- 在線時間
- 0 小時
- 最後登錄
- 21-6-5
- 國民生產力
- 0
- 附加生產力
- 57
- 貢獻生產力
- 0
- 註冊時間
- 19-3-28
- 閱讀權限
- 10
- 帖子
- 28
- 主題
- 1
- 精華
- 0
- 積分
- 85
- UID
- 3136647
|
本人係18-19 k2家長
(長文...慎入)
一路都唔係任何討論區玩家,亦唔識用,所以好少睇;但早前由其他家長口中得知,日前有帖文關於不實分享,越睇越唔尋常,表面看來很詳細,實際九成都是不實,有些指控更是過時。作為家長,由開校至今,以對此學校認識,如果唔出來分享一些真實情況實在覺得愧為父母。
記得小朋友一歲未到開始揀校,打算將來小學要出九龍,所以雅士圖是心目中後備學校....話晒都新校....當然唔會咁大信心。認識學校前,我同好多家長一樣,抱著好奇,知多無壞的選校心態黎聽下個免費講座。事實上佢無試過講座收費。亦唔推銷。合好則來不合則去。
講座是同好多小學既簡介會既意義相似,圍繞著理念,模式,課程宗旨等。
聽完,理念的確同我們一樣,但當時諗,講座總是美好的,再觀察下吧。
同時間小朋友有空檔,也就試下佢地既playgroup. 我小朋友係觀察型,由細到大都超痴身,莫講話新環境,基本上老師病左轉代課老師,佢都好難分離(當時係一歲多少少,親子班階段,分離指同佢分開兩個身位都唔得)
但呢一間playgroup,出奇地,佢係好快被老師既遊戲同演譯方式吸引,好輕快就完左1.5小時。
我由第一堂坐佢後面,到左第四五堂坐牆邊,到左第八九堂坐門口邊,我係覺得好驚訝。
所以,我就繼續上佢playgroup.
當時細細b既佢,最終無乜offer, 得英藝,明慧同雅士圖收,但經過一輪面試遊戲完後普遍感覺間間幼稚園好神秘,唯獨是雅士圖有school tour可以比我在上課時參觀上課時情況(班房外輕輕看下),而且面見校監時,已覺得佢睇穿我家小朋友既性格(當然有懷疑點解咁犀利,當個個老師都話咁細睇唔出既時候,ms wu就睇得出我女係well-trained,有主見) 事實上我女的確由六個月大已開始上外面playgroup.
終於,膽粗粗就選定雅士圖。
一路以來,學校由老師,行政,到姨姨,都好好。當然間中係有協調未完善,但每次都見佢地盡力同盡最快速度改善家長所提出既擔憂。而所有既改變,我敢講句係由pn到而家k2都無令我失望,而且每項決定都從小朋友出發點著想。 我唔知生意係咩,公關係咩,我只知我囡每日都好開心,學校每幾天就有小朋友日常上課相,定期有school newsletter預告下期中英普課程內容,每日老師放學都講幾句當天情況。朋友果d幼稚園,一個月一兩張相,幾個月老師才電話講下近況..我真的覺得我好了解學校做緊咩。
去到k1, 人人都叫我轉大b再考其他幼稚園,最後有根德園同聖羅撒offer, 學之園2nd in, 但面試完,見到班老師個面孔,憑感覺真係唔想讀,個個都好似教小學咁嚴肅,面試安排似以前回鄉咁大陣仗(我指style唔岩我小朋友,唔係話佢地唔好)
我仲記得我好坦白咁同ms wu講左, (因為佢份人真係好坦誠,又直接,而且佢每次講座都講話即使家長諗住轉校都歡迎隨時問佢意見,都會好希望小朋友開心,家庭開心)當時佢反應係:叻叻,我既小朋友考到呢幾間我都好開心。 一句負評都無講過,亦無勸過我做任何決定。
最後係因為佢同學校老師們既細心同愛心,我從來未試過咁肯定地原校直升。
K1上eca, 佢每個學期都親自提名學生適合讀邊個班,最後係家長決定報讀與否。而且一些公開試是幼稚園做試場邀請考官到幼稚園考試,如果覺得唔值,要平,我諗太子都大把教學中心。但小朋友咁細,走來走去學野仲要為呀爸呀媽慳少少錢要轉陌生地方考試,我寧願在學校上了。 2-300令蚊,值得。學校亦不厭其煩咁開放個班房比小朋友在內午餐,不厭其煩咁設置午餐枱椅,夠鐘又不厭其煩咁清潔..... 中間老師仲會好好地黎睇下小朋友,家長見親老師又捉住佢地問長問短,我成日都見老師們好遲先食飯,或者掛住做邊做電腦工作邊食飯,仲係滿面笑容,我心諗真係少d愛心耐心都做唔到.....
