Form One 仔手記
|
我是一個普通的中一男學生,屋企係普通家庭,一家四口和賓賓,我有個家姐都係讀中一。
|
升中放榜前
|
媽咪好緊張,煩惱點樣幫家姐揾名校,佢話家姐top band1 喎,唔好嘥咗佢嘅人才,周圍問邊間名校好啲,校風點?成績點?貴族?幾多人去爭?媽咪好有心機畫咗啲圖表比較啲乜嘢優良率同埋每年乜嘢尖拔喎。至於我呢,好似係band1 尾卦,媽咪話我唔使望入到名校,佢煩少啲喎!
|
升中放榜後
|
成家都好開心,阿爸媽咪家姐如願以償,家姐入到果間佢哋夢魅求嘅名校,我也開心,因為升中學啦,終於大個仔,媽咪話我果間雖然唔算名校,不過天主教中學無咁易學壞喎。媽咪話要獎勵吓,帶我哋去出咗兩部iphone4,我好開心呀…點知,原來祇是畀家姐,媽咪話家姐咁爭氣抵獎佢,我就用家姐舊果部手提電話,另一部iphone4媽咪攞咗去放咯,佢好得意咁笑笑口話賺唔少添。失望?係都唔係第一次,好多時都好似好無奈咁。
|
家庭
|
阿爸成日返咗大陸做嘢,好少係屋企同理我和家姐,佢話做工好辛苦,有時係屋企唔係瞓覺就食煙,老師話食二手煙會短命,我真係驚我會短命過佢哋。我覺得媽咪好叻,佢啲數好精,反應好快,聽佢同人傾計話炒股票賺幾多,去邊度買嘢有優惠,連點樣買法會着數啲佢都講得頭頭是道。家姐讀書好叻,佢記性好,學嘢快,媽咪讚佢一點就明,我讀書就一夠雲,我唔係懶,都想成績好啲,我唔識問家姐,佢話乜你咁蠢,咁都唔識,叫我唔好阻住佢;咁我咪問媽咪,佢同樣話乜你咁蠢,咁都唔識,叫我去問家姐,我好無奈。仲有個賓賓,佢做家務,接送我哋放學呀咁囉,我唔鍾意佢成日講電話,不過,有時返學放學,睇到佢咁矮左右膊頭孭住兩個大書包好辛苦咁,我都想自己孭番,不過佢話媽咪會鬧佢,算啦。媽咪仲同我哋講,佢諗住換賓賓,叫我哋唔好出聲住,我唔係幾捨得,問媽咪,佢照顧咗我哋小學幾年,點解要換?媽咪話我識乜,再續約嘅話將來要畀多啲錢送佢走,乜嘢長期服務金,佢話賓賓係屋企嘅工人啫,叫我唔好咁多事。
|
中學迎新日
|
除咗賓賓,成家人一齊去到家姐間學校嘅迎新日,媽咪話帶埋我嚟見識吓,學校真係好大,好多人,個個學生都俾大班屋企人圍住,影相,連賓賓都有幫手,阿爸媽咪仲話,名校係唔同嘅,你哋睇吓啲老師,安排得幾周到,笑得幾親切,校風幾純樸,我覺得無乜特別,咪一樣笑笑口咁咯,大人講嘢細路千期唔好駁嘴。當校長在台上好嚴肅咁致辭,媽咪個電話突然響起,我真係瘀到爆想揾個窿捐落去,佢仲繼續講咗幾分鐘添,我真希望我自己係分開坐。
媽咪同我去到我間學校嘅迎新日,媽咪話附近環境都幾雜,返學放學小心啲,又吩咐我第日唔好講咁多屋企嘅嘢畀同學知,相比家姐的迎新日這裹少咗人,父母一齊嚟咁囉,有個教會衫嘅人行埋嚟攬住我膊頭,嚇我一跳,佢攪乜嘢,連阿爸媽咪家姐都好耐無咁樣攬住我,佢笑笑口話佢係校長,佢希望我哋唔好嫌學校設備舊,希望同我哋做朋友,希望我哋新同學今日開開心心咁行入嚟呢間學校,他日畢業一樣開開心心咁離開呢間學校。我突然覺得有人關心我,仲有點温暖嘅感覺,媽咪就話呢啲學校比家姐間真係差啲,連校長都要做埋迎賓,但我好開心,好想即刻返學。
|
中一生活
|
