想請教資優父母~

kittylo129

阿仔今年7歲,5歲因太好動,做過一次兒童測試(於下葵涌兒童智力評估中心),當時只話阿仔係活躍,沒有過度活躍症),升上小一後,老師們都覺得阿仔有過度活躍症的特性,上堂坐唔定,又攪攪陣,所以今年暑假特別去協康做左一次評估(有埋IQ test),阿仔只係中上 ,IQ 111, 並不是資優生,但今次評出黍,都係冇過度活躍症同專注力不足,亦冇亞氏保加,但學校好似都係唔係好接受我的報告,(因協康的報告係教育心理學家做的),覺得我需要再搵精神科E生CHECK多次~

其實我真係唔知點教呢個仔,雖然阿仔唔係資優生,但我覺得佢有好多特性似資優兒,所以想請教各位資優父母,我想了解多D資優小朋友的性格同管教~

其實點CHECK都好,有左個咩名稱都好,我只係想幫到我個仔~  (以下係我個仔既小小資料)
1)坐唔定,上堂唔專心,成日攪攪陣,沖動
2)社交差,學校老師覺得佢冇乜太多群體活動,但勁貪玩,其實好有人緣,只係唔識點同人相處
3)運動超班
4)數理強(老師曾話過佢係全班數學最好的,但考試成績唔係),雖說佢係小二,但佢鍾意計難度高 的數,如小五學的面積,體積佢勁鍾意,勁愛科學
5)最鍾意睇書,日日點解點解,勁愛玩,(已經收埋佢D玩具,但都可以自己攪好多打黍玩!)
6)成日要吸引人注意,要晒你100%專注佢,包括過課外活動老師,冇辦法參加小組活動,好多行為問題(如改為單對單教學,就學得好快)
7)好有自己主見(唔係好肯聽人),成日話點解一定要咁,唔可以咁咁咁,如果佢O既做法冇錯,我會俾佢用佢O既方法~

我聽學校社工話資優生仲難教,想請問你地點處理~

lillymarie

kittylo129 發表於 12-12-25 17:00
阿仔今年7歲,5歲因太好動,做過一次兒童測試(於下葵涌兒童智力評估中心),當時只話阿仔係活躍,沒有過度活躍症 ...

首先協康的心理學家有甚麼建議？就算你囝囝無ADHD，行為問題確實存在，心理學家給你甚麼方法去處理呢？
其實學校照道理可以轉介你囝囝去見政府的教育心理學家？既然校方要求，不妨去見見精神科醫生，讓醫生看看教育心理學家的詳細報告，聽聽醫生的意見。

請收PM。

kittylo129

因為我的評估報告內唔係ADHD or 特殊需要,所以只校內未能提供心理學家的支援,但學校已經好有心,盡量安排心理學家~而且社工老師們都好幫手,只係我個仔真係好難教,想再睇下有冇其他方法可行~

而政府的精神科服務已有信排隊,只係唔知會等幾耐,諗住自己出面搵精神科e生又唔知點搵,有冇精神科e生好介紹

stone0208

我個女都是在協康會做ADHD評估, 結果評出來是資優. 老實說, 如果你個仔IQ是111, 好難先會去到130以上, 教育心理學家話題目越來越難, 而且後面的要做對很多才可以拿到分數.
我個女同班有個男同學很似你個仔, 行為一模一樣, 學校社工在他一年班時(6歲)叫了他去個資優測試, 測出來結果只是normal range (110以內), 不是資優, 但証實他也不是ADHD, 他父母打算等他八歲再測過.  

stone0208

我對住我個女係好激氣o家, 我都不知道有什麼方法教她好些, 唯有等她大個d知道醜

kittylo129

你地資優o吧小朋友,有冇行為上問題呢?例如係d乜呢?脾氣點呢?

stone0208

行為問題不算很多, 只是有點過度活躍，尃注力不足, 個嘴巴停不了, 整天不是投訴這樣就是投訴那樣, 情緒如坐過山車, 大起大落, 經常哭泣投訴, 有她在家, 全家人的情緒都唔穩定

miriam

kittylo129 發表於 12-12-25 17:00
阿仔今年7歲,5歲因太好動,做過一次兒童測試(於下葵涌兒童智力評估中心),當時只話阿仔係活躍,沒有過度活躍症 ...

我囡囡同你小朋友情況好類似, 評估出黎唔係資優, 但就有晒資優兒特質, 亦都評估埋唔係 ADHD.

