【短片】名校被指罰學生淋雨聽訓話

elbar

【短片】名校被指罰學生淋雨聽訓話



長沙灣天主教英文中學


學校要學生一邊淋雨一邊訓話？有網民於facebook「名校Secrets」貼文，指長沙灣天主教英文中學（長天）前日早上，有男訓導主任因不滿小部份中四學生，未能於早上8時10分鐘聲響起前排隊，及部份同學未能保持安靜，於是要求所有中四同學在大雨淋漓下，留在露天操場聽他訓話。


校方稱中途下雨


該貼文指出，當時「中四同學受盡歷時約5至7分鐘的雨水摧殘，更有為數不少的同學因而感冒，受了不必要的皮肉之苦」。認為即使要教導學生，也應該在有上蓋的地方進行，免學生雨中受罰。


長沙灣天主教英文中學黃副校長接受查詢時表示，該校規定每日早上學生要在操場排隊，該校操場沒上蓋，每當下雨都不會要求學生在操場排隊。當日因有部份中四學生沒按時排隊，集會之後訓導主任要求所有中四學生繼續留在操場，「教下佢哋，哦下佢哋」。


黃指訓導主任「講講下突然落雨」，但並非很大雨，訓導主任「講埋幾句就dismiss佢哋」，訓導主任並非明知下大雨而要學生淋着雨聽訓話。

Doray

ANChan59 發表於 17-5-22 14:04
五年前的EK網誌.

我都最怕裙腳仔...


有一次同小朋友出去，回家途中突然風雲變色，就刮起大風落起大雨，我地一路跑一路尖叫，因為啲雨好凍又好剌激，我心諗佢地咁大個都未淋過雨，真係幾好嘅體驗。返到屋企先知係九龍塘俾冰雹打穿頂狂水浸……好彩冇落係我地嗰區。

諗起我真係乜鬼運動都鐘意玩，但冇樣精，志在參與。五六年班俾老師的咗去太子大球場練跑，第一次著釘鞋覺得好特別，初中日日帶排球藍球返學，上堂前，小息，lunch, 同放學三不五時落操場打波，唔知點解我地操場超细，但鬼死咁多人落場打波，真係幾個人圍埋就開波，晏啲搵位都難，開心到……同啲後生啲講開我地上PE堂要學高低杠，佢地竟然冇試過，真係good old days la.

ANChan59

五年前的EK網誌.


cowboymama 想知道長記的長跑，越野及運動歷史，我都好願意分享長記如何由一間藉藉無名的普通地區英中，變成一間文武兼備的英文中學。

我會講梁柏林老師(排長)及梅元碩校長對學校40年的貢獻及影響；配合香港天主教教區支持母語教學，自願由英中轉中中，又由中中上訴變回英中的故事。

排長跟我都是1972年進入長記，長記是1970年成立的新英中，由於在屋企附近，可以5分鐘返學又可以返屋企食午飯，當然是首選。

排長是畢業於臺灣國立體育師範大學，當年香港邊有咁多體育老師有大學學位呀。第一堂體育堂，排長召集40+個細路在他面前坐下來。他5'10"高，皮膚稍黑，身材健碩，古天樂似佢，若果在男女校或者女校肯定多人追佢....... 他開門見山問我們，你們知道400m有幾長，我地懶醒等於繞球場一個圈，跟住問800m........ 然後佢話今日你們會知道1500有幾長，我地既反應係唔係呀，第一堂跑1500m....... 佢就話之你，反對無效。

他將人生比喻為長跑，你們跑到800~1000m會面對你身體的第一個極限，慢慢跑，堅持落去，你會突破它，然後完成1500m。跟著他講你下個極限是2400m, 第三個極限..... 第四個極限........ 每次長跑，那些被突破的極限都會出現，經驗話你知，你已經突破它，越來用越少時間便擺脫極限向前跑。你們要有信念，你們可以突破自己的極限.........

跟著唔係跑，用咗不少時間做熱身、拉筋..... 然後分批出發，他拿著4尺長的籐條跟住我地，發覺我地"蛇皇"，佢用籐條扮打過來，我地好辛苦完成人生的第一次1500m..... 落堂後，全身腰酸背痛慢慢行上課室，內心咒罵"正衰人......" (最抵死係他會講比我地知，邊組肌肉今日好痛，邊組肌肉明白重扯住扯住，第三日會鬆弛下來...... 咁似"沉默的羔羊".)

