子女的期望 vs 父母的期望

wan_sosin

greentea000 發表於 17-3-25 14:34
我成績算比較平穩，20名內上落。不過偶然我都有某Ｄ科倒退10分，中學計係失好多分下(跌1個grade)，阿媽會表 ...

讀到中學都仲要管？我好彩！我幼稚園已經無人理

不過我老公會理個仔嘅學業，有時我仔失手分數低咗，我會係佢返屋企前提佢返嚟唔好話個仔，雖然佢都唔算話得好狠嗰種，咁我老公都會合作。
不過今日我老公都鬼咁大聲鬧個仔，我哋落巴士站搭車，個仔叫我哋行住先，佢話係樓下playground玩兩下會追返我哋，點知到巴士站等到有車都未見人，爸爸一見到佢，就走過去狂丙佢，咁我個仔都知衰嘅。

1998Ruby1998

回覆 wan_sosin 的帖子

依家好多中學大學都要管，冇辦法啦，得一兩個細路，依家唔讀書就難有好出路，父母好容易當左自己仔女係個人財產而唔係獨立個體，自然咩都要管。
我阿爸好隨和，好難激到佢，阿媽就唔夠 10 秒即刻扯火，越鬧越火滾，動口又動手。
尋日同父母 Skype，阿媽即刻問我有咩溫書大計，我畀佢睇我個溫書 poster 之後話「哇，你星期日點解有 Games 同埋去行街？」「一星期 7 日我溫 6 日，休息一日咋wor」 「我同你地洗衫煮飯咁多年都冇休息過啦，你憑咩休息？你有得讀書已經好好，仲掛住玩。」 其實我得三科考試，平日都有溫書，唔明白已經過左 DSE 佢都仲咁緊張。

1998Ruby1998

回覆 October. 的帖子

我阿爸都係咁，好少鬧（除非我真係好白癡好過火）阿媽成日同佢講「你鬧下個女啦」，阿爸都係無奈咁笑，然後好 hea 咁講句「努力讀書啦，你又搞到阿媽生蝦咁跳」，之後安慰下阿媽。
阿爸負責教我打機、睇股票、煲劇、花天酒地、講埋 d 無聊野（「你阿媽大減價益你阿爸」、「雪姑七友七個小矮人」佢係我幼稚園嘅時候教我呢類野，即刻畀阿媽喝住 ），NDS、PlayStation、Wii 都係佢先斬後奏，好多色情暴力遊戲都係佢教我點過關，激到阿媽忍唔住揼左部 NDS 同 PlayStation（Wii 太貴，佢唔捨得揼）依家每次同阿爸 Skype 傾計都係講呢排有咩好劇、邊隻係潛力股，成日畀阿媽話曲學阿世，尋日就鬧「個女好似唔似，似足曬你 d 衰野，講埋曬 d 無聊野，冇句正經！」。阿爸就講句「肥婆隻雞甩晒毛」，無厘頭到激死阿媽。好彩我細個冇係學校講呢 d，唔係就真係大穫！

唔好意思，講埋呢 d 野，阿爸教我呢 d 野太多，不過真係體會到咩叫「養不教父之過」

wan_sosin

greentea000 發表於 17-3-25 22:15
親戚女Y終於做左初步測試，屬於"行為衝動">>>患者的自我規管能力較弱，在玩耍或說話時往往無法自我抑制，  ...

