女童在家能言善辯 為何在學校兩年粒聲唔出？（葉偉麟）

elbar

                                                                          
六歲女童在家中猶如開籠雀一樣，對答如流能言善辯，但在學校兩年沒有開口說話，嚴重影響社交生活。師長們都非常擔心，無論怎樣鼓勵勸告，或參加社交訓練班似乎也不見成效。


家長：「佢點解會咁奇怪，佢又唔係啞，點解喺學校乜野都唔開口講？」


我：「呢個唔係「能力」嘅問題，而係「安全感」嘅問題。佢覺得學校呢個環境並唔安全，佢好介意人哋點樣睇自己，驚到一個地步，佢認為唔做唔錯，甚至唔講野，咁就無機會俾人話自己錯。」


家長：「但我哋已經成日都勸佢「唔使驚」，「你一定得架」鼓勵佢，點解都係完全冇用嘅？」


我：「因為崩口人忌崩口碗。佢個死穴就係最驚自己喺眾人面前成為焦點，你叫佢唔使驚，反而令佢仲驚！」


家長：「咁練習得多，自然就唔驚架啦！乜唔啱咩？」


我：「籃球射籃就可能係，因為係技術上嘅增值，可以透過不斷練習改進。但係安全感建立，就係價值觀，信念上嘅轉變。係 Learn by Experience , 唔係一般透過語言或者理論嘅學習。」


家長：「吓？連鼓勵都會嚇驚佢？！」


我：「呢類型小朋友情感上本身已經極度敏感，你想佢「講返嘢」，首先就要「接受佢唔講嘢」，利用一啲特定嘅平台，等佢自自然然講咗野都唔知，呢個就係最吊詭嘅地方。」家長：「咁即係點呀？咁佢第日點面試？」


我：「我都明白你好擔心。但種子並唔會因為你施多啲肥料，淋更多嘅水，曬更多嘅太陽而加速開花結果。」


家長沉默，略有所思。


女孩第一次來到治療室，她站立不安，把整個身體及頭都貼在門上，很希望探聽外面的情況。


我：「你似乎好擔心好緊張，好想知道外面嘅情況。呢個Playroom好安全，我哋唔會做任何傷害對方嘅嘢。你鍾意做乜嘢，或者唔做乜嘢都完全由你話事，完全冇問題。」


女孩沒有任何回應，接着便蹲在地上。


我也陪伴着她一起蹲在地上數十分鐘，直至計時鬧鐘響起。


我：「今日嘅時間差唔多，我哋下星期再見！」


就是這個動作，女孩感到被明白被接納，她慢慢開始在Playroom 探索，並透過不同的玩具，演繹了她內心的恐佈故事情節。有時候是恐怖的僵屍襲擊軟弱無力的公主；有時候是兇猛的恐龍吃掉了小白兔；有時候是在沙漠中枯萎的玫瑰，大多數都是一個「受害者」的角色。


女孩從來沒有說過一句話。


但透過反射她劇情內的「情緒」、「思想」、「行為」、「動機」，借了我的口中說話，說穿了她內心最渴望被理解的故事。


一段日子之後，她想說的故事似乎說完了。她開始向我示意玩 Hide and Seek ，將一些寶石，藏在沙盤之中。


當中的象徵意義，她就是投射想把自己匿埋的想法，但同時又渴望發現。


當她被找到後；微妙的心路歷程開展了。


她從口型數1-10；寫出了一些鼓勵標言在玩棒球比賽時扮Fans 朗讀；歌唱比賽鬥唱大聲高音.....全部都是遊戲，沒有叫過她説一句話。


現實中女孩子開始用語言表達自己想法情緖，交友亦見主動，更自發錄音，作爲學校賣物會時擴播之用。這絕對是一個突破性進展。


在沙盤中，弱勢的公主已經可以用魔法對抗彊屍侵撃，最後更遇上王子。女孩已經擁有Sense of Mastery 感覺，從無到有，她的自我信念已經完全改變了。


其實，要改變一個行為，首先就要容許這個行為不用改變。給予一個安全平台釋放，就有機會產生自覺能力，從而調節自己的情緒。




撰文 : 葉偉麟 兒童行為情緒治療師