考試及測驗先至發燒, 真心求教平日應點樣保持身心健康?

小時了了

事情是這樣, 小女:

1) 去年小三上學期考試 (2014年1月)發燒 照返學考試
2) 下學期測驗 (2014年3月?定4月?唔記得啦)發燒, 照返學測驗
3) 下學期考試 (2014年6月),發燒 照返學考試  
4) 今日小四上學期考試 (2015年1月7日)發燒, 今日無返學, 阿女話有老師係門口"嘟"額頭量體溫會被發現發燒, 唔俾返學及考試, 故今次會第一次補考了.

唉!全部考試及測驗先至發燒. 今日零晨 3:30阿女醒咗同我講話好熱, 我心感不妙話妳係咪發燒呀, 用手量額頭好熱, 拿拿臨俾幸福醫藥俾佢食, 但都難逃請假補考.

第一次考試發燒, 我同自己及阿女講可能無游幾星期水, 抵抗能力差咗啫, 游返水抵抗能力好返就無事喇

第二次測驗發燒, 阿女話已經游返水喎, 都發燒嘅. 我話啲菌好惡毒啊, 身體緊要呀. 但我心感不妙了, 已經諗可能關壓力或情緒健康.

第三次考試發燒, 我直接問醫生阿女連續三次都係考試測驗發燒喎, 老醫生笑笑口同我及阿女講, 平日勤力啲溫書, 唔好臨考試時先至谷呀麻.

今次考試, 我真係無以前咁谷了, 以前聖誕節公眾假期係朝10晚8咁溫書, 今次係一家三口去教會親子露營三日兩夜. 而臨考試嘅星期六及日, 又係全天候朝10晚8咁溫書, 今次卻每日只溫得 3 個鐘左右, 其餘時間同小女 book 場打乒乓球, 踏單車, 睇老子動畫電視, 又俾佢睇金庸射鵰咁, 我以為已經好輕鬆咁去應付考試, 點知咁樣小女都發燒.

今朝同 C6 傾阿女惰況, 佢話下次試下臨考試測驗時唔好食熱氣野 (因為 C6 無啦啦星期日買 Pizza 同燒雞返屋企大家食), 唔知有無效呢?

其實, 今日零晨時阿女發燒, 阿女好純真問我係咪 "因為長高發燒", 我心諗好大機會係 "壓力燒", 但我無講出口. 佢瞓時我係咁望住佢, 我瞓唔返, 睇到佢咁, 依家阿女比起我細個時真係好悽涼.

P.S. 其實阿女成績只係一般, 唔係全級 top 10, 只係全級 50/120名以內,  而我希望佢只需要係維持 band 1尾, 最差的話是 band 2頭成績咋, 我希望係咪好強小女所難呢? 思考中!

小時了了

wan_sosin 發表於 15-1-7 10:29
有能力的話，去搵遊戲治療，壓力可能已經唔係因為父母，係你囡囡本身都唔覺地比自己壓力。遊戲治療係幾好釋 ...

多謝您. 遊戲治療阿女幼稚園時我有上呢啲坊間幼兒心理學課程, 阿女係出面玩過一次 (課程免費送一次), 阿女整個幼稚園階段係屋企真係有"特別遊戲時間"俾佢, 亦買了一大堆兒童心理學玩具什麼屋,樹, 人, 面具, 手槍之類, 屋企細, 無沙玩. 依家佢10歲, 純個人覺得, 遊戲治療幼稚園及初小會適合啲

小時了了

仔仔錫錫你 發表於 15-1-7 10:37
我覺得係壓力問題。你話今次已經無咁谷，其實“零晨 3:30”知道發燒，翌日都重要佢去考試就知小朋友要承受 ...

唔好意思, 我唔係對 band 3生有偏見，只係我覺得小女天資尚可, 自己認為 band 1 或 band 2 對小女學業及更重要係朋輩影響會比較好啲, 以及小女亦應該應付到, 所以要我依家急降低要求去到 band 3, 咁我暫時呢一刻真係未接受到. 如果小女真係有情緒X咁又唔同睇法, 我都係度思考及調節中, 多謝您意見

小時了了

happy_lavender 發表於 15-1-7 10:58
我唔係醫生，唔知係咪壓力導致，但我讀初小時逢星期六都發燒，一年有廿幾個星期六都要請假，上唔到學校的 ...

