在物質富裕的這一代, 現今家長都非常緊張子女讀書, 希望他們能望子成龍! 擁有此心態是正常的。可惜香港教育制度不好, 規劃不完善,令我們無所適從! 在教育王國流連看到不少POST, 常看見家長批評或投訴學校不是。我明白在這裡可以抒發個人感受,但我真的有感而發:
1) 家長報幼兒園/幼稚園閒閒地都報十間以上(叫最少), 其餘個個不理港九新界, 係名校都報左先。報十幾間或廿間以上, 攪到籌號超過1000以上, 又鬧! 話咁多人, 點同人爭!
2) 因為有上述家長報N咁多間學校, 超出學校預期人數, 在交申請表時, 等了兩三個小時, 又鬧! 話學校處理不當, 攪到他們或者老人家要白等兩至三小時才能完成! 又話學校想造氣勢!
3) 學校要排隊取入學申請表, 又鬧! 話學校唔先進, 可以上網download 表格架麻! 做咩又要人通宵或等候幾小時排隊只是取一張表格,又話學校想造氣勢!
4) 知道面試撞了期,打去學校改時間, 學校無得改, 又鬧! 話間間學校做乜野要撞埋同一日? 攪到家長只可選擇一間面試, 又或者辛苦地抱住小孩走幾場學校IN。
5) 報讀幼兒班的家長, 去到學校如見傳統interview,老師循例地問小朋友叫咩名? 同小朋友傾計? 又鬧! 話得一歲人仔, 點識答你, 仲乜要問咁多野!
6) 如見group interview, 好多幼兒同家長group 埋一起, 又鬧! 話學校安排差, 又話”垃圾”interview! 咁多家長窒埋一起, 話小孩根本唔識做動作, 又話老師眼神唔留意他, 點可以作評分, 又質疑評分準則!
7) 如見interview時,學校安排砌圖, 唱歌, 又鬧! 話學校做咩安排咁深既比小朋友作面試。
8) 如學校以排隊收生,不用interview,又鬧! 話學校收生無基準,為什麼不用面試! 就咁收生。
9) 面試完畢後,質疑學校點樣收生? 又鬧! 作為一所學校,校內有校長及資深老師,他們收生點都有準則。為什麼家長們要質疑他們呢?
10) 學校課程淺,又鬧! 話太容易,咁樣難承接小學課程。
11) 學校課程深,又鬧! 話幾歲人仔要讀咁深,失去童年。
12) 學校如有新移民或南亞學生, 又鬧! 話怕他們的口音說英文不好,影響自己小朋友說英文。
13) 學校不安排校車服務給幼兒班,又鬧! 話要家長四周找保母車, 保母車費用又貴。
14) 家長接獲收生通知信後,hold 多間幼兒園或幼稚園,要左揀右揀, 甚至等到某些學校8月份開學後,試堂後覺得不適合才急急退學。令到部份沒有 offer 家長等待很久。
15) 部份家長更安排小朋友上午讀一間幼稚園, 下午又讀另一間幼稚園, 係怕自己的輸蝕, 所以唔理小朋友, 一於讀左先算!
16) 學校講到明面試入課室,只可以一位家長陪同,但往往總有部份家長扮聽唔到,希望跟埋個小朋友一起入去。令到老師常用大聲公同家長說,只可以一位。
17) 家長收到offer 後,要預留兩間幼兒園/幼稚園,乃是正常! 但無需要問人要預留幾多錢去hold住個學位。你hold 住咁多間學校,無offer的家長真係好無奈的!
18) 總喜歡問 xxx VS xxx 學校,兩間的教學不同,大家都是一所好的學校。為什麼要作比較? 答左你某間學校的好處,另一間學校的家長又會回覆你果間的不是! 倒頭來又是鬧鬧鬧!
19) 點解要出post問幼稚園排位? 如果你心中有排位,是沒問題的! 但唔需要出post 去問人。幼兒年紀尚小,咁快就要幫他們的學校排位! 天啊! 幾時排到小學, 中學及大學啊!
20) 點解現今社會細b就要repeat一年博做大b? 明明係該年度出生的,點解要延遲或重讀一年讀書? 又係怕輸蝕咯! 所以學校都要迎口家長口味,某些學校安排10-12月出生的學生延遲一年入學。
為何現今家長會變成了這樣? 為何幼稚園面試要變得考高材生的模樣? 是否真的需要報那麼多幼稚園? 是否需要四周密地面試呢? 是否應要停一停,想一想?
在這裡是希望分享幼兒園/幼稚園教學,但近年好像變了發洩怨言平台。我明白每個人追求理想的是不一樣,個別家長的用詞,真係好過火! 希望我們作為家長
我們要好好反思! 要有身教,我們要尊重學校的規則,尊重每位教學工作者! 他們付出了好多努力,為你們服務,包括: 預備入學文件、辦理申請入學、面試、面試結果、預備開學等工作! 卻在這裡換來無數的家長惡性批評! 如果家長不滿意,用詞可以平和一點在這裡說,甚至可以不選擇該校的。
小朋友剛開始人生中的第一個求學階段,可否讓他們及你們可開開心心地愉快學習呢!
(不喜勿進,不喜勿插,謝謝!)