有關和小兒在學習和打機及電子媒體使用上的時間爭議

MrBeast

人生哪怕吹乒乓 許素虹（2007年報導）
走進許素虹開設的乒乓球訓練中心，滿地都是橙色的乒乓球在滾動，只見幾個小學生在練習正手抽擊，來來回回數十板也不會落網或出界；不時又有年過四十的西裝友，走進更衣室換上球衣，然後對住自動發球機苦練削波。

　　「隻眼唔好周圍望，專心，又唔記得扭條腰啦！」對住心散的小朋友，許素虹經常嗌到聲沙。

　　提板征戰，曾連奪七屆香港乒乓球女單冠軍，從來無大傷患，反而三十歲退出乒壇，開學校做教練輾轉十多年，由朝教到黑，卻傷了聲帶，要開刀切除息肉。

　　「睇住小朋友，由初初打滴滴仔，到埋學界冠軍，我就開心。

　　「我希望可以磨練到佢鬥志，好多小朋友太幸福，未經歷過辛苦。乒乓波球速好快，幾秒之間就要面對成功同失敗，又會學到點睇人（對手）面色，估人心理。」

　　難怪富豪闊太都愛把子女送上門，交由她訓練鬥心，許世勳、廖創興、李國寶等家族成員都是她的客仔，連朱玲玲大公子霍啟剛都自小跟她學乒乓球。

　　「佢細個肥嘟嘟，好得意口架！我中華遊樂會教佢打波，佢媽咪（朱玲玲）冇乜點出現，不過次次都會有四個工人跟住，企四個角落，負責幫佢執波；學一段時間，佢就無再學。」

　　反而立法會主席范徐麗泰的兒子，從小學五年級已開始跟許素虹學打波，學了兩三年便奪得校內乒乓球比賽冠軍，令范太十分高興，索性自己也報名打埋一份，藉此鍛煉體能。

　　「佢好低調唔想公開，我只可以講佢係一個好聽話學生，我叫佢跳，佢就跟住跳，反應好快。平時佢個仔練波，佢次次都會坐側邊陪住，等個仔落堂。」

　　馬浚偉清場練波

　　許素虹說，有時是看電視或報紙，會發現學生的爸爸媽媽上鏡，才知他們是乜乜富豪物物家族，但無論是名人或街坊客仔，她都劃一收費，每小時私人教授都收約四百，過去十多年來從未加價，即使是前特首夫人董趙洪娉也一視同仁。

　　「早幾年董建華老婆個秘書打畀我，話『董太想學打乒乓波，你有無興趣教佢？』佢要我去佢度上門教波，但佢又無乒乓波檯，咁我就建議不如去我個中心度打啦，董太派個秘書睇過，可能覺得地點唔多方便，之後傾傾就無下文。」

　　今年四月，藝人馬浚偉拍攝TVB8的星級音樂王特輯，跟乒乓孖寶高禮澤和李靜對打時，他自爆乒乓球啟蒙老師正是許素虹。

　　「佢前年開始跟我學，正手推擋反手削波都好全面，佢一個禮拜學兩次，每次打兩個鐘，我主力教佢抽波，佢好快上手。」

　　有無明星架子？「無！佢打得差時又唔會發脾氣，只係『唏！唏！』咁樣激勵自己。佢學波就鍾意清場打，唔想畀人望住，我就同佢經理人講，邊段時間會冇乜學生，就叫佢就時間學啦！」

　　訪問這天，記者遇上息影女星兼前港姐崔嘉寶，帶兒子前來學波，許素虹笑臉上前招呼，沒有特別的阿諛。

　　「我淨係知以前電視見過佢，但叫咩名又唔係好記得。」她說自己性格雖然爽直，但不愛應酬打關係。

　　

　　緣慳國家隊

　　這也難怪，出生於印尼的許素虹，本身便是含金鑰匙而來，父母是印尼華僑，在當地經營布疋和手表批發，白手興家成華人富商。

　　「我十兄弟姊妹都自細鍾意打乒乓波，個年代屋企有張乒乓波，環境算係唔錯。」

　　但好景不常，到她七歲時，印尼開始排華，許父更成為追殺目標，惟有舉家移居大陸；誰知又碰上文化大革命，她一家人輾轉流落到惠州市華僑農場生活，許父由印尼富商一下子變為耕田勞動分子，許素虹更是半日讀書半日耕田，練就今天的刻苦性格。

