老牌名校間間鬥豪

elbar

男拔「超級宿舍」設全天候室內泳池，媲美豪宅設施。



老牌名校轉直資後，近幾年紛紛出盡法寶籌款重建或擴建校舍，規模越來越大，設施豪華兼多元化，以拔萃男書院為例，耗資 1.2億元興建嘅「超級宿舍」，唔只有環迴九龍半島靚景，仲有一個設有 6條泳道嘅全天候室內游泳池，又有個建造費幾千萬元音樂廳，聽落係唔係好似附設超豪會所嘅豪宅呢！

紛建泳池體育館

另一傳統名校聖保羅男女中學動用 3億元擴建校舍，新建四層高宿舍；聖保羅書院幾年前已擴建校舍，有新教學大樓同體育館，非一般中學可以匹敵。歷史悠久嘅愛國學校，近年都致力改善校園設施，沙田培僑書院獲四叔李兆基捐錢逾千萬元興建泳池，最特別係有傷殘人士專用更衣室。

其他新進直資學校，好似保良局顏寶鈴書院、林大輝中學都要趕上馬興建泳池體育館。直資學校咁落本，無非覬覦日後有機會吸引內地生入讀，就好似發展商起豪宅主攻內地富豪，直資校都要北望。

elbar

新校舍噚日舉行奠基禮，女拔學生趁機玩吓安全帽。



香港地家人人講「升呢」，傳統名校不甘後人，轉直資後間間籌錢搞重建，常規課程加入新元素，位於佐敦嘅拔萃女書院同埋拔萃女小學，舊年開始重建，預計 2011年 9月啟用，新校舍可用面積比舊校舍多 1.5倍，中小學每一級都會加多一班，校方有新搞作迎接新校舍，會將高爾夫球列入 PE堂常規課程，即係女拔學生人人有機會扑白波仔。

新音樂廳可坐 1500人


女拔未來校舍電腦模擬圖。
互聯網



新校舍噚日舉行奠基禮，女拔校長劉靳麗娟同八方講，起新校舍係為咗學生學習着想，啟用之後有好多新設施及新活動，例如以往學生上體育堂玩高爾夫球只係玩玩吓，將來就會納入運動堂常規課程，人人都一定有機會接觸到呢樣玩意，打得好嘅話仲可以組隊出賽。

據講女拔學生會去西貢滘西洲球場學打波，喺真草地打 18個洞，事關新校舍寸土尺金，雖然只有練習設施，不過對一般人嚟講都幾奢華 o架。此外，新校舍會加建 50個宿位，畀交流生短暫入住，又會加建一個可坐 1,500人嘅音樂廳，規模媲美文化中心個大劇院，劉靳麗娟話可租借公眾使用。

本來舊校有嘅室外游泳池，將會移師室內，變成全天候暖水池；校方亦預留空間同資源發展 IT教學，包括引入多媒體實驗室、科技室等。興建新設施有得有失，校內原本有 24棵樹，家斬剩 8棵，校方指最值得保留僅兩棵，一棵係南洋蟠桃，高 15米，樹冠闊 10米，另一棵係落羽松，高 12米，樹冠闊 5米，學生暱稱佢為「聖誕樹」。

3.8億元建五星級校舍





興建呢個多功能五星級校舍費用達 3.8億元，校方已經籌到兩億幾，餘下一億幾雖未到位，但劉靳麗娟話好有信心校友、家長會踴躍捐款。不過，羊毛出在羊身上，劉靳麗娟指女拔轉做直資五年來冇加過學費，噚日事先張揚會加價，話補貼燈油火蠟同維修保養都好合理。