ADHD食葯問題...請賜教...(急!)

~仔仔媽咪~

原帖由 77777 於 09-6-9 23:03 發表
其實你阿仔從前都係一叫就聽會唔玩玩具??  我覺得你阿仔可能一路都有進步架啦.....又唔洗話因驚住阿仔整倒人而驚左同人地玩的....順其自然啦....查實我覺得如果一班埋面太多呢d小朋友, 又好擔心老師可唔可以控制倒.. ...

咁我仔又係不嬲好驚我唔開心好驚我嬲,又從唔會逆我意...亦未曾駁過我咀,但真係淨係對我先係咁,但佢對爸爸同老師就相反...會駁咀會鬧人會發晦氣甚至會打爸爸同老師,所以連老師都話我仔响學校對住老師時係惡魔,但媽媽一出現即刻變身做咗綿羊...實情係好定唔好,真係可圈可點囉..

都係架...有好多時我都覺得老師好辛苦,以前我就唔知,成日郁D下捉住個班主任係咁講個仔D問題,又成日捉住老師問我仔番學點樣...但之後開始收歛番,交得個仔俾老師,唔多唔少都要相信老師既能力囉!咁好似我地番工一樣,下下都有個人check住又成日問你做好未做得掂唔掂當架...你都會好大壓力同心煩啦,所以今年我真係放手俾老師處理,唔會主動過問,咁講真,老師有問題有難題時自然會搵家長講架啦.所以今年真係同學校關係好好,呢樣我都幾安慰.

至於同唔同正常小朋友玩,,,始終我都仲有餘悸,我仲未放得開同安心囉,有時依家我同個仔去D多人地方或者教會gathering,我一去到自然會有無形既壓力壓住我成個人,就算我仔嗰日好乖無周圍彈又無整親人,我都可以大壓力到差D喊出黎...都有朋友叫我唔好俾咁大壓力自己,但呢樣我仲未調節到囉...

~仔仔媽咪~

原帖由 77777 於 09-6-10 00:09 發表
其實我本身都唔係好鍾意找老師, 因為通常我有野要煩佢地, 又或者我都唔希望老師找我, 通常無mud事佢地都唔會搵我.....不過, 有時真係我唔搵佢地我係無辦法解決.....

你阿仔如果驚你嬲, 佢真係錫你同孝順先會咁.... ...

都明...咁講真我地班仔有咁多問題又係成日俾人投訴...基本上我地呢班亞媽見到亞仔間學校度校門已經驚到喊定先...係真架...次次夠鐘接我仔放學時,我真係好大壓力,成日都驚去到學校甚至未到學校,我手機已經響電話,好驚係學校打黎,好驚又係話我仔出事整傷咗人...就係我咁緊張,所以每次一接到我仔投訴,我幾乎一定會喊出黎,就算唔喊,當日全日我都會謝哂個心有舊烏雲痴住我囉...

我仔如果吾食葯,佢响學校又係越叫越走架!我叫佢都係好似聾咗咁,佢有佢周圍彈,我有我响樹邊叫停佢邊捉'貓'!反而係唔知點解得番我同個仔二人獨處時,或者响學校以外既地方時,佢就好易控制到囉!

唉...男人個個對住仔都衰心軟架!有邊個男人唔縱仔先得架!even我家嗰件會打仔既爸爸,之前咪又係三兩日唔埋,一响街昅到有玩具啱亞仔,就忍唔住手買番屋企黎冧仔...我仔沉迷超人、高達呢D玩意,咪又係嗰兩個父(我仔父親同我仔大舅父)所賜囉!嗰時我已經叫住佢地唔好無啦啦介紹D額外娛樂俾個仔,佢地兩條友仔又猛話係男仔都會鐘意呢D噃!結果我仔依家做咗電車男...當年叫我老公唔好買漫畫俾個仔睇,但老公又以俾個仔睇多D字認多D字為由,結果個仔中咗漫畫毒,D行為咪又多問題出現囉!依家我老公都知衰,都話後悔俾個仔睇漫畫而唔係益智書.

所以我地呢班亞媽,查實唔係淨係湊住一個ADHD仔,而係兩個!爸爸都係ADHD佬黎,我地一教要教兩份囉!我地都係原諒佢地把啦...無眼睇...

~仔仔媽咪~

原帖由 77777 於 09-6-10 10:31 發表
係呀, 我真係試過響阿仔間學校喊倒收唔倒聲, 其實阿仔一返左學, 我都好驚個電話響架......一見係學校打來, 我成個心跳左出來咁劑....通常都無mud好野架....

唉, 我隻c6都係未知衰, 阿仔本來唔睇電視, 係隻c6成日話 ...

我隻佬咪又係唔信邪,佢係都要等到個仔整番幾單大鑊野,佢至信邪咋!之前我隻佬咪又係話個仔無問題,猛話係細路仔都係咁架啦!依家個仔响呢一兩年間係咁俾野我地炭,咁我隻佬至腳震震肯聽我支笛咋!之前?佢係試過唔服氣走黎好寸好惡咁鬧我話我唔係呢個屋企既判官咁話!佢老板吖!我聽完勁火囉!唔啱你教喇!我自己閃咗去唔番黎唔駛煩個仔同你,我無眼屎乾淨盲呀!!!依家總算隻佬都開始聽話,呢次件事我隻佬都好知個仔既問題係源於佢,兩父子都係同一特質同一脾氣...依家我隻佬都似乎唔敢郁D下發癲發埋D怪脾氣喇.希望KEEP到啦.都係幫個仔啫.

