06年9月入讀蘇淅幼稚園K1既家長, 入唻交流下啦!

十月媽咪

CANKAN,
我諗我地既主菜應該係動物園, 當然都想玩下機動遊戲的, 不過馬戲呢, 我本身都無乜興趣的, 而家加埋你地話我知, 個馬戲D音響會好大, 我就更加無興趣喇, 因為阿女好怕咁嘈既音樂的, 同埋諗諗下, 若然第一日去到就玩歡樂世界, 睇怕佢玩完都攰到暈低喇, 都係無謂嘥錢睇馬戲喇! 早D返酒店梳洗, 養精蓄銳, 第二朝再戰動物園好過!  

十月媽咪

CANKAN,
乜柏斯有D咁細年齡既班, 係唔駛家長陪既咩? 我又真係無留意呀, 可能因為我一開始已經諗住陪佢上啦! 事關齊齊上, 我地可以知佢學過D乜野, 返到屋企又可以同佢溫習下丫嘛, 所以一開始, 我地淨係睇中呢個班咋!

我地無響屋企放個電子鋼琴, 只係買左個有54個鍵既電子琴畀佢溫習用咋! 不過都唔係成日開唻溫習的, 因為佢好多時只係練兩練, 就走鬼左佢, 佢果D耐性同專注力, 真係搞到我呢...投晒降呀!    

十月媽咪

CANKAN,
阿女仲有幾聲咳, 不過應該都接近尾聲, 希望放完呢幾日假, 可以好番晒啦!

噚日佢地跳完舞, KELLY想同ANSON玩, 可惜嫲嫲話要返屋企食飯, 所以佢地兩個都好失望呀!

噚日我又偷聽到少少...
小蜜蜂, 嗡嗡嗡...拍拍手...捐山窿...

哎吔, 今次無搵支筆抄低, 所以唔記得晒喇, 有好多句架, 你試下問下KELLY仲記唔記得丫, 我問過ANSON, 佢話: 我唔知呀!    

十月媽咪

joeytcy,
阿女有痰呀, 半夜瞓瞓下咳果陣呢, 就聽到最多痰聲喇! 響邊樹可以搵到准山粉呀? 用一片片果d准山唻煲粥得唔得? 准山可以除痰的嗎? 阿女早幾個星期開生日會果陣, 有人送左盒喉棗散畀佢, 我而家仲考慮緊, 究竟畀唔畀佢試好呢? 佢咁大個女, 我都無畀佢試過架!

十月媽咪

我都問左老師, 十二月頭的生日會, K1好大機會唔會有表演, 但一月份既生日會, K1就好大機會會表演, 到時大家記住請假去欣賞, 兼睇下我地有冇機會相認一下!

至於十二月廿一日的聖誕聯歡會, 應該係K1-K3各班都會有份輪住表演的, 好期待呢日既來臨呀!

joeytcy,
原來你悠悠好高呀, 好似全班最高!
另外唔該晒你個食療葯方, 我聽日返阿媽度, 會叫阿媽幫我煲畀阿女試!  

十月媽咪

下? 又會咁快無左既?

頭先摷下個雪櫃, 見到有D川貝粉, 我放左落D粥度一齊煲, 再加左粒乾瑤柱吊一吊味, 陣間試下畀阿女食, 睇下會唔會咳少D!

今日返到學校, 見到佢隔離個同學仔果兩行鼻涕...OH NO, 怪唔得阿女咁耐都唔好番, 原來齊齊病, 原本阿女D鼻水都收得八八九九, 放學接佢果陣, 又"噓噓"聲咁流...真係無眼睇!    

十月媽咪

咁...咁多都取消左, 咁即係點呀?　就唔就到睇阿女響聖誕節聯歡會個表演呀?

十月媽咪

cankan,
如果意外, 今日阿女都會去跳舞的, 不過佢依然有咳有痰, 好鬼煩, 但放心啦, 我一定會幫佢戴住個口罩先上堂架!

呢幾日, 忙到我陀陀轉呀!

事緣星期三我就跟胡叔叔車, 送完阿女返學, 就去左西環買海味, 跟住接左阿女放學, 就返左馬鞍山, 一唻拎d海味畀阿媽, 二唻同阿女睇醫生, 三唻我都要睇牙!

星期四由馬鞍山坐巴士接左阿女返學, 我就飛快返屋企做家務兼煮定中午飯等阿女返唻食, 阿女放學後, 同佢食完飯, 我就幫個friend打左五集港台既稿 (呢段時間阿女瞓左覺), 到阿女醒左, 我又要湊佢去學畫畫, 佢畫畫呢段時間, 我就飛番屋企煮晚飯! 然後又趕去接番佢, 再同佢響會所玩左一粒鐘, 至返屋企食飯沖涼! 搞得唻, 咁又一日, 天黑lu!

