求教band1小學，追成績

LeeCC

Cherryroy 發表於 22-10-14 11:05
回覆 yiqiyihui 的帖子

其實我都唔知係咪有讀障，老師覺得有咋

所以咪要搵專家評估，證實有的話，就同學校傾調適，如果學校唔協助，可以唔洗唸咁多，轉校得啦。

如果證實不是讀障，專家會講係咩問題，建議如何訓練改善，家長只要畀耐性陪伴訓練，調節期望，等孩子進步。

tummypooh

見樓上各位都睇到好激動。

作為父母，唔想小朋友有問題，有時出左問題都會同自己講未必係，咁諗都係人之常情。

但有啲問題，出現左一段時間，又不斷搵借口安慰自己，其實只會係你個心暫時好過左，但個問題依舊存在同發展更。

香港醫學算係好發逹，政府學校都會有支援。但有時有啲嘢，係不能等的，主動出擊。我唔知樓主係因為依舊包有一絲幸運心態覺得係小朋友未開竅，定係因為金錢問題而咁多年都唔去搵專科確認下。

我真心覺得如果唔係因為金錢壓力真係大到冇可能負擔到，點都出去做左個初步評估先，冇障礙當然最好。如果有，你拎住個REPORT搵學校搵社工拎支援都快啲(校主係私校？我成日覺得私校你唔好諗住佢會支援你)，如果負擔到，更係一路等，一路自費搞住先。

我見有啲POST有人話你提過小朋友做功課要做到好夜，但如果其他同學唔係咁，得你係咁，而家先三年級，四五年級你應該唔訓都搞唔掂。所以你而家真係不能再等了。

Cherryroy

回覆 LeeCC 的帖子

多謝解答，我知大家激動。我其實係想搵唔轉校而追到成績方法。佢1，2年級唔係全部都唔合格，都有試過幾次默書拎8×，英文都有7×，只不過剛開學呢個幾月，所有野都唔合格，做野，寫字又慢，所以我先想請教方法。

Jean1769

Cherryroy 發表於 22-10-15 13:06
回覆 LeeCC 的帖子

多謝解答，我知大家激動。我其實係想搵唔轉校而追到成績方法。佢1，2年級唔係全部都唔 ...

一年班7x分，其實已經係好低。

都唔需要講太多，你而家首要去做的係搵專業人士去做評估再聽專家意見，你再拖，恕我直言，係害左個女

kakokkkk

Cherryroy 發表於 22-10-15 13:06
回覆 LeeCC 的帖子

多謝解答，我知大家激動。我其實係想搵唔轉校而追到成績方法。佢1，2年級唔係全部都唔 ...

其實方法就係要評估左先。

Eunice0203

Cherryroy 發表於 22-10-15 13:06
回覆 LeeCC 的帖子

多謝解答，我知大家激動。我其實係想搵唔轉校而追到成績方法。佢1，2年級唔係全部都唔 ...

其實好多jm已經比哂意見方法你 你都唔肯接受！一年級7.80分其實已經好低

mrchuchu

你有你講，佢有佢做。。。算罷啦大家。

yiqiyihui

mrchuchu 發表於 22-10-15 14:21
你有你講，佢有佢做。。。算罷啦大家。

真係… 完全覺得自己對牛彈琴

所以慳返啖口水好過

老師講可能SEN - 唔信
老師講轉校唔好咁樣令她打擊自信 - 佢自信唔會受打擊
十個八個網友叫評估 - 完全無視

咁佢又問老師?
咁佢又問我哋?

佢自己都有哂自己幻想嘅答案啦

依家覺得個阿媽個問題仲大過個女多多聲

piglover

要由Band 1小學轉寶校，樓主過唔到自己果一關。

Band 1小學都不代表個個小朋友係Band 㗎。

唔適合就係唔適合，比你勉強留下，又點呢？

sonokosy

如有懷疑，緊係去做下評估啦。不過好多人唔明，以為做完評估，學校會支援，然後小朋友就跟到。其實咁諗係錯哂，就算學校有咩支援都好，一個有讀障嘅小朋友都好難跟得上band 1學校嘅進度同功課。
假如確定咗小朋友有讀寫障礙，你下一步就應該要接受同幫小朋友轉校，咁樣對佢會好d。就選小學勉強讀到畢業，咁中學呢？小朋友都無可能讀到，所以媽媽你又何必死守呢個band 1學位呢？同埋小朋友已經讀咗2年，但兩年都唔太跟到，家長亦搞到好大壓力，坦白講，即係話呢間學校唔適合你小朋友。

juneforgbb

Eunice0203 發表於 22-10-15 13:53
其實好多jm已經比哂意見方法你 你都唔肯接受！一年級7.80分其實已經好低
...

