想請教如何令小孩有上進心?

greentea000

Ahbee02 發表於 17-3-2 12:57
我會覺得你媽媽的專制同高期望導致到你的反叛，更甚者，你會好自然甘爲反對而反對，反對你媽媽成為一種習慣。
題外話，甘你依家同媽媽關係好轉了嗎？
你的成長歷程好發人深省，亦令我反省自己教仔女時唔好chur得甘盡，搞到d細路由反感變成反抗，兩敗俱傷，就更加得不償失。

我一直認為我對阿媽既反抗老豆多少有教唆。

係小六升中一既暑假有傾過，老豆無承認亦無否認，係當時佢少數無直接俾答案我既問題。可能擔心我有老豆做靠山會有恃無恐，又驚我孤立無援會太壓抑。

中三又再有傾，係我俾學徒申請表佢簽既時候。想走係真，想知老豆係咪撐我都係真。老豆話我成績OK無需要做學徒，我話學徒有津貼又有一技之長可以早Ｄ自立。老豆問我係咪唔夠自由或者補習費抵銷唔到我既消費(阿媽各種唔聽話就扣零用錢)，提醒左我其實阿媽已經管唔到我，我又自由又有錢。老豆提出俾學徒津貼我換取我讀完中五，但係要我每月做定期，唔可以動用果筆錢。

中五俾阿媽發現拍拖，阿媽情緒失控，又玩跟蹤，令我又想走。走去拎左HP表格，唔想讀AL。呢次老豆無阻止我，俾我自己決定。老豆話中五完已經有資格決定自己既前途，佢私心只係想拖到我中五。老豆高小介入係唔想我一味順從，親如阿媽都唔得；中學俾好多自由係呢個階段太重要，好多價值觀係呢個階段形成，我需要有獨立既人格同思想，而阿媽果套太多限制，阻礙好多體驗，不利將來既競爭。

至於我同阿媽，只係小五小六鬥爭激烈少少，中學我太忙基本上冷落左阿媽，無興趣無需要對抗阿媽。錄音事件同拍門事件令老豆嚇一跳，話我出手太狠招招辣，阿媽根本招架唔到；又叫阿媽咪逼女太甚，個女一出手就KO左個阿媽，又話阿媽睇個電視聽個演唱會星期日訓個覺都俾個女串到出唔到聲，趁早收手否則會輸得好肉酸。

我已經太明白阿媽對我係永不放手，一般父母最遲去到大學會撒手，阿媽依然好堅持！大一我因為唔夠18歲無得參加工場實習，有份通知俾父母簽推遲到18歲再實習，阿媽竟然乘機叫我轉系！學業、職業已經過去，下一個角力會係婚姻，甚至仔女教育問題，沒完沒了。依家我既策略係少見面少接觸，每次相處爭取成為優質相處時間，呢個係小女王同老公主既相處之道。

little_yolky

greentea000 發表於 17-3-2 23:53
我一直認為我對阿媽既反抗老豆多少有教唆。

係小六升中一既暑假有傾過，老豆無承認亦無否認，係 ...

好彩我對阿女要求門檻相對都算低, 俾佢自由度相對亦算高啫

Jane1983

我對我女要求好高，但尊重、支持、愛護和自由度都好高，基本上好少大鬧。就算有嘢做得唔好，都係我地一齊想辦法點樣做好d。我希望係佢心目中，永遠都係我和她 vs 全世界，唔係我同佢處於對立。

Ahbee02

MNIF 發表於 17-3-2 23:26
其實又不需氣餒嘅。我不知道你女兒有多大，一般來說小孩子在七歲以前屬於稱之為直覺式思考階段的狀態。從七 ...

多謝回覆。
小女10嵗啦。佢有閱讀興趣的，平時看吾少書。照計抽象思維能力，思考能力應該都有提升。但事實就系數感弱，題目有些少轉彎就呆曬，吾知從何入手。我有時實在理解吾到佢點解唸吾出。有一次實在頂吾順，大鬧佢一餐。鬧完後自己也吾好受。所以依家我要自己接受唸佢能力就系甘，仲系要慢慢教，慢慢啓發佢。

Ahbee02

greentea000 發表於 17-3-2 23:53
我一直認為我對阿媽既反抗老豆多少有教唆。

係小六升中一既暑假有傾過，老豆無承認亦無否認，係 ...

你老豆真系一個智者。比個超級like佢。

little_yolky

MNIF 發表於 17-3-2 23:26
其實又不需氣餒嘅。我不知道你女兒有多大，一般來說小孩子在七歲以前屬於稱之為直覺式思考階段的狀態。從七 ...

如果按你既講法, 點解小一二數學要做文字題? 齋學計數咪得囉！

同埋, 點解要做閱讀理解? 我堅記得自己初小時係無做過中英文閱讀理解的。數學文字題都肯定無咁tricky。我又唔覺自己D中文同數有幾差喎, 英文都係因為中學之後跑輸大市, 唔關小學基礎事。

serinac

Ahbee02 發表於 17-3-3 10:19
多謝回覆。
小女10嵗啦。佢有閱讀興趣的，平時看吾少書。照計抽象思維能力，思考能力應該都有提升。但事實 ...