Y讀那類學校？學校過去有無投訴？佢衝動行為影響了那些生活地方？評估的醫生/CP給了什麼意見？
唔好意思，咁多問題，我自己慣於了解多少少才比意見別人，唔想比D標準答案就算。
我仔主要是活躍+衝動，專注力反而唔係最差嗰樣，所以讀書方面可以。

greentea000

回覆 wan_sosin 的帖子

Y讀地區二線津校，有一聯繫中學，所以盡量唔想轉校。老師同Y爸講過注意下Y既表達方式，又未至於係投訴。醫生話唔使食藥，行為治療。

我同Y既接觸，無人佢坐得定，唔會扭身扭勢，但係旁邊有人佢一定攪下身邊果位，推下你打下你咁，又唔係真打，係玩果種。同佢講野，佢係會望住你，個樣好留心聽咁。不過佢講野無條理，講東講西，講到後面唔記得前面。

wan_sosin

greentea000 發表於 17-3-26 00:00
回覆 wan_sosin 的帖子

Y讀地區二線津校，有一聯繫中學，所以盡量唔想轉校。老師同Y爸講過注意下Y既表達方 ...

學校不是有太多意見,咁暫時都可以唔需要同學校講,可能講唔講都分別不大.

醫生說的都對,只有這些情況不用食藥,佢係學校都搞住隔離同學?同學有無投訴?你無話佢專注力有問題,咁佢學業上的困難是何原因?

行為治療要家長一起學,在家持續訓練先見效,都要了解家長平日如何教導,在日常生活中去改變.

舉例,小朋友打斷別人的說話,家長會如何回應;有些家長會真係即刻理個小朋友,有些會鬧佢幾句,叫佢收聲;有些可能當聽唔到......
要如何回應才令小朋友知道自己不當,以及應該當別人說話時,甚樣才是適當的發言時間,這要家長去學懂處理和教導.

greentea000

回覆 wan_sosin 的帖子

我都感覺個初步評估結果比較奇怪，無話學習能力方面有咩問題。學校係活動教學，好少係課室正經坐，坐位係輪住調位，分好開下，只要唔係伸手可及Y係唔會去攪同學仔。除左成績差，Y返學係好開心，亦有好多朋友。下一步Y排期兒童精神科同兒童體能智力測驗中心都去睇下，Y爸去協康會上下堂。

Y媽唔認同我地家庭教育，從來無參加，我地唔知佢實際點教Y。零碎資料Y媽似係主流中產路線，好多早教同興趣班，Y又有返教會。由考幼稚園至小學都唔順利，心儀既都唔收。Y爸話Y上學期有進步獎，不過間學校係學習態度改善/成績進步10名都有進步獎，唔知係邊種。Y同輩既學校同成績都比Y好，Y父母唔講我地唔會主動問Y學習既事，其他人討論仔女讀書Ｄ事Y媽都無加入既。

shadeslayer

shadeslayer 發表於 17-3-25 18:23
父母一凹一凸剛剛好。

只要父母花時間在子女, 就不會缺席教育。教育呢.…不是學業考第一才叫教育。

MrBeast

greentea000 發表於 17-3-25 22:15
親戚女Y終於做左初步測試，屬於"行為衝動">>>患者的自我規管能力較弱，在玩耍或說話時往往無法自我抑制，  ...

香港人傳統是較收埋收埋，怕被label，我自己就不wai疾忌醫，對症下藥，不過最終都要看學校取態和有什麼support.

wan_sosin

greentea000 發表於 17-3-26 04:04
回覆 wan_sosin 的帖子

我都感覺個初步評估結果比較奇怪，無話學習能力方面有咩問題。學校係活動教學，好 ...

Y多多少少都叫有進步，返學又開心，有朋友，其實算唔錯，每個小朋友學習進度，能力不同，而且還是初小，還有很多時間機會成長，只係佢父母唔太接受到，都明嘅，父母點會唔想仔女成績理想。
如果佢父母會進一步跟進同評估，又會去上堂，都已經好好，父母都需要些時間接受個女嘅問題，和改善教導方法。
Y媽太封閉唔想別人知別人理，固執於自己的方法，實難幫佢，不過好多做人父母都怕被親戚指指點點，我老公個家姐有對比較大的仔女，成績幾好，我老公間中講下個仔，但佢每句都要踩一腳，我都提老公唔好再講。同親戚傾仔女要有些技巧，先讚幾句小朋友才提少少自己睇法，跟住又讚下對父母，造個和階氣氛，有多些信任慢慢先可以講多少少。
另外，活動教學都唔一定適合較唔專注的小朋友，有時太開心輕鬆，反而更唔留心聽書學習，當然亦唔好讀嚴格到下下罰嘅種學校，但分開枱坐無得搞同學都幾好。
如果之後評估完再有詳細報告，到時再考慮下是否交比學校。

