本帖最後由 khmama 於 13-4-20 00:29 編輯
填表策略精要
其實要填大抽獎既30個志願唔係咁難, 家長可以參考下面既方法:.
步驟一 點解家長會覺得選校表30個志願難填? 皆因份「中學一覽表」入面好似好多學校揀, 令人眼花瞭亂, 所以不知從何入手. 其實家長只要用刪除既方法剷走唔會選既學校, 剩番30間, 就已經初步完成, 只要決定咗邊30間, 要排位就容易好多. 刪除既方式如下: 1. 男仔要刪去女校, 女仔要刪去男校 2. 從下載區下載「2013大抽獎各區學校排位」 3. 如果係band1生, 就將band2B至band3C既學校全部刪除. 如果剩低既學校總數唔夠30個就揀幾間學位較多既band2B. 4. 如果係band1邊緣人或band2生, 就先選一間band1C既學校, 然後刪除其餘band1學校, 再刪除band3B至 band3C既學校, 睇下夠唔夠30個, 當中唔鍾意既學校都可隨意刪去. 如果唔夠30個, 可以加band1C或band3B既學校. 5. 如果係band2邊緣人或band3生, 就刪除band1, band2A及band3C既學校. 如果多過30個, 就刪去部份band2B, 唔夠30個先加入band2A, 最多搵1間band3C包底.
步驟二 甲部填表唔限地區但好少位, 係根據全港banding去抽, 只需選3間唔差過乙部第一志願既學校就可以啦. 因為甲部中咗獎就冇得抽乙部, 有o的家長唔識填, 以為要填得好似乙部咁穩陣, 填咗間差既結果錯失乙部抽獎機會. 如果真係填唔到3間, 可以留空, 唔使勉強填. 有o的考生乙部一定抽到入直屬/聯繫中學既, 因為band1生少過直屬/聯繫位, 咁甲部第一志願填咗直屬/聯繫中學, 其餘兩個志願就唔好填. 不過亦可以考慮搏至top既學校碰運氣. 至於區內band2生, 有機會係全港既band1生, 尤其係強區會有呢個情況, 咁就要利用甲部搏入band1尾學校.
步驟三 至於乙部填表其實分為3個部份: 選校, 執雞同包底. 選校既意思係指選擇頭3志願. 家長必須要清楚遊戲規則係講運氣, 除此之外, 亦取決於區內各band學校既數目, 所選學校有冇直屬/聯繫小學, 學校學額數目, 男女分配等等. 雖然抽獎唔分band頭,中定係尾, 但係程度唔適合既中學, 搏到都未必係好事, 要小心去選擇. 當然校風亦係其中一個重要既考慮因素. 各區都有熱門既中學, 如果有直屬/聯繫小學既, 競爭會較大, 因為小學既band1生多過直屬/聯繫位的話, 就會同區內既band1生爭非保留既位. 如果選擇男校或女校, 亦少咗人同你去爭. 第一志願可以選一間最心儀又合適既學校, 既然係靠運氣, 就唔需要太多顧慮驚個number唔靚. 第二志願要比第一志願較次既本區學校或他區學校, 但千祈唔好選o的好熱門既學校, 因為部份學校抽完第一志願已經冇位比第二志願抽. 第三志願又要再次之. 大原則係3個志願抽到邊一個你都唔會去叩門, 如果抽到第三志願間band1尾你會唔鍾意走去叩門既, 倒不如搏一間他區你會滿意既學校. 當然你唔介意騎牛搵馬又作別論.
|