用戶登入
用戶名稱:
密      碼:
搜索
教育王國 討論區 海外留學 老師去左邊?自學等如自強不息?奮鬥只可靠互聯網? ...
查看: 9724|回覆: 99
go

[英國] 老師去左邊?自學等如自強不息?奮鬥只可靠互聯網?

Rank: 5Rank: 5


3074
發表於 24-5-21 08:18 |顯示全部帖子
本帖最後由 KIMLIFEINUK 於 24-5-21 08:24 編輯

(不可轉載、上報或 post 係任何社交媒體)


有些事,不吐不快!希望大家唔好介意,實在有點生氣。

我小朋友係英國政府學校上中學,佢既physics 老師由二月中重病不能返學校,因為佢病得幾重,無人知佢幾時可以返嚟,於是佢果班就只有代課老師,我唔知大家覺得乜野係代課老師,但係呢度,佢只係一個可有可無既人,唔須要教任何課程,佢只係睇住D學生,學生自己自修。佢除左點名之外,甚至唔需要講任何一句說話。

咁既無老師既情況維持到今個星期中,佢先返嚟,佢因為大病初癒,所以佢要慢慢適應返回歸老師既剛位。

錯也不在佢,佢始終真係病重,但三個月無左 physics 老師,對學生既影響係非常大。

學校叫學生們上網自學,去D唔同網站,YouTube 等自學!自己睇 textbook 學。

天呀!佢一直係 YouTube 揾野自學。year 10 physics 2大個 chapters 叫你自學,無堂上,無老師的。我真係難以形容我既驚訝!

上2個星期,校長 send 左一封給家長既信,英式政治腔。首先感謝家長們體諒。。。又讚歎學生們自學好叻。。。。總結就係,雖然無左老師咁耐,家長好叻!學生好叻!學校亦好盡力配合。一齊俾掌聲大家!

上星期學校嘗試借隔離班個 physics 老師過來幫手上2堂課,更加嚇死人,果位老師原意係幫手run 一個 revision lesson, 因為佢地今個星期有個 physics test.

果位老師於是開始講,問佢地識唔識呢樣、果樣咁,佢地話唔識。於是老師話,嘩!原來你地乜都唔識,我得2堂 revision 無可能從頭教過,我只可以係D questions 搵你地己經識既嚟做下!

聽日佢就 physics test, 考果D佢自學既 chapter, 我女溫書溫到半夜一點先瞓。見佢都好失落。聽朝早會時再溫下。

不停話其實自己應該再早D上網自學得好D,加睇多D網上既 practice exam questions, 都怪自己時間預計得唔好。佢話 technically 自學係可以的。(吓咁都得!)

我係旁邊見到成件事,真係幾嬲!

香港既家長會問我,你咁嬲,點解唔投訴呀?第一,無其他家長投訴,學生係抱怨,但就係咁,第二,我自己都唔相信投訴有乜野用,學校可以簡單答我,請唔到短期暫代 physics 老師,會盡快恢復正常。。blah blah blah.  英國長期請唔夠 science teacher 係真既!唔集合到一推人一齊投訴的話,我一個人既不滿唔覺得有乜用!

又或者仲有人會認為不合理既事,就算得你一個人都要向學校反映!

情況係學校係知道,呢個係佢既處理方法,認同與否,只要佢係處理中,你只可以等。

其實同香港好唔同,可能發生係香港會係一件大事,但呢度無人有興趣理!嘈都無用。看其他更大既事件都係嘈都無謂。

除左人生安全我會全力去出聲 (我果次有不停投訴) ,其他既呢「憾事」,只有係到呻下,嗌下

感謝各位睇我既長篇大論,我純粹講事實分享。其實有好多好多野可以分享,不過唔知大家會唔會受不了。



Rank: 5Rank: 5


4168
發表於 24-5-21 08:42 |顯示全部帖子
我仔讀大學,教授要take care placement 學生,無時間上堂,所以佢地係上video lectures. 佢嗰間係知名大學。喺英國,咩都有可能。

Rank: 5Rank: 5


3074
發表於 24-5-21 08:53 |顯示全部帖子
本帖最後由 KIMLIFEINUK 於 24-5-21 08:56 編輯
SIYip 發表於 24-5-21 08:42
我仔讀大學,教授要take care placement 學生,無時間上堂,所以佢地係上video lectures. 佢嗰間係知名大學 ...

真係感同身受,有 video lesson 都好,不過大學學費唔少錢!應該做好D!

