【短片】慈雲山名校生 控訴瘋狂補課 14天聖誕假全日上堂

elbar

■保良局何蔭棠中學被指強迫學生平日補課至傍晚6時。


本港學童自殺問題持續，今年首個上課日，一名應屆DSE考生疑因學習壓力跳樓自殺，其就讀中學為慈雲山區內名校保良局何蔭棠中學。一名自稱該校學生在事發翌日向《蘋果》控訴，校方強迫學生平日補課至傍晚6時，長假亦需回校全日上課，促教育局正視。校方則稱學生可自行選擇參與補課與否，不會處分缺席學生。


                        
                                                                                                                                                                                                                                             

該名學生自稱在何蔭棠中學讀中六，他指自殺事件發生後，校方為學生進行輔導及提供支援，但指問題深存已久，並非可從短短的輔導時間內解決。根據學校通告及該名學生提供的資料，該校應屆DSE考生自去年中五起，已需大量補課，復活假、聖誕假及暑假均要回校全日上課，學校其他活動如其他學習周、試後活動周及開學迎新日亦如常上課；平日也需額外補課至傍晚6時，即一周約需補課12.5小時。去年底14天聖誕長假學生要回校全日補課，更需應付校方預計需用48.5小時完成的功課，即放學後仍需用3.46小時做功課。


該學生不滿完全失去休息及課外活動時間，校方又要求測驗或考試成績不理想的學生在午膳或補課後重測，進一步減少休息時間，形容是「透不過氣」及「生不如死」。另有該校學生在網上大吐苦水，「究竟咁多嘅補課係對學生有益？係咪真係可以提高到學校嘅成績呢」；有舊生則留言斥校方誤導學生「DSE為人生的全部」。


DSE考生疑不堪壓力自殺亡


《蘋果》記者趁補課時間到何蔭棠中學門外，向學生查詢補課情況。中五高同學指，中一開始就有補課，笑言「我哋個補課都幾精密吓」，自中五下學期起日日補課，升讀中六後必須出席全部補課。中六周同學則認為補課屬正常，有助提升學習情緒，「因為要考DSE所以先要補課，大約每日都有一啲科目需要補」。


保良局何蔭棠中學向《蘋果》覆稱，對有學生不幸離世感極度難過，已向學生家長表達慰問及提供協助，辦學團體保良局已抽調教育心理學家團隊支援學生及教職員。該校又指，一直有為學生提供課後支援，家長與子女可自行選擇參與與否，校方不會處分缺席同學。


教育局指已就該校的補課安排即時與校方跟進。該局又指，校方應盡量避免補課，過多補課有礙學生全人發展，缺乏足夠休息及社交時間。

elbar

每日補課2.5小時　遠超教局建議


■保良局何蔭棠中學


保良局何蔭棠中學學生由中五下學期及中六上學期，大部份上學天均須補課，每次約2.5小時，還未計算周末和長假期。有名校校長慨嘆，長假及平日補課已屬常態。


按教育局定義，高中3年最多用2,040小時教授核心科及選修科，合理增減範圍則為8%，即合理補課總時數最多約170小時。不過何蔭棠中學高中生應考文憑試前一年，大部份上學天均須補課，每次約2.5小時，以兩個學期合共約190個上學天計算，單是中五下學期至中六上學期合共的補課時數，已超出高中3年合理補課時數的總和，還未計算周末和長假期的補課。


名校校長：全世界都操


新高中學制自2009年推行，一直被批評課時不足，不少名校補課成風。有名校校長接受《蘋果》查詢時慨嘆，長假及平日補課已屬常態，「個課程都教唔晒，有啲中三升中四已經補課啦」，又指成績較差的學生，若不補課便無法合格，而學生成績較佳的學校，則要催谷升學率及成績，「弱有弱嘅操，叻有叻嘅操，全世界都操，邊有假放呢」。另有中學校長指何蔭棠中學補課情況誇張，「唔係一味補課就有效」，認為學習要有效率及效能。

迷你人

唔鍾意咪轉校囉！
去band 3啦，輕鬆學習

HaYi

哩間可能比保一更谷, 因想上位?