1998Ruby1998

回覆 wan_sosin 的帖子

我阿媽次次同親戚傾計每講一句就踩一句，唔係踩我學業就踩我性格，係隔離聽住好冇癮，所以我好抗拒同親戚新年中秋等團聚食飯。我個代我最細，最遲入大學，大部份表哥表姊都讀港大、牛劍、Imperial、LSE 等等，依家佢地做銀行總監、高層、大律師，所以真係大壓力到呢！不過我個表嫂、阿姨都話我阿媽講野好刻薄好毒，下下踩到盡，貶低我呢個女。
好彩阿爸堅持「同親戚傾仔女好無謂，自己仔女係自己，人地仔女係人地」，佢會帶我出去魚缸睇魚，去附近商場行街（順便睇地產、電子產品等等）。就算老師好唔鍾意個學生，都唔會第一句就踩，hea hea 地都會讚兩句先踩。

以前我坐唔定，教育局來果幾日老師搞活動教學（簡單來講，就係做騷交貨），課堂教書成份唔多，一組一組咁坐可以討論同埋合作，我果幾日最開心同埋學到最多野。不過依家讀英國大學講，課堂自由自主，活動教學，上堂進度慢，功課冇指示要自己獨立思考，好容易唔想聽書，有少少唔習慣不過都 okay 適應到。我應該係鍾意一對一，好似以前徒弟跟師傅學野咁，唔明就問，大部份時間自修。所以真係唔係人人都適合活動教學，同埋每隔幾年可能會變。

1998Ruby1998

回覆 shadeslayer 的帖子

以前睇李司棋套【家好月圓】，荷媽其中一句話「我未必教到仔女個個人中龍鳳，讀書工作出色，但係至少我唔會畀佢地學壞，我會教佢地做人踏實善良。」

greentea000

MrBeast 發表於 17-3-26 07:56
香港人傳統是較收埋收埋，怕被label，我自己就不wai疾忌醫，對症下藥，不過最終都要看學校取態和有什麼supp ...

Y媽未知，Y爸偷偷革命中，最快要有詳細評估結果先同Y媽講。
學校唔見有咩支援政策。

wan_sosin

1998Ruby1998 發表於 17-3-26 20:28
回覆 wan_sosin 的帖子

我阿媽次次同親戚傾計每講一句就踩一句，唔係踩我學業就踩我性格，係隔離聽住好冇 ...

中國人思想，人哋面前踩下自己個小朋友，叫做謙虛，人哋就算讚下佢個小朋友，都即刻話，邊度係呀! 佢唔乖唔叻唔。。。
不過這代家長，好多已經相反。

我老公有D家人，唔太鍾意我個仔，反而我屋企人就幾錫我個仔，仲會欣賞佢嘅優點。
我都同我老公講，返到佢屋企麻煩留意下，唔好搞到佢家人睇佢唔順眼，否則我會少D帶佢返去，我唔想我個仔被人唔多善意對待。

greentea000

回覆 wan_sosin 的帖子

Y爸問左高年級家長，去到高小活動教學會逐漸減少，坐定定授課佔多。學校無任何adhd支援助計劃，網頁提都無提。聯繫中學唔止一間聯繫小學，起碼要入到精英班先有機會。而Y媽目標從來都係神校，Y爸首先要打破Y媽呢個幻想，聯繫中學由後備變成落力爭取。

