討論區

教育王國: 教育講場; 使用意見

幼兒教育: 幼校討論; 幼教雜談

小學教育: 小一選校; 小學雜談

中學教育: 升中派位; 中學交流; 初中教育

專上教育: 備戰大學; 選科選校

國際教育: 國際學校; 海外留學

知識增值: 課外活動; 教材閱讀; 公開考試; 深造進修

特殊教育: 特殊教育; 資優教育; 自閉寶寶; 智能評估

徵求專區: 二手市場; 誠徵老師; 組班專區; 徵保母車

聯絡管理員

我的中心

教育王國 › 我的首頁 › 日誌 › beastiebistro的日誌

beastiebistro: beastiebistro的個人空間 › TA的所有日誌 › 查看日誌

全寄宿比例對傳統英式寄宿體驗的重要性（之我見）

熱度 6已有 1305 次閱讀 22-9-15 19:02 |系統分類:教育

XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX

XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX XXXXXXXXXXXXXXXX

趁三隻小靈精入晒學，我又喺酒店隔離，乘機又再寫下英國學校嘅嘢。當然睇法呢啲嘢人人唔同，費事舖出大海引嚟一眾無謂爭拗，或者一地玻璃。放喺呢度日誌，有緣或者熟門路嘅網友搵到，又睇吓有冇參考價值。

其實喺唔同帖或者同唔同網友交流都講過N咁多次，我個人認為全寄宿（Full boarding）比例高嘅學校先真正體現到傳統英式寄宿學校嘅教育真諦。當然我又明唔係個個都搵到全寄宿比例高嘅學校，就算搵到都係人揀你你揀人，未必個個入到。不過想小朋友真正體驗英式寄宿生活，有得揀呢樣應該係考慮嘅重點之一（大家見我都將佢擺首位）。如果有網友經agent搵學校，我真係建議你哋叫agent清楚列出學校嘅（Y9-Y13）總學生數量同埋總Full boarder數量作參考。

點解要講明Y9-Y13學生數量呢？因為傳統英式寄宿學校嘅senior school係由Y9起至Y13（呢樣原因另闢一帖再講），所以要apple to apple比較一定要搞清楚senior school人數。（有啲學校自己有Y7，有啲甚至有小學或者幼稚園，但係呢啲年齡多數未必寄宿，所以講明senior school人數喺比較嘅時候客觀啲。）

咁點解講明係Full boarder比例呢？因為除咗Full boarder，近年好多寄宿學校都會提供Weekly或者Flexi boarder選擇。Weekly boarder意思係星期一至五（有啲星期六要上堂比賽嘅連埋星期六上下午）住學校，六日返閨。Flexi boarder意思係冇乜特定時間寄宿，可以一星期兩三日，不過通常週末都係返咗屋企。所以一間學校可以「話」boarding有8成，但其實問清楚，分分鐘Full boarding得四成，其他嘅只不過係weekly/flexi boarding。如果家長以為一樣，到時發現唔係就太遲喇。

咁點解我要咁推崇全寄宿比例呢？你會諗返學咪返學囉有咩分別呢？我盡量講清楚我嘅睇法啦。

學做人

其實一開始嘅學校（講緊中世紀）全部都係教會辦嘅，目的係教導一啲有potential嘅窮苦學生成為神職人員，幫助傳教／壯大教會。及後（15-18世紀）英國國力漸強，版圖漸大，皇家發現極需要人手打理，所以亦參與辦學，希望可以教育一批管理人材。去到18世紀打後，好多有錢有權勢嘅人明白唯有教育好下一代，先可以保住財富（或者先可以從政用權力保住財富），所以好嘅學校漸漸俾呢啲有遠見嘅家長進駐。呢啲家長未必識得／有時間／有心機自己教，所以基本上係全盤out source俾學校。而學校亦明白一個簡單市場道理，越多學生成功，代表越多有頭有面嘅家族會入讀，形成一個positive feedback loop。而且當時嘅交通一啲都唔發達，根本冇可能走讀，所以想收「好」學生就一定要全寄宿。而學校除咗知識嘅傳授，仲要教識學生做人／禮儀／同陌生人相處互動／敗不餒／國家大事／世界地緣政治經濟／管治方式等智識，基本上就係而家所謂嘅「全人教育」，甚至比而家嘅全人更全人。而傳統英式寄宿學校有呢幾百年嘅發展，自然已經去到爐火純青嘅地步。