其實一、二年級70/80分唔係一個問題，問題係因為懶或者未搵到方法溫書，定係開盡turbo都係咁？ 如果已開盡turbo 默書先係70/80先，仲要未必係次次拎到，上到高小點捱

sonokosy

如果要繼續讀原校，建議每日俾小朋友早啲訓覺。唔熟所以溫書溫得夜，但因為攰好難記得入腦，最後成績都唔會好，仲要搞到第二日唔夠精神上堂，唔能夠留心聽老師講嘢，然後成績唔好…呢個惡性循環只會一直無限loop，所以建議你寧願俾小朋友每日早啲訓覺，有足夠精神上堂。

piglover

樓主問小朋友成績問題已2年啦，2年都無改善，仲要留低在原校。

方法，建議，網友都比曬樓主，她又唔接受，都無辦法㗎。

學習係長途賽，小朋友而家都唔想跑，點搞？

piglover

sonokosy 發表於 22-10-15 18:10
如有懷疑，緊係去做下評估啦。不過好多人唔明，以為做完評估，學校會支援，然後小朋友就跟到。其實咁諗係錯 ...

原來樓主小朋友間小學有直屬中學嘅，難怪不想放棄。

不過，直屬都不是百分百收，升唔到原校仲大件事。

tailinlin

piglover 發表於 22-10-15 19:12
原來樓主小朋友間小學有直屬中學嘅，難怪不想放棄。

不過，直屬都不是百分百收，升唔到原校仲大件事。

邊間？

LeeCC

小朋友如果確診係sen，不但小朋友本身要接受訓練輔導，家長都要接受專業人士輔導，第一樣學習的就是調節期望

piglover

我知道樓主邊間小學，坦白講，呢間真係唔深㗎。如果你話小朋友唔係高分，都算。而家係唔合格。樓主果間小學無教深，無教快，如果都唔合格。

樓主真係要帶小朋友做下評估。

bananaGi

Cherryroy 發表於 22-10-14 00:52
回覆 yiqiyihui 的帖子

班主任同我傾過，剩係話佢寫字好慢，老師剛開新學年教佢，就同我講搵間適合佢嘅學校，唔好咁樣令她打擊自信，           我同老師講佢唔合格佢反而知自己要努力，從無打擊過佢，佢記性差啲受同懶思考就係我覺得佢缺點。，不過係阿媽我受唔到。講真11月頭考試，又全炒，我真係未必受得住。我好想搵方法幫佢

比定心理準備你, 睇一睇你校既升中結果, 你既名次將決定你入 band幾中學. 到時唔接受可以點?

LeeCC

其實留係原校，以現在的成績係咪可以直升中學？如果唔係，不如去一間二線學校，畀小朋友透下氣，發掘興趣強項，重拾信心。

真實個案，一線小一生懷疑讀障，學校由12月開始，老師社工每日車輪戰咁見家長，話學校不適合小朋友，勸退，但無安排評估支援，小朋友日日返學喊，夜晚做功課喊

下學期，家長自己安排私家評估，結果出左，證實讀障，交畀學校，無支援，學校採取放棄態度，點解？因為有報告就唔可以勸退，只可以自然流失。

家長忍到學期尾，帶著評估報告去同區二線小學插班，重讀小一，學校發現小朋友數學和表演天份，畀機會發揮，安排補底支援，功課考試調適，小朋友慢慢重拾信心，中意返學，六年後，入咗地區band1尾中學。
家長接受現實和調節期望是一個關鍵，小一咁好彩抽到一線大熱的小學，邊個家長捨得放手？邊個家長唔會期望6年後入同區最top中學？但個家長早開竅，調節期望，知道去二線小學，將來可能都係入band 2，3學校，但留係原校，亦唔見得可以入band 1，既然結果相近，不如比小朋友透氣的空間吧。

yiqiyihui

冇教深教快….

其實仲有兩個禮拜都考試啦… 個女應該已經開哂 turbo。

咩叫旁觀者清，我就唔認為無啦啦今次會合格嘅。

事到如今，咪依家打去約一個月後評估，努力埋個考試，當俾埋最後一個希望自己。到時睇埋學校個成績，合格就最好啦，即刻cancel appointment，唔合格就照去評估囉。

不過以上係站在阿媽角度，照顧阿媽感受嘅折衷辦法。其實從個女角度諗，我認為今次考試就放過佢算，無謂再俾壓力佢。但係知道呢個阿媽唔係一般嘅硬頸，勸退無效嘅。
阿媽同個女都要管理下今次個期望。千祈唔好俾說話個女聽話如果再唔合格就點點點。細路仔人心好脆弱。與其話個阿媽受唔住，其實個女嘅心理狀況更令人擔心。