入讀英國寄宿公學之路 - 家長準備篇3

熱度 8已有 1238 次閱讀 21-2-18 17:59 |系統分類:教育

XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX XXXXXXXXXXXXXXXXXXXXX

擇校條件

終於嚟到最controversial嘅topic喇。當然各位家長自有自己喜好同選擇，始終係好個人嘅嘢。我就以作為寄宿學校畢業生兼家長兼「研究員」身份作出選擇，未必人人同意啱用。

我認為英式寄宿嘅重點係真正嘅全人發展。溝通、相處、Presentation呢啲soft skills甚至比成績更重要。而且作為過來人，我覺得英式教育係鼓勵同啟發小朋友自學，跟本唔存在入咗神校成績自然好呢樣嘢。學校老師唔識變魔術，根本上成績好嘅學校就係入學門檻要求高，嗰批學生其實就算去咗第二間都多數考返同樣嘅好成績。所以可能我嘅選擇方式同一眾「港式」家長好唔同，甚至又被嫌變態。

我就咁排選擇條件喇（由最重要開始跟住遞減）：

條件1:全寄宿比例

對我呢啲Full boarding出身嘅學生嚟講，間學校無返八成寄宿都唔使諗。我喺出面都講過無數次，寄宿學校嘅真諦係喺「寄宿」度（並唔係喺上堂度）。去英國讀寄宿，唔講寄宿體驗反而成績行頭，咁不如留喺香港？其實一千間學校上堂嗰時都係一樣嘅，最多個班房大啲細啲新啲舊啲，根本無分別。每間學校都有好嘅識教嘅老師，都有乞人憎嘅老師，名校如是，垃圾學校如是。

上堂只佔每個禮拜最多三成時間，當瞓覺又佔三成，咁其餘嗰四成先係重點。一齊運動，一齊玩音樂，一齊軍訓，一齊hea，一齊吹水，一齊發夢，一齊打交，一齊被罰，一齊揶揄玩人，一齊被人玩，呢啲先係真正嘅寄宿體驗。無足夠嘅「共犯」又點成事呢？嚟嚟去去都係得嗰三幾十人，點擴闊視野呢？

有好多家長都唔明，上堂嗰時其實根本都無得交流。唔通老師一面講書，你自己喺度大放厥詞咩？轉堂、break time咪又係滾水淥腳？其實真正交流嘅時間就係夜晚Prep time完上牀瞓覺前（甚至熄燈後），第二朝起身又未需要食早餐嗰時，或者係weekend大家鎖埋喺校園百無聊賴嗰啲時候。咁如果間學校係Flexi/weekly boarding嘅，呢啲時候都「吉」得七七八八，仲講咩交流呢？

仲有，我可以星期日朝早跟唔同嘅校隊出去殺敵，下晝返嚟衫都唔換走去MFL朗誦比賽然後食完飯再去Theatre嗰度幫house play做props，每樣嘢有幾十個唔同嘅同學一齊做（無overlap喎），如果間學校weekend走淨一百幾十人，莫講話踢波朗誦，分分鐘連打乒乓波都唔夠人。

所以計我話，想擁抱真正傳統英式寄宿體驗，首選梗係搵間full boarding比例夠高嘅學校（起碼都六七成啦）。可惜而家啲小朋友不論國藉都變晒金叵羅，所以Full boarding比例高嘅學校越嚟越少喇。

條件2:學校喺英國本土嘅reputation

唔好誤會，我講過好多次不屑嗰啲所謂嘅排行榜。呢度refer嘅係學校喺當地人眼中嘅reputation，包括辦學歷史、理念、舊生網絡、家長群嘅組合等等，同學校整體成績一啲關係都無。

男校同女校或者男女校又有少少唔同。要知道其實英國公學已經搞咗幾百年（不過只限男校，始終係基督教父系社會，女士們開頭係無機會接受教育嘅，呢樣去到條件3再講）。

幾百年歷史，乜都經歷過。如果無返咁上下辦法，又或者唔識與時並進，一早就被淘汰咗啦。

所以我偏愛有歷史嘅傳統英國公學，Clarendon 9更佳。有歷史嘅學校，一樑一柱都更有味道，可以瞓喺一間600百幾年嘅校舍入面，喺張用咗300幾年嘅枱下面偷偷刻名，特別有意思。呢啲公學又會流傳一啲人哋無嘅習俗甚至詞彙，更加令人有歸屬感（或者另類嘅優越感啩），令寄宿體驗更豐富。

而呢類有歷史嘅學校先真正有最豐富嘅Student mix。我自己嘅同學就有世世代代都坐上議院，連續第七代讀同一間學校嘅伯爵接班人，又有西非酋長嘅次男，更有憑成績攞足full scholarship，屋企單親差不多住英國劏房嘅同學。個準伯爵根本唔會去一啲比佢家族歷史短嘅學校，而嗰個（我相信任何一間學校都會考第一）嘅劏房同學，根本唔會考慮邊間學校嘅成績最好，而係邊間嘅Reputation/Student mix對佢最有利（事實上都有一喳學校成績可能好過我母校）。

有好多香港agent或者家長吹捧嘅學校，根本無歷史，如果有喺英國讀過書生活過就知喺當地人眼中其實不入流（無論成績幾咁輝煌），我當然敬而遠之啦。不過呢啲都係個人睇法，我無意踩低其他人嘅選擇。

估唔到口水多過浪花，唯有擇日再續。