三十年教育工作者經驗分享，歡迎閱讀。

kathy2006

〈一個讀寫障礙孩子的成長路〉

我曾經有一個補習學生，那年他小二。

我一路幫佢補習，好快就留意到佢有啲唔妥——佢成日將啲字調轉嚟寫，寫到好似鏡面咁；認字好困難，經常認錯字；睇書嘅時候又會跳行，睇唔到完整嘅句子。呢啲情況，我當時已經同媽媽講過。

但因為嗰陣我先啱啱開始幫佢補習冇幾耐，大家對呢個情況都仲喺度觀望，未敢肯定係咪真係有問題。直至學校老師都留意到佢嘅學習情況，正式向媽媽提出關注，話佢可能有讀寫障礙，我哋先至開始認真面對呢個問題。

後來學校幫佢做咗個「及早識別和輔導有學習困難的小一學生計劃」嘅評估，發現佢的確有讀寫障礙。媽媽再帶佢去私營機構搵臨床心理學家做詳細評估，發現情況原來都幾嚴重。

但係，佢爸爸一直不太接受這個事實。
他總覺得兒子沒有問題，但他又不會像媽媽那樣去上課、去了解什麼是讀寫障礙，只是單純地覺得「冇問題」。這種態度，讓孩子的成長過程變得很痛苦——因為孩子要滿足爸爸的期望，要成績好，媽媽就要逼他溫習。

評估之後，我同媽媽正式開始用一啲讀寫策略去幫佢。除咗針對讀寫方面，我亦留意到佢嘅大肌肉都比較弱——跑起上嚟唔係好穩，大腿肌肉張力不足，平衡感亦較差。所以我建議媽媽畀佢多做運動，做拉伸同鍛煉，加強大肌肉嘅發展。讀寫方面，我哋用咗幾個方法：

第一，用泥膠砌字。等佢將泥膠搓成一條條，然後拼湊成字形，透過觸覺同動手操作去幫助佢記憶文字嘅形狀。
第二，用手指喺空氣或沙盤上書空。大動作咁寫字，利用身體嘅動感去加強記憶，亦可以減輕握筆嘅壓力。
第三，用顏色筆輔助抄寫。將一個字嘅唔同部分用唔同顏色標示，幫助佢建立對字形結構嘅認知。

呢啲方法雖然唔可以一下子解決所有問題，但慢慢令佢對寫字冇咁抗拒，亦開始有信心嘗試。
我幫佢補習到小二下學期，之後因為我自己嘅工作情況有變，冇再繼續補習。不過我同媽媽一直保持聯繫，佢間中都會同我講返仔仔嘅情況，所以我仍然知道佢之後嘅發展。

媽媽話，爸爸嘅態度一直冇改變。佢夾喺中間，一方面要滿足丈夫嘅期望，一方面睇住個仔嘅痛苦，壓力好大。到咗小學四年級左右，媽媽突然放手了。
為什麼？因為呢幾年落嚟，佢發現個仔好痛苦。一個本來好開心嘅小朋友，變得唔開心，臉上冇咗以前燦爛嘅笑容。媽媽睇在眼裏，終於決定唔再逼佢，等佢去追自己嘅夢，去發展自己真正喜歡嘅嘢。

放手之後，佢哋先至發現——原來呢個孩子，藝術天賦好強。
佢有自己獨特嘅風格，連視藝科老師都讚賞佢。於是，佢哋決定好好栽培佢喺藝術方面嘅天分。後來，佢參加咗好多畫畫比賽，拎咗唔少獎。

雖然佢未能靠學術成績考入心儀嘅中學，但喺藝術路上，佢走得開心，走得自信。之後，佢選擇咗去外國讀書。喺嗰邊，學校嘅支援好足夠，等佢可以好好發揮自己嘅天賦。最後，佢順利入讀咗自己想讀嘅大學，未來決定做同藝術相關嘅工作。
睇住佢嘅轉變，我喺度諗：如果媽媽冇放手，如果佢繼續逼佢讀書，呢個孩子嘅藝術天分或許永遠都唔會被看見。

有啲孩子，不是不適合學習，只是不適合用主流的方式去學習。他們需要的，不是被逼著走別人的路，而是被看見、被肯定，然後被陪伴著走自己的路。
而這位媽媽最偉大的地方，就係佢願意放下自己嘅期望，去睇見個仔嘅真正需要。呢份勇氣，改變咗孩子嘅一生。
祝願佢將來嘅人生可以更豐盛。

#讀寫障礙 #特殊教育 #教學故事 #媽媽的力量 #孩子的天賦 #不放棄的孩子