催谷學生保飯碗（左丁山）

elbar

話說兩位年青名校老師被派往其他中學監考中三TSA，發現一間Band1中學與一間Band3中學嘅學生在守規矩、禮貌與考試成績方面有好大差異，於是知道家長拼命為子女升中揀名校，係有理由嘅，同時亦慶幸自己夠運，可以在好學校搵到教職，唔駛對住一班成績差嘅學生；但佢地亦遇到另一種壓力，就係名校「怪獸家長」特多，「虎媽」碰口碰面都係，教書時與執行校規時，要特別小心，否則不時會被校長召見：「唉吔，乜乜家長又投訴你嗱！」


教師A有位大學同班同學教師B去咗一間大概可算係Band2嘅學校監考英文，教師B無意中見到該校有選中考TSA嘅學生人人揸住一張紙，個個細細聲背誦，而英文老師一見到教師B就閃身而去，教師B心諗：「該校學生一定係臨急抱佛腳，考試前仲要背note嘞」，不過呢啲TSA試邊度有得背㗎，老師都係受到上級壓力，臨陣仲要催谷應試學生嘅啫。教師B監考過幾間不同學校，據佢經驗所得及與一啲讀Dip Ed.嘅同班同學交流過，知道一啲平時TSA成績在「邊緣地段」嘅學校仲有一樣「蠱惑招」，就係應考之日，一啲平時成績差嘅學生「被放假一天」，避免佢地被隨機抽樣抽中入班房考TSA。


中三考TSA情況如此，小三TSA係小童應考，唔知是否同一情況？總之不同學校嘅水平相差可以好大，所以學校對考TSA或以後BCA嘅態度大大不一樣，譬如教師A間名校根本對TSA不屑一顧，完全冇贊成或反對意見，態度係：「咁易考嘅試，駛乜反對呀？」但係一啲辛苦掙扎嘅Band3學校就為TSA擔驚受怕，誠恐被教育局利用啲數據嚟整治學校或甚至乎導致殺校，校長老師職位不保！現時左丁山以為非名校老師之最大恐懼就係失去飯碗，收生不足學校經常要調整教師名額，會由1個全職教師縮減到0.8個0.5個之類，去到暑假校長就為此感到頭痛，教員室內傷感之至。教育局話香港中小學教育開支龐大，每間學校嘅經費開支睇得好緊，在Band3中學教書嘅老師，話冇心理壓力就係假嘅，如何脫離Band3爬上去Band1保證到收生容易，職位又安全？只得一招，就係拼命催谷學生考好公開試，吸引到家長送子女來入學！教育口號還口號，最大現實就是香港家長，只重視學校公開試成績排名，其他一切多餘！




左丁山