怎樣跟長輩, 親戚解釋小朋友的問題

conconma

仔仔剛2歲9個月, 由於很早巳接受訓練, 所以他的言語不算比同齡太遲緩

可是有些行為比起正常小朋友仍然有分別, 只要相處一段時間便會發現有些不妥

昨天探老爺奶奶, 佢0地都發現阿仔好似唔多理人...其實我所有姑奶同埋我媽咪都知阿仔0既問題...但唯獨佢兩老仍未知

因為我的姑奶們, 暫不想他們知道, 怕他們接受不了...但我怕紙包唔住火, 你們有否類似經驗...究竟怎樣跟他們解釋比較好

pollybell

有個媽咪兩個小朋友都有自閉症,當時佢解釋過俾佢父母知,初初都得唔倒體諒,還覺得只係媽媽管教問題,最後佢寫左封信俾佢父母,佢父母終於明白,重買左有關自閉症既書,了解點可以同自己既孫相處.

hcily

我選擇叫我老公講,其實我一直有暗示給我老爺奶奶,奈何他們好像不太認同孩子的問題,到他終於評估了,我便要老公詳細解釋給奶奶知. 不過老實說,你不能期望他們會完全接受,我奶奶有次看見孫兒做了一個很好的反應,她又忍不住說:他咁精靈,怎會有自閉症.
我只有苦笑,有與沒有,不是主觀意願可控制.
另一方面,我也有點不開心,因為他們一日不肯接受,就代表他們不會學習與自閉小孩相處的技巧.
或許我不應期望太多,其實他們也是愛孫兒的,只是方法不同罷了.

conconma

唉...我老爺奶奶一個70幾, 一個80幾
佢0地係上一代0既人, 怕且好難接受同明白咩叫自閉症

我仲記得當我個仔2個月大時話比奶奶聽, 阿仔隻左耳有嚴重弱聽, 佢都即刻話冇可能0既

又話係咪我大肚時食錯0野, 又話因為扔0左個神位, 所以祖先懲罰

我唸都係煮到來先食...做人父母甚艱難, 做特殊兒童父母更背負很大壓力, 有時真係身心疲累

天之涯

我都好頭痛唔知點講俾屋企長輩知阿仔有自閉症,我和老公都沒特登話俾我老爺奶奶知,老爺身體又唔好,我哋唔想俾佢知費事令佢擔心!但有時真係好大壓力,人哋都睇得出阿仔有些唔同同齡小朋友,只係有苦自己知!

singren

M2

我地都知道左有一年，到而家62同99都唔知，總之我老公冇同佢個邊親戚講，我就話等我老公自己決定。

但係我覺得紙係包唔住火，個囝愈來愈大個，唔識講野又唔多理人。而家就話細啫，大下大下點解都係咁。

唔好話好小見既親戚，連鄰居﹑朋友都要諗下點講，因為有d又唔係咁熟但又識，成日見面都會傾講小朋友讀書野(因為個個小朋友都差不多年紀)，都要諗諗係咪通哂天好定得過且過好…哎~~~~~~

conconma

都係0架...尤其係鄰居/看更都比較"關心"小朋友番邊間學校...

不過如果比看更知道, 就等於成座大廈都知

唉...即使一年見一次0既親戚, 都會問長問短, 又話你要教下個仔禮貌, 唔好成日十問九唔應...唉...真係眼淚在心裡流

hcily

我都面對同樣問題,友善的隣居,清潔嬸嬸的問候,我選擇有需要便說,不刻意隱瞞,因為隱瞞沒意思,我想人家也明白這類小孩.不過我預左將來會面對不少歧視及誤解.
其實家人才是最難搞的,我奶奶是一個飽讀詩書的人,但她的態度跟我那目不識丁的母親簡直是兩回事. 我母親很自然便接受了孫兒的問題,但奶奶面對評估結果,依然不接受,昨天她還說那些都只是理論,言下之意不用太信相,還說我看書看得太多了,即看昏了頭.
他們都不希望我帶孩子去做太多訓練,即使我不停強調早期介入的重要性也沒有用,這才是最叫人氣餒的事.
我想奶奶一直只對著一個孫兒,沒有比較,所以她不覺得孫兒有何問題.

conconma

可能得一粒孫, 所以比較難接受現實

尤其如果他們知道自閉症係冇得醫, 咁就仲難接受