《Best 5 33分嘅包尾》

1. 前言： 記得我Form 1 入學嘅時候，我係用叩門方法，以全級最後一名身份入學。
Form 1 同 2 Final ：我因為係全級尾十要見校長，連續見左兩年，都係因為補考啱啱好合格。
Form 3 ：我因為意識到選科嘅重要性，真係開始認真溫書，終於俾我入到最難入嘅Phy Chem Bio
Form 4 同 5：發現原來自己根本唔鍾意 Phy Chem Bio，純碎係為左嗰啲少少虛榮感，完全無心機讀，拖低埋其他科，結果又要見校長。

2. 轉捩點：Form 6 嗰年，就係我轉變最大嘅一年。以前無論校長老師屋企人同我講要生性，好好計劃點樣溫書，我完全係聽唔入耳。直到我見到我一班讀得書嘅好朋友，一個二個話要衝刺，我先識得驚。
首先，我係一個有自知之明嘅人，我最大嘅問題係懶，無規劃同唔鍾意跟時間表，但係我更加唔甘心，我唔想俾朋友拋低，於是問佢地考得好嘅方法，於是我個best friend就走黎安慰我話你首先要肯捨棄過去嘅自己，“拖”係完全解決唔到問題。
就喺Form 6 十一月，個best friend問我想唔想組個study group，過新生活。我諗都冇諗就入左group，同另外三個平時玩開又讀得書嘅friend一齊。

3. 改變讀書環境：為左專心應付DSE，我地五個決定搬出來住，雖然中間係由唔少家庭因素阻礙，我地都成功遊說到父母俾我地一齊住，而我嘅條件就係要喺第一個月見到我讀書態度上有明顯改變。我地特意㨂左一個隔音好，寧靜同風景好，喺淺水灣一個大約2000呎嘅serviced apartment。雖然係貴，但係其實五個人除番開係負擔得起嘅。我地㨂住serviced apartment 有個好處，就係唔需要搬傢俬，淨係需要買一個打印機印past papers同練習卷就夠。

冇錢絕對唔係問題，重點係你選擇讀書嘅地方。我個人唔推薦去cafe shop或者快餐店入面溫，有機會俾人趕係其次，重要嘅係環境太嘈，難以專注同溫書質量都係大問題。聽住音樂溫／練習 都唔太建議，一開始係可以幫手專注，但係溫耐過二十分鐘之後就盡量唔好咁做，原因係考試場地通常好靜，你唔可能可以一路聽住歌一路考。盡量選一個同考場差唔多環境嘅地方溫書。

4. 由睡眠入手：我地一月搬入，開始地獄式訓練，每日六點起身，互相叫大家起身，邊個十五分鐘之內起唔到身就請食下餐，兩個人遲就包剪揼決定邊個請早餐同午餐。六點半就去做半個鐘gym，沖完身食個早餐就番學（若要早上精神飽滿不賴床，養成有規律的運動習慣是關鍵，早上工作時不會昏昏欲睡，也更易集中精神）；而每晚就九點開始沖涼，十點熄燈。如是者，我地開始培養左一個良好習慣，令我地更加容易集中，溫書事半功倍。

5. 設立目標：第一日入去住，除左㨂房之外，我地規劃自己一定要喺一個鐘頭之內
諗定頭三個Jupas choice，將你心儀嘅學科寫低，寫埋Jupas位數目同上年收生median，貼喺你間房門口。呢點好重要，訂立一個明確嘅目標，需要靜落嚟慢慢諗，因為你對心儀學科嘅渴求就係你嚟緊幾個月嘅動力泉源。

6. 保持考試最佳狀態：除左番學日子，我地每日定左八點就開始做練習卷／操past paper，無論識唔識做都頂硬上左先，當真正考試做，一定要計時，慢慢適應呢個感覺。由入住嗰晚開始，臨訓前我地都會做15分鐘想像，模擬下成個考試過程，由登記去到收卷，呢個係心理訓練，想像自己嘅體能可以發揮到極致嘅感覺，到真正考試嘅時候就會神奇咁冇左恐懼感。

7. 時間管理：我自問好鍾意拖延野嚟做，無論係幾簡單嘅事都會想拖得一刻得一刻，而成日遲到就係其中一個引伸壞習慣。好彩我當時係同一班共同進退又有上進心嘅好朋友一齊，我地一齊制定一份“吸星大法時間表”，規定開始讀書前五分鐘要齊人，唔係又要請食飯。

如果你認為你都呢個問題，你可以搵一個真心關心你朋友，可以訴心事又唔會嫌你煩，最好就係同屆DSE，send 你個時間表俾佢，有禮貌咁問下可唔可以喺某段時間打嚟（例如朝早同夜晚）。如果真係冇咁樣嘅朋友，直接搵阿媽就最啱，相信喺你最需要幫助嘅時期，你阿媽唔會拋低你唔理掛？