咁好明顯喇，要教呢啲嘢，唔可能單靠坐係課室上堂，有好多一定係經日常生活嘅互動／規律去學。咁又好明顯喇，當學校唔係全寄宿，日常互動嘅人數自然大減，學到呢啲非學術嘅「知識」機會自然更少。而且，一間學校全寄宿比例唔高，意味好一部分嘅本土學生係可以走讀或者起碼週末可以返閨，學校剩低嘅基本上係冇屋企返嘅學生。諗吓都知即係香港／大陸／印巴／東歐／非洲嘅同學。如果住埋一齊嘅大部份係呢啲同學，仲會唔會學到傳統英式寄宿嘅真諦呢？

交心

又係講過好多次，其實讀寄宿真正交心嘅時間，係落晒堂，做完晒課外活動嘅down time。基本上即係每日可能係晚飯前少少時間，Prep time後至上牀瞓著前嘅少少時間，同埋週末嘅時間。非全寄宿嘅學校（包括weekly/flexi boarding嘅）其實呢啲時候會走嘅學生都走得七七八八，咁，交咩心呢？

有啲家長會話，車，上堂咪有交流囉。我唔排除上堂會學好英文，但係其他唔同層面嘅交流知識呢？斷估大部份人都唔會上緊堂，老師係前面講緊書，自己喺下面傾偈／玩掛？就算有又玩得幾多呢？而且英國學校乜鬼科都分set，唔同學生又揀唔同嘅科，有時校舍同校舍距離又遠，轉堂係滾水淥腳咁，亦都冇時間慢慢傾。

到真正靜落嚟喇，好似星期日咁，點知學校成個死城咁，返得屋企嘅返晒，交條毛咩？到時分分鐘係同香港／大陸同學交心囉，打麻雀／打邊爐囉，國語流利過英文囉。

我最好嘅鬼仔朋友一定係週末同我探險嗰班。大家焗住喺學校冇定去，自然就會搵嘢玩。平凡如玩吓board games，玩吓運動，玩吓音樂咁，再唔係喺學校範圍探吓險。英式寄宿就係咁，又唔係完全獨裁統治，又未至於毫無規則底線。咩做得咩唔做得，做咗有咩後果，都係學習嘅一種。就算俾人捉到犯規，都一條心唔會做二五仔，好多做人嘅道理都係咁樣學返嚟。

齊人

全寄宿比例高，呢啲down time就夠人一齊玩，一齊闖。我當年，以至我仔同女而家，真係求其冇約埋攞個ball落去就十幾廿人縷埋一齊玩。同一時間，又有幾十人夾緊音樂／樂團，又有人玩緊話劇，又有人校隊訓練，又有人搞緊藝術，又有人聯群結隊落town買嘢，有人去其他house串門子，當然都有人學術討論啦，仲有唔同學會一大籮，又有學校安排嘅trip呀活動呀咁。冇返幾百人點成事呢？如果嚟嚟去去週末都係見返同樣小貓三四隻，何來交流呢？玩得一樣嚟都唔夠人玩第二樣，唔啱玩咪又匿入房睇youtube／netflix囉，咁點算寄宿體驗呢？

