊學校都未必能接受佢O既行為問題，咁到時點呢？之前睇新聞話有位特殊學生因為上堂走黎走去，比老師縛住O係張椅度，可能因為果位學生唔識表達.... 雖然呢D 可能係個別事件，但我唔希望有機會發生O係我仔身上﹗

hktkomama

你唔好俾自己太大壓力，如果真的覺得好辛苦，見仔仔醫生時同佢哋講下，我之前有段時間都是，最後同仔仔的醫生講，轉介咗我看醫生，現在食緊藥，相比之前，情況穩定咗。
我估你仔仔同我個一樣，某程度上，佢哋是睇下佢同那個人的交情，如果佢同你的交情好，佢會讀你講，跟你做。但回到學校，佢同老師的交情未去到使你仔仔在乎。另一方面，佢可能是draw老師的attention,即使是罸，都叫做有人理會。

psv

回復 annaanna 的帖子

其實同我個仔極似，當然我嗰個言語表達及社交都未得！我都有諗過佢係咪唔鍾意讀書，一上堂就發脾氣或周圍走，問佢又會識答番我做得唔啱，但講極都照做，仲要得我一個食得住佢，其他都無人話得聽，而且古惑到睇穿咗我喺學校唔會用到任何手法叫停佢（如罸唔准玩玩具），變成只有喺屋企先至聽話，出到去又係另一個人！喺屋企可以坐低做訓練兩個鐘，但出去做訓練就兩分鐘都唔得，攪到d評估結果完全不乎實際能力！我都想知應該點做？真係好攰，又唔甘心放棄，但係做任何嘢都無幫助，感覺好似患有絕症無能為力咁！曾經聽過有種類似叫對抗型過度活躍症，唔知佢係咪呢種呢？咩都作對！不過，C6安慰我話佢識咁樣作對，即係蠢極有限啦，唔係點識同你鬥法吖！總好過成舊飯咁，踢一下先郁一下，無自己思想！真係唔知好嬲定好笑！苦中作樂！近嚟又遭受到某特殊機構嘅岐視，唔止批死話阿仔一定讀特殊小學，就連中學都批死埋去特殊，甚至批死佢將來極其量只能做一個服務員！我知我唔應該去介意，但聽完真係又嬲又hurt囉！（佢係好鄙視咁同我講，絕對唔係激將法）如果將來阿仔有成功嘅一日，我一定會多謝佢今日嘅睇死！
你小朋友係咪升二年級？喺學校有咩問題？老師有無建議？我都明白如果只因行為問題而要考慮特殊果種深深不憤嘅感覺，但係有時真係好累，無形嘅壓力好似每日都壓住自己透唔到氣，眼淚越來越容易出來，到底應該點做？

psv

回復 Capricorn2521 的帖子

多謝支持！第一樣完全中point, 一話有得打機，佢可以做埋動作背哂"床前明月光"，單雙數同計加數(但佢言語遲成年半)，而家好多時都係"等價交換"至肯做嘢！
第二我已將要求降到最低，但求佢肯坐定無周圍走，即使遊魂，我都讚佢！
第三我已預咗要食藥，只係無辦法中之辦法！
第四嗰d所謂經驗人士，現階段已講到佢好似無藥可救咁，又話佢連坐定都唔得，俾堂佢上都無用，就用d咁嘅藉口話一個月只俾一堂OT，慘過乞佢，如果咁正路咁叻，心諗我就唔駛嚟啦！枉為人人讚嘅大機構！問佢有咩方法建議改善坐定，佢竟然答我暫時都無辦法！可恥！
咁我可以點？連特殊機構都歧視我哋？

annaanna

回復 hktkomama 的帖子

我係一個好眼淺的媽媽，每次鬧仔時都會忍唔到喊... 鬧仔心痛我估大家都會明白﹗
今日我同佢講，o係學校聽校長、老師的說話就等於聽爸爸媽媽的說話，希望佢可以明白，有時諗下，佢幾時先會覺悟呢？幾時先可以做番個正常人呢？我要求唔高，只要佢o係學校都好似o係屋企咁o既表現已經ok喇... 可惜... 我壓力好大，好辛苦，究竟邊個先幫到我呢？

hktkomama

其實你囝囝在唔在乎你的感受?如果佢在乎，可否同佢講佢在學校的行為使你感到唔開心。我仔仔早之前在學校都有些行為問題，後來學校有投訴，我接囝囝放學時因壓力大哭起來，囝囝見到後，佢明白佢的行為會影響媽媽。後來佢有唔乖，老師同佢講媽媽會唔開心，佢就立即乖返。

annaanna

其實我仔都令我好困擾，佢番左學係另一個人，冇我地在場O既時間，不停攪事，失控﹗但如果我同爸爸在場，佢可以好乖，我一個眼神佢已經坐定定﹗
藥又食左，行為管理已經教過，佢完全明白咩係O岩咩係錯，但往往會繼續做錯事﹗
其實咩學校咩環境先O岩佢呢？問題係佢唔係唔喜歡番學，佢唔怕被罰，因為佢好快唔記得左﹗
我係咪要搵特殊呢？但佢學術係冇問題，只係佢對住唔同O既人做出唔同O既事﹗特殊老師係咪真係會有辦法對付佢呢？以我所知，群育學校有短期課程，但要小三以上.... 我可以點做呢？請幫幫忙.....