樂富永光書院

musicangus

樂富永光書院，校風如何？關顧嗎？屬靈嗎？ band 幾？自行跨區 band 2尾生機會大嗎？

wing2353

小弟讀永光，剛剛畢業，上上屆總領袖生長，希望比到最準確既資料你：
學術方面：
1. 學生成績極懸殊。全級頭5名dse最佳5科都有23分以上；全級頭10名都有18分以上。考獲33222既學生至少都有20人。單是以我所知,今年有三位同學考入科大,一位考入中大。只要肯努力，基本上考20分都唔成問題。

2. 半英中。點解我咁講呢，係因為數學及理科都係英文教；世史、地理、體育等文、商科都係中文教。

校風方面：
永光校風遠比鄰近的「龍翔」、「扶輪」、「潔心」等樂富區學校好。讀左6年書，做左3年領袖生都冇聽過學生濫藥、援交。6年來只見過1次低form打架。由於有教會(永光堂)背景，所以學生都比較純樸，師生與班風十分團結。

課外活動方面：
永光較出名的有籃球隊、攀石學會(學校有室內攀石場)、足毽隊及手鈴隊(超出名，多次去商場及內地表演)

總結：以往永光DSE考生升大學率較band 1學校低，係因為以前用中文教maths及理科。但近年積極轉型，英文環境及氛圍漸趨濃厚。相信遲d低form的英文會比本屆好，升大學率有望提升。而且學校鼓勵學生到台灣及內地升學，令學生實踐升學夢。

成績當然比唔上band 1學生，但學校更著重學生既全人發展，學生必須尊師重道，曾有無禮貌既同學被老師重重責罰及輔導；比部份只著重升學率既band 1學校更稱得上一間學校。古語有云：師者，傳道授業解惑者也。可見為人師長是以傳授道理為主要。 閣下自行斟酌會否把永光放在第一志願。

如有問題及查詢，歡迎留言，小弟會儘快回覆。

musicangus

謝謝你。我都欣賞你校的屬靈氣氛和品格教養，但全校超過百幾人，只有20個合格，那4/5學生的成績是怎樣的呢？