(一) 而家學校有NET,但學生英語能力不斷退步;
(二) PLAYGROUP中心梗有一間喺附近,但小學生連收拾書包或床舖都唔掂;
(三) 越多食物選擇,小朋友越揀飲擇食;
(四) 聰明奶粉及營養BB食物充斥市場,五花八門的學習障礙症比例反而上升;
(五) 凡事要顧及小孩自尊,上堂嘈吵罰佢企要好客氣話「請你企嚟呢度.....」;
(六) 學校考試向琴行請假,家長投訴唔俾交少兩堂學費,但業主會唔會通融免收琴行兩星期租呢?奉勸家長少啲計較,萬一樓下間琴行做唔住執笠,到時撘車去第二度上堂咪重煩;
(七) 中學生加減乘除要用計算機,心算真係唔知點算。
現今家長及學生都係消費者心態,小學生用手機影老師責駡學生做投訴證據,從事教育工作多年人士提醒新人而家小朋友唔鬧得,家長投訴會連份工都無埋,教導學生變成俾面派對,學生俾面上堂唔搞事,導師要識做俾番啲甜頭佢哋,想家長同學生LIKE,部份導師會選擇報喜不報憂,反正成日轉工,成績唔好都揾佢唔到。
一句老話「天生天養」,上一代資源及經濟不富裕都可培育出不少才能傑出人士,希望我們這一代不要將小孩子當作受保護動物,凡事平常心看待,盡量少啲干預,自會發掘到小朋友悟性和能力。