不過朋友仔初中就唔係太覺, 可能高中才谷得勁.  不過臨考學校有補堂, 相信好多學生家長都buy.

rulerL

HaYi 發表於 18-2-12 19:19
哩間可能比保一更谷, 因想上位?

不過朋友仔初中就唔係太覺, 可能高中才谷得勁.  不過臨考學校有補堂, 相 ...

呢間一向都超谷，朋友個仔中學時期讀呢間，佢話間學校喺學校邨係出咗名既地獄校。不過佢好叻仔，可以順利捱到畢業升上中大。

littlelamma

香港就是壓力都市

米米爸爸

唔健康的學習環境, 教育局要正視。

kwunpa

米米爸爸 發表於 18-2-13 09:31
唔健康的學習環境, 教育局要正視。

教育局就系要殘害香港平民百姓的孩子。高官、有錢人、權貴、大陸上等人孩子讀國際學校，健康快樂地成長；教育局唔玩殘平民中天資高的孩子，令佢地癡癡呆呆、高分低能，第時出來同權貴孩子競爭點算？

教育是統治者、權貴維持自身利益的手段。

metrochung

老師流失率都高，連老師都頂唔順，可况學生。 老師都好惨，學生唔補課，老師要再揾學生再補，學生做唔完嘅堂課，要繼續做。

fatman69

保良的學校一般都好谷！

TLHE

回覆 fatman69 的帖子

PLK 学校一向嚴格和功課较繁重，但事實上成绩也多數有保証，適合与否，因人而異！家長選校，應了解清楚学校教學模式，替孩子選擇合適的才最重要。
盲從附和後，又批評学校的模式不合時宜，已經於是無補了！

73662710

有錢家庭出去補，對於中下階級，學校免費補，是十分難得的！學校和校長要威和學生有更好成績，原則上並沒有衝突。

我們上一代，老師hea 教，好慘。

1998Ruby1998

諗起以前暑假日日都要返學校聽書／操卷，連聖誕聯歡會都要留低補課，都覺得辛苦。

不過老師肯付出時間去補課，算係咁，好多老師如果教唔切會索性派 notes 要學生自修／匆匆帶過。

ok3

嗱! 以後大家唔好再批評D官校old seafood hea 教啦

王家爸爸

rulerL 發表於 18-2-12 23:20
呢間一向都超谷，朋友個仔中學時期讀呢間，佢話間學校喺學校邨係出咗名既地獄校。不過佢好叻仔，可以順利 ...

保良局學校都比較谷，而呢間更係谷中之谷，其實問題唔係喺學校度，而係家長申請之前無做功課。

王家爸爸

fatman69 發表於 18-2-13 23:03
保良的學校一般都好谷！

揀得保良局既學校，都預咗係好谷既！

TLHE

回覆 王家爸爸 的帖子

冇錯！保良局学校，谷出好成绩就係学校教育特色嘛！冇話啱唔啱，只係適唔適合的考量！
你揀得佢，当然係佢成绩好啦！但係又要批評佢太谷！咁……又要馬兒好又要馬兒不吃草！邊有可能呀！

我們也是保良局小学的，当初都知是谷又功課多！不过，成绩好，考区外又夠競爭力呢！一路读一路都唔会怨，因為是它做就了你有選擇的机会和能力，最後中学選了間校风自由些的中学。但我們也十分感謝母校对兒子的陪養，才令他們往後有選擇的能力，世界是沒有免費午餐的。

Felix223

我唔係好明, 即係補多D = 會DSE叻D ??

littlelamma

其實我會覺得香港教育情況,部份是家長做出來, 這校和對面保一都是算比較谷, 正如上面所講, 揀得保良局既學校，都預咗係好谷既. 但這些校好多家長好buy,可以話好受家長歡迎。這樣做成學校愈谷, 愈多人揀這校。當然他們的子女是否喜歡要這樣谷就好難講。

操練是有需要的, 而學生是否可愉快地學習要有平衡, 也要給老師和學生在生活上有足夠空餘時間休息

王家爸爸

TLHE 發表於 18-2-14 15:16
回覆 王家爸爸 的帖子

冇錯！保良局学校，谷出好成绩就係学校教育特色嘛！冇話啱唔啱，只係適唔適合的考量 ...

情況就好似啲同胞，揀咗國際學校，又嫌中文教得唔好一樣。