~仔仔媽咪~

原帖由 77777 於 09-6-10 11:29 發表
唉, 我隻c6都重係響寸我個階段.....好c惡對我, 佢覺得自己係一家之主, 無理由比我話事.....同埋, 我隻c6係有一個特性, 佢係永遠唔會認錯law....

我阿仔之前係聽話d架, 不過, 有佢同我對抗, 阿仔都唔多聽話啦.....

...

唉...完全係我隻佬既style,不過我隻佬同個仔一樣,係對人惡,就係唔知點解對我硬係有D顧忌...所以最離譜都係嗰鑊咋!話我唔係判官!

我隻佬都係死唔認衰嗰隻黎架!佢最叻咪係扮聽唔到唔應我囉!同個仔一模一樣,所以我朋友都無講錯我,我係湊住兩隻ADHD仔...真係高難度~!

不過你都係要經常幫你老公洗腦架喇!一定要傾囉!如果唔係教仔成日隔離有個'好人'响樹同你爭仔,再唔係响樹明明個仔曳但讚個仔乖...咁樣真係好難教得到個仔囉!我教仔時,我老公都唔可以加把口架,佢就算企响我嗰邊,我地既習慣都係是但一方講完訓話完個仔,至輪到另一方,極少會兩把口一齊訓話個仔.費時個仔亂.

~仔仔媽咪~

原帖由 77777 於 09-6-10 18:01 發表
你真係明我心事, 我真係同隻c6成日爭仔, 佢永遠做好人, 我永遠係衰人, 重要日哦夜哦, 我一出聲, 佢一句躂我話佢想安靜, 一陣我閙阿仔, 佢會閙返我轉頭, 其實我個大仔係難教過個細仔好多, 有時我真係唔想理...根本理 ...

梗係明...因為我同隻佬嗰邊d屋企人都有幾個係咁,嗰d咪仲慶,個仔又唔係佢地生既,又唔係同我地住埋一齊既,一年至久唔久食飯兩三次,但我一教仔,我老公都未諗住出聲,佢地班友仔走黎同我爭仔,又係明明我仔擺明曳,佢地都可以搶咗我仔去,邊摸我仔頭邊讚我仔乖~!跟住我搶番個仔番黎,佢地都可以話:"細蚊仔係咁架啦!",細路仔係咁就等於唔駛教?個仔六七歲仲响酒樓玩追逐唔理d滾水傳黎傳去,又唔理酒樓地毡勁DIRTY仲走黎由得個仔响地扒地瞓地爬地???都唔知什麼道理,仲要佢地個仔立玩具追打我仔,嗰d玩具係硬打落去係傻都知會係好痛囉,我仔梗係走啦,唔通企定定呀...佢地一見我仔走開,佢地都可以將自己幻想當為事實咁同我講:"係咪你平時打開個仔打到佢驚呀!"真係吹到啤啤聲~~~!!!講真個仔升到小一就無體罰,再者我以前體罰亦唔係亂咁打囉.有時對住呢d人都真係幾勞氣架!


依家可能佢地d仔大,有好多問題煩番佢地(坦白講,我同老公都好覺我仔個堂弟係adhd囉!仲要係勁過我仔嗰隻)...咁佢地至無再出聲,我至可以耳根清靜番咋.依家我唔打仔,佢地咪成日忍唔住當眾大巴星埋去個仔度....個仔都失控唔聽佢地支笛既.但佢地又唔覺得個仔有問題,莫講話會唔會去做評估.


不過始終都係自己老公,都係試下搵多d機會同佢好好傾囉!至少都叫佢唔好响你教仔時就加把口黎唱反調,一係唔好嘈,係要出聲既就一定要同你同一陣線講同一道理,否則個仔真係會仲亂,唔知跟邊個RULES做人.真係要搵機會慢慢傾掂數.

~仔仔媽咪~

原帖由 77777 於 09-6-10 20:15 發表
佢地係咪同你地唔岩架.....

有時d人唔抵得你地好....咪咁law.....你阿仔naughty, 佢地咁講, 你阿仔咪重naughty d, 真係靠害......

我好明你講mud架....我都係有類似情形...., 我個邊d人一邊笑阿仔唔專心就無 ...

都唔知咩心態架...我又無諗過,,,不過查實我又唔覺得佢地出於壞嗰方面囉,我都好知因為我奶奶嗰邊係唔打仔鬧仔架!even真係鬧都係好細聲,細聲到你都唔覺佢地係鬧緊人,所以我咁軍訓,佢地咪睇唔過眼囉!不過依家佢地都好明解我,亦都好鍚我地,我老公排行最細,我亦係最細亦最後生嗰位新抱黎,所以都感受到佢地真係好鍚好關心我地...尤其有部份人後期响另外既地方接觸到自閉症呢樣野,都開始理解到我地呢班仔既難處同特性囉,所以之後佢地都唔太干涉我教仔,呢幾年關係係明顯好咗close咗既...

反而係出面嗰D三唔識七,佢地又唔知頭唔知路走黎扮代表响樹話你點話你物嗰D人最煩,有時都好知佢地唔知我地D仔係有問題,會誤解成我地班友仔係曳仔,我地班亞媽係唔教仔,就算係知道之後,佢地又未必明同理解囉.所以我都只好叫自己唔去在意佢地,唉...避得就避啦.

~仔仔媽咪~

原帖由 當媽 於 09-6-10 22:12 發表
講埋今次,我一定會在這個topic閉咀了!

