95網(西貢)統一選校意願,結果及叩門 (相關論題#125, 1220）

Fanta2011

其實唔係按志願排，然後搏抽到靚no.就ok咩？最後都是靠運

clingy

係按照小朋友的號碼來依次分配志願。舉例，有10個學生，10間學校，頭5間學校熱門，如果學生號碼1號，咁佢可以第一個揀學校，一定揀到心水學校。但如果個學生係6號或者之後的號碼，佢只得剩下的5間較不熱門學校可以選。最不幸運係10號學生，只剩最後一個學校，無得揀

Fanta2011

謝謝回覆，咁如果我號碼係2，但甲1已經冇位，我有幾大機會入甲2？

clingy

都係舉例，五個學生甲乙丙丁戊，每人報二個志願，有abcde五間學校，全部人都填最熱門學校ab，只有甲乙兩個學生可以入讀a和b，丙最理想派到c，但都可能跌去最差的e

BSCYL

我個人意見
要放手盡博的話，要有心理準備，骨牌效應，連乙三的志願都守不到，乙二選 梁潔華，田小，明道，信義。 有可能一個位都無
要較穩的，在將官小，景天，黃藻森，梁省德選一間
乙二放基德，陳耀星，志蓮，劉德相信成功在望

BSCYL

23april23 發表於 15-11-26 14:20
其實放心水學校在前幾位都係誠意， 明知第一志願入唔到實跌到好後， 但可以叩前幾間學校， 老師會唔會係咁 ...

如果熱門的，你不是 111，已是誠意不足。況且到叩門階段，實力比誠意重要

23april23

原帖由 BSCYL 於 15-11-26 發表
如果熱門的，你不是 111，已是誠意不足。況且到叩門階段，實力比誠意重要
...

有學校你填佢頭3志願佢都比叩門機會的

yuksusan

想問一下，志蓮和陳國威，那一間好些？

wyjj

請問如果有兩間心儀的，是否可填甲一甲二，（不留空甲二）會唔會影響乙一啊？是否所以學生都係甲不抽完，再一齊去乙部開始？

chiliwu

原帖由 Fanta2011 於 15-11-26 發表
謝謝回覆，咁如果我號碼係2，但甲1已經冇位，我有幾大機會入甲2？

咁要視乎你甲2擺乜? 甲2擺大熱就一定冇機會，放間冷門嘅就入硬。

大抽獎係跟隨機編號，先配對甲1，所有人甲一都配對完，再一齊配對甲2，如此類推。

點解將大熱放晒喺 甲/乙一，二，三 唔可行呢？ 因為將大熱放喺甲一/乙一嘅人仲多過學校提供嘅學位，人地填甲/乙一都入唔到，你填喺甲/乙二，三，…… 又點會入到?

所以，有人放大熱喺第2/3志願，係用嚟等叩門時搏少少“誠意”分。

chiliwu

原帖由 wyjj 於 15-11-27 發表
請問如果有兩間心儀的，是否可填甲一甲二，（不留空甲二）會唔會影響乙一啊？是否所以學生都係甲不抽完，再 ...

咁又要視乎你甲二填咩學校。大熱嘅，結果一樣，唔會中甲二。
否則，你就要諗清楚，究竟甲二同乙一你會點取捨。若果甲二同乙一都咁鍾意，當然去馬。但你若果鍾意乙一多D嘅，甲二就應該留空。

23april23

原帖由 BSCYL 於 15-11-26 發表
如果熱門的，你不是 111，已是誠意不足。況且到叩門階段，實力比誠意重要
...

即係話叩門只可叩第一志願，第二、三志願唔駛叩?

BSCYL

http://www.edu-kingdom.com/forum ... ead&tid=3062466

chiliwu

原帖由 23april23 於 15-11-27 發表
即係話叩門只可叩第一志願，第二、三志願唔駛叩?

咁又唔係喎，D學校話要111/101先有得見，不過有幾多間係講得出做得到?
我只知小/馮晴真係唔放第一冇得見。其他唔敢肯定。
若去到叩門階段，有理冇理，全部都遞表㗎啦，你到時要諗嘅，係若果要見埋家長時，老師問點解之前唔揀佢，你要點答……
都有好多只in小朋友，小朋友表現最緊要。

lhyxxx

Fanta2011 發表於 15-11-26 17:45
其實唔係按志願排，然後搏抽到靚no.就ok咩？最後都是靠運

抽獎係有運氣成分，但填表策略得宜，雖然唔保證一定派得好，但通常都可以避免派得太差，換言之係一種安全打底措施。

至今仍然一舊雲既家長，其實你可以當「第一志願」係鋤大D中嘅「D」，「第二志願」係「煙」，第三志願係「King」，如此類推。如果你想象呢D係你不同級別嘅彈藥而非志願，一切可能容易理解。

乙部例子一：假設你最愛宣小，於是將「D」押喺宣小，呢個「D」已經係你最強武器。有63個位，第一輪大家出牌，開估原來有總共150人將「D」押喺宣小，由於學位數目滿足唔到大家，換言之一定要有人失敗，方法係喺呢150人中再用隨機號碼抽。