我女係無 lesson, 佢自己揾 youtuber 既 video, 拼拼合合D topics 咁學,有D好D video, 有D又無咁好!要自己用好多時間揾。

同埋佢中學生,比較難D。始終細個D,不過而家都訓練到獨立學習。但真係幾影響一D唔太勤力既學生,佢地完全躺平

佢有D同學係無自己學,費事理,也唔 care. 自修堂大叫大笑。




Rank: 5Rank: 5


2326
發表於 24-5-21 09:20 |顯示全部帖子
本帖最後由 大食媽咪 於 24-5-21 09:23 編輯

其實要學上網自學又真係學到既,而家網路太方便,海量資訊非常豐富。我女中學時(非英國)成日話學校老師廢教得差,上堂嘥時間情願自己返屋企上網學仲好。不過當然係要有自主學習既心態同埋夠自律先得,低年班就比較困難。學校理應係要提供教學係真,無辦法底下自學真係只係共度時艱既方法。學校安排得差係事實,如果嘗試安排其他班既老師過去幫手咁會對學生公平啲。

Rank: 12Rank: 12Rank: 12


66710
發表於 24-5-21 13:31 |顯示全部帖子
KIMLIFEINUK 發表於 24-5-21 08:18
(不可轉載、上報或 post 係任何社交媒體)

本帖最後由 Poyau 於 24-5-21 13:32 編輯

學校請人睇堂平過代課
家長唔出聲拖到原本老師回歸就過關
媽事網見有人出聲 學校揾隔離班老師
原校老師代課做多咗工作有加薪
情況可能係有老師願代課 但學校唔想

點評

KIMLIFEINUK    發表於 24-5-22 01:30

Rank: 8Rank: 8


15836
發表於 24-5-21 21:15 |顯示全部帖子
KIMLIFEINUK 發表於 24-5-21 08:18
(不可轉載、上報或 post 係任何社交媒體)

本帖最後由 964000 於 24-5-21 23:04 編輯

投訴冇乜用,都係搵人長篇大論答下官腔,亦好難搵人圍爐,個度D人比較逆來順受,冇乜意慾改善處境。
經濟許可不如讀私校,收錢的應該會認真D。

點評

KIMLIFEINUK    發表於 24-5-22 01:32

Rank: 8Rank: 8


15836
發表於 24-5-21 21:19 |顯示全部帖子
KIMLIFEINUK 發表於 24-5-21 08:53
真係感同身受,有 video lesson 都好,不過大學學費唔少錢!應該做好D!

我女係無 lesson, 佢自己揾 yout ...

Physics係咁多科之中比較難自學的,又係好多女仔弱科。

Rank: 13Rank: 13Rank: 13Rank: 13


88197
發表於 24-5-21 23:05 |顯示全部帖子
經過Covid lockdown, 我就唔明点解唔可以zoom上課,又或者錄影隔離班老師授課,俾無老師果班“自學”,跟住隔離班做功課,然後代课老師改。

Rank: 5Rank: 5


3074
發表於 24-5-22 01:13 |顯示全部帖子
Yanamami 發表於 24-5-21 23:05
經過Covid lockdown, 我就唔明点解唔可以zoom上課,又或者錄影隔離班老師授課,俾無老師果班“自學”,跟住 ...

病左果個老師可能有病假,唔會肯咁勤力上 zoom lessons, 應該係有薪病假。

講開英國D老師真係好多人不停咁病。唔知點解。


我都覺得隔離班老師可以幫到手,真係浪費資源,佢反正日日上堂,但隔離班又日日「放養」係課室。可能懶,學校費事理。佢地既所謂自修,其實好多人大聲叫大聲笑!

其實隔離班既 science 老師幾好的,好多年經驗,而且個人幾 kind. 我女早幾年都係佢果班。不過佢早兩年又係重病,果陣我女 year 8/9,  佢足足重病左大半年,當年有請一個實習老師代佢,雖然強差人意,但總算可以跟住進度。

果陣D學生仲傳話佢可能會死,返唔到嚟!真係好多人重病。一病幾個月至半年以上。

Rank: 5Rank: 5


3074
發表於 24-5-22 01:23 |顯示全部帖子
964000 發表於 24-5-21 21:19
Physics係咁多科之中比較難自學的,又係好多女仔弱科。

係啦,佢而家非常唔鍾意呢科,聽到 physics 都反感!睇嚟唔會改變到!

自學理論果part 還可以,但計數果 part ,要自己睇明就真係好耐,而且一路睇一路憎呢科,真係越睇越煩。尤其是隔離班有老師,佢地無,更加對呢科無好感


Rank: 5Rank: 5


3074
發表於 24-5-22 02:01 |顯示全部帖子
Gov figures:
On a per-pupil basis the total funding to be allocated to schools for 5-16 year olds, in cash terms, in 2024-25 is £7,690



Rank: 8Rank: 8


15836
發表於 24-5-22 07:10 |顯示全部帖子
Yanamami 發表於 24-5-21 23:05
經過Covid lockdown, 我就唔明点解唔可以zoom上課,又或者錄影隔離班老師授課,俾無老師果班“自學”,跟住 ...

