- ANChan59
- ANChan59的個人空間 › TA的所有日誌 › 查看日誌
長沙灣天主教英文中學(長記) - 排長
熱度 15 ||
cowboymama 想知道長記的長跑，越野及運動歷史，我都好願意分享長記如何由一間藉藉無名的普通地區英中，變成一間文武兼備的英文中學。我會講梁柏林老師(排長)及梅元碩校長對學校40年的貢獻及影響；配合香港天主教教區支持母語教學，自願由英中轉中中，又由中中上訴變回英中的故事。
排長跟我都是1972年進入長記，長記是1970年成立的新英中，由於在屋企附近，可以5分鐘返學又可以返屋企食午飯，當然是首選。
排長是畢業於臺灣國立體育師範大學，當年香港邊有咁多體育老師有大學學位呀。第一堂體育堂，排長召集40+個細路在他面前坐下來。他5'10"高，皮膚稍黑，身材健碩，古天樂似佢，若果在男女校或者女校肯定多人追佢....... 他開門見山問我們，你們知道400m有幾長，我地懶醒等於繞球場一個圈，跟住問800m........ 然後佢話今日你們會知道1500有幾長，我地既反應係唔係呀，第一堂跑1500m....... 佢就話之你，反對無效。
他將人生比喻為長跑，你們跑到800~1000m會面對你身體的第一個極限，慢慢跑，堅持落去，你會突破它，然後完成1500m。跟著他講你下個極限是2400m, 第三個極限..... 第四個極限........ 每次長跑，那些被突破的極限都會出現，經驗話你知，你已經突破它，越來用越少時間便擺脫極限向前跑。你們要有信念，你們可以突破自己的極限.........
跟著唔係跑，用佐不少時間做熱身、拉筋..... 然後分批出發，他拿著4尺長的籐條跟住我地，發覺我地"蛇皇"，佢用籐條打過來，我地好辛苦完成人生的第一次1500m..... 落堂後，全身腰酸背痛慢慢行上課室，內心咒罵"正衰人......" (最抵死係他會講比我地知，邊組肌肉今日好痛，邊組肌肉明白重扯住扯住，第三日會鬆弛下來...... 咁似"沉默的羔羊".)
連續兩個星期，每星期都是跑兩堂1500m。到第三個星期，他有新花樣。他要我地由高排到矮，然後按高矮每人有一個目標，我既目標是6'10"完成1500m......... 你們咁聰明都知道，佢學我地d老細咁慢慢將時間縮短。
然後將距離加長，目標是大考前每人要完成7000m (即繞學校跑25個圈，40年後傳統依舊。)，如果不能完成，無得考大考，他得到梅元碩校長的全力支持，我地變成無退路，如果唔上體育課，除非有醫生證明，點都要在運動場幫手計時。及後高中收女生，一樣有一年時間來練習，都要跑5000m。為應付跑步，好多同學會留校練跑，我地週末還會到石梨背水塘跑山練氣及體能，所以當年的長記仔平均d體能真係比喇沙仔及拔萃仔有過之而無不及。
我地一年體育課，未曾接觸個球類，只有跑步，田徑，體操，體能訓練........ 亦直接令我們在我中二時(1973)，第一次參加天主教教區運動會全場第4名，自下一屆1975起(每兩年一屆)，連續16屆的全場總冠軍，好多時是ABCD都是冠軍，其他學校只爭亞季軍。在學界坐即升機在1974年成為第一組別，兼奪得當年玫瑰杯最佳進步獎。2007到拔萃，見到當年打破拔萃及喇沙的壟斷，自己都好興奮，都有d眼濕濕........ 緊係唔比老婆知，唔係有排比佢笑。
由於我地無專門訓練都自己跑越野，後來有新體育老師加入對越野好有經驗，班學生自然超哂班，唔壟斷都好難，就算有學生走去其他名校，但長跑的運動員都陸續新人接舊人。
到中二開始操排球，籃球，跨欄，跳高，跳遠，鉛球，鐵餅......... 到中五學三樣絕學，
1. 田徑訓練法
2. 排球訓練法
3. 籃球訓練法
到大學時，當年唔駛牌，我在康體處都有教波，都幫輕我d零用錢及拍tall錢....
到現在班老鬼見面講開"排長"都又愛又恨，果幾年真係操到隻狗咁，但頑強鬥志，永不放棄，追尋突破....... 一身受用不盡。他用長跑來體現校訓 - "自強不息"..........
全部作者的其他最新日誌
熱門日誌導讀
發表評論 評論 (31 個評論)
- 回覆 ANChan59
- 阿仔G9時，上學期成績嘛嘛地。派完改好的考試卷，化學老師跟阿仔私下講，你係好聰明，你下學期唔發力，你選唔到好既科目，你將來會後悔。她說她一直睇好他的能力。我講到口臭都無乜效果，老師的當頭棒喝，令他的起心肝努力讀書。
到下學期再派化學卷，老師好興奮話，化學考試考第一者響這班，大部份同學恭喜另一位化學成績一直最好的同學。點知老師話唔係佢，係阿仔，成績又60+跳升到95+，由130+名次三級跳，得埋最佳進步獎........
簡簡單單一句說話，可能改變孩子的一生，我太太稱稱職的老師是 - 生命工程師。
- 回覆 cowboymama
- 長記這長跑的傳統真的令學生一生受用無窮！用跑步來訓練學生的意志，建立自信，突破自己的限制，勝於千言萬語！當年小兒升中揀校時有留意長記，也被此傳统吸引。
- 回覆 ANChan59
- 長記若以學術來說只是中上，它地區名校的"名"來自體育的傳統及幾位40年前主事者的遠見，當年我地都幾另類架，學界未能完全打破拔萃及喇沙的精英壟斷，但學生整體體能可能只輸比"赤柱航校"及"少年警校"，在傳統中學水平係無對手，其他新派學校都可以作參考。
- 回覆 annie40
- Anchan,
ANChan59: 當我寫排長時，內心想同佢講，你當年班百厭仔，不少都出人頭地，唔係因為英中，唔係因為考試叻，唔係因為大學畢業，唔係因為順風順水........... 而係佢第一堂輕 ...
跑过的人, 才容易明白排长的訓話, 小女的学校, 第一堂PE已要求跑步2.7K cross country. 速度慢过30 minutes, 要重跑一次, 日子有功, 个个似老虎仔.
- 回覆 ANChan59
- 深又同感.....
annie40: Anchan,
跑过的人, 才容易明白排长的訓話, 小女的学校, 第一堂PE已要求跑步2.7K cross country. 速度慢过30 minutes, 要重跑一次, 日子有功, 个个似老虎仔. ...
- 回覆 annie40
- 今晨约好位网友行山, 顺便鼓励吓她认真地考虑开始做运动,Anchan 要记得约埋太太一起跑步, 无理由收藏D好野唔分享.
明天去报名学游泳, 要跟大学生斗早报名, 我未学懂, 已经告知外子, 我准备三个月后可以跟老友出海学Rowing and Sailing. 女友曾是学界冠军, 今天体能好似弱左, 只有 等我学识游水, 然后做其rowing partner.
12
帖子
日誌
相冊
分享
記錄
活動
投票
懸賞
辯論
商品
收藏
勳章
Copyright c 2002 - 2024 Baby-Kingdom.com Limited, All Rights Reserved.
GMT+8, 24-4-26 11:56, Processed in 0.374661 second(s), 10 queries , Redis On.
GMT+8, 24-4-26 11:56, Processed in 0.374661 second(s), 10 queries , Redis On.