有d小朋友甚至扭計唔食飯,老師都會聽到有異樣入黎望下,氹下佢,其實老師可以唔理咁多,按章工作,但沒有。
我小朋友是好有主見,強自我中心,要引導佢聽指令比普通小朋友要花多一兩倍精神同時間,k1 都還有時間,畫線畫圈唔喜歡,老師都只是叫我勤力練手指肌,從來無比過壓力我們,(因為我知好多幼稚園教唔掂就叫家長回家練功課,仿佛家長要做埋老師-這是理念問題,ms wu好注重家庭關係,記得佢同班主任都講過,醜人由佢地做—呢句我記到今日)
今年k2好緊要。ms wu見面時亦好坦白咁問我意願,想如何配合小朋友性格選之後方向,佢亦知我家是兒童為本,同時家庭希望去直私小學。現實歸現實,唔少家長的確是天生天養同時想入神校小學,我自問小朋友未夠本事,培養佢內內外外可去到直私是我心裡願望但矛盾係唔想扭曲小朋友性格。
咁自我既小朋友,要佢聽指令是很難,ms wu好認真坦誠地焦急地同我商量(焦急到每晚wtsapp 到凌晨),了解大家方向後隔左幾日又搵我講佢諗到個方法可以試(結果小朋友不知不覺咁越來越聽指令,亦唔會無左本身性格,我好感恩..連教學以外佢地都諗埋。我相信無幾多老師同校監會咁嘔心瀝血地除教完課程外還要諗點樣引導呢d頑童。而家到左小朋友下學期,面臨面試即將開始,當出面人人都話我小朋友學習能力高,記性好,但學習睇環境睇同學看心情,易氣餒(iq勁,無eq是大忌)班主任再有耐性都係激勵小朋友嘗試不放棄精神,而ms wu更體貼地,入班教學不斷試唔同模式(分小組定大組適合佢呢?比題目後要佢一次過做晒得唔得?唔得,咁分幾次比題目,又能否獨立完成呢?當佢自暴自棄唔嘗試時,在佢耳邊鼓勵定係催眠方法引佢試好呢?)ms wu又跟我幾晚wtsapp越了解小朋友平時原來待人處事會有咩特徵,又諗到更好方式再嘗試(縱使未必成功,但佢死心不息地試;佢就靠了解我小朋友日常來諗點樣配合教學,我靠佢反過來話我知我小朋友既一切行為既背後原因,配合如何家教,兩人講下講下,我比以前更了解小朋友想法,而佢更遠大地唔係只著眼現在小朋友有幾高能力,而係想佢預到困難時如何克服自己唔放棄,將來先會成功)出面好多老師,見小朋友達標就唔會再理,ms wu唔係,佢當正小朋友係自己既小朋友咁諗諗諗。
呢幾年我聽過好多次佢多謝我聽佢咁長氣既諗法—-(我真的覺得佢傻的,邊有人咁勞心勞力為自己小朋友諗,我多謝佢都黎唔切,佢仲走來多謝家長? 個小朋友同佢無血緣的,家長比錢唔係大晒的,無佢地一班咁有使命既教育人員,唔會有一班心靈健康既小朋友,最多只能做贏起點,上小學自生自滅,輸終點既港童)
重申:我只感覺到校監,同三年來既老師既愛心耐性,學校大大小小小既變化都是為小朋友著想,仲要讚既是門口的姐姐,每次我地家長既瑣碎事找佢都處理得好好,電話佢接,放學行政都係佢,一人頂二三人工作,比以前既行政人員還要細心好記性;相反其他學校頂多就是校長企門口歡迎下番學送下放學。門面野唔係我心目中的教育重點🤷🏻♀呢d我唔介意有定無。
反之ms wu是個校監......佢要忙既事太多了,仲堅持每個小朋友親自入班觀察親自比專業意見家長親自出外為小朋友找小學資訊...我真係覺得小朋友在呢個環境學習好放心,遇到呢度既所有人都不容易....
如果我無感受過,或者唔會花心機寫咁多親身經歷來抱不平;某些有心人既惡意中傷誹謗,我們作為父母,如果受恩都唔出來為學校發聲,我如何做小朋友榜樣,如何教小朋友見義勇為,知恩圖報,不生事不惹事但更不怕事。
最後祝各家長有合適選擇, 上到心儀幼稚園
|
|