談填表策略 (#1, #38, #156, #190)

khmama

個工人突然返咗菲律賓, 家陣要做阿四, 如果答唔切請耐心等等, 亦歡迎其他家長交流, 一定可以集思廣益. band1既家長其實睇完第一頁既策略加埋後面選校建議, 應該可以自行決定到點排, 真係奇難雜症先問都唔遲. 希望今晚可以答得晒啦.

khmama

回復 emilyes 的帖子

一般做法聖芳濟會放第二, 除非你好鍾意銘賢先放第二, 如果唔係就放第三好o的. 第四開始係執雞, 只要填晒band1就得, 唔需要由好至差排, 亦可以跟地區, 喜好, 學位數目自行定次序.

khmama

回復 雪文 的帖子

你應該填晒他區同第二三份既band1, 次序可以自由配搭, 跟住填番第一份, 因為估計第一份會冇位, 但世事無絕對, 最後先填band2.

khmama

回復 odelia_ho 的帖子

甲部填本區他區都唔會冒險, 因為位少, 抽到真係當中六合彩, 唔中都唔係好大損失. 乙部選他區當然冒險, 但未必一定唔得, 視乎有冇人好似你咁搏. 你可以搏第一志願, 之後兩個志願就要穩陣o的. B1A去叩門都有叫座力, 不過就辛苦咗o的.

khmama

回復 kswiss 的帖子

直屬/聯繫小學除咗可以抽直屬/聯繫位之外, 唔成功仲可以抽埋非保留學位, 比人多23個位機會當然大o的. 如果間直屬/聯繫中學只係麻麻地, 有o的人會寧願抽非直屬/聯繫中學, 唔算唔make sense, 只係人望高處.

khmama

回復 chenmk 的帖子

既然鍾意呢3間, 大可以第一黃笏南, 第二銀禧, 第三丘佐榮. 最穩陣當然第一填丘佐榮. 執雞可以培正填第四. 香島係直資, 有o的人嫌佢左, 除你自己意願啦.

khmama

回復 joehkto 的帖子

你先睇番#38, 然後係第一份學校選第一個志願, 第二份選第二志願, 第三份選第三志願. band1生最差只會派去第一間填既band2學校, 千祈唔使咁早填band2. 你先選咗頭3個志願, 跟住由第四志願開始填晒所有本區同他區band1, 目的係執雞, 最後先搵幾間band2頭學校包底就得. band1唔使填band2中或尾甚至band3, 因為唔會派到入去, 係都入咗band2頭先.

khmama

回復 yhlmami 的帖子

正在埋頭作緊o的策略, 慢工出細貨. 先比個小貼士大家啦. 你睇份中學一覽表好似好多學校, 眼花瞭亂咁. 你地先下載我o個份2011年大抽獎排位(下載區), 然後將今年你o個區每間學校既學額填好(包括本區及他區).  然後用刪除(by elimination)既方法剷走唔會選既學校如下:
band1生: 選由第一排到第三十位既band1A, band1B, band1C及band2A. 由band2B開始刪除. 如果band2A過多, 選多位o個o的band2A, 如果唔夠30個就填埋band2B.
band2生: 刪除band3B, band3C, band1A及band1B既學校, 睇下夠唔夠30個, 當中唔鍾意既學校都可隨意刪去. 如果唔夠30個, 可以加band1C, 都唔夠就加band3B.
band3生: 刪除band1A, band1B, band1C, band2A及band3C. 如果唔夠30個先加入band2A, 最多搵1間band3C.

只要決定咗邊30間, 要排位就容易好多.

khmama

係大抽獎呢個遊戲中, band1生因為優先選校, 所以方法比較簡單直接, 之前已經介紹過(#1 & #38). 但係band2生, band3生同邊緣人因為失咗先機, 選校就要步步為營. 其實無論係乜嘢banding, 綜合黎講共有五個策略, 都係針對頭3志願既選擇方法. 下面會逐個解釋. 首先家長要選出30間學校, 方法前面(#156)已經講過, 不再重覆, 但家長記得刪除性別不同既學校, 以免浪費機會, 因為呢個錯誤經常會發生.

策略一: 穩紥穩打

1. band頭 (本區)

2. band中 (本區)

3. band尾 (本區)

呢個策略係一般家長採用既模式, 但求穩陣, 最差去到band尾, 至於真係抽到band尾會唔會去叩門係另一件事. 至於band3生, 第三志願可以選一間校風好既band3尾或者選另一間band3中.

策略二: 穩守突擊

1. band頭 (本區)

2. band中 (本區)

3. band頭/中 (他區)

呢個策略通常係o的又想搏又唔係好夠胆搏, 但係又唔甘心派入band尾既家長會用, 適合各band既考生.