今日一早交左個女畀胡叔叔, 就趕出九龍塘, 因為應承左個friend幫佢拎cckg既form, 咁我見排得咁辛苦, 都順便幫阿女拎左張, 不過睇完張form既內容, 又無乜意慾報名面試, 都係等隻佬返唻再決定! 拎完form, 個friend又call叫, 問我幾時返屋企, 事關又有兩集亞視既稿要趕住打! 咁我又飛返屋企, 吸塵抹地後就開工, 打打下, 又要接放學, 咁湊左阿女返屋企之後, settle down佢兼打暈佢之後, 我又要開工, 啱啱打起無幾耐! 打完就去左洗奶樽, 而家煮緊個雞扒, 咁今晚食果陣, 翻熱就食得! 再淥個生菜, 好簡單! 所以趁個雞扒焗緊呢段時間, 可以偷雞上唻留個言喇!  

十月媽咪

cankan,
仲有仲有, 你講呢d合家歡劇, 我都諗過帶阿女去睇架, 不過final都係唔敢呀, 一唻我驚佢無耐性聽足全場, 二唻佢好怕d忽大忽細既音響聲的, 實會大叫大喊, 好鬼麻煩兼搞到我好鬼尷尬, 所以一直都唔敢帶佢去睇呀!

12月份有乜好介紹呀? 如果anson同kelly一齊去睇, 唔知會唔會好d呢?

至於唱歌果度, 我之前係睇中熊熊的, 但熊熊要星期六早上十點(唔知有冇記錯), 而阿女星期六下午又要上音樂班, 我又唔係太想搞到佢好似好忙咁! 另外都有睇過香兒, 香兒響將軍澳廣場比諾幼稚園入面有分校, 但又係星期六, 仲要同阿女個音樂班撞鬼晒d時間, 所以而家仲物色緊呀!

十月媽咪

joeytcy,
你話我幾慘, 呢頭上到唻留個言, 撞鬼佢, 個女果頭就彈起身, 扒響度望住我! 我家下唔鬼理佢, 由得佢響張床度碌下添!  

十月媽咪

joeytcy,
我咪就係諗住響度偷完雞, 跟住就入房眠一眠囉, 點不知, 而家唔駛望喇! 唯有頂到今晚啦!

十月媽咪

joeytcy,
唉...唔好提喇, 阿女d鼻水翻兜, 個肺依然痰多, 不過就好似咳少左, 但咳果陣依然聽到好多痰聲, 好鬼煩既呢!    

十月媽咪

joeytcy,
佢開頭只係少少鼻水, 咁食左收鼻水葯, 其實已經好左好多架喇! 咁上星期六同佢去飲, 我舅父好人得滯, 就買左d明治既士多啤梨朱古力畀佢食, 佢一晚之內, 食左成十粒, 出事喇, 食完d痰就唻料喇, 一直到而家都清唔到, 超煩!

至於d鼻水, 可能同轉天氣有關, 亦可能畀同學仔惹番轉頭! 事關佢噚日返學果陣明明有戴口罩的, 放學果陣, 我見佢個口罩唔見左, 再望下佢個鼻, c咯, d鼻水又唻料, 救命呀! 真係無眼睇!

醫生畀左四日葯, 而家食左三日, 食埋今日睇下點先, so far其實佢個人好精神架, 除左食完葯之後, 無幾耐就要瞓覺, 其餘時間都係鬼打咁精神的, 所以我諗佢問題應該唔大的, 但如果真係食晒d西葯都清唔到, 我就會的佢去睇中醫, 灌佢飲苦茶架喇! 豈有此佢呀真係!

十月媽咪

唉...我個女太多野唔食喇, 我只能夠話, 佢淨係鍾意食以下食物:

蔬菜: 菜芯, 菠菜, 蕃茄 (其他菜全部唔食, 瓜類全部唔食, 豆類全部唔食)
肉類: 雞肉, 魚肉 (豬牛羊全部唔食)
五穀類: 飯, 粉, 麵, 麵包
生果: 萍果, 橙, 香蕉, 梨, 奇異果, 火龍果, 士多啤梨 (提子唔食)
其他: 雞旦, 奶, 乳酪, 芝士, 果醬, 牛油

零食: 朱古力, 糖, 雪糕, 餅

十月媽咪

joeytcy,
咁你個女都易搞d, 我果個, 真係好鬼揀飲擇食的, 好似見到d豆係綠色, 佢就已經唔肯放落口架喇, 仲要係畀個咬牙切齒既衰樣你睇, 跟住再同你講: 咦呀, 媽咪, 唔食呀, 好核突呀!