始終個幾句,我在這兒話句不多,但在我短話短說當中,只是幾組句子而已,而你兒的學校事,社交事,甚至,同丈夫的相處,都可以想像到許多個人觀感出來,很相信你是一位富想像的人,如果, ...

我响forum出名係長篇大論呢樣係我習慣黎,我個人係唔識簡短,始終我個人覺得有D咩都盡量講得清楚詳盡等人會容易明白.

都係嗰句囉,你太諗埋一邊喇!人地長氣就話人地連珠發炮係鬧你,你問番自己,呢D係咩道理?依家我呢刻就係話緊你囉!你再係唔去改善番你呢樣諗野方式,講真,你永遠都會覺得人地係針對你唔妥你,咁你做人做得咁大怨氣咁唔開心,唔見得係對你自己好囉.

始終我地大家唔識大家,都只係網絡上萍水相逢,我地一齊討論交流意見時,為咩要去鬧人先?你覺得人地鬧你唔妥你,但人地已經講明話唔係,你都仲話係,咁你好無响話人之前先檢討下自己先呢?都講咗唔係,你又唔信,係咪你但求心安要人認同你直覺,明明人地真係唔係鬧你唔係覺得你之前奚落人地,都要附和你呃埋自己答你話:"係呀,我係覺得你奚落你,我係一直鬧緊你"咁話?唔好咁橫蠻無理囉!

我同77777傾咗咁耐偈,我又回應咁多,又係每個回應都水蛇春咁長,咁又係咪代表我一直鬧緊77777,又係覺得佢响樹奚落我?????????????你不如問下佢喇.我唔覺77777有咩問題喎!同佢傾咗咁耐,我都覺得同佢傾得好開心,even大家唔係個個意見都有同感,但我覺得呢D至叫做交流至係一個正常既溝通同社交囉!

我地班仔已經唔識社交,作為父母就算本身都係有呢個問題,但係咪都應該要去檢討下同改善下呢?你話父母會影响仔女,但你呢個論點你識得同人講,但好明顯你無去自己以身作則囉.咁又何來忠告人,又硬要人地一定要聽你跟你意思去行?

既然你都講咗回應埋呢次就唔再回應,同樣我都只會講到呢度唔會再為着你既偏激、諗埋一邊同重複誤會人既善意再作討論.始終你唔係我個仔,我無必要不斷地去叫你唔好偏激要講到你肯改肯認錯為止,況且根本你唔覺得自己咁樣諗野係有問題.我又何需再講呢?要講呢咁多篇長篇回應已經講哂.大家唔啱channel,又唔係認識對方,我和你就當作從沒見過罷了.

~仔仔媽咪~

原帖由 77777 於 09-6-10 23:00 發表
你D屋企人明解就好LAW.....出邊事實上有太多人唔明解, 有D人覺得我唔教, 又有D又覺得我太嚴, 迫得阿仔好緊....諗返轉頭都幾好笑, 咁鬼極端....有時我都費事解釋...真係口水都乾有時比人當傻婆, 呢個世界就係有D人係 ...

雖則我地班仔隻隻都唔同款,但我地班亞媽似乎所遇到既野同感受幾乎一模一樣!!!哈哈!!我都係咁架...就算係出面既人批評我地,都係分兩批,一邊就話我地唔教仔,但偏偏另一邊就話我地太嚴太要求高會嚇親個仔~!有時都得啖笑囉...所以依家我都唔太在意外人點睇,始終佢地真係唔知道亦唔會即時理解到.咁我地呢班亞媽响當知個仔有呢個症時都唔係即時了解佢地亦唔係即時知點教好囉...我都用咗幾年時間至慢慢適應呢個症,但仍然係理解同學習當中.


上年我咪係遇着一個有情緒病既班主任囉!真係一日幾鑊投訴,學校投訴個仔唔係一個問題,咁講真個仔响學校做錯事,我係應該要第一時間要知道囉.但問題在於係佢態度問題,我仔上上下堂無啦啦想睇報紙,你知我地班仔幾咁衝幾咁唔諗下先就做架啦,佢咪好大方咁拎份報紙出黎嘆囉,咁我仔又係坐正老師位前,咁老師要求我仔收番埋份報紙都係好應該,但我仔又ON居居咁唔肯收番埋喎,仲好似傾偈咁同老師講話佢想睇... 咁我都知呢個情形係人都O哂咀,但唔代表可以响全班小朋友面前亂發癲嘛...真係唔係講笑,佢真係發癲,而唔止係發脾氣發惡咁簡單,佢走黎一手搶走我仔份報紙,然後當住全班卅位小二學生面前發癲咁撕到粉碎~!我心諗,佢駛唔駛咁呢?佢係正路既係咪應該沒收我仔份報紙,唔好俾番我仔囉!佢沒收既,我唔會覺得有問題,仲覺得做得好正面添...但佢咁樣响D學生面前毁爛人地既野,係咪即係教緊眼前班小朋友有咩爭執上黎,都可以咁樣整爛人地D野,等人地以後無得用呢?唔係囉!咁講真份報紙又係學校免費派既,就算出街買都只係六蚊,跟本唔係在意錢既問題.而係佢咁樣,不但唔係教緊小朋友個正確行為,而係似係反面教材教緊班小朋友可以咁樣發脾氣囉!事實黎架!初時佢咁樣成日發癲講埋D負面野(同我仔講:你番學都唔係黎讀書既.."...但我仔有學障同當時係對手無力寫唔到字要去醫院做treatment囉),我仔初時都驚,成日都同我講miss chan好惡,但之後我仔都反擊啦,佢發癲當住卅個學生面前鬧我仔,鬧到又係失控唔停嗰隻,我仔就响位度同呢個班主任鬧大聲,鬧到呢個班主任自己都完全收聲唔再嘈...咁我仔至唔再嘈,唔係話我仔啱,我仔都錯,但佢呢個老師係咪都係因為自己既問題,迫到個學生又係用番佢呢隻負面態度同佢溝通同解決問題呢?...所以上年真係我同個仔既黑暗時期...之前讀兩年小一同今年都同學校關係好好,係得小二呢年俾呢個MISS玩謝咗!