囡囡係學校都係坐唔定, 永遠係搞事既一個, 答問題永遠唔舉手會嗌出黎, 成日周身郁搞到老師要話佢.  為左呢樣我都好煩, 幾年黎不停提住唔好大嗌出黎, 舉左手老師叫左先好答, 到 P.3 時遇到叫囡囡做評估既班主任, 終於可以係班主任引導下停到唔大嗌, 郁黎郁去都少左.  我曾經問過囡囡點解會咁, 佢話上堂好悶, 凳又唔舒服咪郁黎郁去囉, 其實佢係想引老師注意, 我同班主任溝通後老師會畀多左 eye contact 佢, 等佢知老師係有留意佢, 但唔會乜都叫佢答.

另外係老師會安排好多唔同既小服務要囡囡做, 好似幫低年級執書櫃, 整下壁報板咁.  今年係學校做普通話大使、體育大使、English Buddies、圖書館服務員, 總之安排好多野畀佢做, 等佢可以係唔同既野發揮所長, 整體上易教左.

佢社交都有問題, 因為佢行為年齡畀同級成熟, 最鍾意係同高年級玩, 咁我就畀佢出去玩下兒童課程, 係活動入面學識控制情緒, 今年年尾好榮幸可以升做義工, 對佢黎講好大鼓舞, 亦都更有責任心, 知道自己上唔到堂時主動打電話同社工請假架.

運動佢都係好好, 跆拳道兩個大型公開賽拎到冠軍, 校內體育科主任亦都讚佢好好, 所以佢一早定左目標要考兒童黑帶之餘, 將來考埋教練同裁判牌.  你可以搵樣佢真係鍾意既運動專注訓練架.

數理強就唔係, 但就極愛科學, 數學成績只係一般.  佢完全未讀過奧數但學校揀左佢參加華夏盃, 我唯有畀佢上兩堂私補等佢知奧數係乜, 點知佢未接觸過都做到, 話奧數好好玩, 學校既數好悶, 所以我會繼續畀佢學奧數, 等佢玩下.

睇書, 佢真係睇好多書, 有時間一個星期去兩次圖書館借書, 就算平時係屋企都會不停睇書, 好多書睇完又睇, 咁睇書呢樣我由得佢, 總之唔係意識不良我都會由得佢揀同借, 亦都因為咁佢中文叫做幾好.

引人注意都係架, 引人注意之餘又硬頸, 但佢有一個好處係會知自己係錯, 會極速改正返自己錯誤, 只係把口唔肯認衰, 呢樣跆拳道導師同兒童課程社工都係咁講, 唔衰得既性格係最麻煩, 但大大下改善左好多.

極有主見, 但好多時講我唔掂, 而我會由得佢撞板, 衰完就解釋畀佢知點解, 講下講下衰多幾十次會開始諗下先做囉.

不論係咩類型小朋友都有唔同既問題, 資優亦都會一樣, 因為佢地會吸收到好多唔同知識, 從中發現其他人或處理方法佢地係唔鍾意就會反抗同唔合作, 變左老師一知道係資優兒就會頭痕, 佢地舉一反三時老師未必會即時招架得住, 咪唔鍾意囉.

今年我選擇左有傾有講, 一齊商量去點做, 畀佢選擇點去安排佢自己既時間表, 總之唔影響正常返學考試溫書, 我全部由得佢做, 係呢個情況下佢情緒處理好左, 因為唔再係一面倒由媽咪決定, 亦都因為咁我壓力細左, 同佢真係玩左多個人鬆左好多.

資優唔資優都係自己仔女, 唔好捉住佢比別人突出而希望佢做得更好, 兩個先容易解決問題.

最後就係希望你唔好咁緊張, 你既緊張亦係導致小朋友係學校或興趣班要引人注意既源頭, 你覺得佢有問題佢就會覺得自己好大問題, 就會更想引人注意, 自己唔好執住個堆評估數字, 你會容易處理好多.

Radiomama

你Handle個女的態度好積極啊！多謝分享。

kittylo129

miriam 發表於 12-12-30 00:36
我囡囡同你小朋友情況好類似, 評估出黎唔係資優, 但就有晒資優兒特質, 亦都評估埋唔係 ADHD.

囡囡係學校都 ...