有時候我覺得數感係天生的，就好似近排同阿仔（今年K3) 係餐廳食lunch, 突然試問佢一碟飯$48和一碗麵$35總共幾錢（只教過20內的加減），佢竟然計到$83。當時自己覺得好驚訝，問佢點計出嚟，原來佢係先計算40+30=70；8+5=13；跟著70+13=83。

但家姐當年一年班下學，就經常連直式加數進位都成日搞亂。好明顯兩姐弟的數感天生就不同。

既然小朋友係文科料子，數學咪唯有唔好太高期望，俾多啲耐性去教吧！

retriever

Jane1983 發表於 15-11-2 15:06
其實上進心呢樣野，係天生定係後天催谷的呢？

又天生？

可能遲D 醫學界又出個名目，ABBA。。

retriever

serinac 發表於 17-3-3 13:00
有時候我覺得數感係天生的，就好似近排同阿仔（今年K3) 係餐廳食lunch, 突然試問佢一碟飯$48和一碗麵$35總 ...

根本同學左幾多數以內加減，甚至幾多位加減無關，先明白數量概念，唔係咩進位借位直式橫式，幾多位都係咁計。

ABC-DAD

細個每逢新年拆利是，數感特別強。

retriever

ABC-DAD 發表於 17-3-4 02:57
細個每逢新年拆利是，數感特別強。

細個時睇檔，客人食左五蚊鷄，俾一百蚊你找。

唔會話20蚊以內先識計，更加唔會腦海內出現直式橫式進位借位或者對錯位。 所以學數時數量概念好重要。

唔少媽媽著眼幾多位，根本係捉錯用神。

homeuser

little_yolky 發表於 17-3-1 15:59
唔好話三十歲, 我老公四張幾野都係咁, 佢既宗旨就係比上不足比下有餘就得, 千祈唔好做最叻果個, 因為一開始 ...

我其實對佢要求真係唔算太高，佢如果可以在8點15分前完成功課， 就可以去公園玩，完成唔到就留在家，但唔會叫佢做練習， 練習係考試温書既工具，中文只做閱讀理解， 英文做返學校工作紙， 係我讀出來，佢講答案，寫都唔駛寫， 因為佢喜歡睇書， 所以咁樣温 中英都已可以有90，唯有 係數要多做， 所以90分既要求， 係唔需要很辛苦就可達到， 所以我話係基本，佢自己都話讀書唔辛苦， 佢如果有上進心，一定係可以達到95，佢係睇到唔識就留空， 講過無數次，諗d答案， 咩都好， 唔好留空，佢都係話諗唔到
至於為甚麼我只求分數， 唔求名次， 因為如果可以一直做到我個要求，到高年班時， 名次自然會前， 我唔係要佢名列前茅， 我係要佢穩定， 我唔係諗住佢讀神校， 只想可升到一間入大學率高既中學， 我真係覺得自己要求唔高

homeuser

miujoey 發表於 17-3-1 16:11
請接受小朋友的不完美, 不要用大人把尺去量度小朋友, 小小年紀如何能夠每事都明白, 每樣野都能看透 ?
奉勸 ...

我冇追求完美， 我係希望佢對自己多少少要求， 做咩都付出多少少力， 真係唔係要求高， 係唔知點引起佢既內在動機去努力， 佢依家既表現係完全冇體現到努力

homeuser

Jane1983 發表於 17-3-3 09:54
我對我女要求好高，但尊重、支持、愛護和自由度都好高，基本上好少大鬧。就算有嘢做得唔好，都係我地一齊想 ...

我就係要求唔係算高， 但尊重，支持，愛護同自由度都唔高， 我估我知道個方向，但有時拿揑得唔準， 差之毫厘就謬之千里

homeuser

回覆 greentea000 的帖子

你個情況真係好可悲， 骨肉相連的母女，竟然 互相煎熬到咁，大家都唔開心， 我相信我女對我唔係咁， 佢好惜我， 好嗲我， 但就唔係好聽我支笛，所以我經常反省， 應該點做好d, 尤其是要係反叛期來臨前早作準備

homeuser

MrBeast 發表於 17-3-2 11:45
太大壓力除時上進心變上吊心，去片

https://youtu.be/X8U4FYMnHro

呢個節目好感人， 之前播嗰時睇， 同今次再睇， 我都忍唔住淚流滿面， 尤其當個女仔講， 凌生凌太，你地鬧左我10幾年嗰種歇斯底里

homeuser

IloveJJ 發表於 17-3-2 12:56
樓主有無睇過呢條片?
https://m.youtube.com/watch?v=jSHjvMnMpo0
好好笑，又值得反省（不代表我認同架）。 ...

冇啊，睇完你推介先睇， 嗰扮乖細路好得人驚， 希望真實中冇呢d人

wan_sosin

homeuser 發表於 17-3-5 01:17
冇啊，睇完你推介先睇， 嗰扮乖細路好得人驚， 希望真實中冇呢d人

現實係有在父母老師面前扮乖嘅小朋友，呀媽話做練習就去做，話練琴就去練，知道唔聽唔等於唔洗做，聽聽話話隨時呀媽帶佢食餐好。但轉個身會對其他無關係嘅人作惡做壞事，似乎係想將情緒發洩在其他人身上。
我見過，我親眼見過咁樣嘅小朋友，好可怕。