唔係嘛? 豆咋喎, 好核突???? 都唔知咩料子! 吹漲!  

十月媽咪

CanKan,
我都知除痰係中葯好過西葯, 但佢d鼻水今日都仲有dd咁多, 同埋星期一同佢覆過診, 醫生開左消炎葯, 要食足四日呀, 所以轉中醫之前, 一定要食晒d消炎葯先啊! 好慘!

我幫人打稿, 係響我入U前開始架, 大大話話, 都打左超過十年喇! 所以基本上呢, 我一放對手響個KEYBOARD度, 隻手就會自動波咁郁, 跟住D字就會自動蒲頭, 我個腦只係需要諗下打咩內容, 而唔需要諗個字點打架!  

十月媽咪

joeytcy,
你阿女好搞笑呀, 又會唔記得攞書包既, 咁食茶點果陣咪無毛巾用囉? 呵呵!

你阿女就好啦, 起碼畀你屈到一啖, 我果個唔得架, 一啖都唔肯試架! 真係名副其實既麻煩友唻架!

所以我而家煮餸呢, 盡可能都只係煮d佢鍾意食既野, 一唻慳番我d腦汁, 唔駛諗咁多花巧野; 二唻又唔怕煮左出唻唔啱佢心水, 而嘥晒我一擔心機!  

十月媽咪

wewetwet,
anson仲未好番晒呀, 不過就應該好番好多喇! 噚日本來都已經咳少左, 撞鬼佢, 阿女一放學, 就同我講: 媽咪, 頭先我喺學校食左牛奶糖呀...(唔係下嘛? 食糖???, 咁今日飲左咩呀?) 益力多囉! (唉...我當堂暈低), 呢頭講完, 果頭佢又咳咳咳...

我已經千叮萬囑左老師, 千萬唔可以畀維他奶, 益力多呢d野畀我女飲, 但佢地真係無乜耳性的, 你今日講話唔好畀, 聽日無講, 咁聽日又會畀, 大佬呀, 我已經戴晒口罩咁返學架喇, 咁即係代表我認為個女未好番晒啦, 咁都唔醒水既, 唔通真係日日打個電話畀老師, 同老師講唔好食呢樣, 唔好食果樣咩, 佢唔覺得煩, 我都覺啦! 真係   

十月媽咪

cankan,

熊熊坑口新寶城智趣樂果度有分校, 星期六朝早好似有兩個時段係for k1-k3既幼熊的!

但我又想畀阿女試下考香港兒童合唱團 (香兒), 佢地響將軍澳廣場比諾幼稚園有分校, 都係星期六, 但就下午, d時間同阿女個音樂班撞晒!

而阿女個音樂班, 仲有十堂左右就完晒, 咁我會等佢完左之後, 同佢試下香兒, 如果香兒唔收佢, 先報番熊熊!

而個音樂班完左之後, 佢如果想繼續學既, 我就會揀過另一d時間, 不過就可能要轉導師喇! 但我想轉番平日時間, 而跟開佢果個導師, 只可以係星期六日, 平日佢要返學的, 加上佢放學之後, 亦都有d私人學生, 所以轉平日就要轉導師喇! 不過都係唔理咁多住喇, 點都係要以阿女意願行先, 如果佢無興趣繼續學, 我都唔會勉強佢住! 同埋我都發覺, 佢鍾意唱歌多過彈琴呀!  

十月媽咪

joeytcy,
果幅圖畫呢, 係由ICAC等機構合辦, 主題係: "智多多故事"親子填色貼貼樂比賽.

題目係: 堅守原則

幅圖既內容係:
在馬拉松比賽中,小獅子一直落後, 嘩啦啦及貓寶寶等好友不斷勸小獅子趁人多混亂, 登上他們的滑板車或人造跑車快些到達終點,但小獅子堅決拒絕,終於跑畢全程. 全場觀眾都十分欣賞小獅子的體育精神,並對他堅守原則, 不欺騙別人的行為報以熱烈的掌聲.

咁幅圖就有一棵樹, 兩舊雲, 一隻小白兔, 一隻跑緊既獅子, 一條路, 一隻貓, 一隻狐狸樣既動物. 小朋友就要將呢幅圖填色OR搵D材料貼落去, 完成呢個幅畫囉!

我都無交到, 一唻阿女唔畀我幫手, 佢要自由發揮, 卒之畫到幅圖好得人驚; 二唻我都係星期日至叫佢畫, 心諗, 交都太遲喇, 所以當佢唔畀我幫果陣, 我都算, 純粹當係一個普通圖畫, 睇下佢油成點啫!