1998Ruby1998

回覆 wan_sosin 的帖子

我阿媽試過係酒樓到同親戚大聲講「佢邊度好？又肥又矮又黑（我承認係事實 ，不過冇咁誇張），讀書又差過人，冇科勁，又懶散馬虎，冇忽似我！」我表嫂望著佢當堂呆左，無奈笑著咁話「唔洗講到咁啊嘛」。我表嫂都有讚有彈佢個女，賞罰分明，所以佢成日覺得我阿媽好刻薄。

我情願阿媽咩都唔講，話我「唔乖唔叻」就算，踩到咁盡傷感情。不褒不貶最好。

我明白你果種心態。邊個父母唔想仔女人中龍鳳，樣樣得？我個大姨好唔鍾意我阿哥，話佢自閉症，嘥米飯，冇希望，然後同我講「讀好 d 書，將來嫁個有錢人，就可以有生之前搵私家醫生 check 下有冇問題。」我聽落都覺得好唔舒服，更何況我父母？不過好彩，都有兩三個表哥表嫂（其中一個做醫生，所以佢好明白事理）好錫我阿哥，佢發脾氣果陣會帶佢行街買野畀佢食，氹佢開心，其他果 d 就避之則吉。所以阿爸阿媽有咩親戚團聚，都好大壓力，唔想去，不過因為禮貌同尊重，所以佢地去，留低我同阿哥係屋企，費時平白招人嫌。

wan_sosin

greentea000 發表於 17-3-26 23:29
回覆 wan_sosin 的帖子

Y爸問左高年級家長，去到高小活動教學會逐漸減少，坐定定授課佔多。學校無任何adhd ...

其實唔會有學校在校網講到明對sen有支援,你可以試下去校網搵下有無"學校報告",通常幾十頁紙,入面可能會搵到學校sen學生人數,學生支援開支等等,應該唔會完全無這些學生,但學校唔會主動講,有些學校因為唔想收sen,都會話沒有支援.等sen家長唔報佢間學校.

原來咁難升聯繫中學,真係試下盡力唔好太強求,Y爸都好好!希望Y媽有改變啦!

wan_sosin

1998Ruby1998 發表於 17-3-26 23:55
回覆 wan_sosin 的帖子

我阿媽試過係酒樓到同親戚大聲講「佢邊度好？又肥又矮又黑（我承認係事實 :nothing ...

我仔就係有些少你哥哥的情況,我仔有堂家姐同堂細妹,這兩姊妹的態度都好差,大嗰個扮晒大人咁呼喝我仔,口臉好嫌棄,細嗰個都唔會當我仔係哥哥.呢兩姊妹連我都唔會稱呼一聲.我同我老公講,唔叫我無所謂,但唔得覺我哋個仔好低下咁樣.兩姐妹係小朋友唔識無得好講,但佢哋父母都好似唔覺有問題.
不過奶奶其實好好,我話,睇在奶奶份上,我會尊重佢老人家,唔會令奶奶難做.不過又唔係個個係咁樣,大哥大嫂對我哋都好好.

MrBeast

1998Ruby1998 發表於 17-3-26 23:55
回覆 wan_sosin 的帖子

我阿媽試過係酒樓到同親戚大聲講「佢邊度好？又肥又矮又黑（我承認係事實 :nothing ...

我有位親友，之前成日讚阿仔細個時點叻點叻，但臨天光lai尿，中學尾成績sir滑梯，之後成日係阿仔面前同親友講佢d弱點，有次C底下佢訴苦話同阿仔關係唔好，我直接話佢communication style 是原因之一，忠言當然是逆耳。這是中國傳統和legacy問題，相信你媽不是固意的，不如掉返轉當佢細路咁教，佢做得好時就讚下佢。

retriever

wan_sosin 發表於 17-3-25 22:33
讀到中學都仲要管？我好彩！我幼稚園已經無人理

不過我老公會理個仔嘅學業，有時我仔失手分數低 ...

女唔敢講，仔係要鬧既。唔鬧唔醒，當然唔係鬧唔停，醒左亦要講返個道理。

當然，個仔親D。呀媽生既义燒，唔捨得俾老豆鬧。。。