乙部例子二：隔離屋有位師奶將「D」押喺將循己經香左，佢嘅最佳武器淨番「煙」，到第二輪出牌，但佢又好理想咁押落宣小，然而宣小63個位已經俾人出哂「D」，佢出「煙」又點夠闘呢？所以隻「煙」浪費左。

乙部例子三：兩輪開牌後，師奶仍未擊中任何目標，手上只有「King」，今次押落景天。景天都有63個位，第一輪有10人用「D」鋤中，第二輪有40人用「煙」鋤中，由於仍然未滿63位，呢50人根本不須再用隨機號碼抽。第三輪有70人用「King」押景天，由於只剩下13個位，大家都係「King」，所以又要用隨機號碼抽。如師奶抽中，佢既遊戲即時中止兼收錢走人。

由此亦可看到景天由第四輪起已經冇位，另一位靚太將「Queen」、「Jack」死押落景天係哂氣。

----------- (以下覺得深毋須理會。)

有讀過數學嘅家長，據以上例子其實可看出所謂「第幾志願」係一種「加權」(weight)。乙部表格並非真如教育局所講是一種wish list，只須把你嘅wishes填哂落去便可。

再想深入嘅家長，可留意上述例子為左容易理解起見，開牌係一輪一輪的，但現實上要將「D」至「3仔」一次過決定押哂不同選擇，再由莊家 (教育局) 內部開哂咁多輪牌後再一次過公佈，如此便涉及你要估埋其他賭仔押注既pattern，即係game theory。

如有錯誤，懇請指正。

hkpapa852

lhyxxx 發表於 15-11-27 15:49
抽獎係有運氣成分，但填表策略得宜，雖然唔保證一定派得好，但通常都可以避免派得太差，換言之係一種安全打 ...

都係 lauwingtai 呢個明星fan club論易明D:
http://www.edu-kingdom.com/forum.php?mod=redirect&goto=findpost&ptid=2733497&pid=37894687&fromuid=1389083

節錄:
或者我再舉一例。全球任何明星都有粉絲會，而我們只可加入其中一個粉絲會做會員，我們要先知道幾個遊戲規則：
第一，每個會有50%可供統一派位；
第二，當中5%是甲部(全世界可跨區抽)，和45%是乙部(只供同區抽)，所以乙部名額是甲部的9倍；
第三，抽獎順序是甲1>甲2>甲3>乙1>乙2>乙3>乙4......>乙30；
第四，抽獎跟以上順序，一抽中就停，假如你甲2抽中，甲3至乙30都唔會再抽
第五，甲部雖可填任何區，但如別區冇明星你鍾意，也可填本區。

而家解釋範例：

我鍾意Tom Cruise>劉德華>福山雅治>松本潤>梁朝偉>余文樂>蕭正楠，我會填：

甲1(Tom Cruise)甲2(劉德華)甲3(留空)
乙1(劉德華)乙2(余文樂)乙3(蕭正楠)﹒﹒﹒﹒乙29(麥長青)乙30(艾威)

問題1：我點解甲3留空？做乜唔填福山雅治？
答：因我愛劉德華>福山雅治，如我在甲3抽中福山雅治，咁我咪等於放棄乙1抽劉德華個45%Quota? 所以我情願甲3留空，都要抽劉華。

問題2：點解乙2唔填梁朝偉？而填余文樂？
答：因為梁朝偉與劉華是同level大熱，乙一必然45%全被抽光，乙二仲抽是呃自己，只會浪費機會，所以我填次一皮的余文樂

問題3：做乜要填滿乙部三十個？冇心水可否留空？
答：唔應該，因甲部留空，電腦會Skip，但乙部留空，電腦會亂抽，所要乙部要盡填，起碼填d唔討厭的，否則，可能會派阮兆祥俾你。

HK-MAN

lhyxxx 發表於 15-11-27 15:49
抽獎係有運氣成分，但填表策略得宜，雖然唔保證一定派得好，但通常都可以避免派得太差，換言之係一種安全打 ...

要明始終會明,唔明既又好難會明,最終佢地好似明,但又會出現好多點解...

hkpapa852

HK-MAN 發表於 15-11-27 16:03
要明始終會明,唔明既又好難會明,最終佢地好似明,但又會出現好多點解... ...

有D人夠好彩, 到D仔女中學畢業都未清玩法.

其實都只係講運氣, 以及少許策略

HK-MAN

hkpapa852 發表於 15-11-27 16:01
都係 lauwingtai 呢個明星fan club論易明D:
http://www.edu-kingdom.com/forum.php?mod=redirect&goto=fin ...

應該好多人都睇過既..,其實最終派到阮兆祥比你都唔需要傷心,反而佢可能有更多時間陪你.

hkpapa852

HK-MAN 發表於 15-11-27 16:09
應該好多人都睇過既..,其實最終派到阮兆祥比你都唔需要傷心,反而佢可能有更多時間陪你. ...

阮兆祥都好過陳山聰, 或者D二打六巨聲幫.....