本帖最後由 legofigure214 於 19-4-11 10:54 編輯
第三階段:2ND IN 面試
2019年係3月19日網上公佈入選兩輪面試名單,大約有270人(我冇數過,係其他POST度執人口水尾咋)。當日,早上8點幾已經有得網上睇名單,即刻開心到要去食一個 FULLDAY BREAKFAST 自己慶祝一下。
根據規定,入選者要即日去SPCS 拎住第一輪面試證換取兩輪面試證。我下午去取證時,離遠係門口分別見到三位阿太由SPCS走出嚟,三位都係笑瞇瞇,一個拎住米黃色紙,一個拎住橙紙,一個已經收埋左張紙。根據呢度形容,橙紙係勁人,我即刻諗到呢位阿太的女兒等同勁人,而佢嘅笑容亦都係最燦爛架!
我一入侯門,兩位書記姐姐在門口歡迎我啦!我一手交第一輪面試證,佢地用左5秒便找到我女的兩輪面試證—— 登登登 — 藍組人仕。
(EDIT 11/4/2019) 第二輪面試共有五組:橙(orange)、紫(purple)、藍(blue)、白 (ivory)、綠 (green)
(更新 11/4/2019)
根據我第一輪目測同探子回報(即我女),我地學校大約有20-25人申請第一輪面試,入選第2輪約10人。10人裡面,咩色都有,橙組佔多,紫組次之。藍組與白色應該最少。無獨有偶,我地嘅橙組人士都係在校成績最好個一批,同樣紫組次之。所以,我心裡預左入左第二輪當贏左。面對阿女,當然係表現另一個信心滿滿的老頭啦!
好啦!知道2ND IN係面見阿女加家長,好彩係有MSS面試經驗(今年仲係SPCS前一個星期六),當時都係阿女加家長,所以我地算係有經驗人士啦!
阿女一向補英文一科,小型補習班,一星期一次,勝在老師好彈性。我早兩個月同左老師講會考呢幾間女校,講左模式大約點考,叫佢幫手TRAIN下阿女的自我介紹,基本對答等等,所以老師都算有為阿女準備過幾堂,阿女亦進入左要面試的狀態。
係屋企,有兩三晚我地都試過三人會議咁講下,不過,真係得兩三晚,每次30分鐘左右。同時,一齊睇下學校網站,至少要知道考咩學校,MOTTO為咩,風格係咩啦……
面試當日,冇左人山人海的場面。
出示面試證後,每個家庭被SPCS姐姐引領去所屬課室等候。所以,應該係好幾個等候課室。而真正有考官坐陣的課室只有4個。我地係等候課室等左15分鐘就叫我地個號碼,心情輕鬆(我係)。SPCS姐姐引領去某個課室門口等一等,因為上一個家庭尚未完成,又等左5分鐘,到我地啦!
原來,藍組係三師會審,我有種感覺係見BOARD,政府工咁。
MSS 面試係兩位老師,比較CASUAL,似家長日。
三師會審係左右兩唐人(面試之後朋友話其中一個係副校),中間係外籍人士(面試之後朋友話我知係 HEAD OF ENGLISH 喎)。 我地係左右家長,中間係阿女。
枱上有計時器,一按鐘,外籍人士主攻問問題,頭盤:個人介紹,之後,環繞PROFILE同興趣問問題,途中,副校都有插入問問題。
中段時間,問情境題。(以下問題不是真實個一條,我改左少少)
假設你係環保署的署長,你會推行咩政策去改善環保?點解?
佢地從你的答案再問相關問題,係呢個位,確實係有點難度嘅。
尾段,枱上有一本ROALD DAHL的書,已經夾好某一頁,外籍人士叫阿女讀某兩段(好似),阿女係呢度讀得有點緊張。我唔知係我緊張聽唔清楚佢講咩,定係佢講得唔算好好啦(心個句我梗係覺得佢講得唔好啦)!
之後,外籍人士問左一兩個有關時間管理的問題。副校有問我地考左咩學校(3間),有咩OFFER(零OFFER)。
面試差不多尾聲。
而一位冇問過問題的老師係呢個時候問左最後一個問題:你地家長有冇問題?
我地相對而笑,我話冇咩問題啦,阿女應該今次充分表現出佢的想法架啦(明顯我硬銷自己個女)。
經過三師會審車輪問左15分鐘,阿女表現強悍,(扮)好有信心咁走出課室。而我地亦都鬆一口氣,因為心想暫時唔駛再被邀請去陪面試啦……
註:面試十成時間用英文回答。
面試個日係星期六,根據呢度指引,最快星期一會有電話消息。
而我,亦係之後的星期一收到個一個神奇電話(25XXXXXX),開心到去食譚仔放題獎勵一下自己!
PS 第一次係呢度寫POST,可能有啲錯漏,我會之後執下。 |