因教學關係,經常聽到學生會答一句「唔知」、「唔識」,以下有些例子和大家分享:
(一) 和失學少年上課問及特首辯論候選人的表現時,對方答「唔知」,其實呢個係對方嘅signal,「嗱,你唔好再問落去,我唔想知,快趣啲上完堂,我趕住返屋企打機」。少年背景是屋企有工人照顧,日夜打機,食飯要「囈」,無心上學亦唔肯揾工;
(二) 課後輔導班安排堂上做練習,有同學舉手嗌「唔識」,哦,無問題,重新講多次,對方話就快夠鐘落堂,跟住攞起支筆等你寫答案照抄。家長唔明點解子女有補習,但考試成績一樣唔得,如果了解上堂情況就會明白「死因」。
(三) 中二生提及中文科啲文言文難,阿媽就答俾錢上埋中文科補習啦,學生都無話唔識,只是想講番自己感受。家長是否真正明白子女學習上的問題呢?
現今學習問題多如天上繁星,家長需要冷靜頭腦分析子女真正情況,關心則亂,免得錢花了但問題仍未解決,日積月累下會令問題變得更複雜。
還有一點是孩子成長需要時間,老師教學也同樣需要時間,我了解現今小朋友有多種學習活動,部份家長期望以最少時間教識他們的孩子,最好所有練習工作紙都能在課堂上完成,以上我所講的例子(二)就是後遺症。琴行教時遇過一個小五學生,人非常聰明,鍾意彈琴但唔肯練,知道琴課為半小時,佢會望住個鐘係咁講嘢,希望傾計傾到落堂,應付方法是將佢排到最後,佢講幾多時間就照加上去,情況先有改善,好彩家長也肯合作,遲落堂都無問題。
可惜現實情況會有家長自選琴課長短時間,認為上堂教唔哂係老師問題。我個人收生前會和家長先作溝通,不能提供足夠時間讓我教學的,對不起,我不能配合到他們的需要。