三年制四年制（左丁山）

elbar

http://hk.apple.nextmedia.com/supplement/columnist/左丁山/art/20131010/18456897


香港七間大學、一間教院之中，除了香港中文大學係雙語大學，可用中文（普通話與廣東話）教學之外，其他七間理論上都係英文大學，以英文為官方語言及教學語言，唔應該用中文教書（中文中史等除外），道理就正如教育局不准EMS（英中）學校以廣東話上堂一樣，但實際上，如果班上學生全是華人，教授又是華人的話，有幾多課程係真正依照大學教學語言所定，全部用英語授課，左丁山都幾懷疑。

不過教學語言用甚麼，關係不大，左丁山讀新亞年代，絕少老師用英語授課（除咗英文科），幾乎全部用國語，記得一位喬林松博士自紐約回來，教會計學原理，上課用濃厚上海口音嘅所謂國語，有時簡直係講上海話，全部同學聽唔掂，卒之佢話：「我講英文好唔好？」梗係好啦，佢一用英語教書，就生動活潑好多，教會計冇得頂，直情係名師，結果班上同學後來有幾位成為大機構財務董事。

當年係四年制，大家都唔知讀得幾開心，1988年政府強迫中大四改三，同學到立法局外靜坐抗議無效，被迫改制，中大人為之痛心疾首，因為當年港大校長王賡武任內曾出過一本小冊子，批評港大生英文不佳，難以接受英式三年大學教育，要求加多一年，但政府為咗慳錢，索性逼中大改制，向港大看齊為三年，弄出一場大風波！

蘋果日報記者無知，十月四日竟然夠膽講「三改四令本港大學質素降」，大笑話也，其實二十年來之三年制生產出一大批追不上水平之大學生，拖低本港水準就真，讀少一年大學就梗係吃虧啲嘅啦。周文耀、陳婉瑩、吳靄儀、詹德隆、科大衛一代之港大生，當然係三年制，但當時入得到港大嘅學生，少於1%，那裏是今天的料子？中大生沙膽虹是中大四年制產品，將佢同今天之三年制新聞系出身記者相比，沙膽虹零零舍舍高出何止一皮，早在八十年代，沙膽虹已是知名活躍於中環嘅財經記者！

寫到呢度有位校友打電話嚟：「港大走四十二年前舊路，請英國人做校長，學生唔反對，中大將來可唔可以請洋人做校長？」左丁山之直覺反應係唔可以，因為中大創校之前，港英政府想搵英國人做中大校長，錢穆先生極力反對，與富爾敦勳爵爭論，結果港英政府同意搵華人做中大校長，有此因由，中大幾難違反傳統。  


左丁山

ANChan59

多出一年讀甚麼才是關䭈！