已到STEP確診及UPDATE小朋友發展情況

girlsc

發展真係好似，好似講緊我個仔。一去到固定地方就講固定野，講嘢好清楚，不過好似背出來嘅，同埋一定要你應佢先停口。我依家就盡量同佢講d不同嘢，或者分散佢注意力。近排在屋企好鐘意玩排隊，咩都可以用來排一餐。另外，都係專注力的問題，上堂雖然坐得定，但係老師講d嘢入唔到腦，所以輪到佢果時，就一舊雲了，要講多兩次先得。

DENNIS201

回覆 girlsc 的帖子

聽密集導師講
一對一做手頭上工作非常OK
但一班人要輪流或者合作就完全遊雲
幼稚園上堂跳舞都有個老師長期捉住

DENNIS201

仔仔最新近況：
剛過農曆新年，好多過年野好似桔、利是、朱古力等已經早在密集訓練度學會
收利是時同在有少量提示之下識講「恭喜發財」「新年快樂」呢d說話
一連幾日去拜年，去到陌生地方說話會較少，人又收歛，只顧玩手上玩具，叫佢講咩佢又識跟講咩，人地比野食佢又識「多謝」唔熟既人唔會發現小朋友有問題，一旦番到屋企或熟悉既地方，說話明顯較多同會較曳
排列玩具多左...乜都一條長線咁排，但整亂佢都唔會有太大反應
尖叫多左，無野做成日拉長聲線「呀丫」咁叫，好高音好煩
岩場合會用到以下句子
「除衫衫好熱」
「爸爸訓教」
「爸爸玩電腦」
「爸爸打機」
「媽媽食飯」
「好靚聖誕樹」
「狗狗唔好嘈」
但發音仍然相當差，好多音都高八度，例如「想要糖糖」會講到「想要劏劏」好多時候只有父母先聽得明
唔著片情況下會講「急尿」，帶佢去會去到，但大便仍唔識表達
小手肌好左，無聊時成日搣食物盒或玩具盒招紙
大動作仍差，唔識跳，跑姿勢亦差，間中會仆倒，但可以拖住行五六百米路唔扭抱了

星星baby

加油！

DENNIS201

仔仔最新近況：
還有兩個多月就三歲，言語同之前差不多，進步唔太明顯
可以講到一d佢成日用同熟既短句，例如最長既有「爸爸車車玩具反斗城」
夜晚叫佢訓教時就會講「唔要訓教」咁
其他說話都係需求性語言多，如「要珍寶珠」「要食肉肉」「買出奇蛋」甚少新句式
識唱好多歌，差唔多唱到一整首，發音差但聽得明唱乜
開始教佢認中文字，認列同讀到十個左右
天水圍密集訓練出現多個人事變動，需要調班重新適應，正考慮會否繼續

DENNIS201

仔仔最新近況：
密集訓練地點由天水圍轉至屯門，課程同之前大同小異
近期言語表達開始有些微進步，會講「要去叔叔屋企」呢類要求性句子
佢扭計時只要大人問「要乜野?」「說話丫」會講到「要玩保齡球」「要寶礦力」「唔沖涼」呢類短句
問佢某種問題會識答，例如「貓貓英文係咩呀?」會答到「Cat」
「香蕉咩顏色?」會答到「黃色」
「去麥當勞有咩食?」答到「薯條」再問「仲有呢?」答到「可樂、麥樂雞」
「KFC有無壽司食呀?」識答「無」
「去麥當勞買出奇蛋?」會答「唔岩」
「頭先去左公園玩咩?」答到「千秋、sir滑梯」
「叔叔住幾多樓呀?」好好記性地識答
但自己玩時會好多BB話，同埋有時會自言自語邊玩邊講
動作仍笨拙，未識跳，未介到片，識自己去小便但大便就唔識

girlsc

好叻啦，我個仔仲未識去小便，點算啊

felixluk

回覆 DENNIS201 的帖子

屯門邊度有密集上呀?
可PM 我?