~仔仔媽咪~

原帖由 77777 於 09-6-10 23:38 發表
仔仔媽咪,

見你話問下我, 咁我只係想講一句同你傾計真係好開心, 大家雖然意見有時唔同, 不過, 我覺得最緊要我地呢班媽咪可以互相扶持, 大家交流下意見, 大家體諒大家LAW....有時比阿仔激C, 有個渠道可以宣洩下.... ...

無啦啦擺咗你上枱...真係唔好意思~~!!!

咪係囉,查實我响BK咁耐,都有成六七年,我長篇大論都唔係淨係對住某人至發生嘛!咁多年,有好多時有D媽咪都講到明話見到我太長篇,一見我有回應都拿拿聲飛過唔睇就算....因為真係太太太....長篇...

只係呢次我無啦啦俾人話我鬧佢,我真係打咗個好大個question mark响度囉!根本一直大家都開心見誠去交流意見去傾,就係因為見我咁長篇就視作係連珠發炮黎鬧佢,講真我都好覺得係俾佢老屈囉!

咁佢人係好緊張又好主觀呢樣係梗架喇,但唔代表我唔認同佢意見同我講番我既睇法就等同係鬧佢或者覺得係佢有奚落過我囉!咁佢有咁既質疑,係咪代表佢自己都覺得佢嗰堆回應係真係奚落緊我呢?如果佢自己唔認為係咁,又何來會誤會人地以為佢係响度奚落緊人???講得唔好聽,佢似係打橫黎行囉!

同佢傾真係會影响到我都會同佢緊張埋一份,但我都會盡量嘗試去同佢苦口婆心好好地客客氣氣咁講野,但佢都係咁,我最後唯有跟佢一樣,用番D好serious既語氣同態度同佢回應...咁呢個係咪大家都想要既態度?坦白講,我唔覺得我想要囉.

正如你所講,我地班仔個個雖則係ADHD仔黎,但佢地都係一個個體黎,隻隻都唔同style,最知個仔最理解個仔既永遠都係自己親生亞媽,只有我地知點對住佢地,實情唔好講咁遠,淨係講我同你,都已經係唔同教法啦.如果係一模一樣既,又何需有個forum响度俾大家媽咪去交流去討論?意見俾係無問題,但人地接受與否或者認唔認同或者跟唔跟住去做,係人地自己決定,人地唔接受唔認同亦唔跟呢個意見呢個做法亦唔見得係壞同有問題囉!大家都係俾意見之嘛,而唔係俾命令,點解要咁固執咁堅持己見,見人地唔認同自己方法,就話人地鬧佢或者話人誤會佢响樹奚落人?講唔通囉.

始終大家都係成年人,唔係細路仔,細路仔心智唔成熟係會成日任性地扭計要人地跟佢意思去行,但大人唔係咁囉,大人幾唔成熟都好,但都會要求自己盡量理智同合理,睇事永遠都要求自己去平常心去睇事情,會要求自己思考同諗野係多方面/唔同角度去睇,而唔係好似我地班ADHD/自閉小朋友咁永遠諗野淨係諗自己,永遠都係一條LINE咁諗而唔識轉彎囉!呢樣都係我仔個心理學家咁同我講.

不過唔緊要啦,呢頭講嗰頭散啦,講完就算,再講只會變成好似我响度批判緊另一個會員咁,都唔係咁好架.

[ 本帖最後由 ~仔仔媽咪~ 於 09-6-10 23:59 編輯 ]

~仔仔媽咪~

原帖由 77777 於 09-6-10 23:44 發表
我呢兩樣野都可以係用一班人話, 你話好唔好笑....

你話你阿仔個MISS CHAN, 咁佢真係好過份枉, 同埋俾我感覺佢真係有D情緒問顥LAW....就算佢自己有壓力都唔可以咁做, 唔怪得之你阿仔舊年咁唔開心LU....

...

查實我都有諗過有同自己講過,係咪我誤會咗呢位班主任呢?係咪佢查實無針對過我兩母子呢?但當中淨係嗰一年小二所發生既事,我都好難唔去覺得佢係針對緊囉...之後今年升到小三,我同我仔個老友個姨媽傾偈,咁啱講番小二呢個班主任,結果聽番黎既係,個班主任對佢地既態度好nice,嗰下我係有唔開心囉.咁我始終都好自然會檢討下係咪出自我問題令到個班主任對我既態度係相反...但只問自己都對呢位班主任好客氣好有禮貌,小二開學第一日我已經同佢打聲招呼,想同佢傾番我仔既問題,但嗰時佢已經唔肯同我傾,之後連電話都可以CUT我線,嗰下我真係幾唔開心.

