各位特殊障礙小朋友既媽咪,開學順利嘛?

siukei17

我小朋友返主流學校,剛剛十月尾比人掉左落去下午班..
因為佢唔坐定定又唔聽指令.....下午班人手多d...
但佢返左下午班之後開心好多,佢依家仲肯跟下我地逐粒音講...班主任真係好有心機教佢...
但校長就表現到唔多想留佢咁...同我講觀察下..如果佢最後都係跟唔到規則既...就要搵其他專業人士教佢...(即要我離校?!)
講真,我覺得阿仔依家單對單已經係vg..係群體時唔得....但群體既規則係真係要佢面對群體多,成為群體既一份子先會有學習既機會.....
而阿仔學校學既野佢基本上都帶到返黎比我,
好似我教左大半年眼耳口鼻,佢都指唔到比我睇...
但學校教完佢,佢即刻識晒.......
向屋企佢之前唔肯學發音...但佢依家睇學校既vcd,佢又肯跟住vcd讀(當然唔正啦...)
佢依家仲肯望我地個咀學講野
我真係唔想因為規則既問題而轉校....
如果係規則問題..去到邊間學校都一樣.....
反而阿仔返左一年e位都無咩進展...向9月開學到依家已經行左一大步....我知道當中老師一定花左唔小心機耐性....

有無家長可以介紹心理e生比我仔仔見下...睇下佢社交同常規服從方面係咪有其他問題出現?評估中心要去到5歲先再見啦........

~仔仔媽咪~

原帖由 siukei17 於 09-11-4 14:17 發表
我小朋友返主流學校,剛剛十月尾比人掉左落去下午班..
因為佢唔坐定定又唔聽指令.....下午班人手多d...
但佢返左下午班之後開心好多,佢依家仲肯跟下我地逐粒音講...班主任真係好有心機教佢...
但校長就表現到唔多想留 ...

查實依家您小朋友有無政府醫生跟進緊?如果有,你試下再打電話去同醫生/社工講,睇下可唔可以再見一見你小朋友,睇下有無咩支援可以幫到手,例如轉校/行為治療等.

如果無既話都試下打去政府兒童智力測驗中心問下姑娘,睇下可唔可以排期做評估,睇小朋友係咪過度活躍等問題,如果唔得既話,可以搵出面私家睇.

個人而言,我覺得最好唔好用VCD黎教小朋友學野,初時可能效果幾好,但之後小朋友習慣睇電視,會好影响佢專注力架!所以都最好避免養成睇VCD既習慣.

佢說話上有無delay?同埋之前有無做過評估話佢係有邊方面既問題?佢响學校唔守規矩,主要係D乜?有無成日打人?

BB頭maimimi

講開打人,囝囝平日係學校常規都ok,近排老師話佢係學校唔知點解成日蝦一個女同學,又打人又成日推人,試過整損人哋,講極都唔聽,都唔知點算,因為佢言語遲緩,問佢點解,佢都答唔到,但我之前問過佢,學校有咩朋友,因為佢講野唔叻,佢連坐係旁邊的同學都講唔到,但又講得出呢個女仔個名,如果人哋家長投訴真係書都無得讀,各位媽咪,可以教下我點做嗎?

[ 本帖最後由 BB頭maimimi 於 09-11-5 10:30 編輯 ]

siukei17

其實阿仔語言遲好多...佢係依家3歲半,1月就4歲..先黎學發音....但佢之前都好多野講..係剩係講bb話....
3月時去左評估中心,e生其實話佢要去s位,就係因為佢常規同語言既關係...但咁啱個段時間e位又搵社署既心理e生見我,因為我打仔..= =心理e生又話佢睇過晒阿仔既file,又觀察左阿仔,佢又覺得未必一定要入s位...常規係主流學校都可以學到....所以最後我無要s位....
阿仔既常規問題唔係打人,佢唔會傷害人..只係唔肯遵守規則,唔合群..有時又會訓地下...老師話一要佢跟rules黎做就會唔高興....成日都要老師哄佢先肯做下...又唔會坐定..係要搵d野黎玩..手指都玩一餐.....

