我仔仔2011/11/11出世。。

小咪食西瓜

你地啲小朋友2011年出世喎，應該係今年開始報PN，應該未開始IN的呀？細B我建議YORK，佢地早報早IN早收，你地早啲報收的機會大好多，就算唔收你PN佢都會收定你K1，咁你咪冇咁担心囉。佢地全年都收FORM的，我個朋友剛剛交左FORM。我小朋友係2010年9月B，今年會讀YORK PN。

小咪食西瓜

回復 caraman923 的帖子

約克

http://www.york.edu.hk/information1024.htm

要俾$30.

download左邊的form. 右邊的冇pn嫁

如果冇經濟壓力，這個係個好選擇。有好多人都覺得佢貴，不過細b其實可以當佢係一個保障先囉。如果考到其他你覺得好的，到時你咪可以有選擇囉，好過咩都冇。
我自己鐘意佢咩都安排好，連興趣班同公開考試都安排好，唔駛自己煩，而且公開試成績好，所以我會俾小朋友一路讀上去, 佢係我自己的首選學校。

我自己的經驗係細b報多幾間，其實好多只俾8月31日前出世的小朋友報名的，所以選擇唔多嫁，到考到心儀的咪唔駛再考囉。我小朋友考頭幾間都收左，我就冇再考了。
你可以試Think, 方方, 明慧, WILLIAM SMART, 慧中, 大坑東, ....都收細B的

小咪食西瓜

回復 ambj 的帖子

Sorry ar. 鰂魚涌我唔識，香港果邊我只係知北角民生同明慧收細B。

小咪食西瓜

回復 aokiwong 的帖子

現在已經可以報，我朋友剛剛報左。我上年考的時候佢好似分左3-4次INTERVIEW，最早報的會聽簡介會同IN先，亦會出左RESULT先，有剩的學位就第二批人IN，所以細B會啲報機會就大好多，我見佢都收好多細B，試下先啦！我上年INTERVIEW時佢地安排得好好的，唔需要等，會安排一個唱遊時段俾小朋友放鬆左先，好開心嫁。有唱歌，跳舞，玩波同動物接獲咁....之後上樓IN，一次IN 3組，獨立每個家庭IN，好快IN完，上次我小朋友IN果時，有一個小朋友唔肯坐又唔理個老師，老師就叫果個小朋友媽媽先帶佢去玩一陣先，IN左另一個小朋友先，之後再IN返佢，俾多一次機會果個小朋友，等佢心情好啲先IN，所以我覺得啲老師好好人。而我小朋友IN時因為只得1歲，仲未識講野，老師問問題佢只係指答案，老師仲同我地講，家長可以用日常生活的對話方法去引導小朋友完成問題。

小咪食西瓜

回復 aokiwong 的帖子

上年11-12月已經IN左到第三四輪了，已經冇太多位。
其實我明白你想講如果一歲唔夠去IN都唔知仲咩，我上年都係咁諗。但唔緊要的，啲老師會觀察你個小朋友的表現，好似我所講，我小朋友IN果陣都係得一歲，唔講野，都係咁。就算IN得唔好，YORK都會俾K1位你再下年讀的，你可以當佢係安全網囉。
你早報會好早就有INTERVIEW，但幾時就要睇返學校的安排。唔好諗咁多，我自己上年都係咁，小朋友係你估佢唔到的，雖然我個小朋友冇講野，但佢手指指咁回應老師，我自己覺得OK啦，而且就算唔OK，我地係細B，點都唔可以同大B比的呀，當自己俾$30去玩囉，唱遊時段唔計分的，所以玩得好開心嫁。

再講多一個經驗俾你知，我小朋友考另一間時，剛剛學行，佢好想行，GROUP INTERVIEW 時佢推住張椅四維行，冇理個老師，咁都收喎，奇怪。(我唔識人，打工仔)

我想講，我地做家長的只可以報多啲名，俾小朋友自己發揮，我地其實咩都做唔到，盡左力就算數。

好啦，講反你問的問題，YORK收幾錢？
我覺得都幾貴，原來小朋友讀書貴過讀大學。
書費(半年):7百幾
書包+SUMMER 校服一套+雜費(半年)+茶點(半年):5千幾
學費每月:4千幾(交十一個月)

咁第一次留位俾$660
第二次都俾剛剛講果啲錢，不過如果唔讀可以退返。

有啲JM計過話每月平均6千幾左右，我自己冇計過，因為仲未開始讀，HEHE........
咁我見同其他學校差唔多，間間都係咁貴，除非有學卷啦，但都要K1先有，PN冇得用。

最後，都係果句，報多幾間啦！加油！

小咪食西瓜

回復 aokiwong 的帖子

你可以試Think, 方方, 明慧, WILLIAM SMART, 慧中, 大坑東, ....都收細B的
同事個B係12月細B,讀開多多PLAYGROUP, 收返佢PN, 你都可以試下