　　「到我九歲，學校舉辦乒乓球比賽，我就靜靜雞偷家姐塊板去參加，第二名，之後再代表學校參加公開比賽。」

　　兩年後她被挑選加入廣東省隊集訓，四十名隊員中最後會淘汰剩六人做省代表，她苦戰至排第六剛好入選。

　　之後她首次參加全國少年乒乓球賽第八，翌年再戰得第三，更獲當時國家隊教練孫梅英點名大讚：「呢個女仔可以重點培養！」

　　人生猶如乒乓球，這一球抽擊得手，下一球卻往往推落網失分輸波。當許素虹正準備代表中國出征亞洲少年賽，卻遇上偏頭痛困擾，一準備比賽就嘔，日日要打止痛針。

　　「醫生話Ｘ光片顯示我腦裡面有一點但又唔係生瘤，而我血管天生比常人窄，所以唔去得北方寒冷天氣生活，結果眼白白睇住第二個隊員頂我個位去比賽。

　　「後來先至知，教練諗住我一比賽完，就畀我加入國家隊，為呢件事，我喊足幾晚。

　　「呢個頭痛一路困擾住我，我惟有繼續留廣東省打波，淨係一路做廣東第一，我都覺得自己好。」

　　一九七八年，許素虹來到香港發展，即橫掃香港乒壇。「我自細就好想世界第一，但知道自己唔得，退而求其次，希望可以打世界賽，企上頒獎台聽住奏國歌，點知入唔到中國國家隊，條路兜個圈香港，反而仲得到更多。」

　　　天外飛屍

　　南征北討的八十年代，許素虹打乒乓球的月薪，由九百元逐漸至有三千元，但始終不夠餬口，閒來會私人教授乒乓球幫補生活，只是所賺到的錢，全都耗盡在醫治偏頭痛方面。

　　「三十歲之前，我咩錢都用晒睇醫生，之後我就靠拎住五萬蚊去炒樓、炒股，我做人都幾狼，同打波一樣，我想贏就諗住進攻去搏，結果畀我賺到第一桶金（廿幾萬元），我就用筆錢去買層樓，用我間乒乓球訓練中心。

　　「果時好多人都話：『許素虹，你都三十歲啦，波又冇得打，錢又冇晒，都唔知你點樣生存？』我份人就係最鍾意人睇衰我，你愈睇死我，我就愈要做好畀你睇！

　　「我失敗過好多次，會好快彈番起身。我一遇到挫折，就會返屋企檢討自己，係咁諗諗諗，點都要諗計諗通佢，再諗唔掂就會去觀音廟同觀音傾偈，然後搵呂祖先師扶乩問卜。」

　　不由得許素虹不信奉神佛，只因去年她本應命喪於天外飛屍之下。

　　去年年頭她拜訪一名國內高人阿姑，阿姑指她年尾會有一個劫數，叫她三月起戴一粒觀音手的玉墜擋煞。

　　到了八月一日中午十二時許，她在屋企一樓平台如常教學生打波，忽然有一粒石仔從天而降打中其右手手指，令她下意識退後一步，不料再有大片石屎連同天花板跌下，她再向右彈開幾步。

　　一兩秒後，一名從廿一樓天台跳樓自殺的五十歲婦人，壓穿許的屋頂，跌正在她剛才站立的位置，嚇得她魂飛魄散。「好彩觀音保佑，好多人話我本應死啦，我覺得係天意。」

　　四十七歲，經歷的人生起伏，令她深明「做人最緊要開心，我最鍾意去dup骨，一次四粒鐘架，隔兩三日就敷一次面膜，我好貪靚架！」

　　記者說希望她穿裙拍照，她高興地說：「好呀！我真係要去買番條新裙先，嘩！日我都係全日唔食，瘦番先至上鏡！」

　　為了自己開心，她不時會買鑽石首飾送給自己。「每個月我一定會去shopping放鬆自己。年年暑假賺到錢，我又會買鑽石獎勵下自己。自己又鍾意儲，得閒拎出望抹，都唔知幾開心，同埋我五行水多，要買屬火，鑽石咪係火囉！」

　　

