入讀英國寄宿公學之路 - 小朋友準備篇（番外篇）

都有啲掙扎記唔記錄，因為唔想炫耀。不過唔記又好似唔夠complete，唯有盡量低調客觀。

睇到呢條副題，係咪第一樣就覺得要成績頂班谷谷谷呢？如果係，咁應該同我啲小朋友冇乜關係啦？我教仔嘅方法咁唔睇重成績，又唔俾去補習上雞精班，如果照「港式」思維應該無行，關我咩事呢？又講一次，傳統英式寄宿公學同香港學校有fundamental difference，思維根本唔同。對佢哋嚟講，成績只係其中一個考慮因素並唔係一切，Interview其實又係成敗關鍵。佢哋唔會celebrate讀書機器，反而小朋友天生有無intellectual curiosity先係重點。呢樣嘢佢哋只可以經interview發掘，所以我相信好有可能有學生嘅考試成績同我個仔不相伯仲，但係我幾肯定我仔喺interview方面係贏晒。

我個仔係資優，而且仲係英文（語言）+ 數理雙資優。不過我覺得咪又係人一個，冇乜值得吹噓炫耀。我亦唔希望佢覺得自己高人一等恃才傲物，所以從來唔會亦唔俾其他人讚佢聰明。不過亦因為係咁，我客觀哋覺得可以俾佢試試考academic scholarship。

講返學校，揸住W公學嘅Offer同E公學嘅reserve list，本來諗住時間許可，就兩間都試。點知一check就知其實無可能，因為兩間嘅scholarship考試係特登安排喺同一個禮拜發生嘅。話說一般人通常都會攞H公學同E公學嚟比較，好似世仇咁。但係其實清楚行情嘅人都知，講academics，H公學反而爭咗另外兩間一皮，E公學嘅頭號敵人其實係W公學。（可能歷史關係，因為E公學其實係由一批W公學老師根據W公學嘅原形模擬衍生出嚟嘅。）

學校收咗之後，我有同我仔飛過去見Registrar（當時小六剛開學）。因應我哋要求，亦被安排喺Scholar's House午膳。我仔當然立即愛上，義無反顧決定要考入Scholar's House。咁我哋亦坐低傾過Strategy，事實上亦成功了。結論係：

1. 參考往績，唔少年份都有一個香港scholar（不過唔多於一個），所以可以合理假設只要贏過所有嘅香港報考生就有機會。當然唔係年年都有香港人，所以都要好過好多英國本土／印／非／日／美／中藉學生先可以佔一席位。

2. 持續學法文，大部分香港學生都忽略呢方面嘅重要性。好多變咗要申請豁免考MFL，間接變咗逼住要揀啲未必想揀嘅科嚟考（始終都要考起碼7科，而history/geography呢啲科個syllabus同香港係差天共地）。而因為仔有浸咗足夠時間，所以基本上程度已經拍得住鬼仔，無乜輸蝕。

3. （秘密武器）如果話一般香港人忽略咗MFL嘅重要性，咁我諗十個有十個都無諗過學拉丁文。但係我都講過，我真係好熟悉遊戲規則，知道呢樣係秘密武器（因為對呢啲頂級傳統英式寄宿學校嚟講，拉丁文係必修科，入咗都一定要讀）。我哋嘅conclusion係，我買書，佢自學。因為有法文底，佢真係用一年時間，閒時喺屋企自己攞住本書學，結果到考試時候，已經追過咗同年鬼仔程度。考試interview嗰時，個Scholar's House Master淨係問點解佢係香港人但係選擇挑戰拉丁文paper（話佢係第一個）已經夠晒standout喇。跟住仔又乘機講下自己點睇書自學，過程遇到咩有趣問題，已經傾到超晒時。

4. 書真係好重要。喺另一個interview，個senior master問佢最近睇咩書，嚟緊準備睇咩書。剛睇嘅仔揀咗Philip K Dick嘅Do Androids Dream of Electric Sheep，個老師當堂打個突話都好冷門喎，其他人都係睇緊1984呀，Animal farm呀咁。自然又有大量延伸話題，例如本書係電影Blade Runner嘅原形，不過經過唔少嘅改編，仔比較喜歡原著對character嘅描寫等等。嚟緊想睇嘅書佢話A clockwork orange，阿sir又嚇一跳話好怪雞㗎喎，佢話就係想知有幾怪雞。

5. 到副校嘅interview，佢拎張50/60年代嘅poster出嚟問阿仔講唔講得出裏面個image係邊個。好彩阿仔又講得出嗰個係Yuri Gagarin，而佢覺得張poster似係美蘇space race嗰時，蘇聯嘅propaganda poster。跟住再延伸傾吓美蘇冷戰時期嘅政治經濟世界觀，講講下又超時。所以general knowledge其實好重要，亦都無得臨時抱佛腳惡補，唯有從小靠海量嘅書去裝備。（要記住考試interview嘅時候年齡係中一，即係話中一要有條件傾呢啲書同General Knowledge。真係要靠由細睇書再加一家茶餘飯後天南地北咁去傾儲返嚟）。

其餘試卷嘅嘢，我都無問咁多。我估都不外乎嗰啲，無乜好講，真係無乜準備。我諗重點係大量嘅寫文，因為鬼佬係唔會interested in考你英文文法（呢啲係預咗會啱嘅嘢），反而你點express你啲諗法先係重點。無論英文卷，或者general knowledge卷都係寫文。咁我仔除咗係talk得之人，都係一個寫手（因為平時無得玩電腦電話，慣咗拎支筆express自己）所以都難唔到佢。

當scholar's house嘅housemaster做完個「釘榜」儀式，越洋打電話通知我，阿仔被選中嘅時候，佢嘅comment正正就係：“Your son's interviews were outstanding, by far one of the strongest candidates ”。親自證明interview嘅重要性，唔係我齋噏當秘笈。雖則係揀「academic scholar」，其實成績唔差係given，面試嘅印象先係勝負關鍵。

我唔敢認叻，不過仔能夠成為佢嗰屆唯一一個香港人（同埋non-UK based，其他全部係喺英國讀緊prep school嘅學生）嘅academic scholar，除咗幸運之外，我估舖排同strategy都幫到少少。

呀重要講，其實今時今日做academic scholar其實乜着數都無㗎（學費冇得減）。因為呢啲公學全部申請咗charity status，所以多出嚟嘅學費同捐款（以前用嚟貼啲scholar學費嘅錢）通通攞晒去幫清貧學生做學費減免。唯一嘅「好處」係入學係scholar，永遠都係，入學唔係，永遠都唔會係。住就住scholar's house，同埋只有scholar先有權著「哈利波特」袍上堂咁大把啦。

今次真係講完，將來有新發展再記錄。