Chuma1128

見好多媽咪都話去驗血，食物敏感同自閉症有關？有無媽咪可以share 相關資料？？Thanks

aileen_913

回覆 DENNIS201 的帖子

你好啊，我仔仔比你仔細一個月，都係有相關的問題，我覺得你仔已經好叻，自己有咩需求都識表達了，我仔近排先識表達要咩咩，比如要飲水，要車車，要奶奶之類，其他問答的問題都係記得我教過咩就講咩，有時候仲會將我講的答案一次過一起講曬，我根本未問。佢大小便好早前一歲多就識表達清楚了，但係小便唔識自己hold住個咕咕仔，成日整濕條褲，相當無奈，依家我都好注重教佢自理能力，佢仲唔肯自己食飯。我想問你幫亞仔戒口堅持幾長時間了？你覺得有成效嗎？我想試下戒口。

Yeahly_ly

想請教小兒19個月....排緊CAC評估...尋日我自己見完姑娘...講左太約情況....話可能都有少少味...佢話健康院醫生初步評估係行為/情緒問題....語言同智力正常.....仲有半年時間....想請教有冇咩playgroup/特訓/機構可推介...謝謝! 頭先睇過step5天密集班~要$9000/月...好貴

DENNIS201

回覆 aileen_913 的帖子

戒口老實講，除左唔直接食蛋同飲奶之外，麩質已經戒唔清了
問個仔想食咩呀，佢會答「要食麵麵」「要食包包」咁
言語真係怪怪地，番到屋企會自己講「我番黎啦」之後我講「歡迎番黎」佢又會講「歡迎番黎」咁
好機械但場合佢又岩架 wor，仲有就成日邊講邊做，好似「除書包」同「玩玩具」咁一路講一路做
小便宜家識講「柯尿尿」又或者屋企自己去廁所，但大便仲未識表達

DENNIS201

回覆 Yeahly_ly 的帖子

19個月即係歲半，當時我仔都有好多蛛絲馬跡例如成日玩轉轉玩具同自轉之類
歲半至兩歲半發展好快，你有睇我 d post 都知佢慢慢會將學到既野表現番出黎
同埋強烈建議兩歲前唔好上乜乜言語治療或者密集班
因為小朋友太細跟本得個喊字唔會學到野
呢段時間主要帶佢出公園、去超市教水果、食物同日常野
屋企就用書或實物或工具教認知同叫佢講番出黎
A仔成日用喊同EE哎哎咁扭計，多引導佢用口講先比野佢

mo515

我想請教A仔自我刺激行為要每日做幾多次才叫刺激行為呢？因我仔發脾氣才撞頭(佢21個月仍唔識講嘢，只是小量單字)，玩眼每日有一，二次，但佢玩眼方法是不斷"斬眼"或者close the eyes, 好小fing 頭，因我仔有眼神接觸，而且有時會走過來望住我，玩捉迷藏，叫佢會應我，也會手指指，只是唔識講嘢及發脾氣撞頭，不過佢都有固執行為但不嚴重，只是不願入舖頭買嘢，佢好快要拉我走，其實朋友唔覺佢自閉，但健康院話佢遲講嘢及脾氣大，自我中心強，懷疑佢有自閉徵狀要排CAC, 所以我好苦惱佢是否自閉, 其實我去咗自悠天地上自閉playgroup, 社工都話佢好有眼神接觸，社工話就算自閉也是輕微，好苦惱，老公又話等政府評估，唔想浪費咁多錢去做私人評估

Yeahly_ly

原帖由 DENNIS201 於 16-05-20 發表
回覆 Yeahly_ly 的帖子

19個月即係歲半，當時我仔都有好多蛛絲馬跡例如成日玩轉轉玩具同自轉之類

明白!宜家仲有半年等緊...就係唔太嚴重...但又想有人mon住發展...同改善下固執行為....剛剛朋友介紹左一間....又唔算太貴....一星期上一堂1:2...當買個安心! 多謝你成日回答我問題大家一齊加油!