琴晚老師打左電話黎同我傾,(因為我老公下午打過電話比佢,都好重語氣....)老師話我可以拎埋e位既功課比佢,等佢可以向學校又同佢做下...而我又要收緊佢向屋企既規矩...
依家我唔理啦..既然班主任真係好有心去教(我老公琴日話到佢好委屈..其實都唔關班主任事....).我就聽老師講,配合老師...校長個方面我交比老公應付....喱d咁官腔既野我真係唔識應付.......

原帖由 ~仔仔媽咪~ 於 09-11-4 23:50 發表


查實依家您小朋友有無政府醫生跟進緊?如果有,你試下再打電話去同醫生/社工講,睇下可唔可以再見一見你小朋友,睇下有無咩支援可以幫到手,例如轉校/行為治療等.

如果無既話都試下打去政府兒童智力測驗中心問下姑娘, ...

siukei17

我阿仔之前初初返n班都有比人投訴過推人,推趺人地張登....
我個排都好大個問號....我叫老師再觀察下...向屋企又成日同阿仔講唔可以推人....
到最後老師發現阿仔唔係真係打人...而只係貪玩...佢覺得得意......有時又係引人注意.....
之後我叫老師如果佢再推人既,就作狀打佢手仔一下,放佢埋一邊唔好理佢一陣,等佢知道自己錯..之後就再無喱個問題
你小朋友係咪想同個女同學玩咋?

原帖由 BB頭maimimi 於 09-11-5 10:08 發表
講開打人,囝囝平日係學校常規都ok,近排老師話佢係學校唔知點解成日蝦一個女同學,又打人又成日推人,試過整損人哋,講極都唔聽,都唔知點算,因為佢言語遲緩,問佢點解,佢都答唔到,但我之前問過佢,學校有咩朋友,因為佢講野 ...

~仔仔媽咪~

原帖由 siukei17 於 09-11-5 18:12 發表
其實阿仔語言遲好多...佢係依家3歲半,1月就4歲..先黎學發音....但佢之前都好多野講..係剩係講bb話....
3月時去左評估中心,e生其實話佢要去s位,就係因為佢常規同語言既關係...但咁啱個段時間e位又搵社署既心理e生見我 ...

係啦,只要你同學校老師可以互相配合到,校長嗰邊暫時唔好理住,就交由你老公去同校長溝通下啦,不過都係嗰句,唔好同學校有任何衝突,唔啱頂多轉校,始終嘈完唔等於校長會即時對番囝囝好.

試下多D留意下出面有咩訓練同課程可以適合你同囝囝上,一黎囝囝做下訓練去改善問題,二黎自己跟多D唔同既治療師同專業人士交流下傾多D,自己都少D鑽牛角尖架!講真我依家既經驗有好多都係源於治療師,响佢地身上真係會學到好多野.

~仔仔媽咪~

原帖由 siukei17 於 09-11-5 18:17 發表
我阿仔之前初初返n班都有比人投訴過推人,推趺人地張登....
我個排都好大個問號....我叫老師再觀察下...向屋企又成日同阿仔講唔可以推人....
到最後老師發現阿仔唔係真係打人...而只係貪玩...佢覺得得意......有時又 ...

我呢十年都係煩呢個問題,所以真係好難俾到咩意見,我仔都係今年小四開學後呢兩個月無再打人咋...可能又加重咗葯既份量,二黎又真係好似老師所言,我仔又真係大個仔咗啦...

不過可以分享就係,查實我地呢班仔係好容易感到不安架!早排我仔講番,我至知佢好多時都係因為之前遇到某些事感到好不安,之後嗰日就會出事(打人)~!同埋佢都有講,有好多時佢唔明點解學校同學成日話佢發脾氣,但佢自己又唔覺架噃,呢樣又好值得我地去深思同研究囉.始終我地唔明白佢地諗乜,同樣地佢地都一樣唔知人地諗乜,佢地都有佢地既難處...所以呢樣我地都要處理好.

~仔仔媽咪~

原帖由 pipi331 於 09-11-6 00:03 發表
我仔2歲, 講嘢慢, 少望人, 模仿差; 啱啱系 c+評估到 可能系自閉, 等緊 太公評估果面醫生診斷.
佢呢個星期開始返普通 幼兒學校n1, 我己經逐d 同老師/主任講 仔仔的問題.  我只希望佢地多d包容, 唔好見我個仔學得慢就 ...