責任／社會結構

雖然小朋友慢慢長大，就算係普通day school甚或香港學校，都會慢慢被付予更多權力，但係呢樣嘢同一班人住埋一齊完全不可同日而語。同一班非親非故住埋一齊，不單只權力會漸漸增多，責任亦同時漸增。唔會一味淨係點人做嘢咁簡單，亦要兼顧平時細嘅一啲起居／讀書／紀律／互動嘅問題。Housemaster就得一個，就算平時朝早有啲house tutor喺度幫吓手，一到夜晚週末，都係靠班大嘅幫手睇住細嘅。如果下下都走剩幾件，互動都少啦，莫講話照顧。

呢種結構亦令到同學同埋師兄弟感情更深，因為真係一個禮拜7日24小時困埋一齊，想唔磨合都唔得。當然都有格格不入，點磨都唔合嘅人。但其實社會咪正正就係咁樣㗎囉！唔喜歡一個人可能都要學識同佢相處，唔係放咗學就拍拍籮柚走人唔使理，因為返到house咪又係對口對面？

當年我嗰啲遠大理想，都係星期六夜晚偷偷哋走出town食嘢嗰時同啲鬼仔摯友（共犯）分享。仲要係一開始好睇唔順眼，結果打交打到爆缸先惺惺相惜嘅朋友添（當然我哋冇互爆大家大鑊啦）。

當然以上都係我個人睇法（戴返頂頭盔先），而各家庭有自己考慮，亦唔係個個都搵到／考到全寄宿比例高嘅學校。不過我誠心提議各位網友，將全寄宿比例列為選校嘅其中一個重要考慮。

有時間我或者會寫下學校巡禮，希望客觀啲講吓，平衡吓啲Agent一味唱好嘅評語。（佢哋實會唱好㗎，否則點氹啲家長報呢？間間都好，樣樣都好，咁有咩分別呢？如果間間都好，咁仲使鬼搵佢呢？每間學校都有強弱，每個小朋友都有唔同特質，揀啱如魚得水，揀錯可能苦不堪言。多啲客觀資訊一定好過少啲，雖然我唔敢講我講嘅實啱晒，不過我相信知多啲點都有助家長們考慮。）

路過

雷人

握手

鮮花

雞蛋

剛表態過的朋友 (5 人)

收藏分享舉報

全部作者的其他最新日誌

熱門日誌導讀

發表評論評論 (27 個評論)

回覆 Radiomama 22-9-16 13:50: 勁呀，你講英國寄宿學校真係好到位。

回覆 Radiomama 22-9-16 13:51: 到大學住宿舍，真係另一回事；而英國同美國，原來真係文化大不同。

回覆 beastiebistro 22-9-16 13:59: Radiomama: 勁呀，你講英國寄宿學校真係好到位。
感謝支持

回覆 beastiebistro 22-9-16 14:00: Radiomama: 到大學住宿舍，真係另一回事；而英國同美國，原來真係文化大不同。
呢樣都真係，等你分享下J喺CMU嘅經歷

回覆 ANChan59 22-9-17 13:48: 我對你說一些人，見佢前面憎佢后面，如何相處真係大學問，自己工作上有3年這種經驗，真係好有挑戰性，不過，又係有得著，對神鬼都可以處變不驚！

回覆 beastiebistro 22-9-17 14:03: ANChan59: 我對你說一些人，見佢前面憎佢后面，如何相處真係大學問，自己工作上有3年這種經驗，真係好有挑戰性，不過，又係有得著，對神鬼都可以處變不驚！ ...
都係㗎，所以寄宿係唔錯嘅訓練。始終住埋一齊五年，一間house成60/70人，唔妥都要諗辦法妥協，否則冇可能生活。

回覆 Yanamami 22-9-21 09:29: Radiomama: 勁呀，你講英國寄宿學校真係好到位。
叫拒專家無人會反對。

回覆 Yanamami 22-9-21 09:39: 細Y已"入侵"埋人地屋企，連人地父母都識佢，有幾個媽咪仲特別鍾意佢。

回覆 beastiebistro 22-9-21 09:51: Yanamami: 叫拒專家無人會反對。
多謝支持，太過獎喇。

回覆 beastiebistro 22-9-21 09:52: Yanamami: 細Y已"入侵"埋人地屋企，連人地父母都識佢，有幾個媽咪仲特別鍾意佢。
細Y好嘢！真正融合，玩得盡興。

