小一面試已近尾聲，真是百感交集

SK11

如不用叩門，13－14的小一面試已近尾聲，回顧我和阿仔年幾以來的努力，持續作戰、屢戰屢敗、屢敗屢戰...... 多難熬啊！終於挺到今天，雖然沒有碩果纍纍，但我已經感恩了，至少阿仔有offer 了。

心裡總結過去這段日子的經驗，真是百感交集，有見到阿仔累極還在做練習的心痛、有見到阿仔由“發夢”變到“醒少少”的欣慰、有上不完的各類補底課程和面試班的疲憊、有撲各個學校簡介會的緊張...... 有和阿仔一起準備比賽的角力，有見著他得獎的喜悅，但更多的是他努力後仍失敗的落寞......那些填不完的報名表、問卷，寫到冇曬位的行事曆, 每天用25小時都做不完的 portfolio...... 每次去面試的千叮萬囑、等信的無助、開信的迷惘、落選的痛苦無奈......後悔自己某些做得不夠、做得不好、沒提他這沒提那..... 還要時刻隱藏自己的緊張，免阿仔feel到太多壓力，還要安慰、鼓勵他不斷做好...... 闖過了一關又一關，無論失敗與成功，我和阿仔都已竭盡所能，累到沒有力量追求更高的了.....這個遊戲太難玩，安慰自己神早已有他最好的安排 ，盡了力，安於現狀、滿足就好。不知你們同意否？

雖然“如果重來，我會做得更好”，但我已無力重來。

四隻貓

看樓主所寫, 回望一下, 我也感慨良多. 百感交集.
儘管大家得到的結果未必如意, 大家都努力過, 付出過.

仍記得那小心奕奕地填寫的報名表; 那每天等信的心情(信箱突然變得無比重要); 在公佈結果那幾個失眠的夜晚; 看到別人收取錄信而自己卻收到不獲取錄通知, 一邊要鼓勵自己, 一邊要坦然地恭喜別人那種矛盾的心情; 還有收到心儀學校的取錄那一刻的眼淚(可幸有這心情的體驗)......
我沒有幻想過假如再來一次, 因為明年就到細仔考小學, 很快我又要再體驗一次, 而且競爭應該會比去年更激烈吧.

cmt1010

我都經歷完這場戰鬥，起初以為阿仔幾醒，面試冇難度，但最終最心儀的沒有offer，好彩次心儀的就有。但當中有一些體會，明白到最緊要是他讀得開心，可以一直維持到那份求知，求學問的興趣，將來不愁沒學問；反之為學校面試而咁早就填鴨般迫他學這樣，練那樣，將大人預定的智識灌入他的脳中，只會毀了小朋友的創意、自我思考的能力。

這個年紀的小孩應該讓他們盡情快樂，盡情探索，相信他們將來可以成為有學問，有能力的人而非只是一個有智識的機器。

SK11

四隻貓：大家都感同身受啊！未經曆的難免半信半疑。希望你在有過去一年的經驗下，休息好，明年可和細仔做得更好啦！加油啦！

cmt1010：你說得對，我們無論怎急，也要顧注阿仔份興趣。去年某個階段，我沒注意這點，差d 令阿仔提起面試都煩。幸而身邊有老師提醒，我刻意放鬆後才令他重來衝勁。小朋友是要學習，但我們都要盡可能讓他們愉快地學習。只有愉快，才能事半功倍啊！

cy664

原帖由 SK11 於 13-04-02 發表
如不用叩門，13－14的小一面試已近尾聲，回顧我和阿仔年幾以來的努力，持續作戰、屢戰屢敗、屢敗屢戰...... ...