本帖最後由 964000 於 24-5-22 07:32 編輯

人地個邊請緊病假,絕對不會做野的,電話都唔會接,唔似香港人咁「盡責」


點評

KIMLIFEINUK    發表於 24-5-23 20:01

Rank: 8Rank: 8


15836
發表於 24-5-22 07:32 |顯示全部帖子
KIMLIFEINUK 發表於 24-5-22 01:13
病左果個老師可能有病假,唔會肯咁勤力上 zoom lessons, 應該係有薪病假。

講開英國D老師真係好多人不停 ...

佢地唔興好似香港咁年年驗身,個文化又自細勁飲洒,好多都overweight
佢地D醫療都係主要睇GP, 有時都要攪到出哂症狀先refer,但又冇錢/唔方便睇私家,於是索性唔理/自己求其買藥食,可能咁所以未退休就一病就重病。

Rank: 6Rank: 6


6629
發表於 24-5-22 08:23 |顯示全部帖子
香港好少少, 但有時都會有差不多的事發生。
我女小學時香港讀官校 , 調咗個中學準備食肥雞餐老師過來教英文, 每日上課讀一次就學生自修,老師上堂瞓教, 上堂去埋後樓梯瞓覺。 後來我發覺個女 成日冇英文功課 , 又見準備測驗/考試都冇工作紙。 個女先將 老師問題講出嚟,我再問問其他家長 ,家長再問學生才得出此事 , 知道當然投訴, 之後第二個學期換咗個代課老師, 都係勁Hea , 頭兩個學期基本上無教書 。

Rank: 5Rank: 5


3074
發表於 24-5-22 16:06 |顯示全部帖子
katrinafu 發表於 24-5-22 08:23
香港好少少, 但有時都會有差不多的事發生。
我女小學時香港讀官校 , 調咗個中學準備食肥雞餐老師過來教英 ...


呢D老師真係令人激氣,浪費孩子既黃金學習時間

Rank: 5Rank: 5


4309
發表於 24-5-23 01:47 |顯示全部帖子
KIMLIFEINUK 發表於 24-5-22 16:06
呢D老師真係令人激氣,浪費孩子既黃金學習時間

Pls check pm

Rank: 8Rank: 8


15836
發表於 24-5-23 14:35 |顯示全部帖子
katrinafu 發表於 24-5-22 08:23
香港好少少, 但有時都會有差不多的事發生。
我女小學時香港讀官校 , 調咗個中學準備食肥雞餐老師過來教英 ...

所以咁多人出去補習係有原因

點評

KIMLIFEINUK    發表於 24-5-23 20:01

Rank: 5Rank: 5


3074
發表於 24-5-23 19:40 |顯示全部帖子
尋日我心情真係惡劣,搞緊一D野,進度慢到真係不進則退。又好多其他文件事,煩到爆!跟住又發生巴士情況,嚇一嚇!

放學時間我女突然打俾我話佢地一行5人等人打救!我血壓即時上升!佢話巴士走左,返唔到屋企,叫我即刻去學校接佢地五個人!我啱啱煑緊野,手忙腳亂!

背景係埠仔巴士服務係好疏落的,巴士只有一班,特別送學生放學,只係學校放學開一次。長期以來,用嘅學生係多于巴士嘅承載量。總有啲學生上唔到車因為巴士滿咗, 而要自己行路返屋企嘅,其實呢個巴士嘅旅程大約係15分鐘左右。

所以長期以嚟成為一種人推人同埋鬥快上巴士嘅競賽。你必須要喺放學時第一個箭步沖出去排隊,因為你排得快你就有機會上到巴士,如果你排到比較後嘅話,你嘅希望就好渺茫喇。如果你真係上唔到巴士就唯有行路返屋企, 但係巴士15分鐘嘅路程,估唔到行路就要行45分鐘. 有啲人其實住喺遠啲嘅地方甚至要行45分鐘再去另一個巴士站,然後再轉半個鐘去佢屋企,所以其實上唔到巴士對個細路嚟講個影響都好大,因為個時間真係好長。

尋日嘅情況已經唔係第一次, 因為巴士首先係接咗兩間學校先去佢間學校, 長期以嚟有人喺巴士上層不停掉嘢落嚟整蠱人,但係越嚟越過分,之前就掉石仔落你個頭度,喺巴士上層最頂嗰個氣窗到掉落嚟。