其實佢嗰時點對我同個仔,要講真係又會有排講,但算啦,已成過去,可能我仔打人問題真係好困擾佢呢...呢D我又可能唔會知...至少依家佢唔再教我仔,佢依家平時放學見到我同個仔都可以好nice咁打招呼點頭示意.又試過一次見佢主動埋黎同我仔講野,但佢係同我仔咬耳仔咁講野,我仔個樣係呆咗,希望佢唔係同我仔講D咩唔好既說話啦....我諗應該唔會卦,,,我仔又唔肯講,又話佢無講D咩...

~仔仔媽咪~

原帖由 77777 於 09-6-11 00:10 發表
咁又唔緊要.....我都係D好直的人, 同埋真係唔多識轉彎的人......不過ADHD真係有好多種, 就算無ADHD, 個個小朋友都唔同啦.....

有時我都會自己響度講一論自己的方法, 不過其實只係因應我個小朋友個性格同我自己好個 ...

聽你咁講,查實我同你都幾似....我又係比較直既人,我唔會立亂話人,我都會對人客氣同尊重,但我自己所想既,我絕對會好直接講出黎,而唔會轉彎換角囉.始終我係有咁既睇法同諗法,無理由只附和人好似應酬咁,明明自己唔覺得係咁,都夾硬同人講話認同囉.

我又係好鐘意聽下其他人既意見同做法,實情做人係應該咁做至啱,無可能下下唔去接收新資訊新方法,下下死用自己嗰套黎行事囉.始終都要放開眼界,去見識下,聽多D唔同意見,對自己永遠都有莫大益處,但人地既做法,自己去唔去跟或者值唔值得一試,係好睇自己點諗,同埋同一個方法能唔能用得着响我地自己問題身上囉.始終睇完人既分享同意見,自己理應都要細心消化下分析一下,至決定跟定唔跟囉.

好似我上星期俾個仔停學咁,查實當媽既見解不無佢既道理,但我好知我仔唔會因為我咁樣停佢學會令佢更加唔願意番學,就係因為我好知個仔仍然好鐘意番學,呢樣唔係我覺得,而係事實如此,我都講過,我仔上星期二開始俾我停佢學,星期三已經強烈要求話佢自己好想番學,求我地俾佢番學,俾多次機會佢,我仔去到星期日晚,佢同我pillow talk時因為知道星期一終於可以番學(考試),佢係開心到瞓唔着,係咁同我講話佢好期待星期一番學,仲話好期待好想知自己可唔可以考試考得到好成績...試問我又怎能唔會覺得我仔係鐘意番學呢?

再者,我亦唔認同外間有人俾自己仔女停學數年,話等到個仔大個仔D'好番'之後至番學,實情大個D即係幾時?我呢次停學唔係逃避,亦唔係胡亂作出決定,雖則我係唔想佢响考試之前再傷到人,呢樣係我感受,我係好驚個仔再傷人,但我要佢停學,都係希望佢能夠冷靜落黎,唔好响佢未思考未反省佢既行為同錯事前又要佢日日去面對去應付同學之間既社交,硬碰硬夾硬擠佢入去困境唔見得係一件好事囉!除非佢已經反省已經明白打人既嚴重性,學到一點處事待人既方法就另作別論,但當日佢咁樣打穿人個頭,實情莫講話我同個仔,學校老師校長同埋受傷既同學,佢地都需要冷靜,需要時間去調節去思考,點解唔可以利用一星期停學呢小小時間去俾大家一個空間去冷靜地思考去諗一個實際方法去解決問題?

之後我打算考完試個仔隔日番學,亦係我計劃之一,亦都唔係逃避,而係我教既方法係,趁住考完試至暑假呢段唔駛上堂教書既日子,俾個仔可以一日學習一日實踐黎學下點去待人處事同處理情緒行為,我要求個仔放假嗰日要去做運動,俾佢跑下打下籃球,呢樣係心理學家講,我地ADHD仔係好需要運動;亦要求我仔去我朋友中心度學守規矩學控制情緒行為,呢樣係好重要,同埋我亦會要求佢學一D要求佢細心同有耐性去做既遊戲,例如:摺紙、棋類遊戲、球類運動等,查實我地班仔最需要既係要佢地有耐性,佢地就係缺乏耐性同細心,往往都唔先停一停,諗一諗就衝動行事,結果咪經常犯事,所以我要求佢一定要學,無得唔玩.就係因為我知我仔會聽我講,唔會拒絕唔做,所以我至希望用多點時間去教佢培育佢.至少佢停學唔係代表佢係响屋企玩樂歎世界,而係學習,到佢番學日子,要佢嘗試去實踐,放學後講番佢當日响學校既事同表現,然後再作檢討,見有不足時我地可以即時去改變戰略,然後再學再試,咁樣我覺得至黎得實際囉.

有時一件事情唔好一聽到個字眼就一口咬定係好定唔好,凡事多面睇,要去分析,要睇情形,要睇實際情況,然後加以思考再作判斷同計劃囉.

咁終歸一句,大家個目標方向都係一心想幫到個仔教好個仔,始終我地唔可以護佢護足一世,佢地大個咗始終要面對呢個社會,佢地要學懂點去處理問題同事情,如果依家唔去搵方法令佢地學識,大個咗將來我地兩腳一伸,得番個仔一個人去面對呢個世界,點算?

~仔仔媽咪~

原帖由 77777 於 09-6-11 00:20 發表
我信有D老師係真係覺得ADHD仔好煩.....亦唔係咁易改變佢地....你而家阿仔唔係佢教就算LAW....