其實我個仔真係同你個女好似,好多時好心急,咩都搶住答,但佢其實已經俾佢P1個陣定左好多,但都佢比其他小朋友相差太多~好彩我間學生O既老師同社工都好幫手,好似你個女咁,俾好多野佢做,做好多唔同類型O既小幫手,係好左少少,佢好容易分心,自制力好弱,向屋企做功課要3-4個鐘~但自己留在學校圖書館自己做後,45分鐘已可做完,所以我又覺得佢唔係專注力不足,出面上數學班都向堂上攪攪陣,後來個老師俾D難D O既練習佢做,佢就坐定左,改善左D,.....我個仔又係勁鍾意睇書,在學校已經日日去圖書館,放假又要我陪佢去圖書館,獎勵都要我買書俾佢,又係好鍾意科學,所以剛幫佢報左科學班,個老師都幾好,除左教佢做,仲會講少少理論,呢D我就真係教唔到佢,只可以發掘佢O既長處,俾佢去發揮~

佢O既社交好明顯弱,出面已經上緊D社交小組班(協康的)都有改善,但仲係差好多

我個仔都係極有主見,有時我地做父母O既,當然會將我地O既經驗教俾佢,但佢有好多野都好有自己一套,成日會話點解一定要咁咁咁,唔可以咁咁咁,有時佢O既新方法(解決方法)唔俾我地大人差,呢樣都係我好欣賞佢O既地方,響冇做錯O既環境之下,我都由佢,唔希望阻礙左小朋友發揮創意,冇野係唔得O既,只要你諗到~但有時我又反省係咪我自己O既管教令到阿個有今日O既行為~

lillymarie

我細囝是資優，但沒有行為問題。
9歲前只喜歡砌LEGO，不喜歡看書，不喜歡上興趣班。性格害羞，容易焦慮。上課很安靜，不多話。
今年四年班，老師鼓勵他多發言，積極讚賞他。我亦努力和他傾計，多聽他的心聲，他信心漸增，才開始多點發表自己意見。但亦變得多駁咀，沒以前那麼馴從。

他上課覺得悶時會發白日夢，覺得功課無聊，會略過幾題不做。做功課會點到即止，不會多做。是陽奉陰違的那種性格。

社交上，他的困難是來自本身焦慮敏感，以致他對別人的信任不足，常常誤會同學不喜歡他，結果錯失機會與同學建立友誼。他喜歡自己做事多過和同學合作做project。

每個小朋友都不一樣。

babyislove

回復 miriam 的帖子

「資優唔資優都係自己仔女, 唔好捉住佢比別人突出而希望佢做得更好, 兩個先容易解決問題」

佢宜家小學開始大，有傾有講，俾佢set時間表。

佢細個時，你又點處理呢?

moonychan

kittylo129 發表於 12-12-25 17:00
阿仔今年7歲,5歲因太好動,做過一次兒童測試(於下葵涌兒童智力評估中心),當時只話阿仔係活躍,沒有過度活躍症 ...

我仔同你仔都幾似, 又係好易吸收, 由其數學, P.2 都係計到份數加減乘除, 另外, 學緊三角形面績 etc..

我仔而家上緊聖基道兒童會的專注力班, 我覺得有d幫助.

另外, 我就係不停同個仔傾, 成日講道理. 而家好左d.

但佢都係好衝動, 同同學玩唔得長久, 成日都會 argue, 我仔唔襟激添, 好煩.

但上堂冇咁遊雲, 又唔會成日周身郁咁多了. 因為專注力班都有train 呢樣.

miriam

babyislove 發表於 13-1-9 14:16
回復 miriam 的帖子

「資優唔資優都係自己仔女, 唔好捉住佢比別人突出而希望佢做得更好, 兩個先容易解決問題」

佢宜家小學開始大，有傾有講，俾佢set時間表。

佢細個時，你又點處理呢?

細個時已經知佢快左少少, 唔想佢咁 "突出" 會好多野由我揀, 亦都會係唔想佢咁 "突出", 控制左佢好多學習同行為上既野.

大部份野我係我 set 晒時間, 畀人話我 "強權統治", 但唔係咁既佢會靠自己小聰明去做野, 考試測驗默書全部唔理架, 唔捉佢坐定定真係蛇左上床睇書, 唔係唔畀佢睇, 但搞好校內既野先, 我連個阿媽好憎畀老師煩架.

今年 P.4 我連幾時默書都唔知, 派到返黎簽名我話 "乜默書黎丫, 我唔知既", 見到成績 ok 已經無理佢.