中醫調理身體我無想起過, 您提起, 今次好咗之後我會捉阿女去睇下中醫試下, 但中醫調理診金+執藥都唔平, 又要洗 $$$$$

另外, 係另一討論帖小學生早餐吃什麼 http://www.edu-kingdom.com/forum.php?mod=viewthread&tid=2976208&extra=page%3D1, 我真係睇到自己汗顏, 覺得自己唔識做人阿媽, 無好好咁整有營養早餐俾女食, 今次之後我都要學其他媽咪學習煮什麼嘉美少爺雞煲3個鐘湯底, 做豬骨湯底了

小時了了

slamai 發表於 15-1-7 13:33
回覆 小時了了 的帖子

運動對舒緩壓力最有效

我都想問下大家意見, 阿女小一開始一星期有一個鐘頭一堂學游水, 學咗都 3年, 我學游水目的係求生及學晒4式就完喇. 原本打算學埋下個月2月就完, 因為見佢學咁耐只學到 3 式, 個游會拖長教, 今年都唔會教蝶式, 唔想浪費金錢

咁, 好唔好繼續俾佢學呢?

小時了了

happy_lavender 發表於 15-1-7 13:28
畀大個D玩o既咪係歷奇輔導囉。

"歷奇輔導" 邊度有呢? 可否介紹下呢?

小女今年已有參加學校基督少年軍, 舊年暑假又有參加 Outward Bond 了 (又上山又下河, 成身濕晒仲幾日唔沖涼, 佢超鍾意), 佢好鍾意玩呢

小時了了

hkspiderman 發表於 15-1-8 07:34
就算補考無分，我都唔會比阿女發緊燒去考試！只係3，4年班，衰左沒有什麼大不了。 ...

分數我反而唔係真係好介意, 係我本人有個傻傻地諗法或者偏見:

1) 我以為考試係學校來說係一件好重要事, 最好唔好補考 (因為我自己從未補考過, 唔知補考後果係點),

2) 我驚學校標籤小女係麻煩學生, 需要學校額外安排試卷及人手,

3) 又或者以為我女詐病唔考試 (都係標籤小女係麻煩學生)

4) 我又驚小女心理上慣咗可以用病來逃避一啲野而唔去面對, 將來佢自己成長及出來工作咁點面對及處理呢?

小時了了

JJDBB 發表於 15-1-7 17:06
另外，游水真系好得，以前每星期游一堂，冬天停游，唔得。自從三年班游冬天，就算冬天到春天交接，三月定四 ...

多謝您寶貴經驗之談, 我會認真參考及效法. 衷心多謝

小時了了

JJDBB 發表於 15-1-8 12:40
少飲冰冷飲品，在家多穿拖鞋，不要赤脚……其實仲有好多。爸爸能諒解女兒，實屬可貴！



  ...

少飲冰冷飲品 ----- 中醫師成日話傷脾胃

在家多穿拖鞋，不要赤脚 ------- 呢個真係無聽過, 唔識喎, 真心求教.


嘩! 上得 EK 多, 真心覺得原來自己識嘅野好少好少, 連皮毛都談不上, 自己唔識煮有營早餐, 選雞又唔識, 又唔識幫助小女處理壓力, 小女今學期開學時, 我自己仲要第一次搵學校社工查問小女情緒情況而得知小女可能已步入青春期..... 愈來愈覺得自己唔識做人阿媽, 真心覺得自己唔係好稱職嘅媽咪

小時了了

真心多謝大家用您地寶貴時間分享您地見解, 方法及心得, 真係令我有支持及打打氣之感.

女人, 每個月生理上有幾日週期性情緒失調, 如果做人阿媽嘅女人, 一年又會多2測2考時有嘅超級情緒低落症候群+脾氣暴躁失調症, 唔好意思, 本人失儀了.

一個唔係好稱職而學緊做人阿媽嘅我, 不斷調較教養兒女步伐, 希望能開始及堅持唔再太急太多太快……腳步輕鬆d去陪阿女走一段人生路


好多謝 happy_lavender 網友名下面金句, 金句尋日不斷係我腦中不斷出現, 提醒自己, 教養兒女係要 "萬軍之耶和華說、不是倚靠勢力、不是倚靠才能、乃是倚靠我的靈、方能成事。(撒迦利亞書 4:6)" 我無聰明, 亦無智慧, 才能及耐性, 係呢個時候真係要搵返得力來源, 倚靠神、方能成事  (唔好意思, 如果唔係基督徒, 不喜勿插)

小時了了

happy_lavender 發表於 15-1-7 13:28
畀大個D玩o既咪係歷奇輔導囉。

"歷奇輔導" ---- 剛剛想起及找到 基甸中心 - 生命導向課程 http://www.gchk.com.hk/235672085335347322442341638498.html, 每個星期六下午2:00 - 5:00有訓練，好似幾好咁，阿女操行麻麻地又成日容易病，都係時間操操佢了。