放心啦,依家查實真係有好多我地呢類小朋友架,所以學校都會包容多D,而且講真如果囝囝唔打人唔影响到人,查實人地真係唔會點查覺到小朋友係有問題囉.

依家趁囝囝仲細,您要把握機會俾佢做治療同訓練,等佢响呢段黃金時間可以追得番囉!你可以做住私家嗰邊治療先,到政府嗰度評估做埋,你同時都排埋政府嗰邊既訓練,相信囝囝會進步得更快.

BB頭maimimi

好似今日咁我見到囝囝又專登行埋呢個女同學排隊,又攞本手冊比佢睇,同佢講野,睇黎想同佢做朋友,但囝囝講野水皮,可能講黎講去都係嗰啲,女同學自然唔理佢,佢又"痴'埋去,囝囝又冇咩社交技巧,可能推下拉下引起損傷,因此比人以為佢蝦人,囝囝真係唔識得同人玩,我見過佢想同小朋友玩,佢只係識得係後面推人,都唔識得睇下點樣一齊玩,真頭痛!今日見到校長,佢話囝囝小息見到佢會走埋去攬住佢,要囝囝改善下,因為咁樣好容易整到其他小朋友!

原帖由 ~仔仔媽咪~ 於 09-11-5 21:45 發表


我呢十年都係煩呢個問題,所以真係好難俾到咩意見,我仔都係今年小四開學後呢兩個月無再打人咋...可能又加重咗葯既份量,二黎又真係好似老師所言,我仔又真係大個仔咗啦...

不過可以分享就係,查實我地呢班仔係好容易 ...

siukei17

其實我估阿仔返左k1之後,其實佢有個心理障礙...因為佢之前唔怕人,係人都痴..
但依家反而一見到唔識既人就離埋向我後面,望住地下..人地同佢講野就扮聽唔到...
我老公話可能因為之前返n班,d同學仔講野都係唔叻..但依家返到k1,個個同學都識講野,所以佢感覺好似比飲比下去..同人唔同...
佢都鍾意同人玩,但因為唔識講野,佢多數都係望人地...
但佢又有同學仔fd架wor...佢返學放學有個同學仔成日叫佢個名..佢又望下人笑下...好搞笑....

不過點樣先可以令佢明白老師唔係剩係對住佢一個...依家老師既注意力一唔向佢度,佢就會唔專心...唉....

原帖由 ~仔仔媽咪~ 於 09-11-5 21:45 發表


我呢十年都係煩呢個問題,所以真係好難俾到咩意見,我仔都係今年小四開學後呢兩個月無再打人咋...可能又加重咗葯既份量,二黎又真係好似老師所言,我仔又真係大個仔咗啦...

不過可以分享就係,查實我地呢班仔係好容易 ...

~仔仔媽咪~

原帖由 BB頭maimimi 於 09-11-6 11:58 發表
好似今日咁我見到囝囝又專登行埋呢個女同學排隊,又攞本手冊比佢睇,同佢講野,睇黎想同佢做朋友,但囝囝講野水皮,可能講黎講去都係嗰啲,女同學自然唔理佢,佢又"痴'埋去,囝囝又冇咩社交技巧,可能推下拉下引起損傷,因此比 ...

查實我仔都係咁架!講野太過BB又水皮(表達能力麻麻),我仔班同學都係唔多鐘意理佢架!跟住佢又會覺得人地對佢唔好,又會發脾氣.

始終我地呢班友仔都唔太識得先睇人眉頭眼額,下下都係亂衝就當係得咁,所以要成日同佢地講,响做任何事或叫人同佢玩前,先停一停諗一諗,睇下人地得唔得閒理佢先,人地拒絕咗就唔好再迫人同佢玩,'介紹'佢去玩其他,例如去圖書館睇書或者搵番自己相熟既老友記去玩...我次次都係咁同個仔洗腦咋...==

~仔仔媽咪~

原帖由 siukei17 於 09-11-7 18:57 發表
其實我估阿仔返左k1之後,其實佢有個心理障礙...因為佢之前唔怕人,係人都痴..
但依家反而一見到唔識既人就離埋向我後面,望住地下..人地同佢講野就扮聽唔到...
我老公話可能因為之前返n班,d同學仔講野都係唔叻..但依家 ...