　　經歷兩次愛情重傷，許素虹已習慣一個人住，每晚回家，第一件事一定是開電視機：「我好怕靜，又驚悶，冇電視唔得口架！」夜冷風，有時她就在電視聲浪中一睡至天明。

　　「我由廿幾歲到四十歲一直好恨婚紗，我知媽媽好擔心我，好想我快結婚，驚我幾十歲人老冇伴，我同媽咪講：『或者呢個係我命數呢！』」

　　其實，許素虹還有一件心事尚未告訴媽媽，她始終念念牢記十多年前一個街頭相士的預言。「嘻嘻！佢話我○七年會有姻緣喎，唔知真定假呢？」

　　情是永遠迷，四十七歲的思春情懷，夢裡夢外總是詩，誰說不可以？

　　

　　富豪公子明星闊太想學乒乓球，第一個人想起的，一定是許素虹。她是連續七屆香港女單冠軍，代表香港南征北討立下不少戰功，退役後開學校教小朋友打波，高徒統統橫掃學界比賽，不少名校如華仁小學更搵她承包乒乓球校隊執教。

　　明星客仔有休息近一年的梁朝偉，每天都打乒乓球健身，許素虹說他只專注學正手抽擊，其他推擋削波一概不學。「佢目的係想練氣同反應，有冷氣都特登唔開，想焗一身汗keep fit；每次佢斟茶，都會專登拎杯茶埋，好有禮貌叫『教練飲茶』，走又親自送出門口搭車立。」

　　好人好事，她容易記在心上，只因悲天憾事，半輩子已遇上太多。

　　本是富商千金，卻因動亂落難成耕田孩童；本可進入中國國家隊，卻因頭痛頑疾含恨放棄；本以為遇上真命天子喬木可依，卻竟是爛賭鬼敗盡身家。

　　吹脹嗎？「我人生起伏好大，每一場波我都想贏，輸我會彈起身再搏過，要生存就要努力。」像乒乓球，跌在地上，卻彈得更高。

MrBeast

IloveJJ 發表於 19-11-21 22:28
都有架，每次私人教，我哋都book兩張枱/兩個鐘，一邊學，另外一邊同爸爸對打。
...

阿爸連續打兩小時 好累架，不要忘記幫佢dup下骨

Jane1983

回覆 MrBeast 的帖子

係ga。有操和無操，有私教和無私教，係差好遠。
不過講到尾，打波同讀書一樣，要心到。個細路心唔到，剩出錢無用。

MrBeast

IloveJJ 發表於 19-11-22 08:50
你同我傾咁耐，就知我唔係個溫柔既女人啦！佢幫我揼骨就有，我無幫過佢揼
...

之所以提示溫馨

little_yolky

IloveJJ 發表於 19-11-22 08:50
你同我傾咁耐，就知我唔係個溫柔既女人啦！佢幫我揼骨就有，我無幫過佢揼
...

Hey！Give me five

stanleypyk

近日連每週返三天每天4小時的兼職亦不願返，今天詐說不得閒又不返，相信是去年多兼職賺的萬多元，養活自己，天天使用電腦嬉戲，變成宅男這樣子，希望快些讀完這一年，我們退休遠去，他才能因環境轉變有所改變！

MrBeast

Jane1983 發表於 19-11-22 08:25
回覆 MrBeast 的帖子

係ga。有操和無操，有私教和無私教，係差好遠。

我從另一角度反思，除非是奇材，otherwise 係唔補唔得，我係覺得個市唔係好健康，這也是我cut c 中的其中一個原因，始終只是想強身健體, 唔想因為eca而令大家緊張，當佢自己有番鬥心時才再入資

洋蔥頭媽咪

stanleypyk 發表於 19-11-22 19:30
近日連每週返三天每天4小時的兼職亦不願返，今天詐說不得閒又不返，相信是去年多兼職賺的萬多元，養活自己 ...

樓主，你囝囝朋友唔多，又沒其他興趣/運動，亦沒有理想和目標，除了返學同返工外，唔打機唔上網你認為佢仲有咩可以做？跟人出去玩政治？定拍拖溝女攪攪震？

明白做父母嘅擔心和難處，但每個人最終都會選擇自己想行嘅路，有自己生活方式，須然旁人未必認同和接受，但凡事想法太灰亦唔會有好處，何不退一步放開點去睇，嘗試接受佢，保持溝通。船頭到岸自然直，唔好用我地上一代眼光去睇下一代，去要求下一代，咁對大家應該都會舒服啲。

Jane1983

回覆 MrBeast 的帖子

當然啦，學果個唔鍾意或者黑面，一定唔會簁氣。
我聽過朋友講一個case，有個女仔又係打波好叻，屋企仆心仆命為佢，係香港有排名的。點知佢到15、6歲先話其實唔鍾意，係屋企要佢學，自此唔打......嘩，咁既人都有，真係無良心

Jane1983

洋蔥頭媽咪 發表於 19-11-23 09:57
樓主，你囝囝朋友唔多，又沒其他興趣/運動，亦沒有理想和目標，除了返學同返工外，唔打機唔上網你認為佢仲 ...

