幼園教育話免費 其實到喉唔到肺（東方功夫茶）

elbar

出得嚟行，預咗要還。本屆政府任期進入倒數階段，留下滿地空頭支票，標準工時、全民退保……幾乎冇一樣嘢兌現。唯獨落實免費幼稚園教育政策，算係一項政績，點知又係做啲唔做啲，到喉唔到肺，你話係咪吹脹吖。


係咁嘅，全面落實免費幼稚園教育係本屆政府嘅施政承諾，教育局前日終於公布具體安排，參加計劃嘅半日制幼稚園，每名學童可獲資助三萬三千多元，而全日制及長全日制則分別獲四萬三千元以及五萬三千元資助。


呢嗱嗱嗱，不患寡而患不均，同樣係小朋友讀幼稚園，港府津貼額度居然搞雙重標準，你話係咪大細超，刻意製造不公平吖。至弊嘅係，原來只要半日制幼稚園嘅資助唔能夠全數支付租金以及教師薪酬等開支，經當局審批後仍然可以收取學費，上限每年近一萬元，連教育局都承認，新計劃下仍有多達兩成半幼稚園要收費，「免費」係呃人嘅。至於全日制及長全日制幼稚園嘅所謂資助，更加可以用「搵笨」嚟形容，家長要同政府共同承擔成本，學費上限更高達每年兩萬五千多元添。


講真，十五年免費教育講咗N咁多年，港府一直賴得就賴，拖得就拖，市民怨聲載道一啲都唔出奇，家陣千呼萬喚始出來嘅，居然係唔湯唔水嘅三不像A貨，家長更加冇法子接受。正如有教育界人士話齋，唔少半日制幼稚園面對租金、薪金等高昂成本，要達致免費教育並唔容易，當局估計七成半學校免費明顯過分樂觀。學校計唔掂數咯喎，一係將成本轉嫁家長，一係將貨就價，裁減教學人手又或者主力聘請新入職、經驗淺嘅幼師，到頭來咪又係犧牲學生利益。


話時話，香港地百物騰貴，養育小朋友唔容易，加上好多雙職家長手停口停，冇時間照顧小朋友，喺咁嘅情況下，對全日制及長全日制幼稚園嘅需求極大。呢，早排有團體調查發現，絕大部分受訪者認為仔女入讀非全日制幼稚園會影響自己同配偶工作，唔接受淨係半日制幼稚園免學費。民意彰彰明甚，港產官僚係聽唔到定係故意與民為敵，大家心照喇。


真係諗極都唔明，增加幼兒教育資助唔係政治問題，社會早有共識，家長舉腳贊成，斷估班政客點鍾意搞事都好，都唔敢冒天下之大不韙阻頭阻勢，政府以此爭取民望，就手不過，咁都唔識做，簡直愚不可及。


冇計喇，鬼叫呢個政府無能兼縮骨咩，明明坐擁金山銀山，硬係要喺教育方面斤斤計較，呃秤取巧，港府民望跌跌不休，施政寸步難行，都係自己攞嚟嘅咋！

shadeslayer

這功夫茶咁都講得出？現在12年免費教育有無要錢的小學中學？