回復 llam1210 的帖子
我囝囝現時4歲1個月,不妨參考佢過去的經歷。
囝囝自出生後便成日喊,仲唔肯俾人抱。到一歲後,佢又成日唔睬人,唔聽指示。你叫佢時,佢有心情就望吓你,但大部份時間都係唔睬人(即唔望人)。平日佢最鍾意玩車(特別係巴士),雖然無玩車轆,但成日鍾意扮停車場排車(橫排、直排、分類排、扮塞車……)。由於佢到三歲才懂說單字,故三歲前用了很多身體語言去表達自己的需要。(二歲多才懂用手指作指示)。
在一歲多,我曾帶佢返個2間playgroup,返咗差唔多1年,但結果係徹底失販,每次佢都唔肯聽導師既指示,唔肯排排坐,只顧自己四周「遊魂」,或自己玩中心既玩具;期間自然多次受到中心既導師及負責人投訴。
經諮詢醫生朋友意見,最後準備帶佢去衞生署兒童體能智力測試中心(CAC)作評估,點知原來最快都要等7個月才有期,唯有自行找私人訓練中心作評估(只需等一週----費用$6500)。評估結果:醫生話囝囝有中度自閉症,最好盡快排政府S位(每週5天密集式訓練)。無幾耐負責社工向我表示,囝囝排S位至少要等1年多。
為咗唔想錯過治療自閉症既黃金期(1-2歲),唯有自費去報讀私人S位(每月$7500,言語治療及職業治療另計,每50分鐘收$800)。其實當時已有多間主流幼稚園取錄囝囝讀N班,但想到佢返playgroup既表現,相信比佢返N班也是浪費時間,所以最後冇比佢讀。期間為咗幫佢,我仲帶咗佢去做針炙,但只做咗4個月,見毫無成效,就停咗。
喺過去1.5年的S位訓練,囝囝有顯著進步→肯聽指示、坐定定、肯望人;到三歲開始識講嘢後,同我哋便更多互動。本來諗住等佢K1才嘗試返主流,不過除我哋覺得佢有顯著進步外,S位的導師也支持囝囝提前嘗試返主流,所以佢先會喺上年2月開始返主流N班。(插班)
不過,在不同學校面試N班過程中(插班),我也有一些不愉快的經歷:其中有一間幼稚園,在面試前已知道囝囝情況,到面試時,因開始時老師 不肯讓囝囝玩園內的遊樂場,故他十分不合作,既不肯回答問題,又不段大哭,最後老師 給了「很多說話」我聽;另一間幼稚園,面試時囝囝非常合作,跟足指示,做到老師 的要求,並得到高度讚賞,但最後都因為見他只懂說單字而未獲取錄。但我不氣餒,繼續尋找,終於成功找到一間。
由上年2月開始,囝囝上午上S位訓練,下午返主流N班。由於我不想幼稚園老師對囝囝有「先入為主」的感覺,故我事先未有通知他們有關囝囝的自閉問題。喺頭幾個月,我同老婆曾經擔心會否收到學校既投訴電話(以前由工人帶佢上playgroup時經常收到這類電話),但好彩沒有。後來我直接向班主任查詢囝囝的學習情況,她表示囝囝很乖,又聽指示,能與其他們同學融洽相處,只是語言表達不太流利。後來因某些原因我需向學校透露囝囝的自閉問題,她們也感到有些驚訝,不太相信囝囝會有自閉問題。自返咗N班後,雖然囝囝個人係攰D(每晚九時便睡覺),但社交及語言發展明顯進步好多(讀K1後進步更多)。由上年9月開始,佢已沒有返S位,改上全日制主流K1班,至今仍未有收到學校的投訴電話,見到佢已能適應啦!
回顧喺年半入面,我覺得囝囝得以改善,原因有:
1. 囝囝的病情可能不是醫生描述那麼嚴重
2. 隨著年歲增長,囝囝的身心發展得到自然改善(2-3歲間)
3. 私立密集式S位的幫助:囝囝經由一群專業的幼兒導師、語言治療師、職業治療師及心理學家的訓練,我認為是最重要的因素
4. 我倆公婆每天與囝囝寓遊戲於學習(每天至少1.5小時,假日則全天候)
所以,只要肯不斷嘗試,囝囝或多或少一定有進步既!努力呀! 補充:如果小朋友既社交、語言及智力都算過得去既話,我高度建議俾佢返主流幼稚園,因為嗰度既環境係可以幫助小朋友較全面既發展。 |