我都試過遇過一個唔多體諒ADHD仔的老師, 個時同佢傾左成兩三個鐘, 以為佢明....不過二三日后, 再同佢傾返, 先發覺講完 ...

都係架...有時遇着D真係講極都唔明既人,我都係算,始終都講唔明,佢地又唔去接受,我仲去重複講黎都無意思囉.好似我仔小一有位班主任(佢地嗰班係有兩個班主任架),上咗年紀,基本上係婆婆黎,即係資深老師黎啦...可想而知有幾主觀,,,佢地只係接受上嗰代既知識,頂多見我仔隻手執唔到筆無力寫字,佢地咪只會識講呢D係小肌肉問題黎囉,而唔會識咩叫做'動作協調障礙',莫講話ADHD或者自閉,,,所以佢只會日日好炆咁鬧住我黎講話我仔好曳,試過我仔又係寫唔到字,結果做唔到堂課,跟住佢就話係我仔唔肯寫話佢懶話佢曳,咁我都算啦,好聲好氣好有禮地同佢講,咁你依家話俾我知佢要抄邊幾個詞語,等我番屋企慢慢教佢寫啦(我仔當年係做一本功課要兩小時),咁好啦,我接過本生字簿,點知呢頭接完本簿,下一秒呢位婆婆老師走黎好大力好惡咁掟支鉛筆落黎我心口度(我坐响度):"抄低啦!!!!!!!!",,,當時我同我仔另一個班主任都目定口呆...另一位班主任即時好唔好意思咁响隔離做口型示意同我say sorry,我都明白,都示意番'唔緊要',,,之後到呢位婆婆班主任坐响我隔離講番我仔要寫咩生字時,佢都仲好勞氣咁講我仔好曳, 我都無哂氣,又知佢都好唔開心,結果嗰日我係倒番轉頭邊摸住呢位婆婆班主任個背(掃背...)邊安慰番佢講:"我都知我仔咁樣,你會好辛苦同好勞氣,但無計,佢有呢D問題佢自都唔想,我地唯有俾多D方法去幫佢等佢改善,,,依家我仔都有去醫院度做物理治療...(未講完佢又好大聲爆一句:"我知!大小肌肉訓練吖嘛!我識呀!!..." 唔係囉...我仔係做緊感統同動作協調相關既訓練囉...),,,慢慢黎啦,如果日後我仔又係唔寫字,你交俾我去跟,等我响屋企親自教個仔寫字,做番D堂課交番俾你囉"...你話...C得未... 查實最需要人氹同安慰既係亞媽我地...點知都要安慰番人地轉頭...我個心仲滴緊血架...仲未止血...

但之後下學期佢都改善咗,至少我仔嗰日肯俾下面手震震寫幾隻字,又唔扭計,佢咪同我講個仔今日乖咗囉...我已經多謝佢都黎唔切...!!!

~仔仔媽咪~

原帖由 77777 於 09-6-11 08:09 發表
其實我明你, 而家呢個時候, 學校的書本差唔多教完, 同時, 如果你的小朋友係好鍾意返學的, 唔比佢返學已經係一個懲罰啦....如果我唔比阿仔返學, 我諗佢一定會同我c過, 因阿仔又係好鍾意返學同成班同學仔一齊, 可能佢 ...

查實叫佢唔好再犯呢句野我呢十年已經不斷咁講,講到最近嗰次我直頭兇個仔話佢再打人我就走咗去唔同佢住,佢當時係驚架,咪又係猛求我唔好咁做,又係例牌話要我俾多次機會佢要相信佢,結果咪又係打爆同學仔個頭...無奈我地班仔又係要同一句野成日提醒住佢地,但同時佢地又繼續犯事.無哂計.


就係想大家好黎好去,又好知自己個仔唔好頂得去邊,咁老師一個對卅隻馬騮仔,仲要黎隻咁勁既...都知老師會辛苦...尤其呢次係婆婆(班主任)黎,見佢扭哂計,咁我都係見佢係老人家份上,氹下佢,等大家都開心番少少...........無計架,如果D老師係識諗係講得佢地明既,我諗前人(以前嗰D家長)一早已經點明佢地...同埋佢地係無心教好小朋友既,我地點講都無意思,,,所以唯有同呢D老師客客氣氣足一年,下年都唔係佢地教我仔,總之俾大家好過,當放過大家一條活路...

講真我身邊都有好多做老師既朋友,由幼兒園、幼稚園、小學、中學甚至乎大學教授都有...查實都好睇到有心去教學同無心會有幾大分別...有心教小朋友真係真心想教好小朋友,佢地係會好主動係咁進修係咁搵唔同既渠道黎增進知識,甚至我有個老友想了解同修讀關於特殊教育既野,因為唔知係咪神都覺得我呢個老友真係真心愛小朋友,佢做咗十幾年幼稚園老師,佢轉乜班或者學校都好,全校最多自閉或特殊問題既學生嗰班都係佢做正教(班主任)...佢接觸得多佢個心真係好想幫到佢地,上年仲聽到佢話,星期六日專登去人地中心度教小朋友playgroup,星期一至五已經全職咁忙,星期六日仲要part-time做呢D,我覺得呢類真心愛小朋友既老師真係可遇不可求囉.我個人都幾欣賞我呢位老友.