尋日離譜到調教咗一啲醋加埋辣椒, 辣椒粉嘅嘢,喺上面倒落嚟。我女個最好嘅朋友就中左招,成頭都係,佢好唔開心 我個女冇中招,但係其實佢周圍嘅人都中咗, 所以人人都好唔開心,佢都好唔開心,跟住個巴士司機見到情況混亂,佢唔單止冇嘗試搵下邊一個人係罪魁禍首,佢仲大喝一聲話"玩夠未",跟住個巴士司機頂唔順,佢竟然決定就噉閂埋個車門開車走! 但係要知道倒嘢落嚟嘅人, 根本就係佢架車上面。反而等緊上巴士嘅同學仔根本就冇做錯,但係佢竟然就咁閂門一走了之, 跟住所有嘅人就上唔到車, 佢哋就好勞氣問老師噉點算呀? 叫返佢返嚟先得架! 老師就話, "哦我冇辦法喇,佢走咗,噉你哋要自己安排交通喇。"


所以我個女就搵我, 然後叫我去救埋佢五個同學。跟住我同我女講, 就算我過到嚟, 都要一啲時間,我話你周圍問下有冇人可以幫手, 跟住佢哋啲同學, 周圍問人問下邊個屋企人住喺附近,又冇返工嘅,又肯嘅,可以過嚟,結果佢哋搵到一個, 跟住我女打返電話畀我話你唔使嚟喇, 而家有個阿媽肯過嚟, 其實根本架車坐唔到五個人,不過當時正所謂"救"得邊個就邊個, 因為其實學校附近係好靜嘅, 如果唔係放學或者返學時間其實嗰度人都唔多個, 側邊又有幾個好大公園, 所以如果一個女仔企喺度真係幾危險下。

巴士係上咗兩間學校先去我女間學校, 兩間學校一間係男校, 一間係男女校.

去到我女間學校(女校), 我問情況係有幾惡劣呢? 佢話好明顯地女性係唔夠男性打嘅, 所以推推撞撞嘅時候, 佢哋系完全唔得嘅, 去到嗰個位, 你又唔夠人高, 又唔夠人哋大隻.

其實坐巴士嘅問題一直都好嚴重, 學校甚至出過公開信, 同巴士公司, 同埋政府講, 但係結果都冇乜大改善, 第一就係講班次太少, 所以搞到學生要打交先上到巴士.

第二就係巴士司機嘅態度惡劣, 佢哋長期鬧人,有時候甚至用粗口鬧人,唔係淨係因為你曳, 所以鬧, 甚至對一啲好乖嘅學生, 都照鬧不停.

噉樣鬧可能因為佢自己做呢份工都好煩,成車都好似野獸噉, 佢要同班野獸困獸鬥, 所以佢自己都好激氣, 日日啲人你推我撞, 開車又驚車死你,有時候好難喎. 因為佢要閂門, 啲人又要擋住道門。你都可以諗到幾複雜!佢要閂門總有人希望用個身想嘗試按住道門,跟住佢又一定要閂門, 佢唯有大聲用粗口鬧你, 鬧到你放棄唔擋住道門,。

巴士裏面嘅人, 又大聲喧嘩吵鬧, 又有人喺車廂裏面掟礦泉水樽, 不停倒啲食物落地下。大聲嗌大聲叫嘅都唔少!

可能巴士司機長期對住呢啲細路, 又真係好激氣, 長期以嚟可能積壓太重,於是終於爆發就不停噉鬧啲學生!無論你乖定曳嘅, 上到車, 上唔到車嘅, 佢日日破口大駡! 但係嚟到我女學校係女校, 其實啲同學仔都比較乖, 但係個巴士司機照樣大聲呼喝, 大聲狂鬧!

啲細路有時俾佢鬧到喊, 有時上唔到車好唔開心, 好徬徨! 總之上巴士就好似一個野外競賽噉, 真係少啲心血都唔得。

Rank: 5Rank: 5


3074
發表於 24-5-23 20:15 |顯示全部帖子
本帖最後由 KIMLIFEINUK 於 24-5-23 20:16 編輯

巴士嘅故事教訓我哋:

做人要--------->  有勇氣, 有計謀, 體格精奇, 有"力爭上車"嘅決心, 厚面皮, 唔怕俾人鬧

------> 有孤注一擲, "上唔到車心不死" 嘅決心。

終會成功在望。
達到"人見人愛,車見車載" 嘅境界









Rank: 5Rank: 5


4624
發表於 24-5-23 20:19 |顯示全部帖子
KIMLIFEINUK 發表於 24-5-23 19:40
尋日我心情真係惡劣,搞緊一D野,進度慢到真係不進則退。又好多其他文件事,煩到爆!跟住又發生巴士情況, ...

多謝你好用心寫左好長嘅文,讓我們明白你們在英國生活或讀書情況。見到甘嘅事,相信我都會激到爆炸。
你需要登錄後才可以回帖 登錄 | 註冊