DENNIS201

回覆 mo515 的帖子

A仔自我刺激行為其實每個年紀會唔同，例如我仔歲半成日自轉，宜家近三兩歲已經無見過
玩車輪都無，反而大左就成日排列野，乜都排成直線，兩歲前係唔會排列野的
重覆行為就係果d 不停重覆開門關門，開櫃關櫃
曾經有個姑娘話要分別小朋友自閉程度其實可以睇佢「斷線」情況
即係佢排列車仔，父母整亂佢，如果無乜大反應就唔算嚴重，反而如果爆喊兼一定要排列番好呢隻就比較嚴重
出街都係，如果佢要去一個地方或方向，例如眼前有間玩具反斗城，父母先用言語，再拖住走，最後強行抱走
都係睇佢反應，自閉特徵輕微既離開半分鐘基本已經可以忘記玩具反斗城呢件事，但嚴重就唔同講法
同一道理，嚴重既小朋友可以為一件玩具喊足三小時不停，父母都可能未必知佢想要乜因為小朋友唔識表達
眼神接觸其實好多A仔都好好，又會搵齊父母一齊出街之類，但本質上同普通小朋友真係有分別
我抱一歲姪仔，佢基本全程都好有「質素」咁望住你同追住你玩同笑，我仔係從來唔會的
但我所有朋友都覺得我仔眼神好好，唔似有自閉，但「朋友」又了解自閉既樣野有幾多呢？
mo515有兩個做法，第一係等CAC評估再做下一步，但有機會拖慢左小朋友學習進度
第二係立即搵私人評估，再排 I E 位或其他機構訓練，就算唔係自閉，番下呢d學下野都算唔錯既只係好貴

mo515

謝謝你解釋，巳排緊CAC, 令外，巳排緊言語治療及職業治療，希望9月返N 班會對佢有d 幫助

aileen_913

回覆 DENNIS201 的帖子

小便可以，大便好快都識的啦，放心！我仔倚賴心好強，佢識講要大小便的，但係次次都要大人陪著去廁所，近排學識自己除褲了，但是尿尿灑到周圍都係，完全唔識自己控制，唔肯自己擺好咕咕仔，我好頭痛，請問你呢樣你係點訓練的？仲有你平時會花好多時間訓練佢自理能力嗎？你仔仔識自己食飯了麼？我近排訓練佢自己食飯，佢只肯等你裝好一羹之後拿起送入口，點都唔肯試試用只羹去裝起飯粥，我抓住佢只手教，佢完全都唔肯望住個碗，一幅不想動的模樣，我有時忍不住會捉起佢只手來打，但係結果都係唔肯。好無奈，有良招的話分享下😣😣

DENNIS201

回覆 aileen_913 的帖子

我地無特別訓練佢小便，我估係I位幼稚園排隊洗手時學會
小便去去下就熟，宜家唔夠高都識踮高腳扶住去，靚d既商場有小朋友廁更加方便
我仔歲半時已識自己用匙筆飯食，用叉食麵都慢慢識la
方法都係用佢好喜歡既野食，例如生果，先切粒比佢學叉自己食，之後用匙咁
宜家問題係非常偏食，見到粒綠色蔥點都要刮走佢

makkielau

唔好意思，我又想問吓
我仔剛過歲半，因為之前肺炎所以要將歲半評估推遲到去七月中，咁我仔最近有玩眼問題，佢係睥住一點行，好似覺得好得意咁，腳尖行都有，但我睇書話有個階段係會腳尖行再準備學跑

佢都鍾意玩轉野，但時間反而比細個少咗，最多係轉吓車輪，但唔俾佢玩佢又無所謂，冇自轉行為

講野係比較慢，但明顯單字同bb話多咗

手指都會，主要係有指指想食咩同睇書，宜家叫佢bibi拍手點蟲蟲都會做到。

指令上叫佢俾波波，佢會識去拎波俾我地，叠到積木都會回頭望我地，如果我地拍手佢會好開心，識同我地拋波，我俾茶壺同杯佢，佢識扮倒水，俾電話佢佢識放喺耳仔

之前想報steps個啲普通playgroup,同個主任有傾開我的憂慮，主任話可以俾多三個月觀察先決定做唔做評估

基本上同佢互動都ok,佢去玩會望吓其他小朋友，見到陌生人會望吓但唔會跟佢

可能佢有玩眼，所以我會擔心，但其他媽媽會話呢個年紀係古靈精怪，玩多一陣唔玩