~仔仔媽咪~

原帖由 ~仔仔媽咪~ 於 09-6-11 08:55 發表


查實叫佢唔好再犯呢句野我呢十年已經不斷咁講,講到最近嗰次我直頭兇個仔話佢再打人我就走咗去唔同佢住,佢當時係驚架,咪又係猛求我唔好咁做,又係例牌話要我俾多次機會佢要相信佢,結果咪又係打爆同學仔個頭...無奈我 ...

同埋同我地呢班仔去旅行都幾大壓力架!所以我都覺得你囝學校真係好難得可以俾佢一齊去外地旅行,比着我仔...............佢唔打爛架機已經thank you佢. 不過我仔跟我去旅行搭機都唔大問題,係一到埗佢太心急太多野想睇想玩,結果變燥底同埋亂嚟,上次去泰國時適逢佢去旅行之前又响學校LAI野,咁佢咪無咁癲囉,但上年去台北...佢HIGH同失控既程度,我直頭尾二個日我忍唔住响台北街頭偷偷地喊...

~仔仔媽咪~

原帖由 77777 於 09-6-11 10:34 發表
係呀, 有d老師真係好盡心盡力去為小朋友架, 我好欣賞個位阿仔的老師, 佢係今年退休啦....佢好少罰人, 又好鍾意比機會d小朋友, 成日獎勵d小朋友架....呢d都係我仔口中講返比我聽, 阿仔由唔鍾意數變左好鍾意數, 我真係 ...

係啦,好少老師真係肯咁接受ADHD仔...仲要帶佢地去旅行,呢D真係對於我地咁多媽咪黎講係dream黎架囉!查實老師既影响力都好大架!你見你囝囝由唔鐘意數學變成好鐘意,就知老師既影响力都唔能夠睇小,想當年我細個,都係淨係聽老師同學校既訓話多過聽屋企人說話囉.所以幾時都話教一個小朋友永遠都係家長同學校一齊去教,是但一邊本PEA,個小朋友實衰硬...始終要平衡囉,一邊唔做野,另一邊就會好重負擔,要嗰邊一條冷擔得起又唔會跌倒,跟住無可能既事,所以點解唔互相扶持互相幫助大家一齊去努力去擔去抬呢?我會係咁諗囉.

~仔仔媽咪~

原帖由 77777 於 09-6-11 14:52 發表
係呀, 我自己好怕數架, 細個時三年級數老師好鬼惡, 五年級又係佢教, 到而家都記得佢, 不過剩係佢好惡..... 我自己身歷其景, 好明白有時惡通常只會令個小朋友愈來愈唔鍾意.....

邊個會鍾意成日比人閙枉, 有時閙係無 ...

我呢兩日係咁趕做教材,攰c我喇~!依家見休息下至上黎同你繼續傾偈~

查實我都係有數學障礙架!EVEN我以前曾經全班考第二,但我數學永遠都係肥佬唔合格,就算我寒窗苦讀都好,都係計唔好,所以我都好鬼驚數學,教我仔乜科都得,係數學我教我真係好大壓力同埋好鬼燥底囉~~~幸好依家我朋友肯免費幫我仔補數...我至輕鬆番d咋.

查實教仔唔理係咪ADHD都好,始終唔能夠一味靠惡同鬧囉,好似我朋友咁,又係一味靠惡同鬧,個仔對耳都聽慣咗亞媽一開口就係大聲喝鬧,依家我朋友個仔咪一樣唔聽亞媽支笛,我朋友都成日呻話自己教唔到個仔.

我以前都曾經有段日子都係咁樣教仔,結果個仔個情況反而仲嚴重,都係去到我仔升小一時,個治療師叫我唔駛鬧仔鬧得咁行,叫我唔好打仔,咁我為咗個仔可以快D好番,我至聽聽話話唔再咁樣教佢,而係學咗治療師嗰套方法,同個仔好好講道理同俾多D方法個仔去解決佢既問題囉.實情唔講有無效,但至少我同個仔既親子關係係明顯好咗好多,以前我仔同我離行離LAK,我又教仔教到好唔想再見到個仔,直頭掟個仔去外家俾工人湊,依家至少我都仲有心機去教,仲有心去堅持要自己親自教仔,而唔係再好似以前咁,掟個仔俾工人睇就算,咁逃避現實囉.

~仔仔媽咪~

原帖由 77777 於 09-6-12 23:10 發表
見返你好開心呀, 你好勤力呀, 我呢兩日都係同仔仔繼續溫書, 因為怕一返學要考試.....

而家呢個時候就當多d時間溫書law.... 今朝阿仔個同學仔媽咪都同我講呢個假期要同個仔執返好d字, 有比較充足的時間....d中文字真 ...

無計啦,為咗個仔咩都願!同埋呢次我係除咗教自己個仔外,亦會幫我朋友教佢中心另一位小朋友國際音標,因為個小朋友連平時說話既發音都有嚴重問題...我朋友想我幫個小朋友點發音咬字.所以我真係要整番個formal D既教材黎教佢同我仔囉....同埋我又心郁郁想試下用我呢個skill黎教人,我要睇仔出唔到黎番工,但屋企真係經濟唔好,想用番自己一技之長黎賺錢,黎幫補下屋企,尤其淨係教仔都需要駛錢(買工具甚至報出面D興趣班佢上)...如果你想學既話,我都可以免費教你架,咁我始終都需要實習下,睇我應該要點教人嘛.

查實我份人係咁,你俾我呻完喊完,我自己點都會企得番起身,始終個仔係我動力,我都唔捨得唔理佢唔要佢,所以我一定要自己企得番起身囉,當然我又極需要你地支持我,鼓勵我同鍚住我,咁我至會企得番起身,否則孤軍作戰,我會好痛苦.