連續兩個星期，每星期都是跑兩堂1500m。到第三個星期，他有新花樣。他要我地由高排到矮，然後按高矮每人有一個目標，我既目標是6'10"完成1500m......... 你們咁聰明都知道，佢學我地d老細咁慢慢將時間縮短。

然後將距離加長，目標是大考前每人要完成7000m (即繞學校跑25個圈，40年後傳統依舊。)，如果不能完成，無得考大考，他得到梅元碩校長的全力支持，我地變成無退路，如果唔上體育課，除非有醫生證明，點都要在運動場幫手計時。及後高中收女生，一樣有一年時間來練習，都要跑5000m。為應付跑步，好多同學會留校練跑，我地週末還會到石梨背水塘跑山練氣及體能，所以當年的長記仔平均d體能真係比喇沙仔及拔萃仔有過之而無不及。

我地一年體育課，未曾接觸個球類，只有跑步，田徑，體操，體能訓練........ 亦直接令我們在我中二時(1973)，第一次參加天主教教區運動會全場第4名，自下一屆1975起(每兩年一屆)，連續16屆的全場總冠軍，好多時是ABCD都是冠軍，其他學校只爭亞季軍。在學界坐即升機在1974年成為第一組別，兼奪得當年玫瑰杯最佳進步獎。2007到拔萃，見到當年打破拔萃及喇沙的壟斷，自己都好興奮，都有d眼濕濕........ 緊係唔俾老婆知，唔係有排俾佢笑。

由於我地無專門訓練都自己跑越野，後來有新體育老師加入對越野好有經驗，班學生自然超哂班，唔壟斷都好難，就算有學生走去其他名校，但長跑的運動員都陸續新人接舊人。

到中二開始操排球，籃球，跨欄，跳高，跳遠，鉛球，鐵餅......... 到中五學三樣絕學，
1. 田徑訓練法
2. 排球訓練法
3. 籃球訓練法
到大學時，當年唔駛教練牌，我在康體處都有教波，都幫輕我d零用錢及拍拖錢....

到現在班老鬼見面講開"排長"都又愛又恨，果幾年真係操到隻狗咁，但頑強鬥志，永不放棄，追尋突破....... 一身受用不盡。他用長跑來體現校訓 - "自強不息"..........

https://www.edu-kingdom.com/home ... ;do=blog&id=779

ANChan59

Doray 發表於 17-5-22 13:41
如果落小小雨我遮埋我C6，佢會鬧鬼我，諗番轉頭咪man 爆，hahahaha!

長天校訓是 "自強不息"，不是出裙腳仔！

當年排長教體育，傾盆大雨一樣25個圈，一樣揸住籐條凶我們，到今時今日都懷念著當時的鍜錬！

Doray

ANChan59 發表於 17-5-21 14:02
班師弟忘記了校訓，少少雨就阿芝阿咗！

以往的刻苦堅毅的訓練及精神，不知去了那裡！

如果落小小雨我遮埋我C6，佢會鬧鬼我，諗番轉頭咪man 爆，hahahaha!

Cheeselover

是否要搞清楚貼文者是什麼人，而那班被雨淋的學生又怎看，若貼文是一直升機家長大驚小怪，又或者班學生覺得有幾番氣概，特別是訓導主任一齊淋，都不要説不勵志，我也不知詳情，不敢判定是非。但請不要太怪責今天的年青人，他們不過是我們這一代老中坑建設今天社會環境下的產物。

skkeung

Jane1983 發表於 17-5-21 19:22
其實而家d家長，好時真係愛護得滯。你無時無刻呵住佢，佢做錯嘢，少少苦都唔捨得佢受。除非家長大把錢養佢 ...

公屋權，空氣權，退休權，卜嘢權……！青年們又貢獻了多少？交稅了多少？

Jane1983

其實而家d家長，好時真係愛護得滯。你無時無刻呵住佢，佢做錯嘢，少少苦都唔捨得佢受。除非家長大把錢養佢過世，唔係你叫佢以後點樣係社會立足？

做嘢辛苦、被老板喝、被同事鬧、被客戶鬧，賺埋都唔夠以前讀書果陣的生活質素，真係情可以堪，難怪青年怨氣咁大。

skkeung

elbar 發表於 17-5-20 12:44
【短片】名校被指罰學生淋雨聽訓話

不閙得，不罸得，不教得！

ANChan59

班師弟忘記了校訓，少少雨就阿芝阿咗！

以往的刻苦堅毅的訓練及精神，不知去了那裡！

hei918

我不了解事件來龍去脈，不能對事件妄加判斷。但好多小朋友學足球，落雨甚至三號風球，只要不是雷暴警告或者雨大到好影響視線，小朋友都照落場，我個人覺得淋小小雨冇咩大不了。如果一個中四生淋5至7分鐘雨就叫摧殘，甘第日橫風橫雨點生存？