小朋友在學校被歧視為中國人，可以點處理

beastiebistro

我諗先搞清楚係點樣嘅歧視先。我以前讀寄宿，都有啲同學會兜口兜面咁叫我"Chinky, Chinky"咁。我就覺得好好笑，大家笑埋一團，跟住出去打場波，佢見我無乜反應，好快就無搞，仲超老友添。我有啲同學無咁接受到，啲鬼仔鬼咁幼稚，見有反應咪搞多啲囉。

beastiebistro

回覆 SIYip 的帖子

就係囉，都唔知發生咩事。樓主都係問清楚小朋友做咩先啦，如果嚴重點解佢（我指小朋友）唔直接即時揾house master或者matron傾同解決呢？
老實講，我見過啲小朋友（包括我嗰時嘅同學）因為home sick，或者想嗲下屋企人，或者同同學溝通唔暢順，就放大咗啲問題希望屋企人緊張佢，其實件事原本好輕微。

當然我唔知樓主小朋友嘅經歷，唔敢排除有欺凌成分。

beastiebistro

大家真係諗多咗喇。我作為過來人（自己係boarding school學生，又係現役boarding school家長），可以負責任咁講啲鬼仔鬼妹其實好鬼幼稚（尤其係lower school嗰啲）。對佢哋嚟講，叫你"chinky"同叫你“死肥仔“或者“白痴仔“冇咩分別。斷估大家都唔會真係覺得佢哋惡性歧視肥人同轉數慢嘅人啩？佢哋叫我Chinky，我一笑置之，跟手我又叫返佢哋Lurch呀（直係手長腳長笨手笨腳）Beefy呀（即係淨係識運動冇乜腦）嗰啲，大家笑下就冇嘢。
呢類「攻擊」持續幾耐就睇你咩反應，我就選擇正面回應甚至直接回擊，再加上我好快入咗幾樣運動校隊，轉個頭就攬頭攬頸（佢哋仲保護返我轉頭添，驚死冇咗個主力同友校比賽會輸）。我有啲同學選擇逃避又唔參與活動，咁咪搞耐好多囉。
我哋七嘴八舌喺度放大件事，本來可能冇乜嘢都變咗「驚天地泣鬼神」，無謂影響咗樓主小朋友嘅寄宿生活啦。等佢問清楚佢小朋友究竟咩事，係咪真係歧視咁嚴重先啦。

beastiebistro

係囉，我都話其實冇乜大不了，大家唔好over react咗，搞到樓主自己緊張埋，解決咗就好喇。

話時話，我當年去英國boarding，當然都唔識打Rugby，我仲要去發源地Rugby School，全民都要參與。我係插Year 10，更比人學少一年，第一堂就出大醜。話說教練教戰術，見我大大隻都跑得下，就叫我負責「達陣」。我其實連球例都未清楚，心諗應該同美式足球差唔多啩，過到條線就得喇。咁攞到個波咪一味沖，過咗條線就好似睇電視美式足球員咁大大力掟個波落地囉。跟住全場爆笑（都有幾十人㗎，連教練都笑埋），我都未知發生咩事，亦有人喺旁邊Chinky Chinky咁。我仲迷惘緊嘅時候，個Captain鬼仔走埋嚟同我講Rugby唔係咁打㗎，你要揸實個波放落地先算數㗎。咁我雖然都覺得好瘀，但又覺得好好笑，笑咗出嚟，其他人見我咁反應反而無再搞，繼續上堂。落堂我老實同啲housemate講我連球例都未識，佢哋咪教我囉，好快我就入埋校隊，有隊友掩護喇。

我諗重點係參與，唔識唔緊要，但一定要落場試。啲鬼仔尤其低年級係好幼稚好低能，但都好單純，見你肯融入肯試，好快就冇嘢。