~仔仔媽咪~

原帖由 77777 於 09-6-13 08:03 發表
仔仔媽咪,

你真係一個好媽咪, 又好肯幫人, 查實我地呢班媽咪響教d naughty仔真係會遇倒好多困難, 如果可以以自己的專長去幫倒人, 可以一方面幫倒人地媽咪減壓, 又見倒人地個小朋友進步, 真係幾開心架.....

多謝 ...

都唔係既,我都係志在幫朋友啫...又見個小朋友都幾乖,我又似乎教到,所以至幫下手咋,,,

唔駛客氣,基本上我都係想搵多D朋友俾我教國際音標,等自己都學下點教人嘛, 查實大家都係我隻白老鼠黎架...嘿嘿~~~所以我先至唔收錢之嘛!朋友之外既人或者再遲D到我教到熟手時就真係要收錢喇~~

查實人唔理係咩人,個個都有失意既時候架啦,亦都需要得到人靜心聆聽同扶持,始終人都係有豐富情感既動物黎,,,而且我又曾經抑鬱過,好明有苦但有口難言嗰隻苦有幾苦,所以依家趁自己仲想講自己心事俾人知,就一定要講出黎甚至喊哂出黎囉,咁都係想舒緩自己既壓力同情緒,否則又係好似我上年咁屈屈埋埋,唔開心到個程度係乜人都唔講,連老公同屋企人咁close既人都唔話俾佢地知亦唔俾佢地知我唔開心,下下都呢入房度自己喊癲又唔食飯,嗰時嗰D恐怖感覺真係唔想再受LU~

所以難得我地傾得埋,又願意聽大家彼此,有咩事都可以講出黎呻出黎囉!學似你咁講,朋友聽你呻,真係唔會嫌你講得多囉.係咪~

~仔仔媽咪~

原帖由 77777 於 09-6-13 11:47 發表
真係好開心有你呢個朋友, 有時我真係會忟會唔開心架, 所以我會成日上來bk, 同人地傾下.....有時我個人真係比較直, 又可能好彩係自己傻更更會講晒d野出來, 我係唔會屈埋響個心度, 可能我真係唔鍾意或頂唔住個種壓力啦 ...

我都好開心認識到您,查實自從我仔幾年前整親人,我俾人千夫所指後,我都唔太敢將個仔D問題講哂出黎,始終唔係個個人都諒解,正如當年咁,我講咗俾班媽咪知我仔有ADHD會打人,識咗年幾兩年,但都可以因為一件事情而話我縱容個仔去打人,嗰下真係幾委屈,講真嗰下我真係好理解到D殺人犯既家屬係咩感受,講真自己個兒子傷害人,作為佢既家人難道會覺得好開心好好笑?難道會心安理得?有時人就係咁樣,一去到自己利益時,係可以埋沒良心去反過黎用說話黎將你千刀萬剮...

不過正如你所言,真係好睇自己遇到D咩人囉,有時對於唔係自己朋友嗰D人既冷言冷語,依家我都唔再擺响心度,亦唔會去猜度人既人格,始終深明人地真係唔理解,唔會知我地既苦況同難處,再者我地教仔又唔係做騷俾人睇我地有幾識教仔,所以,人地點去批評就由得佢地吧.只要自己知自己唔係一個無家教既亞媽,呢D批評就當垃圾扔掉算.

依家我都係傾得埋會繼續同人一齊傾,唔啱傾既就唔再繼續,至少自己都無咁激氣,總之就平常心啦.

~仔仔媽咪~

原帖由 77777 於 09-6-13 18:48 發表
仔仔媽咪,

好明白您的心情, 有時真係唔係個個人都可以傾倒心事, 所以我都唔係太敢同新識的朋友講太多阿仔d野, 撞得板太多....不過, 有d又真係好好唔會笑你, 個d朋友真係好難得law......大家可以交心law....mud都傾 ...

所以真係朋友唔需要多,至緊要真心當你係朋友就得喇.

依家我都係同開我身邊既朋友傾我仔既事會多D囉,始終嗰D唔係網上識番黎,大家一齊讀書一齊共事,大家相處咗咁多年,我係咩人,佢地好知,所以我亦唔需要顧忌佢地會點諗我或者會誤會我,上星期我失意時,我真係由我仔放學開始喊過唔停喊到第二朝五六點至瞓到,嗰晚我不論電話、MSN或者facebook都好繁忙,我仔一出事,佢地個個即刻黎關心我叫我加油,唔好氣餒,查實唔駛朋友幫到我D咩,佢地單單一句鼓勵又貼心既說話,或者肯耐心地聽我講哂呻哂所有負面既野,嗰下我已經好感激佢地!至少佢地有花掉佢地自己時間黎陪足我成晚,甚至好似我朋友咁,免費日日幫我仔補習順便訓話我仔,所以依家我至報答佢對我既恩同關愛,我又免費幫佢中心個小朋友學音標;另一個朋友又凌晨三點半見我又是謝哂灰哂時,用埋佢瞓覺既時間黎打電話同我傾...呢D咪係真正既朋友囉.所以我係好珍惜佢地.有佢地已經夠,儘管出面都有人繼續講風涼說話,我都唔會擺呢D說話响心度,因為嗰D人唔係我朋友囉,就係咁簡單.

[ 本帖最後由 ~仔仔媽咪~ 於 09-6-13 19:07 編輯 ]