當你唔再係Fresh Grad……

elbar

一年又過去，數數手指，如果大學畢業後能順利在3個月內見成份工，現在應該過埋Probation，開始緊打工仔的生涯。
當「Fresh Grad」身份漸漸遠去時，你會發現6個心碎事實︰

1. 人際關係比工作更複雜
別以為每個辦公室都好似8點鐘電視劇咁愛好和平。作為新薯仔，試問又點會知同事A與上司B不和，同時又與主管C互督背脊呢？若工作上要因人事關係而避重就輕，驚呢樣驚嗰樣，都咪話唔煩。

2. 付出與收入不成正比
死做爛做，期望年尾有人工加有花紅派？是咁的，作為基層打工仔，人工每年大約平均只有4%至5%增長，以起薪點$1.3萬計算，一年加大約幾百，同「上車」仲有一大大段距離。

3. 老細覺得你咩都識
要Fresh Grad第一日返工咩都識就太誇張，正確來說，係返工第2日。按照老細的「常」理，工作所有大小事務應該係第1日返工以後就「一理通馬國明」。如果答「唔知唔識」，可能會換來一句︰「你係大學生嚟架喎！」

4. 放假同瞓覺屬奢侈品
Fresh Grad曰︰「返工頭一排都無乜嘢做。」少年，你實在太年輕！
須知道，通過試用期後就見真章，公司事無大小都會關你事。你會發現OT同生老病死一樣乃人生必經階段，最後只能用週末加僅有的年假吊吊命。

5. 返工唔知為乜
一個字︰錢。小時候講「我的理想」，投身社會後卻只得「老細你想」。有幾多人能寓興趣於工作就不得而知，但市面上大部分打工仔大多是為兩餐，要解答「返工的意義」，分分鐘仲難過小三TSA。

6. 有一種幸福，叫返學
細個好想做大人，但大個咗又好想做返細路。工作幾年過後，不難有種「突然便老去」的感覺，於是又想重回學生時代，重拾無憂無慮的讀書生活。至少，唔使煩買樓生仔結婚。

投身職場不久的你或許會發現，打工仔是社會中最麻木的動物。要保存靈魂不易，最重要是做好自己，對得住自己。