小咪食西瓜

回復 aokiwong 的帖子

咁你試下考方方，地方舊左啲同細啲，但收好多細b，唔貴，好似3千幾一個月。
我小朋友interview 果日，6-7位老師分開6-7枱咁見每一個家庭，我見果位，都問過我小朋友問題，老師放左件野在枱面，咁我小朋友好順手咁拎起，老師見到就問我地，佢係咪習慣用這隻手，跟住mark低，之後見到我小朋友換手拎，又mark低，之後再問我地小朋友的發展, e.g. 食野，去洗手間，講野....
問完就同我地講話因為小朋友細，佢地唔會要小朋友做啲唔佢地能力以外的事，問左小朋友的發展同成就ok。

我仲以為唔收，但又收左喎，仲上午班。
我覺得佢有考慮過小朋友的成長，而唔係要所有小朋友考同一樣野。
你可以考慮下。

小咪食西瓜

回復 aokiwong 的帖子

我報左十幾間，只考左5、6間。咁果5、6間都收左，不過大部份都係下午班，得2間上午班。
我選YORK因為佢地英文好，咁咪唔需要出去補習囉。而且佢地提供課外活動，咁我咪唔需要自己出外找，而且在同一學校上，咁好似安全啲同唔需要左就右就啲時間。
從另一個角度睇我係一個懶媽媽，一站式的服務，我輕鬆啲，咁相對咪可以多啲時間同小朋友玩囉。
不過我講剛剛講YORK的課外活動，即係所的多元智能班，其實都係要到K2，仲要經過老師挑選的學生先可以讀。所以都係到時先諗啦，HAHA~
YORK的PN係可以直升的呀！

小咪食西瓜

回復 caraman923 的帖子

荃灣有2間方方，1間係海濱方方，1間係愉景方方，另你可考慮慧中，這3間都收細B，慧中係IN果日即時交錢有RESULT的。

方方九龍塘有2間。但荃灣果2間外觀新啲，九龍塘好舊。
THINK 唔同地區都有，最近你應該美孚果間，商場入面的。

小咪食西瓜

回復 caraman923 的帖子

YORK 係九龍塘。你上學校啲website就可以見到。
方方同慧中，你可以分別睇下EK啲JM點講，我見啲JM都話幾好，另外你問K1考唔考到其他學校，我諗冇人會答到你，因為INTERVIEW就好似六合彩咁，唔好有人話俾你知你一定中。不過咁，以數量計，有PN的學校少啲選擇的，到左K1，選擇多好多，好多人都會轉。考唔考到就要睇下你報名的是否好多人報囉。
都係果句，報多啲，學校點收學生係一個"迷"，報多幾間，如果多過一間收你，咁就左家長有選擇權。
加油！

小咪食西瓜

回復 mifu 的帖子

左邊先有得DOWNLOAD PN張表，係呀，我朋友交左表啦！
你去幼稚園一覽果邊，YORK果板睇下，我好似見有人話去INTERVIEW，不我唔知佢地講緊PN定K1(唔知係咪講緊今年呢)，YORK上年都好早開始IN。你交左表先算啦﹐佢會SEND封信叫你聽簡介會，再之後就INTERVIEW。你有咩問題都可以打去OFFIC問佢地，今年幾時IN我唔清楚。

小咪食西瓜

回復 takjor 的帖子

york 左邊係國際班，右邊係本地班。2種班的英文都係外籍老師教的，國際班就每日有普通話堂，而且班主任有一任係外籍老師; 而本地班就一星期一次普通話，班主任係本地老師。
pn 係國際班果邊的，但升k1時可以去本地班，老師會做評估的，家長自己到時可以同老師傾。
pn 因為冇資助，間間都差唔多係咁貴。york係冇學卷的，所以pn到k3都唔會有資助。
你幫小朋友選學校時要小心，就係有啲學校會由有學卷轉做冇學卷，所以除左舊資料，要睇下學校website有冇新update。
另外，仲有啲野要小心的就係: 學費收幾多個月，書費幾多，雜費包啲咩.....
錢銀要問清楚學校呀，一般收左你留位費$660係唔會退的，咁其他費用記得睇清楚有冇得退。
你可以睇下其他板，有啲jm話有學校pn的書費都2千幾，但係得幾本書。唔讀只可以退書唔可以退錢。
如果一早知道清楚，就可以有個心理準備。
我自己覺得YORK同其他冇學卷的費用差唔多，而且每樣收費都好清楚的，到最後唔讀，7月前通知又可以退錢，而且我見好多JM都會買2手書SAVE $$$。

大角咀你可以考學之國，但好多人考的哦。迦南你記得上佢website睇清楚，唔同分校的報名方式的少少唔同，有啲分校大細b的報名時間係唔同的。小心。