因為學校揀左佢參加華夏盃, 但佢全未接觸過, 我就安排佢上左兩堂私補, 點知佢好鬼鍾意兼做到, 要求我畀佢繼續學, 咁我見時間安排到同負擔到就畀佢上, 事前亦都講明測驗考試前老師會補兩三堂校內課程, 佢為左可以繼續學奧數, 自己話隔堂上啦, 校內同奧數輪住上, 總之唔會話發脾氣唔補校內課程, 佢知道我行左一步畀佢學, 佢亦退返一步去接受, 換轉以前真係癲晒架.

總之同佢傾野會畀幾個 option, 當然有 d option 會跣佢, 佢揀左畀我跣完咪再試囉.

你要我去講點樣轉變心情去處理真係好難講, 係兩個都感受到互相妥協同商量既過程係幾重要, 當然有好多激到發火既事, 自己火完咪話畀佢知我點解會咁囉, 總好過佢單方面去收左我既火而唔知 "死因何在".

fckmama

回復 lillymarie 的帖子


my son is similar to yours : 不喜歡看書，性格害羞，容易焦慮。上課很安靜，不多話。上課會發白日夢，覺得功課無聊 though not very serious as said by his class teacher.  My main concern is about 社交.  I'd be very glad if he can make friends at school.  I always tell him that it's fun to have friends.     

lillymarie

fckmama 發表於 13-1-11 09:29
回復 lillymarie 的帖子

沒錯，我們亦好關注囝囝的社交，因為在社會最重要是懂得和其他人相處，不然幾叻都無用。所以主力去處理他的焦慮，經過多月的努力，他似乎改善了不少。起碼他會話想返學和他的朋友玩，以前他從來不會說他有朋友的。最近又告訴我他有信心可以返學，唔怕被同學欺負，因為他知道要怎樣應付了。

fckmama

回復 lillymarie 的帖子

thanks a lot for your sharing.  when my son studied kindergarten, he didn't like going to school and he said he had no friends.  He's in P.1 now and he still hasn't made any friends.  Can you tell more about how you tackle your kid's anxiety ?

lillymarie

回復 fckmama 的帖子

我細囝和你囝囝一樣呀！幼稚園成日話唔想返學，問老師，老師又話他在學校表現正常。現在回頭望，相信是他覺得太大壓力。他有同我講，返學好驚做錯事被老師罰。
細囝現在9歲，我發現事態嚴重是去年下半年的事。他突然又說不想返學，說同學們都不喜歡他。我當時從三方面著手

一， 我每天都用十五分鐘時間和他獨處，告訴他那時間我專心聆聽他說話，每天都問，“今日有咩想話俾媽媽聽呀？” 過程中我主要是聆聽和acknowledge his feelings, 不說教，亦不提供解決方法。問他問題去把事件了解清楚，遇到困難會反問他有甚麼方法解決。透過這過程，我對他在學校的困難了解多些，起碼對他怎樣看學校老師和同學有更深入了解。

二，我聯絡班老師，了解一下囝囝在學校和其他同的的相處情況。囝囝說同學們不喜歡他，老師却告訴我，原來囝囝在班上頗受歡迎，尤其是女孩子！原來囝囝和老師都看到好多女同學會走近囝囝身邊，大大聲說，“唉！男孩子真討厭！” 又或者說，“XX，你真令人厭煩！” 囝囝聽到好傷心，但老師却看到女同學是笑着講，知道她們其實是在說反話。因為囝囝在班上表現突出，好多男同學會故意對他說，“XX，你好蠢呀！” 細囝聽到就以為人人都覺得他蠢，覺得無人欣賞他。怎知問老師，才知道其實好多男同學都好想和囝囝一起做project, 所有同學都知道囝囝的能力，話他蠢只是作弄他。我把老師說的都告訴囝囝，讓他明白，自己和老師看同一件事，結論竟然差那麼遠！當然，亦真的有些同學討厭他，在學校給他難聽的話，要弄得他不開心。

三，見clinical psychologist, 教他怎樣看事看得正面一些。CP亦給了我一些建議去建立囝囝的resilience, 幫他不那麼容易受別人的說話／批評影响。

Radiomama

我仔的情況是另一類：好勝、認叻 。
這一年他好明顯知道自己數學表現好，於是當老師教授大班基本課程時，他會表現不耐煩甚至不屑。老師約我見面後，改善了一些。不過我常要拉住他，要求他快速完成工作後要覆檢和等待其他同學完成，不能騷擾別人。唯一方法是多帶一本書回校閱讀，又或老師派cross word puzzle給他做。
而他的好朋友都是成績較好的。