策略三: 避其鋒銳

1. band尾 (本區)

2. band尾 (本區/他區)

3. band尾 (本區/他區)

呢個策略建議成績較差既考生採用. 避其鋒銳既意思係唔好同人正面交鋒, 人棄我取, 就會有較大機會成功. 而且選學校亦應注重程度是否適合, 勉強入到band頭未必係好事.

策略四: 險中求勝

1. band頭/中 (他區) 或band+1尾 (本區/他區)

2. band中 (本區)

3. band尾 (本區)

呢個策略通常係他區有o的好學校時會吸引家長採用. 但係搏都只好搏一次, 其餘志願就要回歸正途. 呢個方法亦都係好多band2同band3生用既方法, 由其是某o的區會有機會上一個band有位剩, 可以一搏.

策略五: 破釜沉舟

1. band尾 (本區)

2. band-1中 (本區)

3. band-1尾 (本區)

呢個策略通常係邊緣人採用. 既然唔清楚真正既band, 就唔可以太搏, 以免失晒先機, 派到最差既學校. 如果係band1邊緣人, 第一志願可以選一間本區band1尾, 如果真係band1生, 第一志願多數派得到而程度亦合適. 如果入唔到即係band2生, 咁第二志願已回歸band2填表既正途, 仍然大把機會入好既band2學校.

由第四志願開始已經係執雞最後包底, 方法如下:

Band1生:

所有本區及他區band1 (次序可以隨意編排), 本區band2頭, 他區band2頭.

Band2生:

所有本區band2中, 本區band2尾, 他區band2頭, 他區band2中, 他區band2尾, 本區band2頭, 本區band1尾, 他區band1尾, 本區band3頭, 他區band3頭 (以上次序可隨意改動)

Band3生:

所有本區band3中, 他區band3頭, 本區band3頭, 本區band2尾, 他區band2尾, 他區band3中, 本區band2中, 他區band2中, 本區band2頭, 他區band2頭, 本區band3尾, 他區band3尾 (以上次序可隨意改動, band3尾可以唔填)

以上建議純屬參考, 家長可以自己選取策略.

khmama

回復 nganc9 的帖子

謝謝你的理解. 因為小妹都只係打工仔一名, 仲要係超忙o個隻, 個別回覆會有困難, 亦未必有時間全部回覆, 但我會盡量答, 答唔切唔好見怪. 我亦唔想家長過於倚賴我既回覆, 以免延誤咗交表時間, 所以只可以提供個方法. band1生其實跟我四篇策略去填已經好易做, 而五個策略選邊個又好睇家長心態, 有o的人想搏, 有o的唔想搏, 我係好難幫家長去決定, 因為最終係家長自己去承受結果. 策略已經講晒, 之後可能有o的補充, 家長先嘗試自己排30間先, 真係唔難做, 我再個別回應啦.

khmama

回復 chai 的帖子

南區係最差既區, 男仔更加冇得選. 但係做法都係同我之前講既冇分別, 反正唔到你選, 第一填聯繫, 第二你唔填呂明才都係要填他區, 分別唔大, 咁你第二填呂明才, 再填晒他區band1, 最後先填本區band2啦. 點解填十間咁少? 你填晒o的band2都揍到22間呀.

khmama

每個抽獎網都有本區學額同部份他區學額，不過他區位唔多.

khmama

你可以上去置頂嘅下載區取得上年資料.

khmama

你可以download 我份大抽獎排位，入面嘅學額資料係根據上年中學一覽表輸入嘅.

khmama

因為沙田本區band1位足夠比band1生抽，唔使問他區借位.

khmama

大抽獎只講運氣，即使區內band1位夠分比band1生，仍有風險派去band1尾學校. 只不過多band1學校(本區+他區)嘅網較大機會成功執鷄. 其實進取嘅定義係你首志願是否填一間好多人爭嘅學校. 你要進取嘅同時要接受萬一欠運氣，派唔到心儀中學，都要去接受.


抽獎係一個捉心理嘅遊戲，我認識一個朋友，多年前在中西區第一志願填得5個位嘅QC，第二志願聖類斯. 因為大部份人都會選英皇做第一志願，而聖類斯第二已經係包咗底，入到聖類斯佢都滿意，最後成功入咗QC. 另一個朋友九龍城區，第一志願搏喇沙，因為知道band1位夠派比band1生，就算搏唔到喇沙，是但一間英中都派得到，最後真係派入喇沙. 所以每個case唔同，亦要小心個個都同一心思，結果亦會大失所望.

khmama

viostang 發表 13-4-28 20:56
填錯係唔係逐張加簽更正？

我記得要喺改過嘅地方加簽，無需逐張簽，因為會過底，而後面嗰張係家長keep嘅.