理大教中學生做手機民調 近半長者對車上低頭族睇唔順眼

elbar

【明報專訊】理工大學社會政策研究中心趁暑假舉辦咗「中學生民意調查體驗工作坊」，50名中學生親自設計同做一個嚴謹嘅全港電話民意調查。同學仔設計咗一個「了解香港人使用手機態度」嘅研究。結果發現95.7%受訪市民都有用智能電話；有20.7%市民表明自己「機不離手」。


50名中學生分別來自9間中學，理工大學社會政策研究中心話，舉行工作坊係希望讓同學更了解科學化、嚴謹同規範嘅社會調查，為日後通識教育課程做專題研習打好基礎。同學由教授同導師指導，一手一腳設計調查題目、問卷、擔當訪問員做調查、分析結果，同埋發表研究報告。


今次調查喺本月4至11號進行，以隨機抽樣方式用電話成功訪問咗514名15歲或以上嘅香港居民。調查發現有91.4%受訪者會喺坐公共交通工具時不停低頭睇或玩手機，但原來有45.2%長者係唔接受呢個行為，調查話可能係部分乘客過於專注手機，忽略咗讓座或讓路畀有需要嘅長者。


雖然話科技拉近咗人與人之間嘅距離，但唔少「低頭族」喺社交場合「機不離手」，調查發現有66%市民唔接受其他人同自己食飯時，不停低頭玩電話；另有83.2%市民唔接受同人面對面交談時，對方會低頭玩電話。調查認為，喺上述場合分心睇手機，好可能會忽視對方嘅說話內容，或者畀人一種唔尊重嘅感覺，建議大家唔好因為沉迷用手機，而忽略身邊嘅人。

linrongyao

最麻煩是,人們看手機時, 很多時站在通路口, 防阻進出.