慢慢黎啦,佢依家都仲細,始終專注力都要時間去訓練既...你可以同佢傾多D偈,借D2又同佢講番老師原來都好辛苦,一個要照顧咁多位小朋友,所以佢要多D鍚住老師,唔好俾老師咁辛苦,要乖乖地專心上堂囉~~~當然講之餘可以再講多少少道理俾佢知,等佢明白D.

~仔仔媽咪~

呢期我仔又衰第二樣喇~!!!

雖則佢開學到依家都無再打人,但係佢又是蝦老師同老師玩唔合作呢~~~~

噚日放學我仔中文老師見到我,就同我傾開偈黎,佢話我仔上堂唔肯寫字,又發脾氣,連預默都唔肯寫字去默,仲要鬧老師.........我聽完我已經頭頂出煙~~~

同埋我仔個老友原來開學到依家都開始情緒唔穩定,成日發脾氣同打人...D老師個個都好擔心個老友會影响埋我仔囉...噚日老師又話我仔上堂時一聽到佢老友响位上尖叫大嗌,我仔即刻好HIGH咁嗌埋一份...........認真頭痕!!!

~仔仔媽咪~

原帖由 pipi331 於 09-11-9 01:16 發表


我個仔暫時未識搗亂, 傷人; 但成日魂游, 聽唔明指令 => 難教, 學唔到嘢lor.

私家評估包埋轉介去正苦輪服務, 我亦有系c+做訓練 => 都幾金. 希望承您貴言 亞仔會有進步la. 唉! 擔心佢返唔到普通學校 要去S位咋. ...

放心啦,只要媽媽俾心機幫囝囝去做訓練去學習,實追得上架!嗰時我有個朋友既囝囝被評為自閉傾向,正苦嗰邊都係話佢囝囝要讀S位,嗰刻我朋友都好傷心,但之後我朋友好俾心機俾囝囝去做訓練,依家再評,正苦已經話佢囝囝唔駛排S位,可以照讀主流學校,佢囝囝真係進步好快架.所以您都要加油呀~

私家嗰邊真係好金囉!想當年我仔去私家度做,每個月萬三蚊咁嘔出黎...捱咗一年,我外家都投降,唔再俾錢,最後都要靠我自己教仔咋.

siukei17

我個仔係要返左學,先可以做到訓練....
佢之前上e位小組要5花大綁...更加唔駛講向屋企做training.....
所以如果小朋友既情況唔係傷害人既,我覺得2歲就好比佢返n班,真係差好遠....
我3月評要s位,我4月先比佢返n班,4月第2個星期上小組佢已經唔駛5花大綁,但要不停提佢返埋位....群體生活既學習可能對某d小朋友影響好大~~

原帖由 ~仔仔媽咪~ 於 09-11-9 09:51 發表


放心啦,只要媽媽俾心機幫囝囝去做訓練去學習,實追得上架!嗰時我有個朋友既囝囝被評為自閉傾向,正苦嗰邊都係話佢囝囝要讀S位,嗰刻我朋友都好傷心,但之後我朋友好俾心機俾囝囝去做訓練,依家再評,正苦已經話佢囝囝唔 ...

~仔仔媽咪~

原帖由 siukei17 於 09-11-9 14:07 發表
我個仔係要返左學,先可以做到訓練....
佢之前上e位小組要5花大綁...更加唔駛講向屋企做training.....
所以如果小朋友既情況唔係傷害人既,我覺得2歲就好比佢返n班,真係差好遠....
我3月評要s位,我4月先比佢返n班,4月 ...

都係架!群體生活對小朋友真係好大影响,嗰時我仔雖則都係打人同唔識表達,但至少佢番咗學半年後,佢講野都有明顯進步,至少都講到少少,而唔係一隻字都唔願去學去講啦.所以訓練係要有,但都需要屋企同學校多方面配合既~~~

~仔仔媽咪~

原帖由 pipi331 於 09-11-10 00:21 發表


請問您果時萬幾蚊系 做d mud, 一個星期做幾多堂?

嗰時我仔係响一家言語治療診所度做訓練,除咗做言語訓練外,仲有思維訓練、感覺統合訓練,同埋後期治療師都有訓練我仔响學術上既野架.

嗰時我係join咗個plan係密集式訓練黎,一個星期八堂,每堂四十五分鐘,每星期上四日(即每日兩堂).share番係平過一星期一兩堂咁上既.