家姐今日放學好嬲,佢話個test輸少少做唔到全班第一,佢最唔服氣係攞第一果個同學,之前佢唔識家姐教過佢,媽咪話家姐點解咁蠢,人哋唔識問你,你咪話自己都唔識囉,家姐嘈住要揾補習社,佢話唔公平,啲同學好多都返補習社,媽咪即刻去幫佢揾。我問媽咪我成績麻麻,可唔可以同家姐一齊返補習社,媽咪話我成績唔好,補習咪嘥錢咁話。我真係攪唔清楚,唔係話成績差先去補習咩。我間學校派咗一叠教會捐款獎券,媽咪話買100蚊好啦,仲話啲教會最興呢啲嘢,唔中獎都要留番票尾俾阿爸報稅。不過媽咪上星期先捐咗1萬蚊俾家姐間學校擴建康樂設施,佢仲話呢啲錢唔慳得,寒寒酸酸其他同學、家長會睇唔起我哋,而且兩年後落成,家姐還可以用4年,1年2500蚊好抵,我都話媽咪計數快過我用計數機啦。
|
朋友
|
我嘅新朋友坐隔離位,除咗呢處校長和老師,佢係第一個等我講完嘢先出聲嘅人,所以我想同佢做朋友,係屋企我講嘢無人會聽入耳。我哋仲未收到正式學生八達通,放學我會同朋友仔一齊搭巴士,佢用一張臨時學生八達通,搭巴士要收全費,我叫佢學我咁用小童八達通,收半費,佢話佢爸爸教訓人窮也不可以拋棄氣節,佢滿咗十二歲唔好呃人,我問媽咪我都十二歲啦,想用臨時學生八達通,佢倒轉頭鬧我,話要用小童八達通直至個樣唔似為止。我而家唔會同朋友仔一齊搭巴士,我驚佢鄙視我,我好珍惜這份友誼。
|
環保
|
我今日係禮堂對住好多人講中學生如何為環保出一分力,校長老師同學好多掌聲,我第一次有咁多人讚我,我真係好多謝佢哋,我會再努力,我好想同屋企分享,不過和家姐相比,我諗媽咪都唔會當係乜嘢咁叻,算啦,我自己開心咪得囉。今日放早,媽咪叫我去等家姐放學一齊去食晚飯,學校門口有家長、賓賓幾多人,最討厭擺滿咗大大架啲車,噴晒啲廢氣出嚟,企係學校門口好難呼吸,啲人真係自私,一個人坐咁大架車仲開住冷氣擋住個門口,啲學生都巳經有車代步仲要停正係門口,行多兩步都唔得?我見到都有好多學生行去搭巴士,咁先至環保。家姐放學出嚟,佢叫我以後唔好着住件校服去佢間學校門口等佢,我無應佢,我係學生着住校服有乜嘢奇怪啫。
|
搬屋
|
聽到阿爸媽咪嗌交,阿爸話嫲嫲想嚟住一陣,媽咪話點解唔去阿叔屋企住,媽咪話阿叔屋企嫲嫲都有份出錢買,所以住都應該去阿叔度。唔知點解,婆婆成日都嚟住,媽咪成日話婆婆重男輕女,分身家都祇分畀阿哥,不過佢仍會孝順媽媽。我哋成家搬咗屋去新屋,媽咪話嘅豪宅,屋企細咗好多又好逼,交通又麻煩,要搭邨巴去港鐵站,我好唔鍾意,不過阿爸媽咪家姐好開心,媽咪仲話,豪宅即是豪宅,啲住客睇落都高尚啲,會所又夠豪,佢唔再怕傾計俾人起底喎,係咪高尚我咁細個唔識分別,不過啲保安叔叔就由頭睇到落腳望住我哋,返學放學嘥多咗時間搭車,屋企地方又細咁多,出聲呻實會被佢哋鬧,算啦。
|
電視
|
屋企個電視機有四十幾吋咁大,好似燈咁,有人係屋企就會開着,家姐成日同我爭電視睇,佢要追睇英文台果啲片集,佢話唔睇會搭唔到同學嘴,又話我shallow睇埋啲義海豪情,好在八點半無撞時間,如果唔係我點夠家姐爭。其實我唔係睇阿醒哥,我最鍾意睇係排骨仔呢個小人物,佢成日被人蝦,俾人睇唔起,但仍然堅持生活落去,而且知恩圖報,我覺得自己有啲似佢。
|
未來
|
校長同我哋講,人非完美,所以我哋要不斷改進自己,我都知道我自己和家人都唔完美,阿爸媽咪雖然錫家姐多啲,但佢哋都錫我,我係最細有好多嘢唔識又唔知,所以現在應該專心讀書,我好開心讀依間中學,我發覺自己唔係媽咪同家姐話咁蠢,我跟住老師教嘅方法,我發覺自己進步咗好多,家姐話佢人緣好,facebook有300幾個朋友,佢叫我學吓佢,我覺得佢哋成日係到讚好幾無聊,我自己都有一個朋友仔,佢係學校成日都幫我,我唔會貪心,有一個咁好嘅朋友足夠啦。未來有好多嘢要做,學習,不斷學習啦,我有一個目標,希望將來我畢業時,阿爸媽咪家姐會以我為榮。
|
2010年10月
|