你的文采太好了，我的眼淚又一次失控的落下！
可幸的是，我的兒子也取得offer.雖然不是最心儀的，但阿仔已盡力了！
只是我總覺得自己未盡力去train阿仔，所以入不到最心儀的學校！

SK11

cy664：不要太責怪自己了，雖然有時我都難免像你那樣想，也會那樣難過。但更多的是我都知自己是盡了力，只是付出和得到有時好難成正比。就算天時地利人和...... 在這場小一戰中都顯得不夠，間間幾千人考，幾次面試後才收那一百幾十人，這樣的比例，真是難為了阿仔和我們！我覺得阿仔雖不是資優，但都比我當年K3時“一夠飯”o甘好多了。努力下還沖到些獎項，這確實還給過我希望，但最後，差d乜都冇，真系好驚好驚...... 不少外國的朋友說難以理解香港那樣變態，做家長和幼稚園的學生那樣大壓力...... 唉，誰想這樣？我絕對不希望自己是怪獸家長，但不知幾時，可能我們都不自覺地成了怪獸家長，恍然大悟時，又再想办法放鬆....... 競爭的激烈主導了我們的思維，我慶幸這一刹，我可以放鬆些了，因有offer 了。但我知有些家長也是未有offer, 有offer但內心仍是百感交集的家長相信亦還有很多，在這兒，我只想抒發一下。你們讓我覺得不孤單......

WillBmama

見到呢個題目，真係百感交集，過去年幾兩年的經歷即時勾起。呢個遊戲真係不容易，亦自問無膽量再玩。之前為亞囝裝備，時刻留意各校網站，經常檢視著行事曆，從未如此著緊信箱，為了等結果徹夜也睡不好，亞囝入到final及第3輪面試的喜悅，從沒想過不行的失望，太擔心忍不住哭出來，收到offer的寬裕。
與亞囝一同經歷這遊戲，也是一個很好及令我重新思考什麼才是對孩子最好的。相信上天已為孩子選擇了合適他的學校，願孩子享受快將來臨的小學生活。

hadwinboy

原帖由 SK11 於 13-04-02 發表
如不用叩門，13－14的小一面試已近尾聲，回顧我和阿仔年幾以來的努力，持續作戰、屢戰屢敗、屢敗屢戰...... ...

那麼便選擇一條龍的學校吧! 6年合一合眼便到，正確點，是5年，因為5年級已開始谷呈分。如果你考小一已經這麼大壓力，考中一時只會更大壓力。

喵媽

同大家一樣真係百感交集...
記得K2開始搜集資料, 仲開個file mark低晒想考學校既open day, 簡介會, 收表月份等...不停留意學校網頁, book簡介會, 填表, 搵舊post睇面試模式, 整portfolio...一整年同阿仔努力睇故事書, 考好評估希望拎學業獎, 參加比賽, 教佢常識數學, 一般應對...帶阿仔去面試...而最辛苦係等結果...開信箱...回想起真係覺得好辛苦...真係人都老了及滄桑了幾年...
而且阿仔只在本區讀幼稚園, 雖然學校程度算深但不是名幼, 都唔知佢同讀九龍塘名幼既小朋友會否有很大距離, 所以都不敢有太大期望!! 點知, 好快收到心中2線學校rejected...連waiting都冇, 真係好驚...好驚全軍覆沒...直至收到第一個offer, 個心先定下來! 最後居然係初初覺得有機既學校全部rejected, 收既學校卻是之前沒想過會考到的...所以好多野真係好難講, 亦唔係自己可以控制同預測...好彩係阿仔入到心儀既學校, 真係一個奇妙的經歷!
除了幸運地入到心儀學校, 最感動是我們一家一齊去努力, 一齊經歷, 大家互相支持, 仲見到阿仔原來都會為自己而努力...真係一個好好既回憶!!
祝願大家的小朋友能在小學讀得開心, 喜歡學習!!

知道仲有人未有offer, 不過根據身邊朋友既經歷, 以及在EK所見, 好多時在最後都會有offer! 之前聽一個前輩說, 只要一丁丁點的機會都不要放棄, 最後一定入到不錯的學校, 千萬不要灰心, 加油!!