都係ga。樓主亞仔的case，只要佢畢業後肯努力工作，自力更生，其實打唔打機，食唔食垃圾食物，都係小事。

MrBeast

Jane1983 發表於 19-11-23 10:51
回覆 MrBeast 的帖子

當然啦，學果個唔鍾意或者黑面，一定唔會簁氣。

真的家家有本難念的經，你知我愛吹水，同一位教練吹水，佢個女打得ok, 但比賽輸波會狂哭，之後冇再打比賽，e加兩父女只weekend磋下波，都是成長的一部份。

stanleypyk

Jane1983 發表於 19-11-23 10:56
都係ga。樓主亞仔的case，只要佢畢業後肯努力工作，自力更生，其實打唔打機，食唔食垃圾食物，都係小事。

...

我也是這樣想，只不過我太太有點放不下是因為阿仔打機之餘，都間中和她講下佢兼職的情況，如果我和她退休回國内，得他自己一個没人開解。雖然話說如此，父母的角色除了開解外，還有教導，但很多壞習慣講咗都不聽，大家生活方式都不同，為了陪他開解而不退休，但又改不了他的生活習慣，最後也是選擇退休待他自力更新！

Jane1983

回覆 MrBeast 的帖子

而家世界唔同咗，有d小朋友好自我中心，唔感恩至亂黎程度。識朋友個女當年唔肯練琴，同亞媽為此嘈到反臉，佢亞媽後來屈服由佢放棄。個女仔大個見到同學圍埋即興合湊，竟然好意思怨亞媽無逼佢。

Jane1983

回覆 stanleypyk 的帖子

你地退咗休移居大陸，都可以同佢打電話傾計，或者返來探佢。唔好諗得咁灰，可能佢自力更生過，更知道父母恩呢！一路養住佢，由得佢整日打機就一定係死局，轉變吓可能佢會開竅。

MrBeast

Jane1983 發表於 19-11-23 15:18
回覆 MrBeast 的帖子

而家世界唔同咗，有d小朋友好自我中心，唔感恩至亂黎程度。識朋友個女當年唔肯練琴， ...

所以呢，橫又死掂又死，何必自尋煩惱。剛睇左lion king ，hakuna matata，（因為我e加成日掛在口邊，我小朋友話好後悔比我睇套戲）
joking aside, 聽完教練的故事，有d野真的努力過就算了，勉強未必有幸福

Jane1983

回覆 MrBeast 的帖子

係呀！無得勉強。
唔鍾意 A項目，用同樣時間、同樣學費去學 B項目，一樣可以有成績。

stanleypyk

Jane1983 發表於 19-11-23 15:23
回覆 stanleypyk 的帖子

你地退咗休移居大陸，都可以同佢打電話傾計，或者返來探佢。唔好諗得咁灰，可能佢 ...

我想法相同，謝！

MrBeast

回覆 stanleypyk 的帖子

https://sme.hket.com/article/2479235/%E8%90%AC%E8%83%BD%20SIM%20%E5%8D%A1%E6%96%B0%E7%8E%A9%E6%B3%95%EF%BC%81%E6%AD%A1%E6%A8%82%E9%80%9A%E5%AE%B5%E7%84%A1%E9%99%90%E4%B8%8A%E7%B6%B2%EF%BC%81?fbclid=IwAR2BTOVG9fwtVRh1UPLwE8qr0SBxlRfxmlB7u-JuVOKf0607mMqfM6l0SZI
wifi 時段如意可能打不響了 （若可share)

stanleypyk

剛與阿仔閒談, 這個學期變成網上學習, 經常閒在家, 本來每週三個半天的地產兼職好像返得越來越少, 阿仔話間舖無乜嘢做, 基本返一至兩個半天已可做晒一週的工作, 唔想間舖支出咁多, 所以主動返少了。睇怕這學期他開始想做宅男留在家, 日用十多小時電子產品, 好在還有大半年便畢業, 這情況不會太長久。