回覆 Yanamami 22-9-21 10:46: beastiebistro: 細Y好嘢！真正融合，玩得盡興。
外國人真係開通。細Y話yr12畢業dinner後意猶未盡，繼續去同學屋企盡興，第二朝有另一同學老豆黎接隻醉娃番屋企，順便車埋佢，中途個女喊老豆停車，衝落車嘔，個老豆若無其事。可能佢後生時都係咁，覺得係人之常情。

回覆 beastiebistro 22-9-21 10:52: Yanamami: 外國人真係開通。細Y話yr12畢業dinner後意猶未盡，繼續去同學屋企盡興，第二朝有另一同學老豆黎接隻醉娃番屋企，順便車埋佢，中途個女喊老豆停車，衝落車嘔，個 ...
呢樣又真喎。我自己唔太飲酒，但係寄宿嗰時啲同學一夠18就大飲特飲（仲要係house master同家長知情嘅情況下）。對佢哋嚟講，18歲係成人，飲酒飲到要劏都係自己責任。

回覆 Radiomama 22-9-21 13:45: 唔知J有冇收錯風，佢身處的州份，21歲先可以飲酒。所以佢話佢無飲酒囉。

回覆 Yanamami 22-9-21 13:55: beastiebistro: 呢樣又真喎。我自己唔太飲酒，但係寄宿嗰時啲同學一夠18就大飲特飲（仲要係house master同家長知情嘅情況下）。對佢哋嚟講，18歲係成人，飲酒飲到要劏都係自己責 ...
細Y比佢地大差不多一年，所以通常彼派去買酒，梗係受大衆歡迎啦。佢已經比鬼妹教壞哂

回覆 Yanamami 22-9-21 14:04: 我個中學老友BNO移左去UK, 住果頭無乜香港人，唔到兩個月個女已同附近鄰居個仔拍拖。我笑佢，你個女唔洗等5+1，入籍應該快過你。

回覆 beastiebistro 22-9-21 14:07: Radiomama: 唔知J有冇收錯風，佢身處的州份，21歲先可以飲酒。所以佢話佢無飲酒囉。
冇錯喎，賓州係唔得喎。我老表當年喺U Penn都係要靠假ID...

回覆 beastiebistro 22-9-21 14:08: Yanamami: 細Y比佢地大差不多一年，所以通常彼派去買酒，梗係受大衆歡迎啦。佢已經比鬼妹教壞哂 ...
我都有個老死喺美國係咁，結果做咗酒舖VIP...

回覆 beastiebistro 22-9-21 14:15: Yanamami: 我個中學老友BNO移左去UK, 住果頭無乜香港人，唔到兩個月個女已同附近鄰居個仔拍拖。我笑佢，你個女唔洗等5+1，入籍應該快過你。 ...
咁可能好快做嫲嫲添喎

回覆 Yanamami 22-9-21 14:17: beastiebistro: 咁可能好快做嫲嫲添喎
咁又唔驚，咁大個女咯，同大Y同齡，自己識㗎嘞。大Y都拍左三年拖啦。

回覆 beastiebistro 22-9-21 14:18: Yanamami: 咁又唔驚，咁大個女咯，同大Y同齡，自己識㗎嘞。大Y都左三年拖啦。

12 下一頁

教育王國

幼兒教育

小學教育

中學教育

專上教育

國際教育

特殊教育

知識增值

徵求專區

關閉 安全驗證

全寄宿比例對傳統英式寄宿體驗的重要性（之我見）

剛表態過的朋友 (5 人)

全部作者的其他最新日誌

熱門日誌導讀

發表評論 評論 (27 個評論)

關閉安全驗證

發表評論評論 (27 個評論)