LOVELY-BABE

原帖由 hadwinboy 於 13-04-02 發表
那麼便選擇一條龍的學校吧! 6年合一合眼便到，正確點，是5年，因為5年級已開始谷呈分。如果你考小一已經這 ...

言之有理啊！
而我也不是不緊張阿仔前途，不過我時刻提醒自己不要過了火位，沒去摧谷，與以往一樣，重點只放在攞多些生活體驗，訓練唔怕羞性格和品格培養上，學術方面沒有因考小一而狂操練，我也沒有將一些無謂壓力建諸在我及阿仔身上！
人生路漫漫，放開點放鬆點，考小一只是一個平常不過的起步點！

cy664

一篇篇有血有淚的回憶，引證大家的努力。
由入名幼為博入名小開始，足足三年的部署，聽起來人也覺得累！但我們也經歷而且做了！只不過不是人人入到名小!
但想深一層也只不過是不想六年小學後再博多一次！
有時都覺得好笑是，阿仔考小一的部署好像比當年自己會考及入大學還精心部署，只不過主角係阿仔、不是自己罷了！可笑的是自己的路也未必完全控制倒，何況係阿仔呀！
雖然話條條大路通羅馬，但我地依代人都經歷過，唔想我地D仔女行崎嶇的路，但另一面又唔想做直升機家長，思前想後都係要跟考小一的遊戲規則去走，谷和教也不過是一缐之差好了！
見到阿仔依一年的急速成長，不得不相信經歷及訓練的確迫他們去成長，也是一件額外收獲！大家努力，小一只是一個開始罷了，還有漫漫長路！

little_yolky

hadwinboy 發表於 13-4-2 23:19
那麼便選擇一條龍的學校吧! 6年合一合眼便到，正確點，是5年，因為5年級已開始谷呈分。如果你考小一已經這 ...

但我剛問過2012中學爸爸喎, 佢話小朋友考中學係靠自己實力多啲, 父母只係要幫佢哋做profile, 同埋一齊驚, 無咁大運氣分喎。即係, 如果小朋友有實力, 家長可以坐响度唔駛做嘢。

branma

唔好話考小學煩，考中學同樣煩惱，不過家長們比d信心小朋友，我覺得讀小學和中學一樣，真的看緣份，命中註定了，希望大家放開一點，唔好比壓力自己和小朋友

hoihoima

回復 SK11 的帖子

It's time to relax and plan for a great summer holiday to reward you and your child!

babymouse_to

我個仔今年k2, 細仔，冇任何公開比賽獎項，因為他比較慢熱，對陌生人比較害羞。最近我也開始在BK留意一些揾小一资料。看見這個post, 我都感受到那種百感交集的心情，雖然我場仗剛剛才開始、但已經很有壓力。我知道好多學校都著重面試表現，但係以阿仔慢熱的性格，我都不敢抱太大期望，因為知道性格是好難改的，所以成日提醒自己要隨遇而安，上天總有安排！

little_yolky

回復 babymouse_to 的帖子

係, 要calm down and pray。

你真係唔好唔信, 我囡今年考4間, 只有一間面試前祈禱, 就只中果間, 其他只有waiting list and reject。呢間唔係我最心儀, 但係最適合佢的。依家, 我諗, 學校係阿囡讀唔係我讀, 所以, 應該揀最適合佢, 唔係我最鐘意的。而且, 呢間有聯繫中學, 考中學時可以煩少好多。對嗎?

Chickee

SK11 發表於 13-4-2 14:49
如不用叩門，13－14的小一面試已近尾聲，回顧我和阿仔年幾以來的努力，持續作戰、屢戰屢敗、屢敗屢戰...... ...

雖然“如果重來，我會做得更好”，但我已無力重來。

--- 完全是我的心聲, 所以細果個, 我同佢揀了另一條路, 一條龍kg

Mukchilee

有時覺得最好又最想入的, 其實未必是最合適的......人常常都是做了塞翁而自己不知罷.

相信努力之後,成事在天, 日子會好過點!

反正人生仲長過馬拉松, 大家輕鬆下喇!