有冇言語資優但認字能力差？

mandiiiiiie

仔仔家下20個月大已經講緊結構複雜嘅句子，日常可以好似大人咁對答，舉一啲例子：
- 「媽咪過嚟痞低喺度睇地鐵。」
- 「呢個蛋糕係媽咪整比（佢名）食架。」
- 玩緊積木，會講「陣間砌咩先呢」
唔鍾意嘅嘢會講「唔鍾意呀，媽咪唔好啦」
- 見到屋企人冇帶口罩返入屋企拎，會講「爸B做咩返入黎嘅？」之後再問佢點解爸B返黎佢會答「拎口罩」
-見到路上一列列防撞屏障，會話「好似地鐵呀，影低佢比爸B睇吖」

平日行為成熟謹慎，記性非常好，通常教佢嘢一次就記得，例如同佢講呢條係鯨魚，佢之後見到會同返我地講呢條係鯨魚。聽覺非常靈敏，電話邊個打黎或者語音邊個講，一聲就知，街外係電單車、消防車定救護車經過，佢一聽就知。聽一首歌幾次，中英文都好都識唱埋歌詞出黎。

問題係佢好討厭字卡，一直以來一拎字卡出黎佢都唔理我，最近甚至會講「唔好！唔要！唔想」，用其他活動教學方法都教過，都記唔到ABC或者123，咁耐以黎只係教ABC三個字同123三個數字佢都記唔到，所以好怕佢有認字障礙。但佢識用數字數物件，例如同我講「張被有一架車」，我話呢邊仲有一間，佢會話「兩架」，再搵多一架佢會話「三架車」，咁佢係專登唔記，定咩原因佢連最基本嘅字都記唔到呢？

我覺得佢只係言語能力發展比較好，唔係資優都唔緊要，反而想知有冇小朋友講嘢叻但認字有問題(emoji)(emoji)

小曳人

每個孩子有唔同嘅興趣或學習方法，佢可能覺得字咭無趣味，咁家長就要識變通，睇下有無辦法令認字變得有趣

而且，每個孩子敏感期都唔同，可能半年後佢鍾意都未定！

我大仔係鍾意認字，但唔鍾意flash，我一flash 佢就走
唔知你係咪英文字咭，但英文認字仲可以用letter card / magnet
教埋phonics...   

其實家長唔需要急於認字，或者先伴讀，到佢覺得認字重要，就自然認到

王家爸爸

如果小朋友係語言資優，無可能鍾意認字卡，原因係認字卡係俾語言弱既小朋友用，教資優小朋友需要用佢既獨特學習方法。

mandiiiiiie

小曳人 發表於 20-7-13 07:47
每個孩子有唔同嘅興趣或學習方法，佢可能覺得字咭無趣味，咁家長就要識變通，睇下有無辦法令認字變得有趣

...

謝謝建議！我諗都要再諗諗其他辦法令佢有大啲興趣。我唔係想教佢生字呀，字卡都只係英文字母卡，但只係發覺我教黎教去佢都連ABC三個英文字母都記唔到，所以有啲擔心。我會再慢慢黎～

mandiiiiiie

王家爸爸 發表於 20-7-13 19:09
如果小朋友係語言資優，無可能鍾意認字卡，原因係認字卡係俾語言弱既小朋友用，教資優小朋友需要用佢既獨特 ...

能夠得到你回覆實在非常感謝！想請教呢個階段連英文字母（只係ABC)或者只係數目字（只係123）重覆教導都認唔到，我試過釣字母、畫公仔、做手工或者用佢最愛嘅工地車上面貼ABC嘅方法教都唔見成效，我係咪應該停止再教佢字母，定係教導嘅方法錯左呢？

但明明佢識唱晒成首A-Z同數1-10中英文，一啲冷門嘅詞語例如螺絲批同攪拌機呢啲字，佢聽過一兩次就運用得返出黎，認圖片同實物完全冇問題，最近呢幾日講嘢嘅邏輯思維更複雜，更成熟，但對於字母同數字佢就分唔到，之前試過見到英文字母佢都會數1-10，或者見到數字會講A-Z....我好擔心佢有某類學習障礙

小曳人

mandiiiiiie 發表於 20-7-13 22:06
謝謝建議！我諗都要再諗諗其他辦法令佢有大啲興趣。我唔係想教佢生字呀，字卡都只係英文字母卡，但只係發 ...

可能你有概定順序，但其實唔需要
我係先教EAT，CAT，然後教ABC 架！
因為ABC無趣味，但CAT 有

小曳人

我都係嗰句：敏感期，人人唔同，有d人用視像學習，有d人用聲音，但你強迫條魚學爬..... 為咩呢？

mandiiiiiie

小曳人 發表於 20-7-14 07:47
可能你有概定順序，但其實唔需要
我係先教EAT，CAT，然後教ABC 架！
因為ABC無趣味，但CAT 有

原來係咁，咁我明喇，唔該晒！

王家爸爸

mandiiiiiie 發表於 20-7-13 22:25
能夠得到你回覆實在非常感謝！想請教呢個階段連英文字母（只係ABC)或者只係數目字（只係123）重覆教導都認 ...

即使係有學習障礙，其實大啲就自動解決，無必要太緊張；好多資優都有唔同既學習障礙。我反而覺得，除非問題好嚴重，否則應該等小朋友自然發展。

chujojo

20個月識講句子唔算好特別，20個月認唔到ABC更加正常。放鬆d啦媽媽，培養愛學習的心最重要。多做親子閱讀，多觀察多體驗生活，多玩樂對小朋友最重要。

lui

建議親子閱讀，我女小時三個月開始讀書佢聴。好快三歲自己讀幾十頁的書。我冇用字咭，亦冇在看書時問佢個時點讀（under 三歲）。佢認a-z都唔系特别快（即刻唔系一歲就神童咁）

Ainsleyuyu

回覆 mandiiiiiie 的帖子

有，你個小朋友同我細仔情況一模一樣，4個月大叫媽媽，20個月大已經講嘢好流利，到依傢已經讀幼稚園，但教abc仍然教到一肚氣，反而佢英文vocab好好，睇圖識讀英文生字，但我仍然迷茫緊唔知點教佢。因為我都有聽人講教小朋友英文唔好要佢地認字卡，事實的確幫唔到佢地開口講英文。